ทิน เต่ย โต้ว 27
27
ยาโค้บ ตุ๊ อีสัก ปวัง หว่า
1อีสัก โก๋ ไห่ อ๊ะ. มฒีง หย่า บั๊ว, หมั่ง ไม้ ปวัด. นิ่น เห่ว นิ่น เญย ตอน-โฮล, เอซาว, ต้าย ก๊อง บั๋ว นิ่น, “ตอน อ่า.”
เอซาว เตา, “อา เตีย อ่า, เยีย เยียม น้าย โอ่.”
2อีสัก ก๊อง, “เตีย โก๋ ไห่ อ๊ะ. ไม้ ฮิ้ว ตุ๊ หาย ฮนอย ไต่. 3ตอน อ่า, เฒาะ เม่ย เญย จวัง-หฒิน เหธา ฟอง มี่ง เก้ม ป๊วน เต้า อ๊อ ต้าย ปุน เยีย หญั่น. 4โหฒว คู้ เญย ฮนั้ง เหยียด เกา เยีย อ๋อย หญั่น วั้ว นอ, เบ่น ต้าย ปุน เยีย, เหว่ย เยียม เยีย ไม้ แก้ง ไต่ เยีย ตุ๊ ปวัง ฆะฮ้า ลาย วั้ว หฑุ่น หว่า ปุน เม่ย.”
5อีสัก เหธา นิ่น เญย ตอน, เอซาว, อี ตอน-เตี๋ย ก๊อง หว่า วั้ว หฒั่น, เลเบคา หมวัง เจี๊ยน เญย. เอซาว มี่ง เก้ม ป๊วน อ๊อ วั้ว หฒั่น, 6เลเบคา บั๋ว นิ่น เญย ตอน, ยาโค้บ, “อะจัง เยีย ไฮ์ เม่ย เญย เตีย ก๊อง บั๋ว เอซาว, 7‘ป๊วน เต้า อ๊อ เบ่น ต้าย คู้ เญย ปุน เยีย หญั่น เหว่ย เยียม เยีย ไม้ แก้ง ไต่ ตุ๊ เยียม เฒี้ยว เญย หฑะเฮมียน ปวัง หว่า ปุน เม่ย.’ 8ตอน อ่า, ฮนั้ง หน่าย, เม่ย หมวัง เยีย, เอย เจี๊ยน เยีย เญย หว่า โหฒว. 9เม่ย มี่ง ยู่ง กวั้น วั้ว กิ๊น อี เต้า ยู่ง ตอน เหฑว่ย เญย จุ่น เญย ต้อ ต้าย ปุน มา. มา ฯฒฯ เอย เจี๊ยน เหยียด เกา เม่ย เญย เตีย อ๋อย หญั่น คู้ เญย เบ่น ต้าย ปุน นิ่น หญั่น. 10เบ่น เหฒียง เม่ย ต้อ มี่ง ปุน เม่ย เญย เตีย หญั่น เหว่ย เยียม นิ่น ไม้ แก้ง ไต่ ไฮ่ ปวัง ฆะฮ้า ลาย วั้ว หฑุ่น หว่า ปุน เม่ย.”
11ยาโค้บ ก๊อง บั๋ว นิ่น เญย มา, “มา กั้น ฮิ้ว ตุ๊ เญย, เอซาว ธ้วด เปยย ซุๆ วั้ว. เยีย ไม้ ม่าย เปยย, เฮลี้ยว ฌัง เญย. 12ปวั้ง หฒุ เตีย ฮลัว เยีย, นิ่น ฯฒฯ ฮิ้ว ตุ๊ เยีย ดั๊ว นิ่น. นิ่น ไม้ เฒ์ย ปวัง หว่า ปุน เยีย, ฒู้ง เหฒียว เยีย มเปย!”
13นิ่น เญย มา ก๊อง, “เยีย เญย ตอน อ่า, สี ก๊อง หฒุ โฮ้ว นอ, เซ ด๊อด หฒุ มา กั้น. ขูง อ๋อย หฒุ หมวัง มา เญย หว่า ฮนั้ง. มี่ง เฒาะ ยู่ง ต้าย ปุน มา โอ่.”
