МатӀай 27

Исадиз кар атӀун

(Марк 15:1; ЛукӀа 23:1; Ягь. 18:28)

1 Пакагьан экуьнахъ вири чӀехи хахамарни агъсакъалар, Иса гьикӀ рекьидатӀа лугьуз меслятар ийиз, кӀватӀ хьана. 2Ам кутӀунна, тухвана Римдин сердер ПилатӀан гъиле туна.

Ягьудан кьиникь

(Крар 1:16-20)

3Исадиз кьиникьин жаза ганвайди Ам маса гайи Ягьудаз чир хьайила, Ягьуд авур кардал пашман хьана. Ада, фена, чӀехи хахамривни агъсакъалрив къанни цӀуд гимиш вахгана, 4лагьана:

– Тахсир квачир инсан маса гана, за гунагь авуна.

– Чаз вуч ава? – лагьана абуру. – Абур ви къайгъуяр я!

5Вичив гвай гимишар Аллагьдин КӀвализ гадарна, Ягьуда фена вичи вич куьрсарна. 6ЧӀехи хахамри гимишар кӀватӀ хъувуна, лагьана:

– Абур Аллагьдин КӀвалин хазинадик кутуна виже къведач, абур ивидихъ ганвай гьакъи я.

7Меслят авуна, а гимишрихъ абуру «ГетӀехъандин чил» лугьудай чка, къурабаяр кучукун патал, маса къачуна. 8Гьаниз килигна къенин йикъал къведалди а чилиз «Ивидин чил» лугьузва. 9Гьа икӀ, Ермиягь пайгъамбарди лагьай ихьтин гафар кьилиз акъатна: «Исраилдин рухвайри Адан къимет къанницӀуд гимиш тайинарна. 10Абуру а пулунихъ, Реббиди эмир авурвал, „ГетӀехъандин чил“ къачуна»#Ермиягь 32:9; Зекери 11:12-13..

Иса ПилатӀан вилик

(Марк 15:2-19; ЛукӀа 23:2-5, 13-25; Ягь. 18:29–19:16)

11Иса сердердин вилик акъвазна. Ада Исадивай хабар кьуна:

– Вун чувудрин Пачагь яни?

– Вуна гьа икӀ я лугьузва, – жаваб гана Исади.

12ЧӀехи хахамрини агъсакъалри Адак тахсирар кутадайла, Ада гьич жавабни ганачир. 13Гьанлай ПилатӀа Адаз лагьана:

– Вак кутазвай кьван тахсирар ваз аквазвачни?

14Амма Вичик кутазвай са тахсирдизни Исади яб тагуз акурла, сердер пара мягьтел хьана.

15Гьар Песагь суварин юкъуз сердерди халкьди тӀвар эцигай са кас къазаматдай азад хъийидай адет хьанвай. 16Гьа чӀавуз Бараб тӀвар алай машгьур са тахсиркар къазаматда авай. 17Вири кӀватӀ хьайила, ПилатӀа хабар кьуна:

– Квез за вуж ахъайна кӀанзава: Бараб ахъайдани, я тахьайтӀа Месигь лугьудай Иса?

18ПилатӀаз хахамрин кьилевайбуру Иса чпин пехилвиляй вичин гъиле тунвайди чизвай. 19ПилатӀ дуванбегдин чкадал ацукьнавай вахтунда, адан патав са кас атана ва адан папа лагьай гафар тикрарна:

– А Кас гьахъ-михьиди я, Адаз са затӀни мийир, сенфиз за ахвара Ам себеб яз гзаф азабар чӀугуна.

20Амма чӀехи хахамрини агъсакъалри Бараб азад хъувуна Иса кьиникьиз акъудун лазим тирдахъ халкь чӀалахъарна.

21Гьанлай сердерди абурувай хабар кьуна:

– Квез за и кьведакай гьим ахъайна кӀанзава?

– Бараб, – лагьана абуру.

22– Месигь лугьузвай Исадиз за вуч авун лазим я? – лагьана ПилатӀа.

