МатӀай 28

Исадал чан хтун

(Марк 16:1-8; ЛукӀа 24:1-10; Ягь. 20:1-8)

1 Пакамахъ фад, гьафтедин сад лагьай юкъуз#28:1 Чувудри гьафтедин сад лагьай югъ гьяд яз гьисабзава. Маждалдай тир Майрамни муькуь Майрам кьветӀен патав атана. 2Гьа чӀавуз зурба залзала хьана, Реббидин малаик цаварилай эвичӀна, кьветӀен сиве тунвай къван алудна, гьадал ацукьнавай. 3Адан акунар цӀайлапандиз ухшар тир, адан пекерни жив хьиз лацу тир. 4КичӀевиляй къаравулрикни адан вилик зурзун акатна, абур мейитар хьиз хьана. 5Малаикди элкъвена папариз лагьана:

– КичӀе жемир, куьн хашуниз янавай Исадихъ къекъвезвайди заз чизва. 6Ам ина амач. Ада Вичи лагьайвал, Адал чан хтанва. Фад инал ша, ингье Ам эцигай чкани. 7Гьерекатна фена Адан тилмизриз Адал чан хтайдакай хабар це. Ам Галилейдиз тилмизрилайни вилик атана акъатдайди абурун рикӀел хкваш. Абуруз Ам гьана аквада. Ингье за квез вири гафар лагьана.

8Тадиз кьветӀяй экъечӀна, папари кичӀевал ва зурба хвеш кваз Исадин тилмизриз хабар гуз чукурна. 9Фидай рекье абурал садлагьана Иса гьалтна.

– Хийирар хьуй! – лагьана Ада абуруз.

Абуру Адав агатна, Адан кӀвачер кьуна, икрам авуна.

10Гьанал Исади абуруз лагьана:

– КичӀе жемир. Фена Зи стхайриз Галилейдиз алад лагь, абуруз Зун гьана аквада.

Къаравулрин гьахъ-гьисаб

11Папар тилмизриз лугьуз фидайла, къаравулрикай са бязибур шегьердиз фена, абуру хьайи агьвалатдикай чӀехи хахамриз хабар гана. 12Агъсакъалрихъ галаз меслят авуна, адалай кьулухъ абуру къаравулриз бегьем пул гана, 13лагьана:

– Куьне виридаз лугьун лазим я: «Чун ксанвайла, йифиз Адан тилмизри атана Адан мейит чуьнуьхна». 14Адакай сердердиз ван хьайитӀа, чна адан хъел иликьарда, квез са писвални тахьун патал, чна къайгъу чӀугвада.

15Абуру, пул къачуна, чпиз лагьайвал авуна. А хабар къенин йикъал къведалдини чувудрин арада чкӀана ама.

ЧӀехи тапшуругъ

16ЦӀусад тилмиз Галилейдиз Исади чпиз ша лагьай дагъдиз фена. 17Иса акурла, вирида Адаз икрамна, амма са бязибуру шак авуна. 18Абурун мукьув хьана, Исади лагьана: – Чилелни цавара вири Зи Гъиле ава. 19ГьакӀ хьайила алад, вири халкьарин инсанрикай зи тилмизар ая. Бубадин, Адан Хцин ва Пак Руьгьдин ТӀварцӀелай абурув цик акахьун къачуз тур. 20За квез авур эмирар кьилиз акъудиз абуруз чира. Эхир алукьдалди Зун гьар юкъуз квехъ галайди чир хьухь.

Currently Selected:

МатӀай 28: ЛезПК

Highlight

Copy