AROOMA 16

Nkeethi kîrî eetîgîri bara bangî bonthe

1Ndeenda bwîtîgia Poebe, mwarayia ndeni ya wîtîgio, mûteetheeria wa ngûgî ya Ngai kanicaani ya Kenkiria. 2Ndeenda bûmûthûkia ta bûra bara barî ba Mwathani babatîîrue bathûkanagia. Na ndeenda bûmûteethagia na kîonthe kîra akeegagua arî na thîîna na kîo, n'ûntû wana we nateetheetie antû baingî. Wana niû ningwa aranteethia.

3Nkeetheriani Pirisiira na Akuira. Barutagîra Kîrîstû Yiesû ngûgî ta bûra mmûrutagîra. 4Bareethûngîria ûgwatiini bwa gîkuû n'ûntû bwakwa. Na ti niû ninka ncookagia nkaatho n'ûntû bwao. Wana kinya makanica monthe ma bara batarî Ayaundi i bacookagia nkaatho n'ûntû bwao. 5Nkeetheriani eetîgîri bara barîîkanaga kwao.

Nkeetheriani mwendwa Epinitas. N'we aarî muntû wa mbere nthîgûrû ya Îcia gwîtîgia Kîrîstû.

6Nkeetheriani Maria. Nabûrutîrîte ngûgî mûno.

7Na nkeetheriani Andoronikas na Njunia. N'Ayaundi ta niû, na itwarî na bo nceera rîra ndathaîkîîtwe. Baatuîkire athingati ba Kîrîstû mbere yakwa na atûmwa bara bangî ibabatîîyîîte.

8Nkeetheriani kinya Ampiriatas, mwendwa ndeni ya Mwathani.

9Nkeetheriani Ubanas. Tûrutagîra Kîrîstû n'we ngûgî. Na nkeetheriani mwendwa Stakus.

10Nkeetheriani Apeeres. Noonanîîtie wendo bwake kîrî Kîrîstû i bwa mma. Na nkeetheriani antû ba mûciî wa Aristoburus.

11Nkeetheriani Erondia. I Mûyaundi ta niû. Na nkeetheriani antû ba mûciî wa Nakisas, bara barî eetîgîri.

12Nkeetheriani aruti ngûgî ba Mwathani—Tiribena na Tiribosa. Na nkeetheriani Pasis, immwendeete mûno. Narutîrîte Mwathani ngûgî mûno.

13Nkeetheriani Rubas. Aathuurirwe i Mwathani. Na bûnkeetherie gina. Mmûthûkagia taka arî taata na niû.

14Nkeetheriani Asinkiritas, Biregoni, Amis, Patirobas, Amas, na aruayia bara bangî barî na bo. 15Na nkeetheriani Birorogas, Njuria, Nerias barî na mwaragina, Orimpia, na antû ba Ngai bara bangî bonthe bara barî na bo. 16Keethanagiani na wendo ta eetîgîri. Makanica ma Kîrîstû monthe makûbûkeethia.

Ûrutani bwa mûthia

17Aruayia na aarayia, ndîbwîra nkîbûkinyagîîria atî, bwîmenyeere kîrî bara batûmaga antû baathûkana na bagatûma wîtîgio bwao bûgîa thîîna kuumania na ûrutani bûra barutanaga, bûra bûtagwatanagîra na bûra bwarutanirwe. Bûtikaathengeere antû ta babu. 18Antû bara barûthaga mantû ta mamu ti Kîrîstû Mwathani wetû beegagua bagîtûmîkîra. I mawîrirîîria ma nda ciao beegagua bagîcûa kwingia. Batûmagîra mîgambo îmîega na îrî mûrîo kweneeria bara batamenyaga kana n'ûthûûku babeeraga. 19Gûtirî we ataiyî biû ibwathîkagîra Mwathani. Na gîku i kîo bûnkenagia na kîo. Ndîenda bwîgua bûrî na ûûme bwa mantû mara meega, gûtarî ûntû bûûthûûku bûkûmenya.

20Ngai ûra atweyaga ûkiri eengeerie gûcinda Saitaani, bûmîcinde. Ûtugi bwa Mwathani wetû Yiesû Kîrîstû bûrookaraga naabi. Aameni.

21Bûgûkeethua i Timotheo ûra tûrutaga n'we ngûgî. Na kaîrî bûgûkeethia i Rukias, Njasoni, na Sospita, Ayaundi ta niû.

22Na wana niû Teritias, nkûbûkeethia ndeni ya Mwathani. I niû mbaandîkîrîte Paûrû baarûa îno.

23Bûgûkeethua i Gayas ûra nkaraga gwake. Twinthe tûrî kanica tûrîîkanaga gwake.

Na bûgûkeethua i mwaigi wa kîgîîna gîa taûni, ta we Erastas. Na bûgûkeethua i mûruayia Kuaritas. [24Ûtugi bwa Mwathani wetû Yiesû kîrîstû bûrookaraga naabi bwinthe. Aameni.]#16:24 Mûstaarî ûyû ûtaarî mabukuuni mamwe mara ma mbere ma Kîîngiriki.

Îromba rîa mûthia

25Tûkumagieni Ngai. Ngai arî na inya ya gûtûma bûrika wîtîgioni kwa inya ya ntheto îmbega. N'yo ntûmwa îra yugîîte mantû ma Yiesû Kîrîstû, îra yatûîre yithîîtwe îrî kîriga kwa îgiita rîîraaya mûno. 26Îndî îîndî itûgwûrîrîtwe yo gûkûrûkîîra kîrî maandîko ma iroria. Na Ngai ûra atûûraga tene na tene augîîte îmenyithanue kîrî mîgongo yonthe, kaingo antû beetîgia Kîrîstû na bamwathîkîra. 27Gûkûrûkîîra kîrî Yiesû Kîrîstû, Ngai arookumua tene na tene. Gûtirî ûngî mûûgî ta we! Aameni.

Currently Selected:

AROOMA 16: thk

Highlight

Copy