ЛукӀа 8

Иса шегьерра

1Гуьгъуьнлай Иса, Аллагьдин Пачагьлугъдикай Шад Хабар агакьариз ва вязер ийиз, шегьеррани хуьрера къекъвез хьана. Адахъ галаз Вичин цӀикьвед илчи, 2Вичи чӀуру жинеррикайни тӀалрикай сагъар хъувур са шумуд паб, вичикай ирид жин хкатай Маждалдай тир Майрам, 3Гьирудан гъилибан Хузан паб Ягьна, Сусанна ва гзаф масабур авай. Абуру чпин такьатралди Исадизни тилмизриз куьмекар гузвай.

НикӀе тум цазвайдакай кьиса

(МатӀай 13:1-10; Мрк. 4:1-9)

4Садра Исадин патав гзаф чкайрай инсанар атана кӀватӀ хьана, Иса абуруз кьиса ахъайиз эгечӀна:

5– Са гъилера лежбер никӀиз тум вегьиз фена: вегьей са бязи тварар рекьин къерехдиз аватна, абур рекье авайбурун кӀвачерикни акатна, къушарини тӀуьна. 6Са бязи тварар къван квай чкайриз аватна, экъечӀна алакьдалди кьурана, абуруз кьеж бес хьанач. 7Са бязибур къалгъанрин арайриз аватна. Къалгъанар чӀехи хьана, абуру акьалтзавай къацар пӀуьрчӀуькьарна. 8Са бязибур мублагь чилел аватна. ЭкъечӀайла, абуру вишра артух майваяр гъана.

Ахпа Исади ван алаз давамарна:

– Нихъ ван къведай япар аватӀа, гьадаз ван атурай!

Кьисадин мана ачухарун

(МатӀай 13:10-23; Мрк. 4:10-25)

9Исадин тилмизри Адавай хабар кьуна:

– И кьисадин мана вуч хьурай?

10– Аллагьдин пачагьвилин сирерай кьил акъуддай алакьунар квез ганва, – жаваб гана Исади, – амайбуруз ибур мана авачир кьисаяр яз амукьзава, вучиз лагьайтӀа абур килигзава – аквазвач, яб гузва – ван къвезвач. 11Гила кьиса куькай ятӀа килиг: тумунин твар – Аллагьдин Гаф я. 12Рекьин къерехдиз аватай тварар – гаф ван хьайибур я. Ахпа абурун патав атана иблисди, абур имандал татун ва хилас тахьун патал, абурун рикӀяй а гаф акъудзава. 13Къван квай чкайриз аватай тварар – гаф ван хьанмазни шадвилелди кьабулдай, амма чпихъ дувул авачирбур я: гьавиляй са кьадар вахтуналди Аллагьдихъ иман ийида, амма синагъдин йикъара абур кьулухъ жеда. 14Цацарин арайриз аватай тварар – абур гафуниз яб гудай, амма къвердавай чеб, эчӀелри хьиз, къайгъуйри, девлетрини лезетри буьркьуь авуна, цӀир гъана куьтягь тахьанмаз, Аллагьдин Гаф рикӀелай алуддайбур я. Абуру бегьерни гъидач. 15Миян чилел аватай тварар – абур ван хьайи гаф милайим ва михьи рикӀе хуьзвай ксар я. Бегьерни абуру сабур хуьналди гъида.

16Гьич садани, шем куькӀуьрна, адан винел къаб гьалддач, я тахьайтӀа, ам чарпайдин кӀаник эцигдач; кӀвализ гьахьзавайбуруз экв акун патал, ам шемерганда твада. 17Я винел акъат тийидай сирни авайди туш, я малум тахьана амукьдай чинебан карни. 18Гьа икӀ, куьне хъсандиз яб це: нихъ аватӀа, адаз хгунни хъийида; вичихъ са вуч ятӀани авайди хьиз жезвайдавай гьа авайдини къахкъудда.

Исадин дидени стхаяр

(МатӀай 12:46-50; Мрк. 3:31-35)

19Садра Исадин патав Адан дидени стхаяр атана; абурувай, кӀвале гзаф инсанар хьуниз килигна, Адан мукьув къвез жезвачир. 20Исадиз: «Ви дидени стхаяр Вун акваз кӀанз къецел акъвазнава», – лагьана, хабар гана.

21– Зи дидени стхаяр-вахар Аллагьдин Гафуниз яб гузвай ва а Гафунал амал ийизвайбур я, – жаваб яз лагьана Ада.

ТӀурфан секинарун

(МатӀай 8:23-27; Мрк. 4:36-41)

22Са юкъуз Иса Вичин тилмизарни галаз луьткведа акьахайла, Ада абуруз лагьана:

– Ша чун вирин а патаз экъечӀин.

Абуру луьткве гьална. 23Рекье Иса ахварал фена. Вирел къати гар акьалтна, луьткве цяй ацӀуз эгечӀна. Абур кӀеве гьатна. 24Тилмизри Иса ахварай авудна, лагьана:

– Устаз! Устаз! Чун цин кӀаниз язава.

Ада къарагъна гарни гур лепеяр секинарна. ТӀурфан акъвазна, кьуд пата секинвал гьатна.

25– Куь иман гьиниз фена? – хабар кьуна Ада.

КичӀевал акатнавай ва мягьтел хьанвай тилмизри чпи чпиз лагьана:

– Гарни яд Вичиз кӀандайвал муьтӀуьгъарзавай Им Вуж хьурай?