14ยาโค้บ ฯฒฯ มี่ง เฒาะ ต้าย ปุน นิ่น เญย มา. นิ่น เญย มา เอย เจี๊ยน ยาโค้บ เญย เตีย เหยียด เกา อ๋อย หญั่น เญย เบ่น เหฒียง. 15เลเบคา แอ๋ง มี่ง เฒาะ นิ่น เญย ตอน-โฮล, เอซาว, เญย ลุย-โหว, ต้ง เซียว เจี๊ยน วั้ว เปย๊า เก้า หลง เจี๋ย วั้ว เหยี่ยม, ปุน นิ่น เญย ตอน-ไฝ, ยาโค้บ, ฒุ เจี๊ยน. 16นิ่น แอ๋ง เฒาะ ยู่ง ตอน เญย ด๊บ แน้ด เจี๊ยน ยาโค้บ เญย ปั์ว เหธา จาง, ต้ง ไม้ ม่าย เปยย เญย ต๋อง. ฒอง เหฒียง, 17เลเบคา เฒาะ นิ่น หลิ่ว เล์ย เหฒียง เญย อ๊อ เหธา ฌั้ว ปุน ยาโค้บ โป้ว มี่ง.
18ยาโค้บ มี่ง เถา นิ่น เญย เตีย วั้ว ก๊อง, “อา เตีย อ่า.”
นิ่น เญย เตีย เตา, “ตอน อ่า, เม่ย ต้ง หาย เต้า ตอน?”
19ยาโค้บ เตา, “เยีย เม่ย เญย ตอน-โฮล, เอซาว. เยีย เอย เตีย เญย หว่า เบ่น เหฒียง. เตีย เจี์ย ซิน เฒว์ย เจี๊ยน หญั่น เยีย ป๊วน ต้าย เญย อ๊อ อ๊ะ. หญั่น ลิ์ว, เตีย ตุ๊ ปวัง หว่า ปุน เยีย.”
20อีสัก หน่าย นิ่น เญย ตอน, “ตอน อ้า! เม่ย ฝู่ง ป๊วน ตุ๊ อ๊อ ด่ง หน่าย เซี้ยบ?”
ยาโค้บ เตา, “เฒี้ยว, เม่ย เญย ทิน-ฮู่ง, ปุน เยีย ไฮ่ ปวั้ง อ๊อ เซี้ยบ เญย.”
21อีสัก แอ๋ง ก๊อง บั๋ว ยาโค้บ, “ตอน อ่า, ต้าย ฟัด เต๋ย ปุน เยีย ฮลัว ก๋า, เม่ย หฒะเก้ง เยีย เญย ตอน, เอซาว, เฒ์ย ไฟ ไม้ เฒ์ย.”
22ยาโค้บ มี่ง ฟัด เญย. นิ่น เญย เตีย, อีสัก, ฯฒฯ ฮลัว นิ่น. อีสัก ก๊อง, “เม่ย เญย เฉีย เซ ฮนั้ง ยาโค้บ เญย เฉีย, มป่า เม่ย เญย ปั์ว ไฮ์ ฮนั้ง เอซาว เญย ปั์ว นอ.” 23นิ่น เฒียะ ไม้ ตุ๊ น้าย เซ ยาโค้บ เหว่ย หฒุ ปั์ว ม่าย เปยย ซุๆ ฮนั้ง นิ่น เญย ก๋อ, เอซาว, เญย ปั์ว นอ. อีสัก ฯฒฯ ปวัง หว่า ปุน นิ่น. 24มป่า นิ่น แอ๋ง หน่าย หฑุ่น, “เม่ย หฒะเก้ง เยีย เญย ตอน, เอซาว, ไฟ?”
ยาโค้บ เตา, “เฒ์ย เญย.”
25อีสัก ก๊อง, “ตอน อ่า, ต้อ เม่ย ป๊วน ต้าย เญย อ๊อ ปุน เตีย หญั่น. หญั่น ลิ์ว ฯฒฯ ปวัง หว่า ปุน เม่ย.”
ยาโค้บ ฯฒฯ ต้อ อ๊อ ต้าย ปุน นิ่น หญั่น, แอ๋ง ต้อ อะหงุ่น ติ๊ว ต้าย ปุน นิ่น ฮบ. 26หญั่น ลิ์ว, ฮบ ลิ์ว อีสัก ก๊อง, “ตอน อ่า, ต้าย ฟัด เต๋ย ฒม ตั้ง เตีย เญย เฮมียน.”
27ยาโค้บ มี่ง ฒม นิ่น เญย เตีย วั้ว หฒั่น, นิ่น เญย เตีย ฮน้ม หฒุ ยาโค้บ เญย ลุย เญย ฑยาว ฯฒฯ ปวัง หว่า นิ่น เญย ตอน อ๊ะ.#ฮิบลู 11:20 นิ่น ก๊อง,
“เยีย เญย ตอน ดาง เญย,
ฮนั้ง เฒี้ยว เหธย ฟุ เญย เหลียง-เด่ย ดาง นอ.
28โท้ ทิน-ฮู่ง ปุน บยู่ง-ซุ้ย เยียม วั้ว ลู่ง เหฌี่ย,
หย่า ปุน เม่ย เญย เดา หลง.
