NGÛGÎ 14

Paûrû na Baranaba baatûmîîria Ikoniamu

1Paûrû na Baranaba baathi *sinagoogiini naagu Ikoniamu ta wîthîre. Baaria rwaria rwatûma Ayaundi baingî na antû baingî bataarî Ayaundi beetîgia. 2Îndî Ayaundi bara baaregire gwîtîgia beengîîra bara bataarî Ayaundi, bara bateetîgia, baatûma bamena bara beetîgiirie. 3Paûrû na Baranaba baakarakaranga naagu kagiita kaaraaya bagîtûmagîîria na ûcamba mantû ma Mwathani. Na Mwathani noonanagia wabu ntûmîîri înu Paûrû na Baranaba baatûmagîîria îgûrû rîa ûtugi bwake yarî ya mma. Oonanagia na biama bira aaringaga na magegania mara oonanagia gûkûrûkîîra kîrî bo. 4Antû ba taûni înu bataarî kîmwe. Kûrî bara baagwatanagîra na Ayaundi, na bara baagwatanagîra na atûmwa.

5Gîkundi gîa antû bamwe bataarî Ayaundi, Ayaundi bamwe, na atongoria baao baabanga bathîînie Paûrû na Baranaba na babaringange na maiga. 6Paûrû na Baranaba bakûmenya mûbango ûyu, baakuthûka. Baakûrûkîîra taûni yeetagwa Rîstira na îngî yeetagwa Ndabi, na gûntû kûra kwarî akubî na cio. Taûni inu ciarî gûntû gweetagwa Rikonia. 7Na baathiyaga bagîtûmagîîria gûntû gûku kunthe baakûrûkagîîra.

Paûrû na Baranaba baatûmîîria Rîstira na Ndabi

8Taûni ya Rîstira, ikwarî na muntû aarî ûmwonju mbayo. Aacierwe atakûûmba kûthi. 9Muntû ûyu aathikîîria Paûrû agîtûmîîria. Paûrû amûcûûba oona naarî na wîtîgio bwa gûtûma oorua. 10Paûrû amwîra na inya, “Rûngama ûkinye nthîgûrû na magûrû maaku!” Muntû ûyu aûka na mpwî, aatua kûthi.

11Kîrîndî gîkwona ûgu Paûrû aarûthire kîanjîîria kûringa gîtuma na rwaria rwao rwa Kîîrikonia. Bauga, “Ngai ikûûya ikari ta antû!” 12Beeta Baranaba Cus. Paûrû n'we bamwîta Amis n'ûntû n'we aarî mwaria ûra mûnene.#14:12 Cus aarî mûnene wa ngai cia Angiriki na Amis aarî mûtûmwa wa ngai cionthe. 13Ikwarî na mûthînjîri wa ngai Cus taûni înu. Aatûmîkaga kîromberooni kîa ngai yake. Kîrombero kîarî ome ya taûni. Mûthînjîri ûyu akwîgua ûgu gwakarîkire aaya na ndeegwa na maûa mwanka mwîrîgaani wa taûni înu. We na kîrîndî ibeendaga kûrutîra Paûrû na Baranaba igongwana.

14Paûrû na Baranaba bakûmenya ûgu, baatembûranga nguo ciao. Baugia rwîro baathûngîra kîrîndîîni bakiugaga na inya, 15“I kî n'ûntû bûkûrûtha ûûgû? Anga tûtirî antû ta biû. Tûrî aaga tûbwîra bûtigane na mantû ma ûtheri bûrombage Ngai ûra atûûraga mwoyo. N'we Mûûmbi wa îgûrû, nthîgûrû, maria, na bionthe bira birî ku. 16Tene, Ngai neetîgîîrîîtie mîgongo yonthe îrûtha wabûra îkeenda. 17Îndî rîonthe Ngai noonanagia arî oogo kuumania na mantû meega mara abûrûthagîra ta kuurithia mbura kuuma îgûrû, gûkûria imera kagiita ka bio, kûbwaa biakûrîa, na kûbûûyûria gîkeno nkorooni cienu.” 18Ikwarî na inya Paûrû na Baranaba kûgiria antû babu babarutîra kîgongwana. I mantû mamu baugire baabagiriirie na mo batirarûtha ûgu baabangîîte.

19Ayaundi bamwe baaya baumîîte taûni ya Antiokia na bangî baumîîte Ikoniamu. Beengîîra antû baaringanga Paûrû na maiga. Bamûkururia bamuumagarûkia ome ya taûni bakîthûgaanagia bakûmûûraga. 20Îndî eetîgîri bakwîthîrana bamûthiûrûka, Paûrû aûkîîra aacooka taûni kaîrî. Rûûni rûkîîrî baathi na Baranaba bwa taûni ya Ndabi.

Paûrû na Baranaba baacooka Antiokia ya Sîîria

21Paûrû na Baranaba baatûmîîria ntheto îmbega Ndabi. Baatûma antû baingî batuîka eetîgîri. Bauma agu baacooka baakûrûkîîra Rîstira na Ikoniamu mwanka Antiokia ya Pisindia. 22Na gûku kunthe baakûrûkagîîra beekîra eetîgîri wîru, babaûmîîria wîtîgio. Babarutana babeera, “Nwa mwanka tûnyamaare mûno tûkîîya gûkinya ûneneeni bwa Ngai.” 23Paûrû na Baranaba baathuura akûrû ba wakîra kanica. Baatîîrîra kûrîa irio bakîbarombera. Babanenkanîra ûmenyeeriini bwa ûra beetîgîîtie. 24Paûrû na Baranaba baageendeera nthîgûrû ya Pisindia, baakinya Pamburia. 25Bagûtûmîîria taûni yeetagwa Periga, baakûrûka baathi Ataria.

26Bauma agu baatwa meeri baacooka Antiokia ya Sîîria. Aaga naara eetîgîri baabanenkanîîre ûmenyeeriini bwa ûtugi bwa Ngai mwanjîîrioni wa ngûgî înu baarîîkiirie. 27Bagûkinya agu Antiokia, beeta antû ba kanica amwe. Babeera mantû mara Ngai aarûthîîte gûkûrûkîîra kîrî bo, na bûra eere antû batarî Ayaundi kaanya ga gwîtîgia. 28Paûrû na Baranaba baakara na eetîgîri babu îgiita rîraaya mûno.

Currently Selected:

NGÛGÎ 14: thk

Highlight

Copy