Герасинда жинерар хкудун

(МатӀай 8:28-34; Мрк. 5:1-20)

26Исани тилмизар Галилейдин къаншарда авай Герасин вилаятдиз атана акъатна. 27Иса вирин къерехдал эвичӀайла, Адан вилик фадлай жинерар квай, пекерни алукӀ тийизвай, вични кӀвале ваъ, кьейибур твадай кьветӀера уьмуьр тухузвай са инсан экъечӀна. 28Иса акурла, ам Адан вилик ярх хьана ва ван алаз гьарайна:

– Ваз завай вуч кӀанзава, я виридалайни виневай Аллагьдин Хва Иса? Ваз минет хьурай, Вуна зун азабрик кутамир!

29Ада акӀ лугьунин метлеб ам тир хьи, Исади чӀуру жинжиз и инсандикай хкечӀун эмирнай. Жинжи са шумудра и инсан кьуна чандивай авурди тир. Шумудни садра ам зунжурралди кутӀунна хуьз хьанатӀани, абур кьатӀ-кьатӀ ийиз, жинжин таъсирдик кваз, ам кьурумриз катдай.

30Исади адавай жузуна:

– Ви тӀвар вуж я?

– Кьушун я, – жаваб гана касди, вучиз лагьайтӀа адак гзаф жинерар квай. 31Жинерри Исадиз, чеб гургусдиз#8:31 Гургус – кӀан квачир зурба дагьар хьтинди. ракъурмир лугьуз, минетна. 32Патав гвай пелел вакӀарин са чӀехи суьруь алай. Жинерри вакӀарик акахьдай ихтияр це лугьуз Исадиз дад-бидадна. Ада абуруз ихтияр гана. 33Жинерар инсандикай хкатна вакӀарик акахьна; вакӀарини чукурна фена са чархалай вириз хкадарна ва ана абур вири цин кӀаниз яна.

34Хьайи кар акур вакӀарбанри, чукурна фена, чпиз акурдакай шегьеррани хуьрера ахъайна. 35Инсанар вуч хьанватӀа килигиз рекье гьатна. Исадин патав атайла, абуруз жинерар хкатнавай кас вич вичел хтанваз, пекерни алаз Исадин патав ацукьнаваз акуна; абурук кичӀ акатна. 36И крар акурбуру жинерар квайди гьикӀ сагъарнатӀа, атайбуруз ахъайна. 37Герасин вилаятда авай халкьди Исадивай чпин сергьятрай хъфин тӀалабна, абурук лап зурба кичӀ акатнавай. Исани луьткведа акьахна Галилейдиз хъфена. 38Жинерар хкатай касдини, Исадихъ галаз амукьиз кӀанз, Адаз минетна, амма Исади лагьана:

39– Жуван кӀвализ ахлад. Аллагьди ваз авур зурба куьмекдикай вун хъфена виридахъ галаз рахух.

Адани Исади вичиз авурдакай фена шегьер тирвал ихтилат ийиз хьана.

Яиран рушал чан хкун

(МатӀай 9:18-26; Мрк. 5:22-43)

40Иса элкъвена Галилейдиз хтана. Халкьди Ам шадвилелди кьабулна, вучиз лагьайтӀа Адал виридан вил алай. 41Ингье, синагугдин кьиле авай Яир лугьудай кас атана Исадин кӀвачерик ярх хьана. Ада Исадиз вичин кӀвализ ша лагьана, минетна: 42адан цӀикьвед йис хьанвай авай-авачир са руш рекьидай гьалдал атанвай. Иса аниз рекье гьатна, инсанри гьар патахъай Ам юкьва туна. 43Абурухъ цӀикьвед йисуз къеняй иви физ азиятдик квай са пабни галай. Вичихъ авай-авачир вири эменни лукьманриз серфнатӀани, садавайни ам сагъариз хъхьаначир. 44И папа, кьулухъай атана, Исадин парталдин ценцик гъил кяна. А папай физвай иви гьасятда акъваз хьана.

45– Зак ни гъил кяна? – жузуна Исади.

Садани хиве кьун тавурла, адахъ галайбуру ва Петруди лагьана:

– Устаз, халкьди Вун элкъуьрна юкьва тунва.

46Амма Исади лагьана:

– Са ни ятӀани Зак гъил кяна. За Жувай къуват фейиди гьисс авуна.

47А паб, вичи авур кар чуьнуьхиз тахьана, зурзун кваз атана, Исадин кӀвачерик ярх хьана. Исадик гъил кягъуникди вичиз регьят хьайиди ада вири халкьдиз малумарна. 48Исади адаз лагьана:

– Чан руш! Ви иманди вун хиласна! Ахлад, саламат хьурай вун.

49Адан гаф мецел аламаз синагугдин кьиле авайдаз атана сада лагьана:

– Ви руш кьена, вуна мад Муаллим икрагь хъийимир.

50И гафар ван хьайила, Исади Яираз лагьана:

– КичӀе жемир, анжах Зи чӀалахъ хьухь. Ви руш хилас жеда.

51Петрудилай, Ягьядилай, Якьубалай ва рушан диде-бубадилай гъейри, Ада садазни руш авай кӀвализ гьахьдай ихтияр ганач. 52А рушахъ вири шехьзавай. Амма Исади лагьана:

– Шехьмир, руш кьенвач, ам ксанва.

53Анал алай инсанар адал хъуьрена, абуруз руш кьенвайди чизвай. 54Исади, рушан гъил кьуна, гьарайна:

– Къарагъ, я руш!

55Рушал гьасятда чан ахкьалтна, ам къарагъна. Исади рушаз тӀуьн гун эмирна. 56Рушан диде-буба мягьтел хьана амукьна. Исади абуруз хьайи кардикай садазни талгьун эмирна.

Currently Selected:

ЛукӀа 8: ЛезПК

Highlight

Copy