Math'ayo 24

Jesu ananena dzulu za kubandwa-bandwa kwa Hekalu

Mariko 13:1-2; Luka 21:5-6

1Vikara Jesu arihokala adzambola kahi za ro Hekalu akwendani, anafundzie mamwanyesa go majengo ga ro Hekalu. 2#Luk 19:44Ela Jesu akiambira kukala, “Amba munagaona gano majengo gosi zho? Be namwambira ujeri wenye k'ahana iwe hatha mwenga rindirosala dzulu za mwandziwe, kila kit'u kinadzabandwa-bandwa.”

Jesu ananena dzulu za siku za mwisho

Mariko 13:3-13; Luka 21:7-19

3Bai Jesu arihombola haho, wakwendakelesi kahi za Murima wa Mizeituni. Vikara arihokala akelesi, anafundzie mamuza kinjama makiamba, “Maut'u gano gandahendeka rini? Vidze ni muv̱ano wani undiwonyesa kukala u hehi na kudza na mwisho wa dhunia udzafika?” 4Jesu akiadzigidzya akiamba, “Dzimanyirireni hasidze mut'u akamukenga. 5#24:24; 2 Ath'es 2:9-10; 1 Joh 2:18Kwani kuna anji mandiokudza kwa dzina rangu na kuamba ao ndo Masihi, na mandakenga at'u anji. 6Na mundasikira uv̱oro wa viha vihefwazho hehi na vingine mundahenda kuvisikira uvumi, ela sogoheni, kwani ni hatha gakale gago, ela wo mwisho wa urumwengu undakala uchere mbere. 7#2 Nyaka 15:6; Isa 19:2Kabila rindauka kwendapigana na kabila ringine. Uthawali undapigana na uthawali mungine. Kundakala na ndzala na ts'i indathethema hat'u-hat'u. 8Ela gago gosi gandakala ni mwandzo wa utsungu thu.”

9 # 10:17-22; Joh 16:1-4 # 5:11 “Mundagwirwa muteswe na mwalagwe. Kila mut'u andamumena haha urumwenguni kwa ut'u wa dzina rangu. 10#10:35; Luk 12:52-53Kahi za wakathi uwo, at'u anji mandauya nyuma na makwatye kuguzana na kutsukirirwana enye kwa enye. 11#7:15Kundambola manabii anji a ulongo na mandakenga at'u anji. 12#2 T'imo 3:1-5Na kwa kukala uthiriri undakala udzakaza zhomu, at'u mandaricha kuahendza andziyao. 13#Ugun 13:10Ela iye andiyevumirira hatha mwisho ndiye andiyeokoka. 14#28:19Na Uv̱oro uu Udzo wa uthawali wa mulunguni undahubiriwa urumwengu muzima, ili ukale ushahidhi kwa makabila gosi, ndo wo mwisho udze.”

15 # Dani 9:27; 11:31; 12:11 “Mundaona kit'u cha kutsukiza na cha kwanonga, kirichonenwa ni nabii Danieli kapindi, kiimire kahi za ho hat'u haeri. (H'ewe mushomi, shomat'o ung'alirwe.) 16Bai mundihoona vizho, at'u osi mandiokala Judea namachimbirire ko mirimani. 17#Luk 17:31Mut'u andiyekala a dzulu za nyumba ya kwakwe asiuye mo nyumbani kwendahala kit'u chochosi. 18Mut'u andiyekala a mundani asiuye mudzini kwendahala nguwoye. 19Wakathi uwo vindakala vii-vii zaidhi kwa ano m'ama mandiokala mana mimba na mandiokala manaamwisa. 20Na voyani uwo wakathi mundihokala munachimbira, usikale ni wakathi wa p'eho, hedu siku ya Sabato. 21#Dani 12:1; Ugun 7:14Kwani wakathi uwo kundakala na mateso mabomu garigo k'agadzaonewa na k'agandaonewa kaheri haha urumwenguni. 22Siku zizo za mateso Mulungu wazihunguza kwa ut'u wa at'u arioatsagula, ela kala si vizho, k'ahana hatha mut'u mumwenga angayeokoka.”

23 # Luk 17:23-24 “Bai mut'u akimwamba, ‘Lola thiyuno ye Masihi!’ hedu, ‘Thiyuya kurya,’ sikuluhireni bule. 24#24:5; 7:15; Ugun 13:13-14Mana kundambola ano Masihi anji a ulongo, na manabii anji a ulongo. At'u ao osi mandahenda miv̱ano mibomu ili vichadimikika maakenge hatha o at'u mariotsagulwa ni Mulungu. 25Lolani, nidzamwambira maut'u gaga kimbere.”

