Jɔ̌n 8

Bɔ mbaãaã Àvi njɨ̀a àbȩ la

1Yesò tseke tê ndɔ̀Ꞌ nkɔꞋ ngà vi a ègwet èbȩ Olìf. 2ÈtsəꞋ e tseke tè ntsi, tà kua akwèn ngwènè àsà̧aã lob nɨ̧ Mbɔ̧ɔ̧mà, bòt bu bàgème e kɨꞋɨ̀ mbù̧ù̧te a ngèt tò, tà tseke a si me nyɨꞋte awɔb mènəè. 3Mbɨ̀Ꞌɨ̀ tàa nyɨ̀Ꞌta la, bènyɨꞋtà mbɨ̧te Musì nè Bèfalèsiì e nɨ àvi kǒ bɔ keme atò njɨ̀a àbȩ la nɨŋ nkɨ̀Ꞌɨ̂, ntsea tò a mbì lɔb bɔ̀ɔgème, 4è shuê abua Yesò nê, “NyɨꞋtà, bɔ yaã mbà̧aã àvi wàa njɨ̀a àbȩ la. 5Mbɨ̧te Musì te nyɨꞋte nê, bɔ bɔ ndɨ bɔ̀ɔ temte èwuu àvi wàa ane àti ebùŋe la. Àwɔ̀ mbɔŋ à laꞋnê ghǎ ane ànəê yaa à?” 6Bɔɔ ndàꞋà ale ngua ntà̧à̧ta tò nkɨ eyute èngǎ̧ tàa shu la, mbɨ̀Ꞌɨ̀ eko ànəa bɔ̀ɔ zǐ àtsəa tò la.

Yesò ŋɔ̀Ꞌne a si, nɨ̀ kèti fi me shɨ a si. 7Mbɨ̀Ꞌɨ̀ bòt bu àa ŋwètà mbììta wuê biite la, tà lɔ̀kè àvi, shu abua yɔb nê, “Wòt wu ane yɨ̧ kà li mè ghɨ ànəa kàbɔ̀ŋ la bɨa ngwi èti ntèma atò.” 8Tà làꞋ ale, mbɔ̂ mè ŋɔ̀Ꞌne a si nɨ kèti fi me shɨ èghɨ a ègwet àbeb.

9Bɔ zə ànəê yaa ale, mbùꞋ ane bɔɔjuŋ me ghà wemɔ̀Ꞌ wemɔ̀Ꞌ tè ntsìꞋi sa Yesò zia ndziꞋne bɔ̂ àvi wu tà tɨ̧ɨ̧ a mbì tò la. 10Yesò lɔ̀kè àvi mbììte àvi wu nê, “Bòt bu bɔ̀ wu à? Wòt kǒ bakà teꞋa akwèn e laꞋnê bɔ̀ bùŋè àwê?”

11Àvi wu bɨ̀ɨ̀lè nê, “Wòt ntsě a Tê.”

Yesò mè shu abua tò nê, “BetsiꞋa mmɔ̌ mbɔŋ mɨ̧̂ è nka shu nê bɔ̀ bùŋè àwê. Dù me ghǎ, ka à ka tsi ngɨa kàbɔ̀ŋ.”]

Yesò wu mbɨ̀Ꞌɨ̀ èkaꞋa

12Yesò ghɨ̀ ale, mè ndaꞋa abua Bèfalèsiì nê, “E ngu èkaꞋà ngɔ̀ŋ yaa. Wòt tà kùŋè am la, è bɔ èkaꞋà mèmpème, tà ka tsi li ghȩ̀ȩ̀ne a èbem ndzěm a.”

13Ale, Bèfalèsiì bu e shu abua tò nê, “À wua nta ànəa yê àwɔ̀ mbɔŋ kà ye wòt tà nkɔꞋɔ akwen yè la. Ànəa à shua la ntsě nkûŋ.”

