Mahendo 5

Makulekule ya Anania na Sifira

1Ela kwiwa muntu sariḍye ndiye Anania. Ewa na muke eyeakihanwa Sifira. Nao waguza nkonde yao. 2Kenge Anania kadziwekea sehemu ya hizi fwedha, huku mukaziwe akiwa kavimanya tswee, makisa hizi zingine ndizo apfiyezo hawa *ntumi. 3Pet̯ero kamuuza kamwamba, “Anania, kut̯i kumuyatsa Shaat̯ani auheke mojowo na akuhendeze umukulekule Ruhu Mudheru kwa kudziwekea sehemu ya hizi fwedha upatiyezo wipfoiguza hi nkondeyo? 4E nkonde usidzaiguza, ntaiwa yako? Na hat̯a wipfoiguza, hizi fwedha undezihendea viḍevyonse utsakiyevyo. Kut̯i d̯ubva, kuhuna mojoni mwako kuhenda dzambo dza hiḍi? Nkukukulakula mwanaad̯amu, ela kumukulakula Muungu!” 5-6Anania epfosikia haya t̯u, kagwa kafwa. Makisa kudza worani waulinga-linga hu mwiiwe, wanuka nao wenda wauzika. Wantu wonse wasikiiyeo hiḍi dzambo wanjijwa ni oga muno.

7Kwipfochia kit̯emo cha chima cha masaa mahahu, mukaziwe kanjia humuḍe kuzimu pfasipfo kumanya haya yamuhendekeeyo muumewe. 8Pet̯ero kamuuza kamwamba, “T̯anyambia, achi ndicho chima mupatiyecho, mwipfoiguza e nkonde yenu?” Ae kamwambukuya kamwamba, “Ee, ni hiyo mala.”

9D̯ubva Pet̯ero kamwamba, “Kut̯i wewe na mumeo muhuna kumuḍema Ruhu jwa Ḅwana? Hawa wantu wamuzikiyeo mumeo hivi wa hapfo muḍyangoni, na wadzakuhwaa nawe.” 10Iyo saa, Sifira kagwa hafufi na maguu ya Pet̯ero kafwa. Hawaḍe worani wepfonjia, wamut̯onga kamaafwa. Ndookomu wayawa nae nze, wenda wamuzika hafufi na muumewe. 11Tsanganiko ḍyonse pfamodza na wantu wonse wasikiiyeo haya mambo wanjijwa ni oga mukuu.

Mambo makuu ya ntumi wahendeyeyo

12Hawa ntumi wahenda mafara ya kumakisa na vihambwiizo kahi ya hawa wantu. Hawa wahikiza wonse wekitsanganika pfamodza uani mwa Sulemani. 13Ntaku yuḍejwonse asikwaa muhikiza, eyeweza kugijana nao. Hat̯a vivyo, wantu wangine wasiokuwa wahikiza wekiwahila muno. 14Wake na wayume zaid̯i wamuhikiza Ḅwana, na hichi kit̯aro cha wahikiza chikuya. 15Kwa dzambo ḍya haya mambo ya hawa ntumi weyowakihenda, wantu wekitsukuya wajwazi na kuwayavya majiani na kuwat̯ambaarya mat̯at̯ani na misalani ili nangaa hichi kivwii cha Pet̯ero chiwafinikize wangine wao, akiwa kuchiani. 16Na vit̯aro vya wantu wadza kuyawa midzi iizingiyeyo Yerusalemi. Wayeha wajwazi wao na hawaḍe weokuwa na mpepfo nzuka, na wonse wapfozwa.

D̯ina za ntumi wakuntiyezo

17Kenge huyu *Mukohani Mukuu na wenziwe wonse, wa kit̯aro cha hapfahapfaḍe cha *Masad̯ukayo, wawafwiya ḍea muno hawa ntumi. 18D̯ubva wawagija hawa ntumi na wawangiza gerenzani. 19Ela huḍe sikuwe, malaika jwa Ḅwana kawafungwiiya miḍyango ya gerenza, kawayongowa hat̯a nze. Kisa kawamba, 20“Endani mukasumame Hekaluni, muwasumwiiye hawa wantu kula kintu dzuu ya haya maisha yenu mapfya.” 21Hawa ntumi wauḅa haya wambiijweyo ni huyu malaika. D̯ubva magura mapfema, wanjia humu Hekaluni waḍabva kuwayongweeza hawa wantu.

