ซ้าว เมี่ยน 5
5
หัด ม่าย หวุย เญย เมี่ยน ธ้วด ด๊บ-ลิ่ว เธี้ยง
1 เฒี้ยว บั๋ว โมเซ, 2“อ๋อย หฒุ บั๋ว อิสะลาเอน เมี่ยน หัด ปุ๊ด ก้ม ฮู้ แป่ง เญย เมี่ยน เหธา ซิน หฒั่ง ธ้วด ไม้ หอบ หฒุ ธ้วด เญย หาย หญู่ง ววม, แอ๋ง เหธา หลาย มัวะ หฒุ จั๋น-ไต่ ม่าย หวุย เญย เมี่ยน, ธ้วด กะเหญี่ย หฒิ ด๊บ-ลิ่ว เธี้ยง. 3ไม้ กุ๊น มจั่ง มเซียะ, อ๋อย หฒุ หัด ธ้วด กะเหญี่ย หฒิ ด๊บ-ลิ่ว เธี้ยง เหว่ย ไม้ ปุน นิ่น บัว เญย เธี้ยง, ต้ง เยีย เยียม นิ่น บัว บุด๋ง เญย ต๋อง, ม่าย หวุย.” 4อิสะลาเอน เมี่ยน ฯฒฯ ฮนั้ง น้าย นอ โหฒว, หัด นิ่น บัว ธ้วด กะเหญี่ย หฒิ ด๊บ-ลิ่ว เธี้ยง. เฒี้ยว ฮนั้ง หาย นอ บั๋ว โมเซ, อิสะลาเอน เมี่ยน ฯฒฯ ฮนั้ง วั้ว นอ โหฒว.
โหฒว ต่อง อ๋อย หฒุ ปุ้ย
(เป๊ย หมั่ง เลวี 6:1-7)
5 เฒี้ยว ก๊อง บั๋ว โมเซ, 6“อ๋อย หฒุ บั๋ว อิสะลาเอน เมี่ยน, ไม้ กุ๊น มจั่ง มเซียะ, หาย เต้า โหฒว หาย หญู่ง ต่อง หาย เต้า,#5:6 ไฟ “หาย เต้า โหฒว ต่อง เมี่ยน ฮนั้ง ป้าม เมี่ยน โพว-ทง โหฒว นอ”. วั้ว เต้า ไม้ เหฒียบ ฒัวะ เญย โหฒว ปุน เฒี้ยว, นิ่น ฯฒฯ ต่อง หมี่ อ๊ะ. 7นิ่น อ๋อย หฒุ เหญี่ยม นิ่น โหฒว ต่อง เญย ฒุ์ย, หย่า อ๋อย หฒุ เฒาะ นิ่น โหฒว ต่อง เญย เหยียด ฒู้ง ถุย หฑวน ปุน นิ่น ต่อง วั้ว เต้า, แอ๋ง ปุ้ย ปยา โก๊ว เญย เหยียด โก๊ว. 8มป่า สี ก๊อง หฒุ เมี่ยน โหฒว ต่อง วั้ว เต้า ไต่ หย่า ไม้ ม่าย เธียน-เธะ แล์ง วั้ว เต๋ย ปุ้ย เญย กะน้าย, อ๋อย หฒุ ปุน ไซ เมี่ยน เว่ย ฝูง ปุน เฒี้ยว. เลี่ยม เหว่ย ฟิ นิ่น เญย ฒุ์ย วั้ว เต้า ปะกี ยู่ง โก๊ว อ๋อย หฒุ ปุน. 9อิสะลาเอน เมี่ยน ต้อ ต้าย ฝูง ปุน ไซ เมี่ยน เญย เหยียด ฒู้ง ธีง-เหฑ่ง เญย กะน้าย ฯฒฯ เป๋น ไซ เมี่ยน เญย. 10เก๊าะ-เมี่ยน เญย ธีง-เหฑ่ง กะน้าย เซ เก๊าะ-เมี่ยน กั้น เญย, มป่า นิ่น ฝูง หาย หญู่ง ปุน ไซ เมี่ยน, วั้ว หญู่ง ฯฒฯ เป๋น ไซ เมี่ยน เญย.”
