Yohana 15

Yesu ndiye muzabibu wa ḍugha

1Yesu kagija kunena na wanafund̯iwe kawamba, “Mimi ndimi muzabibu wa ḍugha, na Baba ndiye mwenye hi nkonde. 2Kula hambi ḍya hu muzabibu ḍisiḍyovyaa matunda, anaḍikenta. Ela kula hambi ḍiḍyonavyaa matunda, anaḍipfeeya ili ḍipate kuvyaa matunda zaid̯i. 3Nywinywi mwa dza mahambi yapfeejweyo, koro mwisakudhereswa ni hichi chuuwo nimwambiiyecho. 4Gijani kukaa kuzimuni mwangu nami nakaa kuzimuni mwenu. Dza hiviḍe vya hambi ḍisivyoweza kuvyaa matunda ḍikitsagijana na hu muhi, nanywi ntamuwezi kuhenda kiḍechonse pfasipfo kukaa kuzimuni mwangu. 5Mimi ndimi hu muzabibu, nanywi ndinywi haya mahambi. Muntu akikaa kuzimuni mwangu nami nikikaa kuzimuni mwakwe, huyo anavyaa matunda ya kut̯osa. Koro pfasipfo mimi, muntu nkawezi kuhenda kintu. 6Yuḍejwonse asiyekaa kuzimuni mwangu, huyo anawa dza hambi ḍisiḍyovyaa. Na mahambi dzayo yanafat̯ulwa yakanyuuka kisa yanaundukizwa na yakatsomwa. 7Nywinywi mukikaa kuzimuni mwangu na vyuuwo vyangu vikikaa kuzimuni mwenu, yombani kiḍechonse nanywi munakipfegwa. 8Mwipfonavyaa matunda kwa winji, munawa mwakuyangani ya kwamba mu wanafund̯i wangu na wantu wanaona namuna ya Baba aivyo mukuu.

9Mimi nimutsaka nywinywi dza hiviḍe vya Baba anitsakiyevyo mimi. Gijani kukaa kuzimuni mwangu ili mugije kuona matsako yangu. 10Mimi nizigija amuri za Baba nae kagija kunitsaka. Dza vivyo, nanywi mukizigija amuri zangu munagija kuyaona matsako yangu. 11Mimi nimwambia haya haya mambo yonse, ili myojo yenu ipate kudzaa tsekea nyinji dza hi niyonayo. 12Na hi amuri yangu niyokumumpani ni hii: Tsakanani dza hivi vyangu nimutsakiyevyo nywinywi. 13Ntaku tsako ḍiḍyo kuu kuchia tsako ḍya muntu kuyayavya maishaye kwa dzambo ḍya waḅamuzwe. 14Na mukihenda hivi nivyonamuamuru, ḅasi nywinywi mu waḅamu zangu. 15Simuhane wahumisi kawii, kwa kwamba muhumisi nkambijwe yonse ya huyu ḅwana jwakwe eyonayo. Mimi nyakumuhanani nywinywi waḅamu zangu, maanaye kula cha Baba anyambiiyecho, nisakuchimwambia. 16Nywinywi sinywi munitsaniyeo, ela mimi ndimi nimutsaniyee nywinywi. Na nimuhuma mwende mukavyae matunda yadzeyoonekana, ili kwamba mukimuyomba Baba kiḍechonse kwa sari ḍyangu, anakimumpa. 17Nichokumuamuruni ni kwamba, mutsakane.”

Kevo ḍya huju lumwengu

18Yesu kagija kunena na wanafund̯iwe kawamba, “Lumwengu jukimukeva, nywinywi kumbukani ya kwamba jwiinikeva mimi d̯ura. 19T̯ambere mundeewa wantu wa huju huju lumwengu, lumwengu jundeemutsaka. Ela lumwengu jumukeva kwa kwamba nywinywi ntamukwaa wa huju lumwengu. Mimi nimutsana kuyawa kwa huju lumwengu. 20Aviḍe nivyomwambia munavikumbuka? Niwa nimwamba, ‘Muhumwa si mukuu kumuchia huyu ḅwana jwakwe.’ Ikiwa kwamba mimi wanikuntisa d̯ina, ḅasi hat̯a nanywi wanamukuntisa d̯ina. Ela kwa kwamba wangine wao wayagija haya mayongweezo yangu, ḅasi hat̯a haya mayongweezo yenu pia, wangine wao wanayagija. 21Haya haya yonse, wanayamuhendea kwa kwamba mu wantu wangu. Na wanayamuhendea kwa kwamba ntawamudzi huyu anihumiye. 22T̯ambere nindeewa sikudza nidzeninene nao, wandeewa ntawa tsowa. Ela kwa kwamba nimaakudza na nimaanena nao, ntawa kipfangizo kawii cha kuhendea nabvise. 23Kula anikevee mimi, kamukeva na Baba pia. 24Mimi nihenda mafara ya kumakisa kahi yao, yasiyodzahendwa ni muntu yungine yuḍejwonse. T̯ambere nindeewa sidzahenda mambo dzayo, ntawandet̯alijwa nabvise. Ela viivyo ni kwamba, hat̯a ingawa waona hivi nihendeyevyo, wao wahuwekea kevo ami na Baba. 25Na hivi wahendeyevyo, wat̯imiza hivi vya haya matsoro yambiyeyo, ‘Waniwekea kevo pfasipfo saḅaḅu iḍeyonse.’

26Mimi namuyehea Mugijiija kuyawa kwa Baba. Jeje ni huyu Ruhu jwa kumuyanga hi ya hachi dzuu ya Muungu. Na adzepfokudza, kadzamushuhuḍia dzuu yangu. 27Nanywi pia ni muwashuhuḍie wantu dzuu yangu, kwa kwamba mwiiwa pfamodza nami hangu nipfoḍabva kuyongweeza.

Currently Selected:

Yohana 15: pkb

Highlight

Copy