Mark 1

Mapəhay aŋa Yuhana masla maɗàh batem.

(Mata 3.1-12; Luka 3.1-18; Yuhana 1.19-28)

1Aganay gay delga uwana adzəka à vok lakəl aŋa Yesu, Kona aŋa Zəzagəla, uwana mafal dzakwa à gəl gà. 2La wakità uwana la abà Yesayya atsetsèr, Zəzagəla agòɗ:

ˈ“Aganay gəsləl à awtày masləlay gulo, la huma aŋak kà maɗahkaŋ tetəvi à ahəŋ.”ˈ#Malaki 3.1

3Uwaga kà kuda aŋa dza uwana awiyay la fəta la abà:

ˈ“Ɗahàwla azlatetəvi à Sufəl Zəzagəla à ahəŋ tərra.”ˈ#Yesayya 40.3

4Kiya uwaga Yuhana apəhla vok ala la fəta la abà. Az gay Zəzagəla, anavà azladza uwana tasà à waŋ à slaka aŋha: ˈ“Kə̀sàw batem, uwana apəhla ala kà kadapəhaw gay la ləv ala, ŋgaha Zəzagəla adàmamatsakula tsakana ala.”ˈ 5Azladza la makoray masla Yahudiya, la azladza la Urusalima gesina, tasà à waŋ à slaka aŋha, uwana tasə̀lla tsakana aŋatà à uda. Yuhana aɗahà à atà batem la mukwà Urdun la abà.

6Yuhana adùw lukut maɗehəŋga à vok la aŋidz aŋa zlugumi, rəts awadà vok ala la parapara zlap, tatak may aŋha kà hayyaw la zuway mazuway. 7Apə̀h à azladza, agòɗ à atà: “Dza uwana atsa à waŋ la lig gulo la ahəŋ kà, aɗuwa gi la məŋga, gəsla gay kà makəl gəl à ahəŋ aŋa mapəl zuwiɗ kwimik aŋha ala aw. 8Gi kà, gəɗahakulla batem kà la iyaw, ama masla kà aɗahakullaŋ kà la Masasəɗok Zəzagəla.”

Yuhana aɗàh batem à Yesu

(Mata 3.13-17; Luka 3.21-22)

9La abatà Yesu asà à waŋ la gudəŋ Nazaret la kutso Galili. Yuhana aɗahalla batem la mukwà Urdun la abà. 10Mok uwana Yesu asà à uda la iyaw la abà, anəŋà à zagəla kà, zagəla mapəzl à ama ala gà. Anəŋà Masasəɗok Zəzagəla atsà à ahəŋ à gəl aŋha bokuba habakoku. 11Ŋgaha tatsənà kuda uwana atsə̀n à ahəŋ la zagəla: “Kak bəzi gay ləv gulo, gərabay məŋga kà kak.”#1Musa 22.2; Mahabay 2.7; Yesayya 42.1

Sufəl aŋa mawisiga apapat Yesu

(Mata 4.1-11; Luka 4.1-13)

12La lig la ahəŋ, katskats Masasəɗok Zəzagəla adala Yesu à fəta à abà. 13Adzà à ahəŋ la abatà mavakay dzik ufaɗ, ŋgaha seteni apapàt masla. Yesu adzà à ahəŋ la tataka azlatatak fəta la abà, ŋgaha azlamalika tazlàk masla bay.

Yesu azal azlaməna makas kilfi ufaɗ

(Mata 4.12-22; Luka 4.14-15; 5.1-11)

14Tadùw Yuhana à daŋay, kiya uwaga Yesu ahàd à kutso Galili, kà maz gay matsiɗayga aŋa Zəzagəla. 15Agòɗ: “Kaslà adaslay à dagay kà Zəzagəla adzəka makoray aŋha. Pə̀hàw gay la ləv ala, dìŋàw gəl à gay matsiɗayga aŋa Zəzagəla à vok!”

16Mok uwana Yesu anə̀f à gay dərəv aŋa Galili, anəŋà azlaməna makas kilfi səla, Səmon la deda aŋha Andəre. Tadàw dzarawa à iyaw abà kà makasla kilfi. 17Yesu agòɗ à atà: “Sàw à waŋ, nə̀fàw gi, gədàpakakulla kà azlaməna makas azladza.” 18Katskats tasàk à dzarawa aŋatà, tanəfà masla.

19Uwana adada à huma à gay ŋuv, anəŋà azlabəza aŋa Zebede, Yakuba atà la Yuhana, atà la kəslah iyaw la abà taɗàh dzarawa aŋatà. 20Katskats Yesu azàla atà, tasàk à baba aŋatà à ahəŋ la azlaməna sləray aŋha la kəslah iyaw la afik, ŋgaha tanəfà Yesu.

Dza la masasəɗok mawisiga

(Luka 4.31-37)

21Yesu la azlaməna matapla la slaka aŋha tahàd à Kapernahum. La vuɗ maduw ləv aŋa azla Yahudiya, Yesu adà à gày madəv kuɗa aŋatà à agu kà matapatàla. 22Azladza uwana tatsənà gay aŋha kà, ləv avàl atà à gay, kà uwana atapàtàla kà bokuba azlaməŋga aŋa azlaməna madzeŋ wakità Zəzagəla aw, ama bokuba dza uwana akor ndzəɗa.

