RUKA 8

Eekûrû bara baathiyanagia na Yiesû na arutwa baake

1Ntugûûni ira ciathingatire, Yiesû aathiûrûûka na mataûni na ntûûra agîtûmagîîria ntheto îmbega ya ûnene bwa Ngai. Aathiyanagia na arutwa baake îkûmi na baîrî, 2na eekûrû bamwe bara Yiesû ooreetie ndwari, na bara eengatîîtie irundu biithûûku biauma kîrî bo. Ûmwe aarî Maria Mûmagindari, ûra irundu biithûûku mûgwanja biengatîîtue biauma kîrî we. 3Ikwarî na mwekûrû ûngî eetagwa Njoani, mwekûrû wa Suca (Suca ûra aarî mûmenyeeri wa into bia Eronde), na kûrî ûngî eetagwa Susana, na bangî baingî bara baateethagia Yiesû na into biao.

Ngerekano ya mwandi wa mbeû

(Math. 13:1-9; Mko. 4:1-9)

4Antû baaya kîrî Yiesû baumîîte bwa taûni mwanya mwanya, beethîrana amwe. Yiesû abaarîria agîtûmagîra ngerekano. Abeera, 5“Ntugû îmwe mwandi naathiire kwanda mbeû. Wabûra aamincaga mbeû yake mûndaani, kûrî imwe ciagwîre njîraani ciakinyangwa n'antû, nyoni ciaya cioya. 6Ingî na cio ciagwa njaraani cia maiga. Ikuuma ciaûma n'ûntû gûtaarî na kîthithina. 7Kûrî ingî ciagwîre matîîni ma mîîgua. Ikuuma, matî mamu ma mîîgua maakûrania na cio maciinyîka. 8Îndî kûrî ira cio ciagwîre mûthetuuni ûmûnoru. Ciauma, ciakûra bwega na ciaumana mûno. Wakîra îmwe yaciaraga mpîndî îgana rîmwe.”

Yiesû aarîîkia na kuuga na inya, “Ûra arî na matû neegue.”

Gîtûmi kîa Yiesû gûtûmîra ngerekano

9Arutwa baake bamûûria bûra ngerekano înu yaugaga. 10Yiesû abacookeria abeera, “Biû ibwetwe ûûme bwa kûmenya witho bwa ûnene bwa Ngai. Îndî kîrîndî kîra kîngî kîo nwanga ngakîarîria na ngerekano, kaingo ‘Bagaacûûbaga, îndî bationa, na beegua bataciûre.’ ”#Isaaya 6:9-10

Yiesû aataûra ngerekano ya mwandi wa mbeû

(Math. 13:18-23; Mko. 4:13-20)

11Yiesû auga, “Ûrutani bwa ngerekano înu bûkari ûûgû. Mbeû i kiugo kîa Ngai. 12Mbeû îra yagwîre njîraani i ngerekano ya antû bara beegagua kiugo, îndî Saitaani akaaya akabûria kîra gîkûrî kîande nkorooni ciao batikaaye gwîtîgia boonokua. 13Mbeû îra yagwîre njaraani cia maiga i ngerekano ya antû bara beegagua kiugo kîa Ngai bagagîîtîgia bakeneete, îndî ûtiîgagua beerikîîtie bwega wîtîgioni. Beetîgagia kagiita gaakai, baayîîrwa i magerio, bagacooka waara akûrû. 14Mbeû îra yagwîre matîîni ma mîîgua i ngerekano ya antû bara beegagua kiugo kîa Ngai, îndî n'ûntû bwa kwîthangîkia bagîîciiragîria mantû ma ûtûûro bûbû bwa nthîgûrû îno, kwenda ûtonga, na mîago, bikainyîka kiugo gîkathaata. 15Na mbeû îra yagwîre mûthetuuni ûmûnoru i ngerekano ya antû bara beegagua kiugo kîa Ngai, bagakîthûkia na wendo na ûmma bakoonania maciara baûmîîrîîtie.”

Werû bwa kiugo kîa Ngai

(Mko. 4:21-25)

16Yiesû auga, “Gûtirî muntû amuntagia taa amîkunîkîra kana amîaiga rungu rwa ûrîrî. Amîtûûgagîîria bantû aûkîîru kaingo îmûrîkîra antû bara bakaathûngîra nyomba înu. 17Gîntû kîonthe kîra kiithe igîkaumbûrwa. Witho bunthe bûkaamenyekana, bwoneke cwe.