– Хашуниз ягъ Ам! – жаваб гана вирида.

23– Ада вуч пис кар авуна кьван? – лагьана ПилатӀа.

Амма халкьди амайдалайни кӀевиз гьараяр авуна:

– Хашуниз ягъ Ам!

24ПилатӀавай халкь секинариз жезвачир. Жемятдик мадни гзаф гъулгъула акатзавай. И кар акурла, ПилатӀа, яд къачуна, халкьдин вилик вичин гъилер чуьхвена, лагьана:

– И Муъминдин Иви авахьунай зак тахсир квач, ам куь кӀвалах я.

25– Къуй Адан Ивидин жаваб гудайбур чунни чи аялар хьурай! – жаваб гана халкьди.

26Гьа чӀавуз ПилатӀа Бараб ахъайна, Исани къамчидалди гатана, хашуниз ягъ лагьана эмирна.

27Гьанлай сердердин аскерри Иса гьукумдардин кӀвалерин гьаятдиз тухвана, гьана вири аскерар Исадин патав кӀватӀна. 28Исадал алай пекер хтӀунна, абуру Адал яру пекер алукӀна, 29кьилелни къакъвадин таж эцигна, Адан эрчӀи гъилени лаш туна, Адан вилик метӀер яна, абуру рахшанддалди лугьуз хьана:

– Чувудрин Пачагь сагъ хьурай!

30ГьакӀ лугьуз абуру Адаз тфуяр гуз хьана, ахпа Адан гъиляй лаш акъудна, гьадалди Адан кьил гатаз эгечӀна.

Иса хашуниз ягъун

(Марк 15:20-32; ЛукӀа 23:26-43; Ягь. 19:17-27)

31Адакай ягьанатар авуна куьтягь хьайидалай кьулухъ, Исадилай яру пекер хтӀунна, Адал Вичин парталар алукӀна, гьанлай Ам хашуниз ягъиз тухвана.

32Абур фидайла, абурал киринейви Симун лугьудай са кас гьалтна, абуру Исадин хаш адав гужалди тухуз туна.

33Абур ГалгутӀ, яни Пел лугьудай чкадив агакьна. 34Исадиз абуру туькьуьлвал квай чехир гана, амма адан дад акурла, Адаз ам хъваз кӀан хьанач. 35Иса хашуниз ягъайдалай кьулухъ, Ам хашунал алаз хкажайбуру Адан пекер, чип вегьиз, пайна. 36Ахпа анал ацукьна Адан къаравул чӀугваз хьана. 37Адан кьилихъ тахсиркарвилер къалурдай кьул яна. Адал кхьенвай: «Им Чувудрин Пачагь Иса я».

38Исадихъ галаз санал хашариз кьве къучини янай: сад Адан эрчӀи, муькуьдини – чапла патавай. 39Патавай физвайбуру, Адакай чӀурукӀа рахаз, чпин кьилер юзуриз, лугьуз хьана:

40– Эй, Аллагьдин КӀвал чукӀурна пуд йикъан къене эхциг хъийидайди! Вун Аллагьдин Хва ятӀа, жува жув хилас ая, хашунилай эвичӀ!

41Гьа и жуьреда чӀехи хахамри, тавратдарри ва агъсакъалрини рахшанд кваз лугьудай:

42– Масадбур Ада хиласдай, гила Вичивай Вич хилас ийиз жезвач. Ам Исраилдин Пачагь ятӀа, хашунилай гила эвичӀрай. ЭвичӀна акуртӀа, Ам Месигь тирдан чун чӀалахъ жеда! 43Ада Аллагьдихъ далу акалнавай; Аллагьдиз Ам багьа ятӀа, къуй Аллагьди Ам хилас авурай. Ада лагьанай хьи бес: «Зун Аллагьдин Хва я».

44Адахъ галаз санал хашуниз янавай къачагърини Адаз экъуьгъзавай.