หล่าย เอ๊า เหฮยียน โหฆ
11 เฒี้ยว แอ๋ง ก๊อง บั๋ว โมเซ, 12“อ๋อย หฒุ บั๋ว อิสะลาเอน เมี่ยน, ‘สี ก๊อง หาย เต้า เมี่ยน เญย เอ๊า ยั่ง เพียน เหฒา-เบี่ย, ไม้ เหฒียบ ฒัวะ เญย โหฒว ปุน นิ่น เญย โหฆ, 13ฯฒฯ เหธา กั้น เต้า มจั่ง ตอน เปว๋ย เป่ย นิ่น เญย โหฆ, ไม้ กุ๊น นิ่น โหฒว ไม้ ธีง-เหฑ่ง, ไม้ ม่าย หาย เต้า โหฒว ฒอง-เหฒง, (เหว่ย หฒุ เปว๋ย เญย เฒี่ยง โห่ เมี่ยน เฒาะ ไม้ ตุ๊,) 14หย่า สี ก๊อง โหฆ แฑง-ปวัง, หล่าย นิ่น เญย เอ๊า ม่าย เจ๊า, เอ๊า หย่า หฒะเก้ง โหฒว ไม้ ธีง-เหฑ่ง, อ๋อย หฒุ ต้อ นิ่น เญย เอ๊า มี่ง ไซ เมี่ยน วั้ว. ไฟ สี ก๊อง โหฆ แฑง-ปวัง นิ่น เญย เอ๊า, หล่าย นิ่น เญย เอ๊า ม่าย เจ๊า, ไม้ กุ๊น นิ่น เญย เอ๊า ไม้ ม่าย, นิ่น ธีง-เหฑ่ง เญย, 15โหฆ อ๋อย หฒุ ต้อ นิ่น เญย เอ๊า มี่ง ไซ เมี่ยน วั้ว. หย่า อ๋อย หฒุ เหว่ย นิ่น เญย เอ๊า ต้อ เจี๊ยน อี เมาะ#5:15 ฮิบลู หว่า ก๊อง “เหยียด เอฟา, เหฒียบ โก๊ว เญย เหยียด โก๊ว.” เซ เล่ย ไม้ โก อี เมาะ (2 ลิด). บาลี เบย้า บ๊วน. หย่า ไม้ ตู๋ง โต๋ กะลั้น โย่ว, ไม้ ตู๋ง เฒาะ ฮูง อัน กู้ หงว่าย, เหว่ย หฒุ น้าย เต๋ย เหฒี่ย เญย กะน้าย เซ เหว่ย แฑง-ปวัง เญย เจ๊า, เหว่ย จั๋ง เมี่ยน โหฒว ต่อง เญย สี่.
16“‘ไซ เมี่ยน ฯฒฯ ต้อ น้าย เต้า มเซียะ ตอน ต้าย โซ้ว เจี๊ยน เฒี้ยว เญย หฑะเฮมียน, 17ฯฒฯ เฒาะ เต๋ย ธีง-เหฑ่ง เญย ววม ต้าย ตั๊บ เนีย-แป้ง, แอ๋ง เญา เต๋ย หฒั่ง ทิน-ฮู่ง เญย ด๊บ-ลิ่ว เญย เดา เญย เนีย-บูง ตั๊บ เจี๊ยน. 18ไซ เมี่ยน ฯฒฯ ปุน วั้ว เต้า มเซียะ ตอน โซ้ว เจี๊ยน เฒี้ยว เญย หฑะเฮมียน หย่า ไจ๊ ฆอย นิ่น เญย บะเปยย, แอ๋ง เฒาะ เหว่ย แฑง-ปวัง เญย เจ๊า, เหว่ย จั๋ง เมี่ยน โหฒว ต่อง เญย สี่ วั้ว เต๋ย เหฒี่ย เญย บ๊วน, ปุน นิ่น โป้ว เจี๊ยน. ไซ เมี่ยน กั้น โป้ว เจี๊ยน โฮ้ว เมี่ยน เญย ววม-อิม, 19ฯฒฯ เห่ว วั้ว เต้า มเซียะ ตอน แล์ง เจี์ย แหง่ง หว่า. ไซ เมี่ยน ก๊อง บั๋ว นิ่น, “สี ก๊อง ไม้ ม่าย กั้น เต้า มจั่ง ตอน เหธา เม่ย เปว๋ย, เม่ย หย่า ไม้ ยั่ง เพียน เหฒา-เบี่ย, เยียม เจี๊ยน โหฆ เญย ปั์ว-เดี๊ย ไม้ โหฒว ไม้ ธีง-เหฑ่ง เญย สี่, โท้ ปุน น้าย เต๋ย โฮ้ว เญย ววม ห่อย ไม้ หฒุ เม่ย. 20มป่า สี ก๊อง เม่ย เยียม โหฆ เญย ปั์ว-เดี๊ย แอ๋ง ยั่ง เพียน เหฒา-เบี่ย ฯฒฯ โหฒว ไม้ ธีง-เหฑ่ง, เหธา กั้น เต้า มจั่ง ตอน เปว๋ย, ไม้ เฒ์ย กั้น เญย โหฆ,” 21(เถา น้าย นอม ต๋อง, ไซ เมี่ยน ปุน น้าย เต้า มเซียะ ตอน หฒิว นิ่น แล์ง แหง่ง หว่า หฒุ โฮ้ว. ไซ เมี่ยน แอ๋ง ก๊อง,) “โท้ เฒี้ยว ปุน เม่ย เญย กะเซีย อ๋ม, ธั่ม ฒุ่ย ไจ่, เหญา เหฑ่ง,#5:21-22 ไฟ “ปุน เม่ย ม่าย ไม้ เจี๊ยน กู้งว์า” ไฟ “ปุน เม่ย ไม้ ไฮ่ ม่าย กู้งว์า.” ฯฒฯ เยียม เม่ย เญย เมี่ยน บุด๋ง โหฒว หฒุ เมี่ยน โฮ้ว, หฒุ เมี่ยน เหฒียว เญย เมี่ยน. 22โท้ ปุน น้าย เต๋ย โฮ้ว เมี่ยน เญย ววม-อิม เปียะ เม่ย เญย กะเซีย, ปุน เม่ย เญย กะเซีย อ๋ม, ธั่ม ฒุ่ย ไจ่, เหญา เหฑ่ง.”
