กง-โฒ่ 25

เปาโล โท้ มี่ง โลมา ต้ม ฒิ่ว ฮู่ง วั้ว ตุ๋น สี่

1เฟสะทัด ต้าย เถา นิ่น เญย แซ้ง, โหฒว เจี๊ยน หฒูง ตุ๊ ปัว ฮนอย, นิ่น ธ้วด ซีซาลียา มี่ง เยลูซาเลม ฒี่ง. 2ไซ เมี่ยน เปย๊ย เหธา ยิวไท เมี่ยน เญย เปย๊ย ฯฒฯ มี่ง เฟสะทัด วั้ว โก๋ เปาโล, 3โท้ นิ่น เถง เต๋ย นิ่น บัว, ฝูง เปาโล มี่ง เยลูซาเลม ฒี่ง. นิ่น บัว ฮนั้ง น้าย นอ โท้ เหว่ย หฒุ นิ่น บัว ต๊า หฒะเอ๋ย ตั๊ง เจี๊ยน ด๊าม-เจ๊า ไต๋ เปาโล. 4เฟสะทัด เตา, “เปาโล ขวน เจี๊ยน เยียม ซีซาลียา ฒี่ง. ไม้ หนั่ง เล่า เยีย หย่า อ๋อย หฑวน อ๊ะ. 5สี ก๊อง เปาโล โหฒว ต่อง หาย ติ่ว, อ๋อย หฒุ ปุน เต๋ย เม่ย บัว โหฒว โฮล เญย เมี่ยน กัน เจี๊ยน เยีย มี่ง โก๋ นิ่น.”

6เฟสะทัด เยียม เยลูซาเลม ฒี่ง ไม้ เก้า เล่า เหฮยียด ฮนอย ไฟ เหฒียบ ฮนอย หธีง ต้าย หฑวน ซีซาลียา ฒี่ง. ตะเหญ่ย ฮนอย นิ่น เฒว์ย เจี๊ยน สี่ ต้อง เห่ว เมี่ยน ต้อ เปาโล ต้าย. 7เปาโล เปียะ ต้าย, เยียม เยลูซาเลม ฒี่ง ต้าย โก๋ นิ่น วั้ว เต๋ย เมี่ยน โซ้ว ฮวีง ก๋อม ล์อ ฒุ์ย เฮนี้ย เญย โก๋ เปาโล มป่า ไม้ ม่าย เหยียด เหยี่ยม ม่าย ฒอง-เหฒง เฒียน.

8เปาโล ฯฒฯ ก๊อง ไจ๊ ซิน เญย หว่า. นิ่น ก๊อง, “เยีย ไม้ โหฒว ต่อง ยิวไท เมี่ยน เญย หาย หญู่ง เล์ย ไฟ หฒั่ง ทิน-ฮู่ง เญย เปย๊า ไฟ โลมา ต้ม ฒิ่ว ฮู่ง.”

9เฟสะทัด อ๋อย ยิวไท เมี่ยน อะเฮน้ย นิ่น ฯฒฯ หน่าย เปาโล, “เม่ย หญุ่น มี่ง เยลูซาเลม ฒี่ง ปุน เยีย ตุ๋น เม่ย เญย สี่ ไฟ?”

10เปาโล ก๊อง, “อี้ หฒั่น เยีย โซ้ว เจี๊ยน โลมา ฮู่ง เญย สี่ ต้อง, หอบ หฒุ เยียม น้าย ตุ๋น เยีย เญย สี่. เยีย ไม้ โหฒว หาย หญู่ง ต่อง ยิวไท เมี่ยน, เม่ย กั้น หย่า หฒะเก้ง ฮิ้ว เญย. 11สี ก๊อง เยีย โหฒว ต่อง หาย หญู่ง หฒี่ ตุ๊ ไต่, เยีย หย่า ไม้ แหง่ง. มป่า สี ก๊อง น้าย เต๋ย ยิวไท เมี่ยน ต้าย โก๋ เยีย น้าย เต๋ย สี่ ไม้ เฒียน นอ, ไม้ ม่าย หาย เต้า ม่าย เล์ย เฒาะ เยีย จิว ปุน นิ่น บัว. เยีย โท้ ปุน โลมา ต้ม ฒิ่ว ฮู่ง เซี้ยม ฒุ์ย.”

12เฟสะทัด เหธา นิ่น เญย กุ๊น สี่ เมี่ยน ธ่าง ล่าง ลิ์ว นิ่น ฯฒฯ ก๊อง, “เม่ย โท้ โลมา ฮู่ง เซี้ยม ฒุ์ย, วั้ว หญู่ง เม่ย ฒู้ง อ๋อย หฒุ มี่ง โลมา ฮู่ง วั้ว อ๊ะ.”

