ทิน เต่ย โต้ว 34
34
เยียม เซเคม ฒี่ง ธ้วด เญย สี่
1ยาโค้บ เหธา เลอา ม่าย เต้า เซียะ, บั๋ว เห่ว ดีนา. ม่าย ฮนอย ดีนา ธ้วด มี่ง เหธา วั้ว นอม ต๋อง เญย มเซียะ ตอน หฑย่าว. 2กุ๊น วั้ว นอม ต๋อง เญย ฮีไว เมี่ยน, ฮาโม เญย ตอน, เซเคม, ปวัด ดีนา ฯฒฯ เญา เจี๊ยน นิ่น ธา. 3นิ่น ไฮ์ ฮนั้ม น้าย เต้า เซียะ, ดีนา, ฯฒฯ เหธา ดีนา ก๊อง หลง, อ๋อย ดั๊ว น้าย เต้า เซียะ ฮนั้ม นิ่น. 4เซเคม บั๋ว นิ่น เญย เตีย, ฮาโม, “โท้ เตีย มี่ง เถง เยีย ก๊อง น้าย เต้า เซียะ โอ่.”
5ยาโค้บ ฮิ้ว ตุ๊ เซเคม โหฒว ปุน นิ่น เญย เซียะ เญย เม่ง เต้า หว่าย มป่า ยาโค้บ ไม้ แก้ง ก๊อง หาย หญู่ง เหว่ย หฒุ นิ่น เญย ตอน บัว เยียม วั้ว น่า ปู๋ง แซง-คู้. นิ่น ฒั้ว เจี๊ยน นิ่น เญย ตอน บัว หฑวน.
6เซเคม เญย เตีย, ฮาโม, ธ้วด มี่ง เหธา ยาโค้บ ธ่าง ล่าง. 7ยาโค้บ เญย ตอน บัว เยียม วั้ว น่า เยี้ยด ไฮ์ น้าย เต๋ย สี่ นิ่น บัว ฯฒฯ หฑวน ต้าย. นิ่น บัว ไฮ์ เฮญี้ยว หว่าย เหฑ่ง, เฉีย เจี์ย ไห่ เซเคม ฮนั้ง น้าย นอ โหฒว โตะ ธา ยาโค้บ เญย เซียะ. เซ ไม้ หอบ หฒุ โหฒว เญย สี่ หย่า หมั่ง เผีย ไห่ นิ่น บัว อิสะลาเอน เมี่ยน.
8ฮาโม ก๊อง บั๋ว ยาโค้บ บัว ตอน-เตี๋ย ต่อย, “เยีย เญย ตอน, เซเคม, ฮนั้ม ไห่ น้าย เต้า เซียะ. โท้ เม่ย บัว ปุน น้าย เต้า เซียะ เยีย เญย ตอน หล่ง โหฒว เอ๊า. 9เยียม น้าย มี่ง บัว ล่ม ฑ่อย จิว ทง. ปู๋ง เม่ย บัว เญย เซียะ ปุน เยีย บัว เญย ตอน หล่ง, หย่า ต้อ เยีย บัว เญย เซียะ ปุน เม่ย บัว เญย ตอน หล่ง. 10ฮนั้ง น้าย เม่ย บัว ไฮ่ เหธา เยีย บัว จวั่ง เต่ย-ปูง เยียม. เม่ย บัว อ๋อย เยียม หาย นอม ต๋อง, กุ๊น เยียม ตุ๊ เญย, แอ๋ง ล์อ เดา เหลียบ กั้น เญย งว์า-กอน, เปียะ ธ้วด โหฒว แซง-เอ๋ย.”
11เซเคม หย่า ก๊อง บั๋ว ดีนา เญย เตีย เหธา นิ่น เญย ก๋อ บัว, “โท้ เม่ย บัว ฆอย ฟิม ฆอย เอ๋ย เยีย. เม่ย บัว อ๋อย หล่ง หาย หญู่ง เยีย ฯฒฯ ปุน. 12อ๋อย หล่ง เล์ย-กีง เหธา ฒี่ง เหญ่ย บัวะ เหฒีย กุ๊น ก๊อง ม่าะ! เม่ย บัว อ๋อย หล่ง หาย หญู่ง บัวะ เหฒีย เยีย ปุน เหฑ่ง, ตะฟ่าน ตุ๊ เม่ย บัว เญย เซียะ ฮนั้ง.”