18“Menyagîîraani mûno bûra bûkeegangagua mantû, n'ûntû ûra arî na gîntû akoongeerwa. Îndî ûra gûtarî kîo we arî na kîo, wana kaniini kara arî na ko nagaatunywa.”

Bagina na aruagina ba Yiesû ba mma

(Math. 12:46-50; Mko. 3:31-35)

19Gina na aruagina ba Yiesû baaya bakîendaga kwaria n'we, îndî baaremwa kûmûkinyîîra n'ûntû bwa antû kwingîa. 20Muntû ûmwe eera Yiesû, “Nyûkwe na aruanyûkwe barûngi aara nja na ibakwenda gûkwona.”

21Yiesû abeera, “Taata na aruayia n'antû bonthe bara beegagua kiugo kîa Ngai bakarûtha bûra gîkuuga.”

Yiesû aakiria kîbuubani îriani

(Math. 8:23-27; Mko. 4:35-41)

22Ntugû îmwe Yiesû na arutwa baake baatwa îtarûûni. Yiesû abeera, “Tûringeeni tûthi rûgongo rûra rûngî rwa îria.” Baanjîîria kûthi.

23Bathiîte na îtarû, Yiesû aagwatwa i toro aamaama. Kwagîa kîbuubani kîînene îriani îtarû rîenda kûriama. Bonthe beegua barî ûgwatiini. 24Arutwa baake baathi bamûûkia bamwîra, “Mwathani, Mwathani! Itûkûthira!”

Yiesû aûka, aagondokera kîbuubani na makûmbî ma rûûyî, gwakirîîria. 25Yiesû aûria arutwa baake, “Bûrî kû wîtîgio bwenu?”

Arutwa baarigara na baaguaya. Baûrania, “Ka muntû ûyû arî ûû n'ûntû wana ruuo na rûûyî ibikûmwathîkîra?”

Yiesû ooria muntû aarî na kîrundu kîîthûûku

(Math. 8:28-34; Mko. 5:1-20)

26Yiesû na arutwa baake bakûringa rûgongo rûra rûngî rwa îria, baakinya nthîgûrû ya Angeraca îra yeerekanîrîte na Gariiri.

27Bakuuma îtarûûni baakinya nthîgûrû, baakomana na muntû aarî na kîrundu kîîthûûku mûno. Muntû ûyu naarî akuuma taûni îra aatûîre. Ataakaraga mûciî na ateekagîra nguo kwa îgiita rîîraaya. Aakaraga makurunguuni kûra antû baakuû baathikagwa. 28Akwona Yiesû aanjîîria gûkaya mûno, eegwîthia nthî magûrûûni maake. Augîîria na inya auga, “N'ata ûkwenda naani, Yiesû, Mwana wa Ngai ûra atûûraga îgûrû mûno? Itû ngûkwereka menya ûnnyamaaria!” 29Augire ûgu n'ûntû Yiesû naarî akwîra kîrundu gîku kiume kîrî we. Muntû ûyu aakaraga ogeetwe na nyororo njara na magûrû. Îndî amwe noogu, rîra kîrundu gîku kîamûgwataga, aathitimûkaga nyororo igatuîkanga akaûra akathi bwa rwanda.

30Yiesû amûûria, “Wîtagwa ata?”

Muntû ûyu amwîra, “Mbîtagwa Mbûûtû.” Aarî na irundu mûkondo. 31Irundu bibu biereka Yiesû biamwîra, “Itû ûtigaatwîngatie ûtwîra tûthi bwa ndoromera!” 32Ikwarî na ngûrwe inyingî ciarîîthîîtue kîrîmaani waagu akubî. Irundu bibu biereka Yiesû biamwîra, “Twîtîgîîrie tûthi ngûrweeni iira.” Yiesû abiîtîgîîria. 33Irundu bibu biauma kîrî muntû ûyu, biathi biathûngîra ngûrweeni inu. Ngûrwe inu cionthe ciaugia ciîndamîîte na mpara ciemina îriani, ciaûra na rûûyî.

