ทิน เต่ย โต้ว 8
8
บยู่ง-ซุ้ย-อิ๋ม ฮ้าบ
1ทิน-ฮู่ง ฒู้ง ไม้ หละคุ โนยา หย่า เหธา นิ่น เยียม ฑั้ง วั้ว เต๋ย เหยียด ฒู้ง แซง-คู้ เฮยี่ย ฒ่อย. ทิน-ฮู่ง ปุน หฑยาว ป่วน เดา-เป้ย, ววม ฯฒฯ ฮ้าบ เจี๊ยน เหฌี่ย. 2เดา-เดี๊ย เญย ววม-ฒี้ง เญย ค้วด เหยียด ฒู้ง ดิบ หมี่ อ๊ะ. กู้ หงว่าย ลู่ง เญย แก้ง หย่า กวน เหฑ่ง. ลู่ง หย่า หฮลอง หมี่ อ๊ะ. 3ววม หมั่นๆ ฮ้าบ เจี๊ยน เหฌี่ย. เจี๋ย ลิ์ว เหยียด แป๊ะ ฮม์ เหฒียบ ฮนอย ววม หธ่อ ฮ้าบ เจี๊ยน เหฌี่ย. 4เถา เธี้ยด หฮลา เหฒียบ เธี้ยด วั้ว ฮนอย, ฑั้ง ฯฒฯ ตี้ง เจี๊ยน อาลาลัด เก้ เญย เหยียด นอม บง-นี้ง. 5ววม แอ๋ง ฮ้าบ เจี๊ยน เหฌี่ย เถา เหฒียบ หฮลา แซง-เยี้ยด วั้ว ฮนอย, บง-นี้ง ฯฒฯ ธ้วด ต้าย.
6เจี๋ย ลิ์ว เฝย เหฒียบ ฮนอย, โนยา คอย ฆอย ต้ง นิ่น โหฒว ต้าย เยียม ฑั้ง เญย ฟง ม่วน 7ฯฒฯ ปู๋ง นอม เหนาะ อา ธ้วด. เหนาะ อา ขูง ได๋ มี่ง ได๋ ต้าย เถา กะเดี๊ย เดา เญย ววม ฮ้าบ ฆาย เหฑ่ง. 8โนยา แอ๋ง ปู๋ง นอม เหนาะ โฆ ธ้วด มี่ง เหว่ย หฒุ นิ่น อ๋อย ฮิ้ว ตุ๊ เดา-เป้ย เญย ววม ฮ้าบ ไฟ ไม้ แก้ง ฮ้าบ. 9มป่า ววม หธ่อ เหยียม เจี๊ยน ลู่ง เดี๊ย. เหนาะ โฆ ล์อ ไม้ ตุ๊ ต๋อง หฑบ ฯฒฯ หฑวน ต้าย เถา ฑั้ง-เฮลน. โนยา แอ๋ง ซูง ปั์ว ฒิบ เปียะ ฑั้ง. 10นิ่น ฒั้ว เสี่ย ฮนอย ลิ์ว แอ๋ง ปู๋ง เหนาะ โฆ เยียม ฑั้ง ธ้วด มี่ง. 11ลู่ง ม์าน-หฮมวัง เหนาะ โฆ หฑวน เถา โนยา วั้ว, ฑุ่ย แป๋ง ดาม เจี๊ยน เหยียด คว้าย กะลั้น น่อม แมง เญย, เญี์ยม เญย. โนยา ฯฒฯ ฮิ้ว ตุ๊ ววม ฮ้าบ เหฌี่ย หมี่ อ๊ะ. 12นิ่น แอ๋ง ฒั้ว เสี่ย ฮนอย ลิ์ว ฯฒฯ ปู๋ง เหนาะ โฆ ธ้วด หฑุ่น. น้าย หฑุ่น เหนาะ โฆ ไม้ หฑวน อ๊ะ.
