MATHAYO 7
7
Ûtikaagiitîre bara bangî îgamba
(Ruka 6:37-38, 41-42)
1Yiesû aathi na mbere na kûrutana auga, “Bûtikaagiitîre bara bangî îgamba bûûya kûgambithua, 2n'ûntû bûra bûgiitagîra bara bangî îgamba i ta bu bûkaagiitîrwa. Kîthimi kîra ûkaathimîra na kîo bara bangî wana woû i kîo ûkaathimîrwa na kîo. 3N'ata ûkwona gakaracû karî riitho rîa mûcoore waku, îndî ûtikwona mûgogo ûra ûrî riitho rîaku? 4N'ata ûûmba kwîra mûcoore waku, ‘Ga nkûrute gakaracû riitho’ na mûgogo ûrî rîîtho rîaku? 5Woû mwîbwithia! Amba wîrute mûgogo riitho kaingo ûûmba kwona bwega gakaracû kara karî riitho rîa mûcoore waku bwega, ûmûruta ko.
6“Bûtikaanenkere kurû gîntû kîîtheru na igaacooka kûbûrûmanga. Na bûtikaagerere ngûrwe ruru#7:6 ‘Ruru’ îrî goro mûno. Yonekaga rûûyîîni îriani na îkari ta iiga. Mûgambo ûyû ‘ruru’ ti Kîîtharaka, itûrombeete. cienu, n'ûntû nigaakinyanga.”
Ngai neegagua maromba
(Ruka 11:9-13)
7Yiesû auga, “Rombaani bûkeewa. Cûani bûkoona. Ringaringaani bûkaarugûrîrwa. 8Ûra arombaga neeyagwa, ûra acûaga noonaga, na ûra aringaringaga mûrango narugûragîrwa. 9N'ûû wacienu eetua mûgaate i mwana wake akamwaa iiga? 10Kana mwana amwîtia îkûyû akamwaa njoka? 11Ûkeegua biû ibwiyî kwa aana beenu biewa bithongi na bûrî antû baathûûku rî, n'ata îîndî Abaagu ûra arî îgûrû akaarega kûbwaa biewa bithongi mûno, bara bûmûrombaga! 12Kwoogu rûthagîraani bara bangî mantû monthe ta bûra wana biû bwenda babûrûthîra, n'ûntû i bu kwandîkîîtwe *wathooni bwa Musa na mabukuuni ma iroria.”
Njîra ciîrî
(Ruka 13:24)
13Yiesû auga, “Thûngîraani na mwîrîga ûra mûcege. Mwîrîga ûra ûthiîte wînyangiani n'ûmwariî na njîra n'îmbariî, na n'yo baingî bathiîte n'yo. 14Îndî mwîrîga na njîra îra îthiîte mwoyooni n'înjincianu na ibaakai bamiiyî.”
Mûtî na maciaro ma uu
(Ruka 6:43-44)
15Yiesû auga, “Îmenyeereeni kîrî iroria bia ûrongo bira biiyaga bikari ta ng'ondu bikîoneka, îndî ndeni bikari ta ncûgi. 16Bûkabimenya na ngûgî ira birutaga. Kûrî muntû aûmba gûtua ncabiibû mûtîîni wa mîîgua, kana agatua nkûyû mûgaani? 17Mûtî ûmwega ûciaraga maciaro meega, na mûtî ûmûthûûku ûciaraga maciaro maathûûku. 18Mûtî ûmwega ûtiûmba gûciara maciaro maathûûku, na mûtî ûmûthûûku ûtiûmba gûciara maciaro meega. 19Mûtî unthe ûra ûtaciaraga maciaro meega nûrîîkagwa ûkarîrîkîrwa na mwanki. 20Kwoogu bûkabimenya na ngûgî ira birutaga.”
Ntugû ya kûgiitîrwa îgamba
(Ruka 6:46; 13:25-27)
21Yiesû auga, “Ti muntû wonthe ûra ambîtaga ‘Mwathani, Mwathani,’ akaathi ûneneeni bwa îgûrû nwanga ûra arûthaga bûra Baaba ûra arî îgûrû eendaga kûrûthwa. 22Ntugû înu i baingî bakaambîta, ‘Mwathani, Mwathani, tûtaaroragia kwa riîtwa rîaku na tûkeengatia irundu biithûûku kwa inya ya riîtwa rîaku na tûkaringa biama biingî kwa riîtwa rîaku?’ 23Naani nkaabeera ntakûbaitha, ‘Umaani aaga ndî, ntibwiyî, eeyia baba.’ ”
Aaki baîrî
(Ruka 6:47-49)
24Yiesû auga, “Kwoogu ûra wonthe eegagua ntheto ciakwa akairûtha, akari ta muntû ûmûûme ûra aakire nyomba yake rwaraani rwa iiga. 25Mbura îkuura mûguû waya ruuo rûkîbuutanaga, nyomba îtoombokana kana yenyenya n'ûntû mûcingi wa yo weenjîîtwe rwaraani rwa iiga. 26Na ûra eegagua ntheto ciakwa na atacirûthe, akari ta kîaa kîra gîakire nyomba ya kîo mûthangaani. 27Mbura îkuura mûguû waya ruuo rûkîbuutanaga nyomba ya kîo yaturana nthî mpu, yoombokana. Kûgwa kûra yagwîre kwarî kûûnene mûno!”
28Yiesû akûthiria kuuga mantû mamu, kîrîndî kîarigara mûno n'ûrutani bwake, 29n'ûntû aarutanaga na inya ya Ngai na ti ta aarimû ba watho.
Currently Selected:
MATHAYO 7: thk
Highlight
Share
Copy
Want to have your highlights saved across all your devices? Sign up or sign in
© 2019, Bible Translation and Literacy
