Yohana 11

Kifo cha Lazaro

1Kwiwa muntu mumodza eyeakihanwa Lazaro ahendeyee mujwazi hukuḍe Betania. Hukuḍe ekiishi na waimbuzwe wawii weowakihanwa Maria na Marit̯a. 2Huyu huyu Maria ndiye adzeyeakimuhiiya Ḅwana manunkanto humu maguuni kisa akimufuta na hizi nywiize. Na huyu ndugujwe ndiye eyekuwa mujwazi. 3D̯ubva hawa waimbuzwe Lazaro wamupfiikia ḍaamisa Yesu wamwamba, “Ḅwana, huyu ḅamujo umutsakiye ni mujwazi muuno.” 4Ela Yesu epfopata hi ḍaamisa kamba, “Hu ujwazi wa Lazaro ntauwezi kumuyehea kufwa. Udza ili upate kuyanga namuna ya nguvu za huyu Mwana ziivyo na Muungu apate kushad̯wa.”

5Hat̯a ingawa Yesu ewa kamutsaka Marit̯a, Maria na ndugu yao Lazaro, 6epfopata haya maagu ya kwamba Lazaro ni mujwazi, nkakunuka na yayo maguu ende. Ishinu kakaa hukuḍe ekokuwa kwa nsiku mbii zaid̯i. 7Kisa kawamba hawa wanafund̯i wakwe, “Sasa hwendeni Yud̯aya kawii.” 8Ela hawa wanafund̯iwe wamwamba, “Mwaalimu, hunakwendadze Yud̯aya kawii na hali si hat̯a kae hawa wantu wa Yud̯aya wekitsaka kukubiga na mawe wakuyage?” 9Yesu kawambukuya kawamba, “Nsiku nzima ntaikwaa na masaa kumi na mawii ya kuhenda kazi? Muntu akyenenda na musikahi nkawezi kukolasika kwa dzambo ḍya kwamba anauona hu muyanga wa huju lumwengu. 10Ela kula eyenakwenenda nasiku anakolasika kwa dzambo ḍya kwamba ntaku muyanga.” 11Yesu epfonena hivi akisa, kongeza kamba, “Ḅamu jwehu Lazaro kamat̯ambaara, nami nyakwendani ninkamuyamuse.” 12Nao hawa wanafund̯iwe wamwamba, “Ḅwana, ikiwa kwamba kat̯ambaara kakuyaani, nka untu anapfowa.” 13Wao wekit̯ara ya kwamba Lazaro ewa kakuyaani ḍugha, ela cha Yesu echoakinena iwa ni kwamba Lazaro ewa kafwa. 14D̯ubva Yesu kawambia wazi tswee kawamba, “Lazaro kafwa. 15Na nina tsekea kwamba vipfohendeka siwapfo. Haya haya yonse yahendeka kwa dzambo ḍyenu, ili mupate kudziyongweeza kuniserefat̯a. Haya hwendeni!” 16D̯ubva Tomasi, eyeakihanwa Mwana Mpatsa, kawamba hawa wanafund̯i wenziwe, “Naswi hwendeni. Ikiwa kwamba ni kufwa hufwe pfamodza na huyu Mwaalimu.”