14Yesò bɨ̀ɨ̀lè nê, “E màà ngua nta wu ànəê am, kà ye nkɔꞋàkwèn am, ko ànəa e shua la wu nkûŋ, nkàà nê mâ ko àdziꞋa e ndzəèà la, mè nko àdziꞋa e ngà la, ka bɨ̀ambɔŋ e bakà ko àdziꞋa è ndzəèà la, bɨ̀ ka ko àyea e ngà la. 15Bɨa nɨa èyì bɔbȩ ka nɨ̀a sàꞋa bòt. È me wu am ko maa kà lem saꞋa wòt. 16Ka e màà ngua saꞋa wuê wòt, ko èlɨ e saꞋa la wu nkûŋ, nkàà nê è ntsě mmɔ̌ mmɔ̌ sàꞋa la, è saꞋa ba wòt wu tà tsàà am la. 17Àkata mbɨ̧ tɨ̧ aa nyɨ̀Ꞌta nê, bòt babe àa shua ànəê yeamɔꞋ ane ànəê, ànəa bɔ shua la wu nkûŋ. 18Ale, e ndaꞋa ànəa mâ ko ane yaã mmɔ̌ mbɔŋ la, Tǎt am wu tà tsàà am la mè me laꞋa ànəa tà ko ane yaã la.”

19Yesò làꞋ ale bɔ biite atò nê, “Tǎt wè wua à?”

Tà bɨ̀ɨ̀lè nê, “Bɨ bakà ko am, bɨ̀ ka mèe nko Tǎt am. Bɨ ghɨ̀ ale nko am, ko bɨ koa Tǎt am mɨ̧̂.” 20Yesò nàà ndàꞋà mènəè maa ale, ngu a èbem lob nɨ̧ Mbɔ̧ɔ̧mà nyɨ̀Ꞌta, adzìꞋ yu bɔ̀ɔ màꞋà èkab la, ka wòt kà baãaãte atò nkàà ndɨ̀ wu àfɨꞋa bɔ̀ɔ ghɨ ale la à bakà zìꞋ nkùꞋ la.

BetsiꞋa bɨ̀ ka gha àdziꞋa e ngà la

21Yesò mè shu abua yɔb nê, “Maa gha am, bɨa me kɨ am, ka mbɔ̂ ngu li pfə wuê nè mènəè kàbɔ̀ŋ mɨ̧, nkàà nê betsiꞋa bɨ̀ ka kɨꞋɨ̀ àdziꞋa e ngà la.”

22Tà làꞋ ale, bɔɔjuŋ Bèjuê bu e laꞋa kètsìà wɔb nê, “Tàa nê nko nê ye tsiꞋa nkɨ ebùŋè àvi, na tà tsiꞋa shua nê betsiꞋa bà ka kɨꞋɨ̀ àdziꞋa ye gha la à?”

23Yesò shu abua yɔb nê, “Bɨ dzəa sitsǎꞋ, è wu am, ko e ndzəa a ègwet. Bɨ ndzəa ngɔ̀ŋ ŋaa, è me wu am, e nka dzəa ngɔ̀ŋ ŋaa. 24Eyaa wu lə yu mâ yaã shu abua yɨ̧ nê, bɨa pfə ne mènəè kàbɔ̀ŋ mɨ̧ la. Bɨa pfə ne mènəè kàbɔ̀ŋ mɨ̧, na bɨ bakà bɨ̧ɨ̧ne laꞋnê, e ngu wòt è ngu wùà la.”

25Ale, bɔ biite atò nê, “À wu wà à?”

Yesò shu abua yɔb nê “E ngu wòt mâ yaã me bùꞋu shu abua yɨ̧ nê e ngu wùà la. 26Mènəè taꞋa wu betsiꞋa e shu ane yɨ̧ mè saꞋà wɨ̧ adù̧ la. Ka maa shu bòt ngɔ̀ŋ yaa wuê àghɨa mâ zə abua wòt wu tà tsàà am la, mbɔ̂ tàà ndàꞋà wuê nkûŋ.”

27Yesò nàà ndàꞋà ale, bɔ̀ ka ko laꞋ nê, tà làꞋà ànəa Tǎt vi Mbɔ̧ɔ̧mà, 28ale, tà shu abua yɔb nê, “ÀfɨꞋa bɨ lɔ̀kè Waã Wòt ngù̧ù̧te a mbɨ̧̀ mbasa la, ka bɨ bɔ̂ nko nê, e ngu wòt è ngu wùà la. ÀfɨꞋa mbɔŋ ka bɨ bɔ̂ nko nê, maa kà ghɨ àghɨa ko nè mɔ̧ ne mètàŋ. Maa shua wuê àghɨa Tǎt am wu tà tsàà am la, è nyɨꞋte am la. 29Wòt tà tsàà am la wu ba tò, tà bakà sa am mmɔ̌ ndziꞋne, nkàà nê maa ngɨ̀à wuê àghɨa tàa nkɨà la àfɨ̀Ꞌ àgème.” 30Yesò làꞋ ale, bòt nyaŋ e zì mèntɨ̧ɨ̧ mɔb ane tò.