34Antû bara bairîîthîîtie bakwona ûgu, baugia rwîro baathi. Baatambia ntheto taûni na ntûûra ira ciarî akubî. 35Antû bauma taûni baathi kwîbonera bûra mantû mamu maakarakari. Bakûthi kîrî Yiesû, beethîra muntû ûyu aarî na irundu biithûûku akari nthî magûrûûni ma Yiesû. Bakwona eekîrîte nguo na kîongo gîake gîtarî ûntû, baatua kwîgua ûguaya. 36Bara booneete mantû mamu magîkarîka beera antû bûra muntû ûyu aarî na irundu biithûûku oorangiirue. 37Antû bonthe ba gîteere gîku kîa Angeraca, beera Yiesû aume agu athi n'ûntû ibeegiirue ûguaya mûno. Yiesû aatwa îtarûûni aathi.

38Muntû ûyu aarî na irundu bibu eereka Yiesû bathiyania. Yiesû amûregeera amwîra, 39“Înûka ûkeere antû beenu bûra Ngai akûrûthîra.” Muntû ûyu akuuma agu aathiire agîtûmagîîria taûniini înu yonthe akîîraga antû bûra Yiesû amûrûthîra.

Yiesû ooria kaarî ka Njairû na mûka aaruaga nthakame

(Math. 9:18-25; Mko. 5:21-43)

40Yiesû agûcooka rûgongo rûra rûngî rwa îria, kîrîndî kîra kîamweteerete kîamûthagaana. 41Mûtongoria ûmwe wa *sinagoogi eetagwa Njairû aaya, eegwîthia nthî magûrûûni ma Yiesû. Amwereka bathi mûciî wake 42n'ûntû kaana gaake ga kaarî ikaarî akubî gûkua. Kaarî gaku kaarî ka mîanka îkûmi na îîrî na Njairû ataarî na kangî.

Yiesû athiîte, kîrîndî gîa antû ikîamwinyîkaga. 43Kîrîndîîni gîku ikwarî na mûka aanyamaarîîte mîanka îkûmi na îîrî akîruaga nthakame. Eenyangîîtie into biake bionthe akîragûragîrwa na gûtirî ndagitaarî aûmba kûmworia. 44Mûka ûyu aaya bwa nyuma ya Yiesû, amûtongithia mûthia wa nguo yake. Nthûti îmwe nthakame îra mûka ûyu aaruaga yatiga.

45Yiesû aûria, “N'ûû aantongithia?” Bonthe baakaana.

Petûrû amwîra, “Mwathani, nwa antû wababa bagûcereereete bakwinyîkîîte.”

46Yiesû auga, “Kûrî muntû aantongithia n'ûntû inkûmenya kûrî inya yambuma.”

47Mûka ûyu akwona akûmenyerwa, aaya akiinainaga n'ûguaya. Aagwa nthî mbere ya Yiesû. Antû bonthe bakîîgagua amwîra gîtûmi gîa kûmûtongithia na bûra oorangua nthûti îmwe. 48Yiesû amwîra, “Wîtîgio bwaku bûgûtûma wora. Îthi na ûkiri, mwarî wakwa.”

49Yiesû akîaragia woogu, Njairû aareeterwa ntûmwa i mûtûmwa kuuma mûciî wake. Eerwa, “Nootanyamaaria mwarimû kaarî gaaku gagûkua.”

50Yiesû eegua ûgu, eera Njairû, “Ûtikaamake, îgua ûrî na wîtîgio, mwana akoora.”

51Agûkinya mûciî wa Njairû, Yiesû aathûngîra nyomba barî na Petûrû, Njoana, Njakubu na aciari ba kaana gaaku. Gûtirî bangî eetîgîîria bathûngîra ku. 52Antû bonthe bara baarî oogo ibaarîragîra kaana gaku mûno. Yiesû abeera, “Tigaani kûrîra. Kaarî gaka ti gakuû, ikamaami.”

53Antû boona ta gûtarî bu augaga n'ûntû ibaiyî i gaakuû. 54Yiesû aagwata kaarî gaku njara. Akeera, “Kaarî, ûkîîra!” 55Kaarî gaku kaariûka, gaûkîîra nthûti. Yiesû abeera bakarûmie gîntû gîa kûrîa karîe. 56Aciari ba ko baarigara. Yiesû abakaania abeera batikeere muntû mantû mamu.

Currently Selected:

RUKA 8: thk

Highlight

Copy