Марк 15

Иса ПилатӀан вилик

(МатӀай 27:1, 11-30; ЛукӀа 23:1-5, 13-25; Ягь. 18:28–19:16)

1Экуьнахъ тадиз чӀехи хахамри агъсакъалрихъни тавратдаррихъ ва Меслягьатда авай вирибурухъ галаз меслятар авуна. Абуру Иса кутӀунна, тухвана ПилатӀан гъиле туна.

2ПилатӀа Адавай хабар кьуна:

– Вун Чувудрин Пачагь яни?

– Вуна гъа икӀ я лугьузва, – жаваб гана Исади.

3ЧӀехи хахамри Адак гзаф тахсирар кутуна. 4ПилатӀа Адавай мад хабар кьуна:

– Ваз лугьудай гаф авачни? Вак кутазвай кьван тахсирар Ваз аквазвачни?

5Амма Исади и гафаризни жаваб тагайвиляй ПилатӀ пара мягьтел хьана.

6Гьар Песагь суварин юкъуз халкьди тӀвар кьур къазаматдавайбурукай сад ПилатӀа ахъайдай адет тир. 7Гьа чӀавуз, гъулгъула гьатай вахтунда инсанар кьиниз килигна, Бараб ва са кьадар маса ксар къазаматда тунвай. 8Халкьди, кӀватӀ хьана, и гъилерани ПилатӀавай ада гьар сувариз ийизвай кар кьиле тухун тӀалабзавай.

9– Квез кӀандатӀа, Чувудрин Пачагь ахъайдани? – жаваб гана ПилатӀа. 10(ПилатӀаз чӀехи хахамри Иса чпин пехилвиляй вичин гъиле тунвайди чизвай.)

11Амма чӀехи хахамри, Исадилай Бараб ахъаюн хъсан я лугьуз, халкьдик футфа кутазвай.

12– Куьне «Чувудрин Пачагь я» лугьузвайдаз за вуч авуна кӀанзава? – мад лагьана ПилатӀа халкьдиз.

13– Хашуниз ягъ Ам! – гьарайна абуру.

14– Ада вуч пис кар авуна кьван? – лагьана ПилатӀа.

Амма халкьди амайдалайни кӀевиз гьараяр авуна:

– Хашуниз ягъ Ам!

15Халкьдиз кӀандайвал хьун патал, ПилатӀа Бараб ахъайна. Исани, къамчидалди гатана, хашуниз ягъ лагьана эмирна.

16Аскерри Иса сердердин кӀвалерин гьаятдин къенез тухвана, гьана вири аскерар кӀватӀна. 17Абуру Адал яру пекер алукӀна, кьилелни къакъвадин таж эцигна. 18Гьанлай абуру Адакай ягьанатар ийиз хьана:

– Чувудрин Пачагь сагъ хьурай! 19Абуру лашунал Адан кьил гатазвай, тфуяр гузвай, метӀерал акъвазиз ягьанатдалди Адаз икрам ийизвай.

Иса хашуниз ягъун

(МатӀай 27:31-44; ЛукӀа 23:26-43; Ягь. 19:17-27)

20Адакай ягьанатар авуна куьтягь хьайидалай кьулухъ, Исадилай яру пекер хтӀунна, Адал Вичин парталар алукӀна. Гьанлай Ам хашуниз ягъиз тухвана.

21НикӀяй шегьердиз хквезвай киринейви Симун лугьудай са касдив, Искендеранни Руфан бубадив, Исадин хаш тухуз туна. 22Ам ГалгутӀ, яни «Генгеш» лугьудай чкадал гъана. 23Адаз тиряк квай набататдин миже какадарнавай чехир гуз алахъна, амма Ада ам хъванач. 24Иса хашуниз ягъайдалай кьулухъ, Ам хашунал алаз хкажайбуру Адан пекер, чип вегьиз, чпин арада пайиз хьана.