โท้ นิ่น หย่า ปุน เม่ย ตุ๊ เบย้า เฮม้ย เหธา เซียง-อะหงุ่น ติ๊ว ธั้ม.
29โท้ ปุน ธั้ม-ฝีง เมี่ยน ฟู-สู เม่ย,
หย่า ปุน ธั้ม-นอม กั๊วะ เญย เมี่ยน เกว่ย เหฌี่ย ป๋าย เม่ย.
โท้ ปุน เม่ย ไฮ่ โหฒว เม่ย เญย มั์ว-ต่อย เญย เฒี้ยว,
หย่า ปุน เม่ย เญย มา เญย เฒ้ย-ฟุน เกว่ย เหฌี่ย ป๋าย เม่ย.
หาย เต้า เหฒียว เม่ย, โท้ ปุน วั้ว เต้า หฒุ เหฒียว.
หาย เต้า ปวัง หว่า เม่ย, โท้ ปุน วั้ว เต้า ตุ๊ เฒี้ยว เหธย ฟุ.”#ทิน เต่ย โต้ว 12:3
เอซาว โท้ อีสัก ปวัง หว่า
30อีสัก ปวัง ลิ์ว หว่า, ยาโค้บ จังๆ ธ้วด มี่ง ฮนั้ง, นิ่น เญย ก๋อ, เอซาว, ป๊วน ตุ๊ อ๊อ หฑวน ต้าย. 31เอซาว ฯฒฯ โหฒว เต๋ย อ๊อ คู้ เญย ต้อ มี่ง ปุน นิ่น เญย เตีย หญั่น. นิ่น ก๊อง, “อา เตีย อ้า! เจี์ย ซิน เฒว์ย เจี๊ยน หญั่น เยีย ป๊วน ต้าย เญย อ๊อ อ๊ะ. หญั่น ลิ์ว, อา เตีย ตุ๊ ปวัง หว่า ปุน เยีย.”
32นิ่น เญย เตีย, อีสัก, หน่าย ก๋า, “เม่ย หาย เต้า?”
เอซาว เตา, “เยีย เม่ย เญย ตอน-โฮล, เอซาว.”
33อีสัก เลี่ยม เฒ่ย ซิน หฒิน ฌ้วนๆ เญย. นิ่น ก๊อง, “วั้ว หญู่ง, หาย เต้า ป๊วน อ๊อ ต้อ ต้าย ปุน เยีย? เยีย โคะ โหะ หญั่น ลิ์ว, เม่ย ฯฒฯ เถา. เตีย ฒู้ง ปวัง หว่า ปุน นิ่น หมี่ อ๊ะ. หฒิว เตีย ปวัง เญย หว่า นิ่น หย่า หฒะเก้ง ตุ๊.” 34เอซาว ไฮ์ นิ่น เญย เตีย เญย หว่า นิ่น เฮญี้ยว มุน ไห่, ปู๋ง-ซีง ปู๋ง-เฉีย เญย เญี้ยม เจี๊ยน ก๊อง, “อา เตีย อ้า! โท้ ปวัง หว่า เยีย. โท้ เตีย หย่า ปวัง หว่า ปุน เยีย ม่าะ!”
35อีสัก เตา, “ต้ง เยีย อ๋อย ปวัง เม่ย เญย หว่า เม่ย เญย โย์ว ต้าย ดั๊ว เยีย ปวัง ปุน นิ่น เหฑ่ง หมี่ อ๊ะ.”
36เอซาว ก๊อง, “นิ่น เญย บั๋ว เห่ว ยาโค้บ#27:36 ยาโค้บ วั้ว โจ๋ว หว่า ไฮ์ ฮนั้ง ฮิบลู หว่า ก๊อง ดั๊ว วั้ว โจ๋ว. เก้ง! ผุย ไห่ อ๊ะ, เหว่ย หฒุ นิ่น ดั๊ว เยีย อี หฑุ่น หมี่ อ๊ะ. เยีย โหฒว ตอน-โฮล ตุ๊ ซูง-โก๊ว เญย เล์ย นิ่น ดั๊ว ตุ๊ หมี่ อ๊ะ.#ทิน เต่ย โต้ว 25:29-34 อี้ หฒั่น ต้ง เตีย อ๋อย ปวัง ปุน เยีย เญย หว่า นิ่น หย่า ดั๊ว เตีย ปวัง ปุน นิ่น เหฑ่ง หมี่ อ๊ะ. อา เตีย อ้า! เม่ย ไม้ เลี่ยว เหยียด เต๋ย ปวัง ปุน เยีย อ๊ะ?”
