Jɔ̌n 2

Yesò nkùbtè Mèleb è tsìꞋi mèlùꞋ

1Èlibȩ e li ntsè bebe, èpǎ̧ ndzɔꞋɔ ko e wu a Kanà a èbem àlaꞋ a Galìlî. Nyɨ̌ Yesò wu abot, 2bɔ mè nkaꞋa Yesò bɔ̂ bɔkatè bi a èpǎ̧ ndzɔꞋɔ mbɔŋ mɨ̧̂. 3MèlùꞋ tseke tè mì, nyɨ̌ Yesò shu abua tò nê, “Ko nê mèlùꞋ è mî.”

4Yesò shu abua tò nê, “Mê à ka shu am àghɨa màa ghɨ̀ la, nkàà nê àfɨ̀Ꞌ am a bakà zìꞋ nkùꞋ.”

5Nyɨ̌ tò shu abua bòt bu ngàbtà èghɨ abot la nê, “Bɨ̀ ghɨ̌ àghɨa àgème tà shu nê bɨ̀ ghɨa la.”

6Bɔɔ ndàꞋà ale èliba ko yentuà e wu abot bɔ ghɨ ane àti la. Bèjuê e li ngua ndzìà mèleb a èbem èliba yàa nɨa shùà ènyit mbɨ̀Ꞌɨ̀ ekùꞋu e mbì Mbɔ̧ɔ̧mà. Àliba yeamɔꞋ a me nɨ bègalon mèleb mbɔ̀ŋè èghem yebe kò yetat leꞋ.

7Yesò tsèkê tè shu abua bòt bu ngàbtà èghɨ la nê “Bɨ̀ lu̧u̧ne èliba yàa nè mèleb.” Ale, bɔ lu̧u̧ne èliba mbɔŋ nè mèleb tè è kɔꞋ ndzəa ètsəê.

8Tà mè shu abua yɔb nê bɔ̀ tuꞋte me kǒ ngà ŋǎ abua wòt wu tà wua àtsəa bòt bu bɔ̀ɔ ngàbtà èghɨ la.

Bɔ ghɨ̀ mbɨ̀Ꞌɨ̀ tà shu la. 9Bɔ ŋa ale, ŋut yute mèleb mu li ngèble ntsiꞋi mèlùꞋ la, ka tà kà lem nko nê è yaã ngu mèleb. Wu ndàꞋ bòt bu ngàbtà èghɨ abot la ka bɔ li nko la. ÀfɨꞋa mbɔŋ tà tɔ lu̧ ndzà yu 10mbììte atò nê “Ka bɔ̀ɔ ngɨ̀ bɔ̀ ghǎ àdziꞋa èpà̧ bɔ bɨ̀ ŋà mèlùꞋ ntsɔ̧̀ bòt e me nu tê è nyi ane yɔb ka bɔ ŋa me kàbɔ̀ŋ à? Ale, à ghɨ̀ na ka nɔ̀ŋè è me ntsɔ̧̀ ntsiꞋi ŋa akwèn à?”

11Yesò lɔ̀Ꞌ ngɨ̀ ànəê yaa a Kanà, a èbem àlaꞋ a Galìlî è wû ànəa mbì a kà ye fɨ̀Ꞌ tà li ngɨ̀ bòt e ye ènɨ̧ tò la. Bɔkatè tò e ye ale, ndzì èntɨ̧ɨ̧ wɔb ane tò.

12Mbɨ̀Ꞌɨ̀ bɔ paa la Yesò bɔ̂ nyɨ̌ vi, nè bɔnyɨ bi nè bɔkatè bi e chu nga a Kàpenàwuêm ntsèke abàꞋ və ane èli ko.