25Ам экуьнин сятдин кӀуьдриз хьиз хашуниз янай. 26Тахсиркарвилер къалурдай кьулунал «Чувудрин Пачагь» кхьена, Адан кьилихъ яна. 27-28Адахъ галаз санал кьилдин хашариз кьве къучини яна: сад Адан эрчӀи, муькуьдини – чапла патавай.

29Патавай физвайбуру, Адакай чӀурукӀа рахаз, чпин кьилер юзуриз лугьуз хьана:

– Эй, Аллагьдин КӀвал чукӀурна пуд йикъан къене эхциг хъийидайди! 30Жува Жув хиласа! Хашунилай эвичӀ!

31Гьа и жуьреда чӀехи хахамрини тавратдарри рахшанд кваз чпи чпиз лугьузвай:

– Масадбур Ада хиласдай, гила Вичивай Вич хиласиз жезвач! 32И Месигь, Исраилдин Пачагь, гила жедатӀа, хашунилай эвичӀрай. ЭвичӀна акуртӀа, Ам Месигь тирвилин чун чӀалахъ жеда!

Адахъ галаз санал хашуниз янавайбуруни Адаз экъуьгъзавай.

Исадин кьиникь

(МатӀай 27:45-56; ЛукӀа 23:44-49; Ягь. 19:28-30)

33Нисинрихъ вири чилел мичӀ акьалтна, сятдин пудралди гьакӀ амаз хьана. 34Сятдин пудаз хьиз Исадай гьарай акъатна:

– Элаи, Элаи! Лема сабахтани? (Яни: «Я Аллагь! Я Аллагь! Вуна Зун вучиз туна?»)

35Адан ван атай гьанал алай са бязибуру лагьана:

– Килиг садра, Ада Ильясаз эверзава.

36Абурукай сада, чукурна фена, цуру чехирдай кьежирнавай мантар, лашунин кӀвенкӀвел акьалжна, Исадин сивихъ тухвана, лагьана:

– Акъваз кван, Ам анлай элягъиз Ильяс къведатӀа килигин чун.

37Исадай мад кӀевиз гьарай акъатна. Гьа инал Ада чан гана. 38Аллагьдин КӀвале авай пердени виняй агъуз пад хьана.

39Са вишенкьил къаншарда акъвазнавай. Исадин чан а жуьреда хкатайди акурла, ада лагьана:

– И Инсан рикӀивайни Аллагьдин Хва тир.

40Анал яргъал акъвазна килигзавай папарни алай. Абурун арада Маждалдай тир Майрам, гъвечӀи Якьубанни Юсидин диде Майрам ва Саламат авай. 41Абур, Иса Галилейда авай вахтунда, Адан гуьгъуьна гьатна, Адаз къуллугъ авурбур тир. Абурулай гъейри Адан гуьгъуьна аваз Ярусалимдиз атанвай гзаф маса папарни авай.

Иса рага атӀанвай сура тун

(МатӀай 27:57-61; ЛукӀа 23:50-56; Ягь. 19:38-42)

42Няни хьанвай, суварин вилик квай жуьмядин югъ тир, яни Киш йикъан, Песагь суварин вилик квай югъ. 43АриматӀайдай тир, вични Аллагьди пачагьвал ийидай вахтунал вил алай, Меслягьатдин векил, гьуьрмет авай ксарикай сад тир Юсуфа ПилатӀан патав фин кьетӀна. Ада фена ПилатӀавай Исадин мейит вичив вахгун тӀалабна. 44Иса икьван фад кьена лагьана ван хьайила, ПилатӀ мягьтел хьана. Аскеррин кьилевайдаз эверна.

– Ам фадлай кьенани? – хабар кьуна ада.

45Аскеррин кьилевайдан жаваб чир хьайила, ПилатӀа Юсуфаз мейит къахчудай ихтияр гана. 46Адани мейит хашунилай эляна, кафан маса къачуна, Исадал алчудна, Ам рага атӀанвай кьветӀе-сура кучукна. КьветӀин сивихъни къван агулдна.

47Маждалдай тир Майрамани Юсидин диде Майрама Исадин мейит эцигнавай чка рикӀел хвена.

Currently Selected:

Марк 15: ЛезПК

Highlight

Copy