23Mok uwatà, dza la masasəɗok mawisiga apə̀hla vok ala la gày madəv kuɗa uwatà la aku, awiyà: 24“Mana à gay aŋak la anu ma? Yesu, kak zil Nazaret! Kasà à waŋ kà mazanula ay? Gəsəl kà, kà kak Tsikaslaga uwana Zəzagəla aslə̀l kak à waŋ.” 25Yesu aslə̀h məlo à masasəɗok uwatà à gəl: “Dzà à ahəŋ titi! Sà dza uwaga lakəl ala!” 26Ŋgaha masasəɗok mawisiga aɓəllakà dza uwatà la ndzəɗa, awiyà la kuda məŋga, ŋgaha asàlla à kəl ala. 27Ləv avàl atà à gay gesina. Tanàvàhà à vok: “Mana gay mawga uwanay asal magoɗay ma? Mana uwaga ma, akor azlamasasəɗok mawisiga la ndzəɗa, ŋgaha azlamasasəɗok mawisiga bay tafa à gəl à gay aŋha?” 28Katskats azladza tazàhà gay lakəl aŋa Yesu la kutso Galili gesina.

Yesu awar azlaməna ɗuvats ala aŋuvaw

(Mata 8.14-17; Luka 4.38-41)

29Uwana tasà à uda la gày madəv kuɗa la aku kà, katskats Yesu ahàd atà la Yakuba ŋgaha la Yuhana à mtəga aŋa Səmon la Andəre. 30Məŋay aŋa Səmon la akàl la vok la slaka mahən à ahəŋ. Mok uwana Yesu abə̀z atà à vok kà, tapə̀hal gay lakəl aŋha. 31Yesu ahàd à slaka aŋha, akə̀s la ahàl, atsìzllàŋ ala, ŋgaha akàl vok asàlla vok ala. La lig la ahəŋ mis uwatà azlàk atà.

32La mokokhu, mok uwana afats adatəɗ à ahəŋ, azladza tasàhla azlaməna ɗuvats aŋuvaw à waŋ à slaka Yesu, la azlauwana la masasəɗok mawisiga. 33Azladza gudəŋ uwatà tahamà gay à vok la gay gamagày aŋha. 34Yesu awaràŋ ala azladza aŋuvaw uwana tas ŋgərpa la azlaɗuvats anik anik gesina, la makuɗəkàh azlamasasəɗok mawisiga, afàhà à atà akur à lig kà mapəhlaŋ ala aw, kà uwana atà: “Məsəl Yesu”, tagòɗ.

Yesu auguzahay la kutso Galili

(Luka 4.42-44)

35Lebəŋ gà bəŋ, afats à lig mas à afik, Yesu atsìzlla ala, ŋgaha asà à uda la kay, ahàd aŋha à fəta à abà ŋgaha adə̀v kuɗa la abatà. 36Səmon atà la azlamanalay aŋha tahàd kà mayàh masla. 37Uwana taɓə̀zal à vok, “Azladza gesina tayàh kà!”, tagòɗal. 38Ama Yesu agòɗ à atà: “Məhàd à azlagudəŋ anik anik, gədàpəhay gay Zəzagəla la abatà babay, kà uwana gəsà à waŋ kà maɗàh sləray uwaga.” 39Kiya uwaga auguzàhàh la kutso Galili gesina. Apàh gay matsiɗayga la azlagay madəv kuɗa aŋatà la aku, ŋgaha akuɗə̀kàh azlamasasəɗok mawisiga à uda.

Yesu awura masla akàl zagəla ala

(Mata 8.1-4; Luka 5.12-16)

40Masla akàl zagəla asà à waŋ à slaka Yesu, akədèɗal à huma à gay, anàval: “Kamkam, baŋa asa à ka kà, kaslala vok kà mawur gi ala!” 41Vok ahàm à Yesu, abiyà ahàl ala, adəɓanì, ŋgaha agòɗal: “Asa à gi, wùr ala!” 42Katskats akàl zagəla asàl à vok ala, awùr ala. 43La lig la ahəŋ, Yesu awùl à masla la mafahal akur à lig, agòɗal: 44“Tsənàŋ lela, kapəh uwaga à dza anik aw, ama hàd kadàpəhla vok à masla mav tatak à Zəzagəla, kà kadawurla, ŋgaha và tatak uwana Musa apə̀h à ahəŋ kà masəlay kà kawùr ala.”#3Musa 14.1-32 45Ama dza uwatà ahàd, adzəkà mapəhay à azladza gesina lakəl aŋa mawurla aŋha. Gay gà la uwaga à uwana Yesu aslàla vok kà mad gudəŋ à abà la dazuwaya aw. Kà uwaga à uwana Yesu adzà à ahəŋ la uda la fəta la abà, la abatà bay, azladza tadàh à awtày à slaka aŋha la kəla slaka gesina.

Currently Selected:

Mark 1: mfh

Highlight

Copy