Yesu kamufufuya Lazaro

17Yesu epfofika Betania, Lazaro ewa kamazikwa na kamaawa na nsiku nee mbeerani. 18Mudzi wa Betania wiwa chima cha kilomita ntahu t̯u kuyawa Yerusalemi. 19Na wantu wenji wewa wenda wakamuingamaze Marit̯a na Maria kwa dzambo ḍya kufwijwa ni ndugu yao. 20Marit̯a epfosikia kwamba Yesu kakudzani, kayawa ende akamut̯angere, ela Maria kahafa hukuḍe nyumbani. 21Marit̯a epfot̯ongana na Yesu kamwamba, “Ḅwana, t̯ambere wewe undeewa upfo hapfa, huyu ndugu yangu nkandeefwa. 22Ela nimanya ya kwamba hat̯a saambi, ḍiḍeḍyonse udzeḍyoḍimuyomba Muungu, jeje anaḍikuhendea.” 23Yesu kamwambukuya kamwamba, “Huyu ndugujo anafufuka.” 24Nae Marit̯a kamwamba, “Ndivyo, nimanya kaḅisa kwamba nsiku ya mwiso anafufujwa anawa mojo kawii.” 25Yesu kamwamba, “Mimi ndimi niyenafufuya wantu na kuwapfa maisha kawii. Muntu anihikiziyee mimi, hat̯a akifwa huyo anaishi kawii. 26Na yuḍejwonse apatiye maisha ya ḍugha kwa dzambo ḍya kunihikiza mimi, huyo nkawezi kufwa meshi. Dze, Marit̯a, hayo hayo kuyahikiza?” 27Marit̯a kamwambukuya kamwamba, “Ee Ḅwana. Nihikiza ya kwamba wewe ndiwe huyu *Masiya na ndiwe Mwana jwa Muungu udziye lumwenguni.” 28Marit̯a epfonena hivi akyendaakisa, kenda kamukuntia geri Maria na kamwamba, “Mwaalimu kadza na kakukuhanani.” 29Maria epfosikia hivi, kanuka haraka kamuḍaabvat̯a Yesu. 30Yesu ewa amaale nkadzanjia humuḍe mudzini, ewa ka pfapfaḍe pfa Marit̯a at̯onganiyepfo nae. 31Hawa wantu weowakimuingamaza Maria humuḍe nyumbani, wepfomuona akiyawa haraka haraka, wat̯ara ya kwamba kakwendani hukuḍe mbeerani akaiye. Ndookomu nao wamuuḅa.

32Maria kenda mumpaka hapfaḍe pfa Yesu epfokuwa. Epfofika akimuona, kamugwiya maguuni na kamwamba, “Ḅwana, t̯ambere wewe undeewa upfo hapfa, huyu ndugu yangu nkandeefwa.” 33Yesu epfomuona Maria akwakuiyani na akidza akiona na namuna ya hawa wantu wangine weokuwa pfamodza nae wevyowakiiya, vimuhora hu mojo na vimungiza tsungu muno. 34Nae kawauza kawamba, “Ayu afwiye mumuzika ku?” Nao wamwambukuya wamwamba, “Ḅwana, nzoo hukuyange.” 35Yesu mitsozi iḍabva kumuhika. 36Na wantu kudzaona hivi wamba, “T̯ayowani namuna amutsakiyevyo Lazaro!” 37Ela wangine wao wamba, “Ikiwa kwamba ntumbu matso kawapfonya, kimut̯iidhiyecho kumuhendeza Lazaro atseefwa ni kintu ga?”

38Yesu kanjijwa ni tsungu kawii na kenda hukuḍe mbeerani. Hi mbeera yenye iwa ni mpango iyofinikizwa na iwe hapfa pfa kunjiiya. 39Yesu kawamba hawa wantu, “Ḍiperuyeni-peruyeni hiḍi iwe muḍinuye.” Ela Marit̯a kamwamba, “Ḅwana, ae e saasambi nkaawa kununkani fara? Hangu akizikwa yeo ni nsiku yane.” 40Yesu kamwambukuya kamwamba, “Marit̯a, mimi sikukwambia ya kwamba ukihikiza unaona namuna ya uwezo wa Muungu uivyo?” 41Kisa hiḍi iwe ḍipfoperujwa-perujwa ḍikinujwa, Yesu kanuya matso dzuu mbinguni na kamba, “Baaba, ni asant̯a kwa kunisikia. 42Nimanya ya kwamba unakaa na kunisikia kut̯wa. Ela ninena hivi kwa dzambo ḍya hawa wasumamiyeo hapfa, ili wapate kuhikiza kwamba wewe ndiwe unihumiye.” 43Yesu epfoyomba dza hivi akisa, kamuhana Lazaro na idzwi kuu kamwamba, “Lazaro, yawa huku!” 44Nae Lazaro kayawa na humu mbeerani akiwa kafungwa sand̯a hangu kitswani mumpaka nyajoni.#11:44 Hi mikono na haya maguu vikilingilwa-lingilwa vit̯ani vya sand̯a na hu uso wikilingilwa na hanjifu. Na myeedha ingine kwikitumika nguo nkuu. D̯ubva Yesu kawamba hawa wantu, “Mufunguyeni hi sand̯a mumuyatse huru!”