Yesò ghà a lob nɨ̧ Mbɔ̧ɔ̧mà

(Mat 21:12-13; Mk 11:15-17; Lk 19:45-46)

13Àlia Bèjuê àa njɨ̀a èpǎ̧ Màntsea a ègwet la a tseke tè me kùꞋu, Yesò kɔꞋ nga a Jèlusalèm. 14Tà nyi a èbem lob nɨ̧ Mbɔ̧ɔ̧mà ndzě bòt fɨ̧̀ɨ̧̀nà mpɔ̀ŋtsə nè njɨ̀tsə bɔ̂ banɨ̧̌ ndɨk la, ka nè bòt bɔ̀ɔ nkùbta èkab bɔ tseke a ègwet mèkɔ̀Ꞌ mɔb la. 15Ale, tà nɨ mèliꞋ ngɨ̀ angot nɨŋ fəè àwɔb nè banyà̧ bu bàgème èbem lob Mbɔ̧ɔ̧mà ntsàà àbȩ, mbɔ̂ mpààtè mèkɔꞋ bòt bu nkùbta èkab la mè sàŋè èkab wɔb a si. 16Tà ghɨ̀ ale, tà shu abua bòt bu fɨ̧̀ɨ̧̀nà banɨ̧̌ ndɨk la nê, “Bɨ̀ ŋeꞋe èghɨ bàa nɨŋ ndzə a lob ŋàa. Bɨ̀ ka nɨ lob Tǎt am ngɨ̀, è tsìꞋi àdziꞋa èwen.”

17ÀfɨꞋa mbɔŋ bɔkatè tò e ku̧u̧te nê, èngǎ̧ Mbɔ̧ɔ̧mà e laꞋnê “Èkɔŋ wu mâ bɔ ane lob yê la aa nɨ àtsə am.”

18Bɔɔjuŋ Bèjuê e ye mbììte atò nê “À nɨ̀ àtɔŋ nèŋǎ ka me ghɨ̌ èghɨ bàa à? BetsiꞋa à ghɨ̀ ka ànəa kà ye fɨ̀Ꞌ nɨŋ nyɨ̀Ꞌte nê a dzə abua Mbɔ̧ɔ̧mà à?”

19Yesò shu abua yɔb nê “Bɨ̀ bùù lob yaa ndzè na nàa me wu ane èlibȩ betat e kɔkè yùà tè è kɔꞋ ntɨ̧̂ la.”

20Bèjuê e biite atò nê “Àa ghɨ̀ na ka enɨ èlibȩ betat ebɔ̧ɔ̧ lob Mbɔ̧ɔ̧mà yaa bɔ nɨ èngùꞋebȩ èghem yekwì ntsɔ̀b yentùa ka bɔ̧ɔ̧ la à?” 21Bɔɔ ndàꞋ ale bɔ̀ ka ko nê, lob Mbɔ̧ɔ̧mà yu Yesò shua la wu mbɨ̧̀ tò. 22Yesò tseke tê tà li tà pfə tà mee tà yu̧u̧me ka ètsə bɔkatè tò e bɔ̂ ndzààtè bɔ bɨ̧ɨ̧nè ànəa àkata Mbɔ̧ɔ̧mà nè ànəa Yesò li shuê la.

23Mbɨ̀Ꞌɨ̀ Yesò wua Jèlusalèm àfɨꞋa èpǎ̧ Màntsea a ègwet la, bòt nyaŋ e zì mèntɨ̧ɨ̧ mɔb ane èlen tò mbɨ̀Ꞌɨ̀ bɔ ye mènəè kà ye fɨ̀Ꞌ mu tà ghɨ̀ la. 24Ka Yesò ka zi avi ane yɔb nkàà nê tà ko àghɨa wòt ègème wu yùà la. 25Ale, wòt ka tsi mbɔ̌ ndɨ tàa mèe shua tò àghɨa bɔ̀ wu yùà la nkàà nê tà ko àghɨa àa èntɨ̧ɨ̧ wɔ̀bȩ̂ la.

Currently Selected:

Jɔ̌n 2: mnf

Highlight

Copy