Luka 10

Yesu kahuma ntumi miyongo mifungahe na wawii

1Makisa Ḅwana Yesu katsana wanafund̯iwe wangine miyongo mifungahe na wawii. Kawahuma wawii wawii wamuyongowe kwenda kula mudzi na kula atsakiyepfo kwenda. 2Wasidzanuka, Yesu kawamba, “Haya mavuno ni menji, ela hawa wa kuyavuna ni wachuchu. D̯ubva muyombeni huyu Ḅwana jwa haya mavuno ongeze wantu wa kuyavuna. 3T̯asikiani, nyakumuhumani mwende dza wanambuzi kahi ya mahiyeye. 4Namutsetsukuya fwedha, wala munkoḅa, wala viyahu. Namutsekaiya kukedhya wantu humu njiani. 5Mukinjia nyumba ya muntu, d̯ura ambani, ‘Nyumba hii naiwe na naghea.’ 6Na hapfo kukiwa muntu jwa naghea, naghea yenu naimuhafiye jeje. Ela akitsawapfo, naghea yenu idzamuujia nywinywi. 7Nyumba iḍeyonse mudzeyosukia, ikaani mumo. Ḍyani na kunwa kiḍechonse mudzechopfegwa. Koro nywinywi mu wahenda kazi wangu, na kula muhenda kazi anamala t̯ubvoḍye. Namutsekwenda na kusama-sama madzumba. 8Mwipfonaunjia mudzi na mukipfokejwa, ḍyani hichiḍe mudzechopfegwa. 9Wapfozeni wajwazi wa humo humo mudzini, na muwambie wantu kwamba Uhaju wa Muungu umawafikia hafufi. 10Ela kula mwipfonanjia mudzi na mukitsapfokejwa, uyaweni huo mudzi na muwambe hawa wenye, 11‘Hat̯a hiḍi ḍukuu ḍya hu mudzi wenu ḍidzaiyeḍyo maguuni mwehu hwakuḍimukukuntiani wenye, kumuyanga kwamba muhenda matsowa. Ela mumanye ya kwamba Uhaju wa Muungu umaawa hafufi.’ 12Nami hachi nyakumwambiani, nsiku ya hukumu idzepfofika, Muungu anawafwia t̯ei zaid̯i wantu wa Sod̯oma, kuliko wantu wa huo huo mudzi!”

Yesu kanena dzuu ya midzi isiyomuhikiza

Matayo 11:20-24

13Yesu kongeza kunena kamba, “Mudzawa na d̯ina iyodze nywinywi wantu wa midzi ya Korazini na Betisaiḍa! T̯ambere hayaḍe mafara ya kumakisa yahendejweyo kwenu yandeewa kwamba yahendegwa midzi ya Turo na Sidoni, saa hizi wenye wandeewa kwamba wavwaa magunia na wakaa ivuni hangu iiḍe na iiḍe, kuyanga kwamba wapfyehuza mama! 14Hachi nyakumwambiani, hukumu idzepfofika, Muungu kadzawafwia t̯ei zaid̯i wantu wa midzi ya Turo na Sidoni kuliko nywinywi! 15Na nywinywi wantu wa Kaperinaumi, hat̯a mukiḍema kudzikuzya mumpaka mufike mbinguni, munasuswa nsii mumpaka lumwengu jwa wafu!” 16Makisa Yesu kanena na wanafund̯iwe kawamba, “Yuḍejwonse adzeemuhikiza nywinywi, kanihikiza mimi. Na yuḍejwonse adzeemudziza nywinywi, kanidziza nami. Na kula anidzizie mimi, kamudziza huyuḍe anihumiye.”

Tsekea ya wanafund̯i miyongo mifungahe na wawii

17Hawa wanafund̯i wauja na tsekea na wamwamba Yesu, “Ḅwana, hat̯a mpepfo nzuka zihut̯ii hwipfozibusa kwa sariḍyo.” 18Yesu kawamba, “Nimuona Shaat̯ani kagwa nsi kuyawa mbinguni dza yupfepfe. 19T̯ayowani, nimumpa mawezo ya kuranga nyoka na ninge, na uwezo dzuu ya nguvu za nyabva na ntaku kintu kidzechomuonesa tsungu. 20Ndookomu namutsetsekea kwa kwamba mpepfo nzuka zimut̯ii, ela tsekeani kwamba masari yenu yoregwa mbinguni.”