เฟสะทัด เหธา อาฆีพา ฮู่ง ธ่าง ล่าง

13ฆะฮ้า เล่า เต๋ย, อาฆีพา ฮู่ง เหธา เบนิด มี่ง ซีซาลียา ฒี่ง หวุ่ย ปวั้ง เฟสะทัด, เหธา นิ่น หฑย่าว. 14เยียม วั้ว ธั้ม-ฮนอย เต๋ย เญย, เฟสะทัด เฒาะ เปาโล เญย เจ๊า ก๊อง บั๋ว ฮู่ง เตี๋ย. นิ่น ก๊อง, “ม่าย ล่าน เมี่ยน, เฟลิก ธ้วด วั้ว หฒั่น เฒาะ นิ่น ขวน เจี๊ยน น้าย. 15เยีย มี่ง เยลูซาเลม วั้ว หฒั่น, ไซ เมี่ยน เปย๊ย เหธา ยิวไท เมี่ยน เญย เมี่ยน โก๋ ต้าย โก๋ นิ่น หย่า โท้ เยีย ตี่ง นิ่น เญย ฒุ์ย. 16มป่า เยีย เตา นิ่น บัว, ฮนั้ง หน่าย โหฒว เซ ไม้ หอบ โลมา เมี่ยน เญย เล์ย. ไม้ กุ๊น หาย เต้า ม่าย สี่, อ๋อย หฒุ ปุน นิ่น เหธา โก๋ นิ่น วั้ว เต๋ย ต๋อย เหฒง หธีง ต้าย เฒาะ นิ่น จิว ปุน หาย เต้า. 17โก๋ นิ่น วั้ว เต๋ย เมี่ยน ต้าย เถา น้าย เยีย ไม้ ไง่. ตะเหญ่ย ฮนอย ฮนั้ง เยีย มี่ง เฒว์ย สี่ ต้อง เห่ว เมี่ยน ต้อ เปาโล เปียะ ต้าย. 18โก๋ นิ่น วั้ว เต๋ย โซ้ว เจี์ย ซิน ต้าย ก๊อง มป่า ไม้ โก๋ ฮนั้ง เยีย หล่าย นิ่น บัว อ๋อย โก๋ เญย เอ๊าะ สี่ นอ. 19นิ่น บัว ขูง แฑง เถา นิ่น บัว ยิวไท เมี่ยน เญย เล์ย ฮนั้ง, หย่า แฑง เถา ล่าน เมี่ยน, บั๋ว เห่ว เยซู. นิ่น ไต่ มี่ง มป่า เปาโล ก๊อง นิ่น หธ่อ เฒี่ยง เจี๊ยน เญย. 20เยีย ไม้ ฮิ้ว ตุ๊ อ๋อย หฒุ ฮนั้ง หาย นอ เบ่น น้าย เต๋ย สี่ ฯฒฯ หน่าย เปาโล นิ่น หญุ่น มี่ง เยลูซาเลม ตุ๋น น้าย เต๋ย สี่ ไฟ? 21มป่า เปาโล โท้ มี่ง ต้ม ฒิ่ว ฮู่ง วั้ว เซี้ยม, เยีย ฯฒฯ เห่ว แปง ต้อ มี่ง ขวน เจี๊ยน ฒั้ว เถา เยีย ม่าย เฒี่ยง โห่ หธีง ปุน นิ่น มี่ง โลมา ฮู่ง วั้ว.”

22อาฆีพา ก๊อง บั๋ว เฟสะทัด, “เยีย กั้น หย่า อ๋อย หมวัง นิ่น ก๊อง.”

เฟสะทัด ก๊อง, “วั้ว หญู่ง, ฌัง ฮนอย เม่ย ตุ๊ หมวัง นิ่น ก๊อง อ๊ะ.”

เปาโล เยียม อาฆีพา ฮู่ง เญย หฑะเฮมียน

23ตะเหญ่ย ฮนอย อาฆีพา เหธา เบนิด ฒอง ฑ่อย, เหธา ต้ม แปง-เปย๊ย บัว เหธา วั้ว นอม ฒี่ง โหฒว โฮล เญย, ม่าย เม่ง เต้า เญย เมี่ยน, โห่ว เจี๊ยน เปียะ ฮู่ง จา เญย ต้ม หวุ่ย ต้อง. ต้าย ฑ่อย, เฟสะทัด เห่ว เมี่ยน ต้อ เปาโล เปียะ ต้าย. 24เฟสะทัด ก๊อง,

“อาฆีพา ฮู่ง เหธา เยียม น้าย เญย หฒวัง เมี่ยน อ้า! เม่ย บัว ปวัด น้าย ล่าน เมี่ยน. เยียม เยลูซาเลม เหธา เยียม น้าย เญย เหยียด หฒวัง ยิวไท เมี่ยน เหน่า เจี๊ยน ก๊อง นิ่น ไม้ หอบ หฒุ ม่าย แหม่ง เฒี่ยง อ๊ะ. 25มป่า เยีย ฒ่า หน่าย นิ่น, ไม้ ปวัด นิ่น ต่อง หาย หญู่ง หฒี่ ตุ๊ ไต๋ นิ่น. นิ่น กั้น โท้ ปุน โลมา ต้ม ฒิ่ว ฮู่ง ตุ๋น สี่ เยีย ฯฒฯ ตี่ง เฮญี้ยว ฝูง นิ่น มี่ง. 26มป่า เยีย ล์อ ไม้ ตุ๊ หาย หญู่ง สี่ เฟี้ย ปุน โลมา ฮู่ง. เยีย ฯฒฯ ต้อ นิ่น ต้าย น้าย, เม่ย บัว เญย หฑะเฮมียน, หย่า เหล่ง เจ๊ย เญย เยียม เม่ย, อาฆีพา ฮู่ง, เญย หฑะเฮมียน, เหว่ย ฒ่า หน่าย นิ่น, เยีย หธีง ต้าย ม่าย หว่า เฟี้ย. 27เหว่ย หฒุ เอย เยีย ฮนั้ม, ฝูง ฒุ์ย-เมี่ยน มี่ง หย่า ไม้ ม่าย โก๋ นิ่น เญย หว่า เซ ไม้ หอบ.”

Currently Selected:

กง-โฒ่ 25: IuMiTH

Highlight

Copy