26“Kwa vizho mut'u yoyosi andiyekudzamwambira kukala, ‘Masihi a nyika bewe!’ hedu ‘Masihi adzazama kuryahu ndani!’ hatha thuwani shuhuli zenu, musimugwire gakwe kamare. 27#24:30, 37; 25:31; 1 Akor 15:23; 1 Ath'es 3:13; 4:15; 2 Ath'es 2:1, 8; Jako 5:7-8; 2 P'et 3:4; 1 Joh 2:28Mana Mwana wa Mudamu andihokudza, andaonewa ni kila mut'u, dza viryahu lumethe lumethazho mwambolero wa dzuwa na lukaonewa hatha mutserero wa dzuwa. 28#Ayub 39:30; Ugun 19:17-18Kwani ‘Hadzihogwa kimba, ndo nderi mathungananaho.’ ”

Kudza kwa Mwana wa Mudamu

Mariko 13:24-37; Luka 21:25-33

29 # Isa 13:10; 34:4; Haga 2:6, 21; 2 P'et 3:10, 12; Ugun 6:12-14 “Bada ya siku ziryahu za mateso kukira thu, dzuwa rindangira kiza, na mwezi k'aundaala kaheri. Nyenyezi zindagwa ts'i, na nguvu za dzulu mulunguni zindathukuswa. 30#Zaka 12:10-14; Dani 7:13-14; Math' 24:27; 26:64; Mar 14:62; Ugun 1:7Na vikigoma vizho, ko dzulu kundambola muv̱ano wa kunyesa kukala Mwana wa Mudamu akudzani. At'u a makabila gosi ga urumwengu mandarira, kidza mandamona Mwana wa Mudamu anatharamuka kuno a dzulu za maingu. Naye andatharamuka na nguvu na nguma nyinji. 31#24:31 13:41; Gunda: 1 Akor 15:52; 1 Ath'es 4:16Andaahuma malaikae mapige gunda zhomu zhenye, na maakundzumanye o at'u osi mariotsagulwa ni Mulungu kula kila p'embe ya dhunia.”

32“Bai dzifundisheni kula kwa mutini. Mutini t'aize zikikala nyolovu na kukwatya kumboza makodza, munamanya kare wakathi wa mavuno udzafika hehi. 33Kwa vizho ninwi nanwi mukiona maut'u gaga gosi, manyani kukala wakathi wa kudza Mwana wa Mudamu udzafika hehi. 34#16:28Nami namwambira kamare, kizhazi kiki k'akindakira kabila maut'u gaga gosi kuthimira. 35Mulunguni na ts'i, zhosi vindahenda mwisho, ela maneno gangu k'agana mwisho bule.”

36 # Mahe 1:7 Jesu akienderera kunena akiamba, “Ela k'ahana mut'u amanyaye ni siku yani na saa yani gandihokalira maut'u gaga, hatha o malaika na ye Mwana wa Mudamu k'amaimanya bule, Baba h'akeye nde aimanyaye.”

37 # Mwan 6:11-13; 7:7-13; 2 P'et 3:6 “Kudza kwa Mwana wa Mudamu kundakala dza zho virizhokala wakathi wa Nuhu. 38Kwani siku zizo za Nuhu kabila v̱ula ya muretho k'aidzanya, at'u mathuwa kuishi here kawaida thu. Makala makirya na kunwa, na kuhala na kuhalwa hatha Nuhu achangira safinani. 39At'u ao mathuwa kuishi bila kumanya kundakudzani, hatha muretho ukidzaahala vizho. Na vizho ndo vindizhokala hatha yo siku andihokudza Mwana wa Mudamu. 40Siku iyo alume airi mandakala ma mundani, mumwenga andahalwa na ye mungine arichwe. 41Anaache airi mandakala manasaga, mumwenga andahalwa na ye mungine arichwe. 42#24:44, 50; 25:13; Mar 13:33, 35; Luk 12:40; 21:36Kwa vizho, kalani matso, mana k'amumanya Bwana wenu andakudza siku yani. 43#1 Ath'es 5:1-2; 2 P'et 3:10; Ugun 3:3Sirikizani bai, kala mwenye nyumba ni kumanya mwivi andakudza usiku wa saa nyingahi, k'angakubalire nyumbaye ibandwe bule, angachesa matso kuirinda. 44Kwa vizho ninwi nanwi dziikeni thayari wakathi wosi, kwani Mwana wa Mudamu andakudza wakathi musiwoudhania.”

Ahumiki adzo na ai

Luka 12:35-48

45 # 25:21-23 Jesu akienderera kunena akiamba, “Muhumiki mwaminifu na mulachu ni yuyahu ariye akirichirwa ahumiki andziye ni bwanawe aatsundze na kuap'a chakurya here vimalikanazho, andahenda vizho. 46Baha iye muhumiki iye ariye bwanawe andakudzamuthekeza anahenda vizho. 47Kwani namwambira jeri wenye kukala, andamuhala na amuhendye akale muimirizi wa zho vit'u zhosi arizho nazho. 48#2 P'et 3:4Ela ye muhumiki mui akiamba kimoyo-moyo, ‘Naona ye bwana wangu k'andauya vikara,’ 49akwache kuapiga o ahumiki andziye, na kurya na kunwa hamwenga na arevi. 50#24:42Bai ye bwana wa muhumiki yuyu andauya siku asiyodhania na saa asiyoimanya. 51#8:12Naye afikaho andakudzamuhala na amutose visiku-visiku, gonya amutsanganye na at'u a kudzihendya. Na kuko at'u mandarira na kwafuna meno kwa utsungu.”

Currently Selected:

Math'ayo 24: nyf

Highlight

Copy