Huyu Mukohani Mukuu na hawa wenziwe wahana gasa yonse ya wakuu wa Kiyahud̯i. Makisa wahuma wantu kwendawahwaa hawa ntumi gerenzani, wawapfiike gasani. 22Ela wepfofika, ntawakuwaona hawa ntumi humuḍe gerenzani. Ndookomu wauja wenda waipfa maagu hi gasa, 23wamba, “Hwipfofika hukuḍe gerenzani, huit̯onga hi miḍyango ifungwa gu na huwat̯onga na hawa wamia wakiwa kwamiani miḍyango. Ela hwipfofunguya hi miḍyango ntahukuona muntu humuḍe kuzimu!” 24Huyu mukuu jwa wamia wa *Hekalu na hawa wakohani wakuu wepfosikia hivi, waḍabva kumamat̯a haya yawahendekeeyo hawa ntumi. 25Makisa kudza muntu, kawamba, “Mumanya! Hawa wantu mungiziyeo gerenzani, waa Hekaluni wakuwayongweezani hawa wantu.” 26D̯ubva huyu mukuu jwa wamia wa Hekalu na wantuwe wenda wawahwaa hawa ntumi. Ela ntawakuwahwaa na nguvu koro wekiwashooga hawa wantu watsewabiga na mawe.

27Wawayeha hawa ntumi usoni ya hi gasa, na huyu Mukohani Mukuu kaḍabva kuwauza vyuuwo. 28Kawamba, “Ntahukumuseresa kwamba mutseyongweeza kwa sari ḍya Yesu? Ela t̯ayowani haya muhendeyeyo! Ishinu muidzaza Yerusalemi nzima na mayongweezo yenu. Na mwakutsakani kuhufwariza kwamba ndiswi humuyagiyeo!”

29Pet̯ero na hawa ntumi wangine wambukuya wamba, “Ni had̯i humut̯ii Muungu, ela si wanaad̯amu. 30Muungu jwa wabibi zehu kamufufuya kuyawa wafuni huyu Yesu muyagie kwa kumupfatsika muhini mwa mpatsa. 31Huyu ndiye apfazijwe hat̯a mukono kuyume wa hila wa Muungu, dza haju na mupfonya, ili awawezese wantu wa Isiraeli wapfyehuze mama na wayatsijwe nabvise zao. 32Swiswi na huyu Ruhu Mudheru, jwa Muungu eyenapfa hawaḍe weonamut̯ii, hu mashaahiḍi wa haya mambo.”

33Hawa wazee wa hi gasa wepfosikia hivi, wareja muno hat̯a wahuna kuwayaga hawa ntumi. 34Ela Mufarisayo mumodza ahanijwe Gamalieli, eyekuwa mwaalimu jwa *Sharia eyeakihilwa muno ni wantu kasumama hapfaḍe gasani. Kayomba hawa ntumi wanujwe kachuchu hapfaḍe gasani. 35Makisa kayambia hi gasa, “Wantu wa Isiraeli, manyani, haya mwiyokutsakani kuwahendea hawa wantu. 36Kakae kachuchu kwiit̯upuka muntu eyeakihanwa Theuda. Kadzihana muntu mukuu, na wantu chima cha magana mane wamuuḅa. Ela kayagwa, na wonse wamuuḅiyeo wat̯amisaa-t̯amisaa, na kit̯aroche chaara. 37Nyumae, huyu Yud̯a jwa Galilaya kat̯upuka ngera ya kut̯alwa kwa wantu. Nae kapata kit̯aro cha wantu wamuuḅiyeo. Ela nae kayagwa, na wantu wonse wamuuḅiyeo wat̯amisaa-t̯amisaa. 38D̯ubva, dzuu ya hiḍi dzambo ḍya hi saasambi, namutsewahenda kiḍechonse hawa wantu. Wayatseni na shuuli zao. Koro ikiwa kwamba haya ni mat̯aro na kazi ya mwanaad̯amu inakwaara yenye. 39Ela ikiwa kwamba ni kazi ya Muungu, ntamut̯oweza kuinanga. Mudzarorot̯a kwamba mwakujwanani na Muungu!” Hi gasa ihwaa haya maghaghisa ya Gamalieli. 40Ndookomu wawahana hawa ntumi hapfaḍe gasani, wayavya amuri kwamba wabigwe na lucha, na wawaseresa kutsanena kawii meshi kwa sari ḍya Yesu. Makisa wawayatsa huru. 41Hawa ntumi wanuka hapfaḍe gasani wakiwa na tsekea nkuu, ya kwamba Muungu kawatsana wakuntiswe d̯ina kwa dzambo ḍya sari ḍya Yesu. 42Na kula nsiku, wekyenda madzumbani mwa wantu na Hekaluni, kuyongweeza na kusumwiiya *Maagu Mema dzuu ya Yesu kwamba ndiye *Masiya.

Currently Selected:

Mahendo 5: pkb

Highlight

Copy