13โนยา ตุ๊ หลัวะ แป๊ะ เล่ง เหยียด หฮญัง, ฒี่ หฮลา แซง-เยี้ยด วั้ว ฮนอย, เดา-เป้ย เญย ววม ฆาย หมี่ อ๊ะ. โนยา ฯฒฯ แธะ ทง ฑั้ง-ลิ่ว หมั่ง ปวัด เดา ฆาย เต๋ย อ๊ะ. 14เถา เหญ่ย หฮลา หญี่ เหฒียบ เธี้ยด วั้ว ฮนอย, เดา ฆาย เหฑ่ง หมี่ อ๊ะ.
15ทิน-ฮู่ง ก๊อง บั๋ว โนยา, 16“เม่ย เหธา เม่ย เญย เอ๊า-เจว๊ย ตอน-บวั์ง ธ้วด ฑั้ง อ๊ะ. 17เหธา เม่ย เยียม น้าย เต๋ย หญู่งๆ ม่าย แหม่ง เญย กะน้าย, เหนาะ, แซง-คู้ เหธา ญอง เดา เญย กะน้าย อ๋อย หฒุ ต้อ ธ้วด ต้าย เหว่ย ปุน นิ่น บัว โต่ว ป๊วน หฮยาง ต้าย ปวั๊ง ลู่ง เดี๊ย.”
18โนยา เหธา นิ่น เญย เอ๊า-เจว๊ย ตอน-บวั์ง ฯฒฯ ธ้วด เหฑ่ง ต้าย อ๊ะ. 19เหยียด ฒู้ง แซง-คู้ เหธา ญอง เดา เญย กะน้าย เหธา เหนาะ, เหยียด ฒู้ง เยียม เดา-เป้ย ไฮ่ ต์ง เญย กะน้าย, เหยียด หญู่ง เหยียด หญู่ง เญย, ธ้วด ฑั้ง เหฑ่ง.
โนยา หล่ง แซง-คู้ เหฒี่ย เฒี้ยว
20โนยา เหธย นอม เหฒี่ย-ต้อง ต้าย เหว่ย เฒี้ยว. นิ่น แอ๋ง เฒาะ หญู่งๆ ไม้ ม่าย หวุย เญย แซง-คู้ เหธา หญู่งๆ ไม้ ม่าย หวุย เญย เหนาะ, อัน เหฒี่ย-ต้อง เป๋น ปั๊ว เหฒี่ย เญย กะน้าย. 21เฒี้ยว ไฮ์ น้าย เต๋ย เฉีย ดาง, หอบ เฮญี้ยว ไห่, ฯฒฯ เยียม เฮญี้ยว ฮนั้ม, “เยีย เหยียด ลิ์ว ไม้ แอ๋ง เหว่ย เมี่ยน โหฒว หว่าย สี่ โฮ้ว เดา-เป้ย, เหว่ย หฒุ เมี่ยน ม่าน เยียม ไฝ เญย มต้าย ขูง ม่าย เฮญี้ยว โหฒว หว่าย สี่ ฮนั้ง. ยั่ง น้าย เจี๋ย, เยีย ไม้ ฮนั้ง น้าย หฑุ่น เหมียด หญู่งๆ ม่าย แหม่ง เญย กะน้าย.
22“ตะฟ่าน ป้าม เกน หธ่อ เยียม เจี๊ยน เญย เฒี่ยง โห่,
หฒวัง เญย ธุน-เธียว เหธา เซียว เญย ธุน-เธียว,
จวั๊ง เญย เฒี่ยง โห่ เหธา ยัวะ เญย เฒี่ยง โห่,
ตง-เกน เหธา ธุน-เกน,
ลู่ง ฮนอย หฒั่น เหธา ลู่ง ม์วน หฒั่น,
เหยียด ลิ์ว ไม้ ไฮ่ เหฑ่ง.”
Currently Selected:
ทิน เต่ย โต้ว 8: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