Nkûŋ yu nàa yàa wê esǎ la

31Yesò ghɨ̀ ale, shu abua Bèjuê bu bɔ zi èntɨ̧ɨ̧ wɔb ane zi la nê, “Bɨ me ghɨ̀ àghɨa mâ shu awɨ̧ la, ko bɨ lâ ngu kwàꞋ bɔkatè bɔ̧, 32ko bɨa ko ànəa nkûŋ yu è dzəâ abua Mbɔ̧ɔ̧mà la, naa ghɨ̌ bɨa bakà tsi ngu èbùꞋ.”

33Tà làꞋ ale bɔ bɨ̀ɨ̀lè nê, “Ba wu bòt àndǎ̧ Abàlàghâm, ba bakà li mè wu àbùꞋ a wòt kǒ. Àa shua nê, bɔɔ yàà wa esà ale nko nê, à shua ne ghà à?”

34Yesò tsɔꞋɔ èngǎ̧ wɔb nê, “KwàꞋ ane nkûŋ tsiꞋ è shua wɨ̧ nê, wòt ègème tàa ngɨa kàbɔ̀ŋ la, wu àbùꞋ a èghɨ kàbɔ̀ŋ bu èntɨ̧ɨ̧ tò àa nkɨà la. 35ÀbùꞋ aà kà nteꞋa a èbem àndà̧, waã ka tàa ntèꞋa a èbem àndà̧ la. 36Ale, Waã Mbɔ̧ɔ̧mà nàŋa ndzà wê sàŋ, à ko nê, à chɨɨme mpem. 37Mâ ko nê bɨ wu bòt àndǎ̧ Abàlàghâm, ka bɨ bɔ̂ me kɨ wuê èlu̧ ebùŋè am nkàà nê, bɨa kà bɨ̧ɨ̧ne èngǎ̧ am. 38E ndàꞋà mènəè Tǎt am è nyɨꞋte am la, è me wu awɨ̧ ko bɨ wua ngɨ̀à àghɨa bɨ zə abua wɨ̧ ne tǎt la.”

39Tà làꞋ ale bɔ bɨ̀ɨ̀lè èngǎ̧ tò nê, “Tǎt nyaꞋ wa wu Abàlàghâm.”

Yesò mè shu abua yɔb nê, “Bɨ ghɨ̀ ale ndâ ngu bɔ̧ Abàlàghâm ko bɨa ngɨ̀à àghɨa Abàlàghâm li ngua ngɨ̀à la, 40ka nè àfɨ̀Ꞌ yaa bɨa nkɨ ebùŋè am, mmɔ̌ wu mâ shua wɨ̧ mèngǎ̧ nkûŋ mu mâ zə abua Mbɔ̧ɔ̧mà la. Abàlàghâm li tà kà ghɨ ànəa ko anè. 41Ka bɨ wua ngɨ̀à wuê àghɨa wɨ̧ ne tǎt li ngɨ̀ la.” Bɔ nê, “Mbɔ̧ɔ̧mà zìa ndziꞋne wu ndàꞋà Tǎt wa ba bɔ la.

“Ba ntsě bɔ̧ mèdùùbè.”

42Yesò mè shu abua yɔb nê, “Mbɔ̧ɔ̧mà ghɨ̀ ale ndâ ngu tǎt wɨ̧, ko bɨa nkɔ̀ŋkè am, nkàà nê e dzəè abua tò ka nkɨ̀Ꞌɨ̂, è nka kɨꞋɨ àtsə am mmɔ̌ mbɔŋ, tòà ka tà tsàà am la. 43Bɨ ghɨ̀ na bɨ̀ ka ko ànəa e shua la à? Wu nê bɨa kà mbê nkɨ ezə èngǎ̧ am. 44Satàn wu tǎt wɨ̧, àfàꞋ àyɨ̧ wu ndɨ bɨ̀a me ghɨ̀ wuê àghɨa tàa nkɨà la. Tà lè yaŋe wu wòt tàa mbùŋà bòt la, tà kà wua nkɨà nkûŋ, nkàà nê tà bakà li me làꞋa nkûŋ. Tàa ngɨ̀ tà me làꞋà mèfà̧, tà wua ndàꞋà mbɨ̀Ꞌɨ̀ tàa ndzìà ngɨ̀a àfɨ̀Ꞌ àgème la, nkàà nê, tà wu wòt mèfà̧, mè ngu tǎt mèfà̧ ègème. 45Ka ndɨ̀ wu màa ndàꞋa nkûŋ la, bɨ̀ ka wua bɨ̧̀ɨ̧̀nâ èngǎ̧ am. 46Wòt wu ane yɨ̧ betsiꞋa tà nyɨꞋte nê, maa ngɨ̀à mènəè kàbɔ̀ŋ la wu wà à? Mâ me laꞋa nkûŋ bɨ ghɨ̀ na ka bɨ̀ ka bɨ̧ɨ̧ne ànəa e shua la à? 47Wòt tà wu wê Mbɔ̧ɔ̧mà la nàà njùta mèngǎ̧ tò. Lə yu bɨ̀a ka kɨ eyute mèngǎ̧ mbɔŋ la wu nê, bɨ ntsě bòt Mbɔ̧ɔ̧mà.”