“‘วั้ว เต้า มเซียะ ตอน อ๋อย หฒุ เตา, “อาเมน. อาเมน.”
23“‘ไซ เมี่ยน ฯฒฯ เฟี้ย น้าย เต๋ย โฮ้ว เญย หว่า เยียม โซว-หฌุ่น, แอ๋ง หฑาว น้าย เต๋ย หฑั่ง เปียะ วั้ว เต๋ย ววม-อิม. 24นิ่น ฯฒฯ ปุน วั้ว เต้า มเซียะ ตอน ฮบ น้าย โฮ้ว เญย ววม-อิม. ววม ฯฒฯ เปียะ นิ่น เญย ซิน ห่อย นิ่น เตี๊ย โค้ว. 25ไซ เมี่ยน แอ๋ง เฒาะ เยียม มเซียะ ตอน เญย ปั์ว เหว่ย แฑง-ปวัง เญย สี่ ฝ่ง ห่อ เญย บ๊วน, เยียม เฒี้ยว เญย หฑะเฮมียน โป้ว เจี๊ยน ธุ้น กีง ฝ่ง ห่อ ลิ์ว, ฯฒฯ ต้อ มี่ง เถา เหฒี่ย-ต้อง. 26นิ่น แอ๋ง เฒาะ เหยียด เญา เหว่ย จั๋ง เมี่ยน โหฒว ต่อง เญย สี่ เหฒี่ย เญย บ๊วน เฮยี้ยด เหฒี่ย-ต้อง ปั๊ว. ปั๊ว ลิ์ว, ฯฒฯ เห่ว วั้ว เต้า มเซียะ ตอน ฮบ น้าย เต๋ย ววม. 27สี ก๊อง นิ่น โหฒว ไม้ ธีง-เหฑ่ง เญย สี่, ไม้ เหฒียบ ฒัวะ โหฒว ปุน นิ่น เญย โหฆ, ยั่ง เพียน เหฒา-เบี่ย, นิ่น ฮบ ลิ์ว น้าย เต๋ย ววม เปียะ มี่ง, นิ่น ฯฒฯ หฒุ เตี๊ย โค้ว. นิ่น เญย กะเซีย อ๋ม, ธั่ม ฒุ่ย ไจ่, เหญา เหฑ่ง.#5:27 เป๊ย หมั่ง ซ้าว เมี่ยน 5:21-22. นิ่น หย่า เยียม นิ่น เญย เมี่ยน บุด๋ง หฒุ เมี่ยน เหฒียว, หฒุ เมี่ยน โฮ้ว. 28มป่า สี ก๊อง วั้ว เต้า เมี่ยน ธีง-เหฑ่ง เญย, ไม้ ยั่ง เพียน เหฒา-เบี่ย, ฯฒฯ ปุน ธีง นิ่น ไม้ ต่อง, หย่า ไฮ่ ม่าย กู้งว์า เญย.
29“‘น้าย เซ แฑง-ปวัง เญย เล์ย-หลัด, ต้ง มเซียะ ตอน ยั่ง เพียน เหฒา-เบี่ย, เยียม โหฆ เญย ปั์ว-เดี๊ย มี่ง โหฒว ไม้ ธีง-เหฑ่ง เญย สี่. 30ไฟ เมี่ยน หล่าย นิ่น เญย เอ๊า ม่าย เจ๊า ฯฒฯ หั่น นิ่น เญย เอ๊า. ไซ เมี่ยน อ๋อย หฒุ ปุน วั้ว เต้า มเซียะ ตอน เยียม เฒี้ยว เญย หฑะเฮมียน หย่า เอย เจี๊ยน น้าย หญู่ง เล์ย-หลัด เญย ติ้วๆ เล์ย โหฒว. 31โหฆ หย่า ไม้ ม่าย ฒุ์ย อ๊ะ. มป่า วั้ว เต้า มเซียะ ตอน หฒิว นิ่น โหฒว เญย, อ๋อย หฒุ ตี่ง ฒุ์ย.’”
Currently Selected:
ซ้าว เมี่ยน 5: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