13หลาย เซเคม โหฒว หว่าย นิ่น บัว เญย หมั่ว, ดีนา, เญย เม่ง เต้า, ยาโค้บ เญย ตอน บัว ดั๊ว เซเคม เหธา นิ่น เญย เตีย, ฮาโม. 14นิ่น บัว ก๊อง, “เยีย บัว ไม้ ไฮ่ ปู๋ง เยีย บัว เญย หมั่ว ปุน ไม้ เจี๋ย ก๊าด เญย เล์ย เญย เมี่ยน หล่ง. ฮนั้ง น้าย โหฒว, เยีย บัว เญย เม่ง เต้า หว่าย เหฑ่ง อ๊ะ. 15เยีย บัว ม่าย ดุ ติ้ว เล์ย ฮนั้ง หธีง ไฮ่ แล์ง ปุน, เซ เม่ย บัว เต้าๆ มจั่ง ตอน อ๋อย หฒุ ฮนั้ง เยีย บัว นอ, เจี๋ย ก๊าด เญย เล์ย เหฑ่ง. 16ฮนั้ง หน่าย เยีย บัว ฯฒฯ ไฮ่ ปู๋ง เยีย บัว เญย เซียะ ปุน เม่ย บัว, หย่า ต้อ เม่ย บัว เญย เซียะ ต้าย หล่ง โหฒว เอ๊า. เยีย บัว หย่า ไฮ่ เหธา เม่ย บัว จวั่ง เต่ย-ปูง เยียม. 17มป่า สี ก๊อง เม่ย บัว ไม้ หมวัง เยีย บัว, ไม้ เจี๋ย ก๊าด เญย เล์ย เหฑ่ง, เยีย บัว ต้อ เยีย บัว เญย หมั่ว#34:17 ฮิบลู หว่า ก๊อง เซียะ. เปย๋า อ๊ะ.”
18ฮาโม เหธา นิ่น เญย ตอน, เซเคม, ไฮ์ น้าย เต๋ย หว่า หอบ เฮญี้ยว เญย. 19วั้ว เต้า ตอน ฯฒฯ ไม้ ไง่, เอย เจี๊ยน ยาโค้บ เญย ตอน บัว เญย หว่า ก๊าน เจี๊ยน โหฒว, เหว่ย หฒุ นิ่น ฮนั้ม ไห่ ยาโค้บ เญย เซียะ. นิ่น บัว เหยียด ฒู้ง มั์ว-ต่อย เซ เซเคม โหฒว เก้า โฮล เจี๋ย. 20ฮาโม เหธา นิ่น เญย ตอน, เซเคม, ฯฒฯ มี่ง ฒี่ง แก้ง ด่าง เหธา เหยียด นอม ฒี่ง เญย ก๋อ-โย์ว ก๊อง. 21นิ่น บัว ก๊อง, “น้าย เต๋ย เมี่ยน เหธา บัว โหฒว ก๋อ-โย์ว ต่อย. บัว อ๋อย หฒุ ปุน นิ่น บัว เหธา บัว จวั่ง เต่ย-ปูง เยียม, เปียะ ธ้วด ม์าย หม่าย. บัว เญย เต่ย-ปูง จั๊ง เญย, เก๋า ตุ๊ ปุน นิ่น บัว เยียม เญย. บัว หย่า ไฮ่ หล่ง นิ่น บัว เญย เซียะ. นิ่น บัว หย่า ไฮ่ หล่ง บัว เญย เซียะ. 22น้าย เต๋ย เมี่ยน อะเฮน้ย เหธา บัว จวั่ง เต่ย-ปูง เยียม, เป๋น เหยียด ฝีง, มป่า ม่าย เหยียด ติ่ว นิ่น บัว หธีง ต้าย แล์ง, เซ บัว เต้าๆ มจั่ง ตอน อ๋อย หฒุ ฮนั้ง นิ่น บัว นอ, เจี๋ย ก๊าด เญย เล์ย. 23นิ่น บัว เญย แซง-คู้, นิ่น บัว ม่าย เญย หญู่งๆ กะน้าย ฯฒฯ เป๋น บัว เญย ไม้ เฒ์ย? โท้ ปุน บัว ฮนั้ง น้าย นอ โหฒว. นิ่น บัว ฯฒฯ เหธา บัว เยียม น้าย อ๊ะ.”
