NGÛGÎ 11

Petûrû aacooka Njerusaremu

1Atûmwa na eetîgîri bara bangî ba Njundea beegua antû bataarî Ayaundi ibeetîgîîre kiugo kîa Ngai. 2Petûrû agûcooka Njerusaremu, eetîgîri bamwe ba Ayaundi bataagwatanîra n'we. 3Bamwîra, “Ûrathûngîîre nyomba cia antû batarî bataane warîyanîra na bo!”

4Petûrû aanjîîria kûbataranîria bwega bûra gwakarîkire. Abeera, 5“Ntugû îmwe ndî taûni ya Njopa nkîrombaga, ndoona kîoneki. Ndoona ndeendamîîrua mwanka ara ndarî gîntû gîakari ta cuka înene îtambûrûkîîtue kuuma îgûrû, îrî ngwate koona cionthe irî inya. 6Ndaraithîîria bwega ndoona îrî na nyamû cia mîthemba yonthe. Nyamû cia magûrû mana, cia mîciî na cia kîthaka, cia gwîkururia, na nyoni. 7Ndeegua kayû kambîîra, ‘Petûrû, thînja nyamû ino wîgaagûre.’

8“Ndauga, ‘Arî buru, Mwathani, n'ûntû gûtirî rîo ndaarîa gîntû gîtaagîrîte kana gîtarî kîtheru.’

9“Kayû gaku kaaragia kuuma îgûrû kaîrî kambîîra, ‘Ûtigeete into Ngai atheretie bitaagîrîte.’ 10Gwakarîkire ûgu maita mathatû, rîru nyamû inu cionthe ciacookua îgûrû.

11“Îgiitaani warîru ikwarî na antû bathatû baarûngi agu nyomba înu ndakaraga. Baatûmîîtwe kîrî niû kuuma Kaisaria. 12Kîrundu aambîîra ntikeegue ndî na nkanja ndega kûthi na bo. Aruayia baba tûraayaniirie na bo kuuma Njopa, baba bathanthatû bûkwona aaga, i bo twathiire na bo nyomba ya muntû ûyu eetagwa Koronerias. 13Tûgûkinya, Koronerias atwîra bûra oonangire mûraîka aaya kîrî we nyomba yake. Mûraîka ûyu amwîra, ‘Tûmana Njopa wîtîrwe muntû agwîtwa Simioni, kaîrî Petûrû. 14Agakwîra mîgambo îgaatûma wonoka na antû baaku bonthe.’

15“Nkwanjîîria kwaria, Kîrundu Ûmûtheru abeendamîîra wata bûra na tiû aatwîndamîîre kagiita ka mbere. 16Ndaririkana mîgambo îra Mwathani aariirie auga, ‘Njoana aabaatithaniirie na rûûyî. Îndî bûkaabaatithua na Kîrundu Ûmûtheru.’ 17Weegua Ngai naabeere kîewa ta kîra tiû aatwere tûgwîtîgia Mwathani Yiesû Kîrîstû rî, ndî ûû ndigîîria Ngai?”

18Bara bataagwatanagîra na Petûrû bakwîgua mantû mamu baatiga. Baakumia Ngai bauga, “Kwoogu Ngai neete antû batarî Ayaundi kaanya kinya bo beerira kaingo batûûra mwoyo?”

Kanica ya Antiokia

19Eetîgîri bara baanyagaaraniirie n'ûntû bwa kûnyamaarua kûra kwaumaniirie na gûkua gwa Stibini, bamwe baao baathiire bwa nthîgûrû ya Boinîcia, Kupooro na taûni ya Antiokia bagîtûmagîîria Ayaundi bonka. 20Îndî bamwe ba bo ba kuuma Kupooro na Kureni baathiire Antiokia baatûmîîria mantû ma Mwathani Yiesû kîrî antû bataarî Ayaundi. 21Inya ya Mwathani nîarî amwe na bo. Antû baingî beetîgia, baagarûka baatuîka ba Mwathani.

22Mantû mamu maakinyîîra kanica ya Njerusaremu baatûma Baranaba athi Antiokia. 23Agûkinya oona bûra Ngai aathaarimaga antû, aakena. Abeekîra wîru bonthe abeera bathi na mbere nkoro ciao kwîgua irî kîrî Mwathani, beerikîîtie. 24Baranaba aarî muntû ûmwega na aûyûrîîtwe i Kîrundu Ûmûtheru, na aarî na wîtîgio bûûnene mûno. Antû baingî boongeereka baatuîka ba Mwathani.

25Baranaba auma Antiokia aathi Taarisas gûcûa Saûrû. 26Akûmûgwatithania baacookania n'we Antiokia. Baranaba na Paûrû baagwatana na kanica ya Antiokia, baakarania na bo mwanka wathira wabakîrutanaga gîkundi kîînene gîa antû. Na agu taûni ya Antiokia noogo eetîgîri beetîîrwe rîa mbere ‘Akîrîstû’.

27Kagiitaani wagaku iroria bimwe bia kuuma Njerusaremu biaya Antiokia. 28Ûmwe wa iroria bibu eetagwa Agabas, aarûngama. Kwa inya ya Kîrundu Ûmûtheru aaroria auga yûûra rîînene mûno rîkaaya nthîgûrû yonthe (na wabu yûûra rîru irîayire kagiita kara mûnene ûra eetagwa Kîraundia aathanaga Rooma). 29Eetîgîri ba Antiokia baagwatanîra bauga wakîra muntû arute gîntû kûringana na bûra inya yake îgana batûme ûteethio kîrî eetîgîri ba Njundea. 30Beethîrania baatûma Baranaba na Saûrû bairîra akûrû ba kanica, Njerusaremu.

Currently Selected:

NGÛGÎ 11: thk

Highlight

Copy