ROMA, 11

O LE MATAUPU XI.

O le faateaeseina o Isaraelu.

1O lenei, ou te fai atu, Ua lafoaiina ea e le Atua lona lava nuu? Aua ne‘i faapea; auā foi o le Isaraelu a‘u nei, o le fanau a Aperaamo, o le itu aiga o Peniamina. 2E lei lafoaiina e le Atua lona nuu na ia silafia anamua. Ua outou le iloa ea le mea ua fai mai ai le Tusi i le tala ia Elia? ina ua momoli atu e ia ia Isaraelu i le Atua, ua faapea atu, 3Le Alii e, ua fasiotia e i latou au perofeta, ma ua sŏloia ou fata faitaulaga; na o a‘u lava ua toe, ua latou saili foi e fasioti ia te au. 4A ua faapefea ea le tali mai a le Atua ia te ia? Ua ou faatoe mo‘u e toafitugaafe o tagata, o e ua le tootuli lava ia Paala. 5O lenei, e faapea foi i nei ona po, ua i ai e ua totoe e tusa ma le filifiliga o le alofa tunoa. 6Afai foi o le alofa tunoa, ua le o galuega; ana faapea, po ua le toe ta‘ualofatunoaina le alofa tunoa; afai foi o galuega, ua le o le alofa tunoa; ana faapea, po ua le toe ta‘ugaluegaina le galuega. 7O lenei, pe faapefea ea? E lei maua e Isaraelu le mea ua ia sailia, a ua maua e i latou ua filifilia, a ua faamaaaina loto o e ua totoe. 8Pei ona tusia, Ua tuu atu e le Atua ia te i latou le loto moe gase, o mata latou te le vaai ai, ma taliga latou te le faalogo ai, ua oo i ona po nei. 9Ua fai mai foi Tavita, Ia liua lo latou laulau ma mailei, ma matāsele, ma mea e tausuai ai, ia fai foi ma taui ia te i latou; 10ia faapouliuligia o latou mata ina ia le vaai, ia faano‘uno‘u o latou tua e le aunoa. 11O lenei, ou te fai atu, Ua tausuai ea i latou ina ia latou pauu? Aua ne‘i faapea; a o la latou agasala, ua oo ai le ola i nuu ese, e faatupu ai lo latou losilosi. 12A e afai ua fai la latou agasala ma tamaoaiga o le lalolagi, afai foi ua fai le faamativaina o i latou ma tamaoaiga o nuu ese, e le atili ai ea ona faapea o lo latou manuia? 13Auā ou te fai atu ia te outou o nuu ese, auā o a‘u o le aposetolo o nuu ese, ou te vivii i lo‘u faiva; 14pe mafai ia te au ona faatupuina le losilosi i lo‘u aiga, ma ou faaolaina nisi o i latou. 15Auā afai ua maua le leleiga e le lalolagi ina ua lafoaiina i latou, pe faapefea lo latou amiga? E le o le ola ea lea nai e ua oti? 16Afai foi e paia mea faapolopoloina, e faapea foi le paluga uma; a paia le pogai, e faapea foi ona la. 17Afai foi na gaui ese nisi ona la, a o oe o le olive vao, ua faapipiiina oe ia faatasi ma i latou, ma ua tofu faatasi ma i latou i le pogai ma le sua o le olive, 18aua e te faasiasia i ona la; afai foi e te faasiasia, ia e manatu ua le ola le pogai ia te oe, a ua e ola i le pogai. 19Anei e te faapea mai, Ua gauieseina ona la, ina ia faapipiiina ai a‘u. 20Mālie; a ua gauieseina i latou ona o le le faatuatua, a o loo tumau oe ona o le faatuatua; aua e te faamaualuga, a ia e fefe. 21Auā afai ua le faasaoina e le Atua o la na tupu mai ai, ia oe, ne‘i le faasaoina oe. 22Faauta foi i le agamalu ma le toasa o le Atua; o e na pauu e oo ai le toasa; a e oo ia te oe le agamalu, pe afai e te tumau pea i lona agamalu; a le faapea e gauieseina oe. 23O i latou foi, pe afai e le tumau pea i le le faatuatua, e toe faapipiiina i latou; auā e mafaia e le Atua ona toe faapipiiina i latou. 24Auā afai ua salaeseina oe nai le olive vao, na e tupu mai ai, ma ua faapipiiina oe i le olive lelei, na e le tupu mai ai, e le toe faapipiiina ea o la na tupu mai ai i lo latou lava olive i se a? 25Auā le au uso e, ou te loto ina ia outou iloa lenei mea lilo, ina ne‘i tou faafiapopoto; ua faamaaaina loto o isi Isaraelu, seia oo ina ulufale mai le atoatoa o nuu ese; 26ona faaolaina lea o Isaraelu atoa uma, pei ona tusia, E maliu mai le Faaola mai Siona, na te faateaeseina le amio faalematau ia Iakopo; 27o la‘u foi lenei feagaiga ma i latou, pe a aveeseina e a‘u a latou agasala. 28O fili i latou i la le tala lelei, ona o outou; a ua alofaina i latou i la le filifiliga, ona o tupuga. 29Auā e le salamo lava le Atua i ana mea e foaifuaina mai ma lana valaau. 30Auā faapei o outou foi, sa outou le faalogo anamua i le Atua, a o lenei, ua alofaina outou ona ua latou le faalogo; 31e faapea foi i latou ua latou le faalogo i nei ona po, ina ia alofaina i latou foi ona o le alofaina o outou. 32Auā ua punitia e le Atua tagata uma lava i le le faalogo, ina ia alofaina e ia tagata uma lava. 33Aue! le loloto o le tamaoaiga o le poto atoa ma le silafaga a le Atua. E le masuesueina ana faamasinoga; e le mafai foi ona iloa ona ala. 34Auā o ai ea se ua iloa le finagalo o le Alii? po o ai foi se ua pulega faatasi ma ia? 35po o ai se na muai avatua ni mea ia te ia, a e tauia mai ai ia te ia? 36Auā ua fua mai ia te ia, ma ua faia e ia, e iu atu foi ia te ia mea uma; ia ia te ia le viiga e faavavau lava. Amene.

Currently Selected:

ROMA, 11: SOV

Highlight

Copy