24วั้ว นอม ฒี่ง เญย เหยียด หฒวัง ก๋อ-โย์ว ปวั๊ง เฮญี้ยว ฮาโม เหธา เซเคม เญย หว่า. ฒี่ง กะญั์ว เญย เหยียด ฒู้ง มจั่ง ตอน ฯฒฯ เจี๋ย ก๊าด เญย เล์ย เหฑ่ง.
25เจี๋ย ลิ์ว ก๊าด เญย เล์ย ตะฟาม ฮนอย วั้ว ฮนอย, วั้ว เต๋ย มจั่ง ตอน หธ่อ มุน เจี๊ยน เญย. อี เต้า ยาโค้บ เญย ตอน, ดีนา เญย ก๋อ, สิเมโอน เหธา เลวี, ปุ๋ย เจี๊ยน หฑุ ด๊าว เปียะ ฒี่ง, เลี่ยม ไม้ ม่าย หาย เต้า โก๊ว เญ่ย. นิ่น บัว ฯฒฯ เปียะ มี่ง ไต๋ เหฑ่ง วั้ว นอม ฒี่ง เญย มจั่ง ตอน. 26เลี่ยม ฮาโม เหธา เซเคม อี ตอน-เตี๋ย, นิ่น บัว หย่า ไต๋ กวั่ง หมี่ อ๊ะ. หย่า ต้อ ดีนา เยียม เซเคม เญย เปย๊า ธ้วด มี่ง หมี่ อ๊ะ. 27ยาโค้บ เญย ตอน บัว เปียะ น้าย เต๋ย หฒุ ไต๋ ไต่ เญย เมี่ยน เญย เปย๊า, ลู้ เหฑ่ง วั้ว นอม ฒี่ง, หลาย วั้ว นอม ฒี่ง เญย เมี่ยน โหฒว ปุน นิ่น บัว เญย หมั่ว เญย เม่ง เต้า หว่าย. 28นิ่น บัว เฒาะ ปะกี ยู่ง, ยู่ง, ง่ง, ล่อ, เหยียด ฒู้ง กะน้าย. ไม้ กุ๊น เยียม ฒี่ง ไฟ เยียม เด่ย, นิ่น บัว เฒาะ เหฑ่ง หมี่ อ๊ะ. 29หาย หญู่ง ม่าย จ๋า-ฒิ่น เญย กะน้าย นิ่น บัว หย่า เฒาะ เหฑ่ง. เลี่ยม มเซียะ ตอน, เลี่ยม ฝุเจว๊ย หย่า ต้อ เจี๊ยน มี่ง. เลี่ยม นิ่น บัว เญย จา-ตี้ง หย่า ลู้ ฌัง เหฑ่ง หมี่ อ๊ะ.
30ยาโค้บ บั๋ว สิเมโอน เหธา เลวี, “เม่ย บัว ฮนั้ง น้าย นอ โหฒว อ๋อย ปุน เยีย หฒุ สี่, หฒุ คานาอัน เมี่ยน, เปลิดซี เมี่ยน เหธา เหยียด ฒู้ง เยียม น้าย นอม เต่ย-ปูง เญย เมี่ยน ฑอง เยีย อ๊ะ. บัว หย่า ไม้ ม่าย เมี่ยน ธั้ม. สี ก๊อง วั้ว เต๋ย เมี่ยน กั๊บ ชะ ต้าย เบ๊าะ เยีย นอ, เยีย เหธา เยีย เญย เปย๊า ฒง เมี่ยน ฯฒฯ หฒุ เหมียด เหฑ่ง.”
31นิ่น เญย ตอน บัว เตา, “เยีย บัว ไม้ ปุน นิ่น โหฒว ปุน เยีย บัว เญย หมั่ว ต๋อง หม่าย ป๊วน-ซิน เญย มเซียะ ตอน.”
Currently Selected:
ทิน เต่ย โต้ว 34: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