Исадин кьиникь

(Марк 15:33-41; ЛукӀа 23:44-49; Ягь. 19:28-30)

45Нисинрихъ вири чилел мичӀ акьалтна, сятдин пудралди гьакӀ амукьна. 46Сятдин пудаз хьиз Исадай гьарай акъатна:

– Эли, эли! Лема сабахтани? Яни: я Аллагь! Я Аллагь! Вуна Зун вучиз туна?

47Адан ван атай гьанал алай са бязибуру лагьана:

– Килиг садра, Ада Ильясаз эверзава.

48Абурукай сада, чукурна фена, цуру чехирдай кьежирнавай мант, лашунин кӀвенкӀвел гьалдна, Исадин сивихъ авуна.

49– Акъваз кван, – лугьуз хьана амайбуру, – Ам хилас ийиз Ильяс къведатӀа килигин чун.

50Исадай мад кӀевиз гьарай акъатна. Гьа инал Адан чан хкатна. 51Гьасятда Аллагьдин КӀвале авай пердени виняй агъуз пад хьана, залзала хьана, рагар пад-пад хьана. 52Кьейибур динжарнавай кьветӀерикай са гзафбур ачух хьана, Аллагьдиз талукь са хейлин кьейибурал чан хтана. 53Исадал чан хтайдалай кьулухъ абур чпин кьветӀерай экъечӀна, Ярусалимдиз – пак шегьердиз – фена. Абур гзафбуруз акуна. 54Иса хуьзвай аскерризни абурун кьилевайдаз залзала ва маса хьайи крар акурла, гзаф кичӀе хьана, лагьана:

– РикӀивайни Ам Аллагьдин Хва тир!

55Анал яргъал акъвазна гзаф папарни алай. Абур, Иса Галилейда авай вахтунда, Адан гуьгъуьна гьатна, Адаз къуллугъ авурбур тир. 56Абурун арада Маждалдай тир Майрам, Якьубанни Юсуфан диде Майрам ва Зебедеян паб авай.

Иса рага атӀанвай кьветӀе-сура тун

(Марк 15:42-47; ЛукӀа 23:50-56; Ягь. 19:38-42)

57Няни хьайила, Исадин тилмиз хьайи АриматӀайдай тир Юсуф тӀвар алай девлет авай са кас ПилатӀан патав атана. 58Ада ПилатӀавай Исадин мейит вичив вахгун тӀалабна. ПилатӀа мейит вахгун эмирна. 59Юсуфа Исадин мейит къахчуна, ам михьи кушдин кафандик кутуна, 60вич кьейила динж авун патал вичи цӀийиз рага атӀанвай кьветӀе-сура туна. КьветӀин сивихъни са чӀехи къван агалдна, ам хъфена. 61Маждалдай тир Майрамни муькуь Майрам кьветӀен къаншарда ацукьнавай.

КьветӀел къаравулар эцигун

62Гуьгъуьнин юкъуз, ам Киш югъ тир, ПилатӀан патав чӀехи хахамарни фарисеяр кӀватӀ хьана.

63– Агъа, – лагьана абуру, – гьеле а тапархъандал чан аламаз, Ада «Пуд йикъалай Зал чан хкведа» лагьайди чи рикӀел хтана. 64ГьакӀ хьайила, пуд лагьай югъ алукьдалди, Адан мейит авай кьветӀ хъсандиз хуьдайвал эмир це, Адан тилмизри, йифиз атана, Ам чуьнуьхун мумкин я. Ахпа абуру халкьдиз «Кьенвай Адал чан хтана» лугьуз къекъведа. ГьакӀ хьайитӀа, Адан эхиримжи таб эвелимжидалай писди жеда.

65– Квехъ аскерар гала, – лагьана ПилатӀа, – алад, квез чидайвал хуьх.

66Абуру кьветӀен патав атана, къванцел муьгьуьр эцигна, кьветӀен патав къаравулар акъвазарна.

Currently Selected:

МатӀай 27: ЛезПК

Highlight

Copy