37อีสัก เตา, “เตีย ปุน นิ่น โหฒว เม่ย เญย เฒี้ยว หย่า ปุน เหยียด ฒู้ง มั์ว-ต่อย เธียน-เธะ โหฒว นิ่น เญย โปว. เลี่ยม เบย้า เฮม้ย เหธา เซียง-อะหงุ่น ติ๊ว เยีย ปุน เหว่ย ยู์ง นิ่น เญย แหม่ง. ตอน อ้า! เยีย ม่าย หาย หญู่ง ไฮ่ เถง เม่ย?”
38เอซาว ชะ โท้ นิ่น เญย เตีย, “อา เตีย อ้า! เม่ย ขูง ม่าย ดุ หญู่ง ปวัง เญย หว่า ฮนั้ง? โท้ เม่ย หย่า ปวัง เต๋ย ปุน เยีย ม่าะ!” นิ่น แอ๋ง เญี้ยม หฑุ่น อ๊ะ.#ฮิบลู 12:17
39อีสัก ฯฒฯ ก๊อง บั๋ว นิ่น,#ฮิบลู 11:20
“เม่ย หฒุ เยียม เล่ย เดา-โท้ว หลง เญย ต๋อง โก.
ลู่ง เญย บยู่ง-ซุ้ย เม่ย หย่า ไม้ ตุ๊.
40เม่ย อ๋อย หฒุ เขา หฑุ ด๊าว ยู์ง แหม่ง,
หย่า อ๋อย หฒุ ฟู-สู เม่ย เญย โย์ว.
มป่า เม่ย หาย หฒั่น ไฮ่ ซิ้ม ตุ๊ ดุ๊ด นิ่น,
เม่ย ฯฒฯ ไม้ หฒุ นิ่น กุ๊น.”#27:40 ฮิบลู หว่า เป๊ย ฮนั้ง ม่าย เดี๋ยง-ก์า ก์า เจี๊ยน จาง มป่า ตุ๊ ว้วด เน้า หมี่ อ๊ะ. เอ๋ย เล์ย เซ ซิ้ม ดุ๊ด, ไม้ หฒุ เมี่ยน กุ๊น.#ทิน เต่ย โต้ว 36:8; 2 ฮู่ง โต้ว 8:20
อีสัก เห่ว ยาโค้บ มี่ง ฮาลาน
41เอซาว ฑอง ไห่ ยาโค้บ หลาย นิ่น เญย เตีย ปวัง หว่า ปุน ยาโค้บ. นิ่น เยียม เฮญี้ยว ฮนั้ม, “ฮนั้ม ต้าย ไม้ เล่า เยีย เญย เตีย เกวย เสย. ฒั้ว เยีย บัว เฑ่า เญี้ยม เญย เฒี่ยง โห่ เจี๋ย ลิ์ว, เยีย อ๋อย ไต๋ ยาโค้บ กวั่ง อ๊ะ.”
42เลเบคา ไฮ์ ก๊อง นิ่น เญย ตอน-โฮล, เอซาว, ต๊า หฒะเอ๋ย ไต๋ ตอน-ไฝ, ยาโค้บ, นิ่น ฯฒฯ เห่ว ยาโค้บ ต้าย ก๊อง บั๋ว นิ่น, “หมวัง ก๋า, เม่ย เญย ก๋อ, เอซาว, ต๊า หฒะเอ๋ย อ๋อย จ๊าว วิน ไต๋ เม่ย. 43ตอน อ้า! หมวัง มา เญย หว่า โอ่. เม่ย อ๋อย หฒุ เปย๋า มี่ง ฮาลาน ฒี่ง, มา เญย ก๋อ, ลาบาน วั้ว. 44อ๋อย หฒุ เหธา นิ่น บัว เยียม โต่ว ฒั้ว เม่ย เญย ก๋อ เญย กะเฉีย ฟิว มี่ง, 45หละคุ เม่ย โหฒว ปุน นิ่น เญย สี่, เยีย มต้าย ปุน เมี่ยน มี่ง ต้อ เม่ย หฑวน. มา ฝู่ง ไฮ่ ปุน ตุ๊ เหยียด ฮนอย ไต่ อี เต้า ตอน?”
46เลเบคา ก๊อง บั๋ว อีสัก, “หลาย เอซาว เญย อี เต้า ฮิดไท เมี่ยน เอ๊า, เยีย ไม้ หน่อย ฟ่าน เฒี่ยง อ๊ะ. สี ก๊อง ยาโค้บ แอ๋ง หล่ง เต้า น้าย นอม เต่ย-ปูง เญย ฮิดไท เมี่ยน เญย เซียะ โหฒว เอ๊า นอ, เยีย ไต่ เก้า หลง.”
Currently Selected:
ทิน เต่ย โต้ว 27: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