Yesò bɔ̂ Abàlàghâm

48Mbɨ̀Ꞌɨ̀ Yesò làꞋ ale la, Bèjuê bu e bɨ̀ɨ̀le nê, “Tè bà ka shua nkûŋ nê, à wu wòt Sàmalìà, mè mbɔ̂ fo kàbɔ̀ŋ ane yê?”

49Tà bɨ̀ɨ̀lè nê, “E mbakà bɔ fo kàbɔ̀ŋ ane yaã, maa nkùkta wuê a Tǎt am Mbɔ̧ɔ̧mà ka bɨ me làꞋà mènəè kàbɔ̀ŋ adù̧ yaã, 50mbɔ̂ e nka wua nkɨà nê bòt è me ŋeꞋe am a ègwet, wòt nàà və àyea mbɔŋ à wu a tèkitebu tò la. Wu tòà ka tà ko ndɨ tàa mbàŋè mènəè mɔ̧ la. 51KwàꞋ ane nkûŋ tsiꞋ è shua wɨ̧ nê, wòt tàa ndzəa èngǎ̧ am ngɨ̀à mbɨ̀Ꞌɨ̀ e shu la ka li epfə a.”

52Bèjuê bu e shu abua tò nê, “Ba lâ nko àfɨ̀Ꞌ yaa nê, à bɔ fo kàbɔ̀ŋ ane yê. Abàlàghâm li mpfə, bèndàꞋàtɔŋ Mbɔ̧ɔ̧mà e pfəꞋtè àyɔb mɨ̧̂, ka à bɔ̂ me shu nê, wòt tàa ngɨ̀à àghɨa à shu la ka li epfə a. 53Aà ale ngu nê, à tsea tǎt wa Abàlàghâm, bɔ̂ bèndàꞋàtɔŋ Mbɔ̧ɔ̧mà bu be li mpfəèꞋte la à? Àa mɨ̀ɨ̀tà nê à wu wà à?”

54Yesò bɨ̀ɨ̀lè nê “E ngu anè me ŋeꞋe am mmɔ̌ mbɔŋ a ègwet, ko wu àku. Wòt tàa ŋeꞋe am la wu Tǎt am wu bɨ̀a shua nê wu Mbɔ̧ɔ̧mà wɨ̧ la. 55Bɨ te bakà ko atò, ka e mbɔ̂ nko atò. E nê, e mbakà ko atò, ko maa wu wòt mèfà̧ mbɨ̀Ꞌɨ̀ bɨ̀a, ka mâ lâ nko atò, mè me ghɨ̀ àghɨa tà shu la. 56Tǎt wɨ̧ Abàlàghâm li ngùꞋtè àvi e ye àli am, tà li ndze, a mè mbɔ̌ atò.”

57ÀfɨꞋa mbɔŋ, Bèjuê bu e biite atò nê, “Àa ngɨ̀ à bele kà lu̧ èngùꞋebȩ èghem yetà̧â̧, ngɨ̀ na ka me shu nê à li ndɔ̀Ꞌ ndzea Abàlàghâm?”

58Yesò shu abua yɔb nê, “Ane nkûŋ, tsiꞋ è shua wɨ̧ nê, Abàlàghâm li me laꞋ ne yea ngua, e ndzaŋe ewu.” 59Mbɨ̀Ꞌɨ̀ tà làꞋ ale la, bɔ wȩȩtè àti nê bɔ kɨ etemte atò ebùŋe tà bəètê àghɨ ayɔb, ndzə a èbem lob nɨ̧ Mbɔ̧ɔ̧mà yu nga àbȩ.

Currently Selected:

Jɔ̌n 8: mnf

Highlight

Copy