ÀfaꞋa 1

1Wòt èkɔŋ am Tìofilɔ̀s, e ndi shɨ̀ mènəè Yesò li ngɨ̀ mè nyɨ̀Ꞌte àfɨꞋa tà li mbùꞋa àfàꞋ àzi la, 2eghǎ wu ane àlia Mbɔ̧ɔ̧mà li nɨ atò ngà a ègwet la a èbem àkata mbì am. Mbɔ̧ɔ̧mà li me laꞋ nê yea nɨ atò nga ègwet ale, tà nɨ̌ èyǐ Fo Kèfə nkɨ̀ɨ̀te bòt bu tà li ndàà àwɔb ane bɔntu̧ bi la. 3Mbɨ̀Ꞌɨ̀ bɔ ghɨ̧̀ɨ̧̀ne a Yesò tè tà pfə mè njù̧ù̧mê la, tà nèètè nyɨ̀Ꞌte avi abua bɔntu̧ bi bu ane ndɨ bɔ̀ɔ ko nkûŋ nkûŋ nê Tà yù̧ù̧mè la. Tà li ntaꞋa pùùla a mbì lɔb ane èlibȩ èghem yekwì, ndaꞋa abua yɔb ndɨ Mbɔ̧ɔ̧mà nàa mbà̧aã kèfɔ̧̀ vi la. 4È li ngu àfɨ̀Ꞌ àko, Yesò bɔ̂ bɔntu̧ bi bu bɔ bu̧u̧te a si bɔ̀ɔgème, tà shu abua yɔb nê, “Bɨ̀ ko mbɨ̀Ꞌɨ̀ bɨ sà àpfəèà nɨ̧ a Jèlusalèm yaa nga adzìꞋ ako. Bɨ̀ chɨ̀Ꞌɨ àghɨ yu e ndi shu awɨ̧ nê Tǎt am e kaꞋ nê yea ŋa abua yɨ̧ la. 5Jɔ̌n li ngua ndzìà bòt a èdzî, ka èli ko aa me tsě, Mbɔ̧ɔ̧mà naa zǐ Fo Kèfə ane yɨ̧.”

Mbɔ̧ɔ̧mà nɨ a Yesò ngà a ègwet

(Mk 16:19-20; Lk 24:50-53)

6Yesò bɔ̂ bɔntu̧ bi bu e tseke a si àfɨ̀Ꞌ àko, bɔ biite atò nê, “Tê, tè à bèle vəèəè a kèfɔ̧̀ abua bòt Izəèlȩê?”

7Yesò tsɔ̀Ꞌɔ èngǎ̧ wɔb nê, “Wu Tǎt am zìambɔŋ ka tàa nyɨꞋte àfɨꞋa èghɨ bàa àa li me ghɨ̀ la. BetsiꞋa bɨ̀ ka koê. 8È me wu awɨ̧ ko Fo Kèfə naa zǐ mètàŋ ane yɨ̧, bɨa ghǎ e me shu ànəa bɨ ye mè nko ane yaã la abua bòt Jèlusalèm, nè bòt àlaꞋ a Jùdià nè Sàmalìà, mè nè bòt èlaꞋ ko tsa a sitsǎꞋ ŋàa.”

9Mbɨ̀Ꞌɨ̀ tà làꞋa tê ndɔ̀Ꞌ la, bɔ me ye bɔ ŋeꞋe atò me kɔꞋɔ ngà a ègwet, mbàꞋ kɔꞋ nkèlè àwɔb mbɨ̀Ꞌɨ̀ bɔ me ye atò.

10Bɔ bela ndɨ̀ŋkà ègwelebuule ndɨ Yesò ghà la, me ko bòt babe bɔ kwaãaã ndìte kèfə la, e saꞋa a ngèt yɔb, 11è shu nê, “Bòt Galìlî, bɨ̀ ka tsi ndzě ngoꞋ yɨ̧ ndɨ̀ŋkè ègwelebuule. Èlɨ Mbɔ̧ɔ̧mà nɨ Yesò waa, abua yɨ̧ nɨŋ nga a ègwet la, wu wuê ndɨ tàa li mě kɨꞋɨ la.”

Wòt tsa jɨ àdziꞋa Judàs

(Mat 27:3-10)

12Mbɨ̀Ꞌɨ̀ Yesò ghǎ a ègwet tè ndɔ̀Ꞌ la, bɔntu̧ tò e lɔ̀Ꞌɔ ègwet èbȩ Olìf, ngȩ̀ȩ̀nè mbɔ̀ŋè ane ànəa lèghȩ̀ȩ̀nè àliapfəèa Bèjuê, ngwènè a Jèlusalèm. 13Bɔ ghà ale nkɔꞋ nga àtsəa lob a ègwet yu bɔɔ wua ndìa a èbèm la. Bɔntu̧ baa li ngu Pità, bɔ̂ Jɔ̌n, nè Jimsì nè Andùlù, nè Filìb bɔ̂ Tɔmasì, nè Bàtòlomiò nè Màtìù ndɔ̀Ꞌ nè, Jimsì waã Alfeɔ̀, bɔ̂ Simùn wu tà li ntàꞋa wua nùà mènəè àlaꞋ la, nè Judàs waã Jimsì. 14Bɔ li ntaꞋa wua mbu̧u̧ta adzìꞋ yeamɔꞋ ntsàꞋta Mbɔ̧ɔ̧mà bɔ̀ɔgème fɔ̀ɔ̀le ne bèzi, nè Màlià nyɨ̌ Yesò, ndɔ̀Ꞌ nè bɔnyɨ tò.