Wakuu wa Kiyahud̯i walacha kumuyaga Yesu

Matayo 26:1-5; Marko 14:1-2

45Wenji wa hawaḍe wantu weokwenda kumuingamaza Maria, wepfoona haya ya Yesu ahendeyeyo wamuhikiza. 46Ela wangine wao wenda kwa hawa *Mafarisayo na wawasumwiiya haya ya Yesu ahendeeyo. 47D̯ubva hawa Mafarisayo na wakohani wakuu wahana kikao cha hi gasa ya Wayahud̯i na waḍabva kuuzana wakyamba, “Haya, sasa huhendedze? Huyu muntu kakuhendani mafara ya kumakisa menji na menji! 48Na hukimuyatsa agije kuhenda hivi, wantu wonse wanamuhikiza. Ndookomu nao hawa wat̯awala wa Kirumi, wanakudza wanainanga-nanga hi *Hekalu yehu na kyeet̯i chehu chonse wanakisa kafu.”

49Mumodza jwa hawa weokuwa hapfaḍe gasani ewa ni Kayafa. Jeje ewa ndiye huyu *Mukohani Mukuu huhuuḍe mwaka. Nae kanena ne gasa kamba, “Munawezadze kuhenda uḍyura dzohuo? 50Ntamukwakuonani hat̯a kwamba ni heri kufwe muntu mumodza kwa dzambo ḍya kyeet̯i chonse, kuliko kuyatsa kyeet̯i kizima kidzekinangwe-nangwe?” 51Kunena hiḍe ya hachi, hivi vyuuwo vya Kayafa aneneyevyo ntavikuyawa akilini mwakwe jeje mwenye. Ela kwa kwamba jeje ewa ndiye Mukohani Mukuu huhuuḍe mwaka, kat̯aḅiri kwamba Yesu anafwa kwa dzambo ḍya kyeet̯i kizima cha Wayahud̯i. 52Na nkakut̯aḅiri kwamba Yesu anafwa kwa dzambo ḍya Wayahud̯i t̯u, ela pia kwa dzambo ḍya wana wa Muungu wonse wat̯amisaiyeo-t̯amisaiyeo ili awahendeze kuwa kintu kimodza. 53Ndookomu hangu hiyo hiyo nsiku, hawa wakuu wa Kiyahud̯i waḍabva kuhenda mipango ya kumuyaga Yesu. 54D̯ubva Yesu nae kayatsa kuzunguuka wekeani kahi ya hawa wantu. Kanuka kenda mudzi wa Efuraimu wiwokuwa hafufi na yuwanda na kakaa hukuhukuḍe jeje na wanafund̯iwe.

55Jila ya *Pasaka ipfofika hafufi, wantu wenji wanuka na midzini kwao wenda Yerusalemi. Wenda mapfema ili wakadzidherese dza ivyowamala kaḅila hi jila ntaidzafika. 56Wepfokuwa humuḍe Hekaluni waḍabva kumuyowa-yowa Yesu wamuone kwamba kaku. Kisa waḍabva kuuzana wao na wao wakyamba, “Munat̯ara ya kwamba huyu huyu njwakudza kwe nsikunkuu?” 57Hawa wakohani wakuu na Mafarisayo wewa wawamba hawa wantu kwamba, muntu adzeemuona Yesu ni had̯i anene ili wapate kumugija.

Currently Selected:

Yohana 11: pkb

Highlight

Copy