Mayombo ya ḍuḍa ya Yesu

Matayo 11:25-27; 13:16-17

21Iyo saa Ruhu Mudheru kamungiza Yesu tsekea, nae kamushad̯a Muungu kamba, “Nakuyaviza ḍuḍa e Baba, wiye Haju jwa mbingu na nsi yonse. Nakuyaviza ḍuḍa kwa kwamba hi hachi kuiwafitsa hawaḍe weonadzihwaa kwamba ni makaro na wamanyi, na kuiwapfenwiiya wantu weo dza wana vichuchu! Ndivyo Baaba, kuona vyema kuhenda hivi hivi koro vikutsakiza.” 22Makisa Yesu kamba, “Baba kanimpa mamulaka dzuu ya kula kintu. Ntaku yuḍejwonse amumanyiye huyu Mwana kwamba ni gani, lamud̯a Baba jeje heket̯u. Na ntaku yuḍejwonse amumanyiye huyu Baba kwamba ni gani, lamud̯a huyu Mwana na hawaḍe wonse wa huyu Mwana atsaniyeo kumuyanganya huyu Baba kwao.” 23Makisa wepfokuwa geri wao heket̯u, Yesu kawaperukia hawa wanafund̯iwe kawamba, “Nywinywi muvodhyegwa muno kwa kuona haya muoneyeo. 24Koro hachi nyakumwambiani, manabii wenji na mahaju wat̯amani muno kuyaona haya haya mwiyokuonani nywinywi, ela ntawakuyaona. Wat̯amani kusikia haya mwiyokusikiani nywinywi, ela ntawakuyasikia.”

Amuri nkuu ya mwiso

Matayo 22:34-40; Marko 12:28-31

25Nsiku modza, Mwaalimu jwa *Sharia mumodza atsakiye kumuḍema Yesu, kamudzia kamuuza kamwamba, “Mwaalimu, nihendedze nipate kuwa na maisha ya kuunga na yuungo?” 26Yesu kamwambukuya kamwamba, “T̯anyambia, ai *Sharia yambadze? Na unaiimukadze?” 27Huyuḍe muntu kamwamba, “Yamba umutsake Ḅwana Muungujo na mojowo wonse, na ruhu yako yonse, na nguvu zako zonse, na akili yako yonse, na umutsake mwenziwo dza udzitsakiyevyo mwenye.” 28Yesu kamwamba, “Kwambukuya hachi, d̯ubva henda dza hivyo nawe kudzawa na maisha ya kuunga na yuungo.”

Inganyo ḍya Musamaria mwema

29Huyuḍe Mwaalimu jwa Sharia ekitsaka kudzivonea, ndookomu kamuuza Yesu kamwamba, “Ayu mwenzangu ni ga?” 30Yesu kamwambukuya kamba, “Muntu mumodza kayawa Yerusalemi kwenda Yeriko. Akiwa njiani kat̯ongana na wadhara, wamuvwiiyeo nguo, wamubigiyeo na kumuyatsa d̯uru ḍya mwiso. 31Ihendeka kwamba kuchia *mukohani na iyo njia, ela epfomuona huyuḍe muntu, kamuchia na jwa geri. 32Kawii kuchia na Mulawi#10:32 Walawi wewa wahumisi wa Hekalu. na hapfaḍe. Nae epfomuona, kamuchia na jwa geri. 33Ela Musamaria eyekuwa charoni na hiḍe njia, epfomuona huyuḍe muntu, kamufwiya t̯ei. 34Kamwendea, kamuhiiya mvinyo na mafuha mad̯aze na kazifunga. Makisa kamupfaza huyuḍe muntu dzuu ya hiḍi hareḍye na kamupfiika nyumba ya wageni, kamujwaza. 35Chamukoche kahwaa fwedha kamumpa huyu mwenye hi nyumba ya wageni na kamwamba, ‘Mujwaze huyu muntu huyu, na chima kiḍechonse udzechoyavya kuchia hichi, nakuipfa nikiuja.’ ” 36Kisa Yesu kamuuza huyuḍe Mwaalimu jwa *Sharia kamwamba, “Mat̯aroni mwako, ni ga jwarikaḍye huyuḍe muntu abigijwe ni wadhara, kahi ya hawa wantu wohahu?” 37Huyuḍe Mwaalimu jwa *Sharia kamwambukuya kamwamba, “Ni huyuḍe muntu amunahiiye.” Yesu kamwamba, “D̯ubva nawe enda, ukahende dza vivyo.”

Yesu kenda nyumbani mwa aḍe Marit̯a na Maria

38Yesu na wanafund̯iwe wepfokuwa charoni, wafika mudzi eoakiishi muke eyeakihanigwa Marit̯a, nae kawapfokea nyumbani kwakwe. 39Marit̯a ekikaa na ndugujwe ahanijwe Maria. Yesu epfokuwa kuhaḍisini, Maria kakaa hafufi nae kumusikiiya. 40Ela Marit̯a ewa kamuud̯amia kuelekanya chakuḍya. Ndookomu Marit̯a kamudzia Yesu kamwamba, “Ḅwana, nkunamuud̯ama hat̯a kwamba ayu Maria kaniyatsa nihumike mimi heket̯u? Mwambie adze anigijiije.” 41Ḅwana kamwambukuya kamwamba, “Marit̯a, Marit̯a, nkudzomuud̯ame na kudzisumbua na mambo menji na menji, 42lamud̯a modza t̯u, ḍinamala kukumud̯a. Maria kadzitsania dzambo dzema, ḍisiḍyoweza kunujwa kwakwe.”

Currently Selected:

Luka 10: pkb

Highlight

Copy