15Èli ko e li ntsè, bòt bu bɔ zì mèntɨ̧ɨ̧ mɔb ane Yesò la, bɔ bù̧ù̧te a si mbɔ̀ŋè ènkɨ̀ nè èghem yebe. Pità lɔ̀Ꞌɔ a si ndàꞋ èngà̧ waa abua yɔb, nê, 16“Bɔnyɨ bɔ̧, èngǎ̧ Mbɔ̧ɔ̧mà wu Fo Kèfə li ngɨ̀ Fɔ̧̀ Dàbid làꞋà ane ànəa Judàs la, e li mbɔ̌ ndɨ àa wu nkûŋ la. Fɔ̧̀ Dàbid li shu ndɨ Judàs wu wòt tàa li tɨ̧ɨ̧ a mbì e ghɨ̌ ka bɔɔ baãaã a Yesò la. 17Tà li ngu wòt kǒ ayɔɔ aya, ngu ndɨ Yesò li ndȩ atò nê ba tò ba è me ghɨ̌ àfaꞋa Mbɔ̧ɔ̧mà nɔ̂ la.”

18(Judàs nɨ èkab kàbɔ̀ŋ wu tà ghɨ̀ nɨŋ la, njù̧ èbaꞋ, mbɨ̀ŋke èbem tò ebùꞋà, èghɨ èbem tò e dzəè. 19Bòt bɔ li ngua ntsèke a Jèlusalèm la e li ndzə ànəa ngaa bɔ̀ɔgème, ntsiꞋi me tɔ àdziꞋa ngaa nê “Àkeldamà”, ngua shua ane ndɨ̧ yɔb nê “ÈbaꞋ Àlo̧.”)

20“Bɔ shɨ a èbem Àkata Mèkù̧ nê:

‘Tè lob tò tsiꞋi fəâ kà ye wòt tàa ntsèka a èbèm la.’

Mê nê,

‘Tè wòt tsa jɨ àdziꞋa àfaꞋa atò.’

21-22Mbɨ̀Ꞌɨ̀ àa anè la, wòt kǒ bɔ̂ ndɨ tàa nyi ayɔɔ aya mbɨ̀Ꞌɨ̀ me shu abua bòt mɨ̧̂ ànəa ye ye mè nko nê Yesò Lefɨ̀Ꞌ yu̧u̧me la. Ŋut bɔ̂ ndɨ tàa wu wòt ane bòt bu bɔ li ngu ayɔɔ aya àfɨꞋa ba Yesò Lefɨ̀Ꞌ ba e li ngua ngȩ̀ȩ̀nà nɔ̂ la. Tà bɔ ndɨ tàa wu wòt tà li ngu ayɔɔ aya e bùꞋu àfɨ̀Ꞌ yu Jɔ̌n li ngua ntsɔ̀tà Ntu̧ Ntsɔ̧̀ Mbɔ̧ɔ̧mà, mè ndzìà bòt a èdzî la, eghǎ wu àfɨ̀Ꞌ yu Mbɔ̧ɔ̧mà li nɨ a Yesò abua ya nga a ègwet la.”

23Ale, bɔ ŋa tèlente bòt babe. Bòt mbɔŋ li ngû Jòsêb wu bòt ko e li ngua ntɔ̌ nê Bàsabàs, (èbeko e tɔ nê Justùs) la, nè Màtiàs. 24AfɨꞋa mbɔŋ bɔ tsaꞋte a Mbɔ̧ɔ̧mà nê, “Tê, à ko èntɨ̧ɨ̧ waa waa. NyɨꞋte awa wòt à lȩ̀ 25nê tà nɨ àdziꞋ afàꞋa yaa mbɨ̀Ꞌɨ̀ wantu̧ wê, ndɨ̀ wu Judàs li sàŋ ngà adzìꞋa bɔ̀ɔ ntsɔ̀Ꞌɔ àfaꞋa bòt kàbɔ̀ŋ la.” 26AfɨꞋa bɔ tsàꞋte a Mbɔ̧ɔ̧mà tè ndɔ̀Ꞌ la, bɔ màꞋà èbìt ane tèlen tu tebe la e baãaã Màtiàs. Ale, bɔ nɨ atò nkwèꞋne ayɔɔ bɔntu̧ Yesò bu ntsɔ̀b wemɔ̀Ꞌ la.

Currently Selected:

ÀfaꞋa 1: mnf

Highlight

Copy