ЛукӀа 17

Исади тилмизриз гъил къахчуз чирун

(МатӀай 18:6-7, 15, 21-22; Мрк. 9:42)

1 Исади Вичин тилмизриз лагьана:

– Инсан рекьяй акъуддай затӀар дуьньяда тахьун мумкин туш, амма абур ни арадал гъизватӀа, гьадаз гуж жеда. 2ГьакӀан гъвечӀи инсанрикай сад рекьяй акъудзавай кас гарданда регъуьн къван туна гьуьлуьз вегьейтӀа, хъсан я. 3Мукъаят хьухь, ви стхади гунагь жедай са кар авуртӀа, вуна адаз туьнбуьгь ая. Ада туба авуртӀа, вуна адалай гъил къахчу. 4Ада йикъа иридра ваз акси яз гунагь крар авуртӀа ва, иридра ви патав атана, мад туба авуртӀа, вуна адалай гъил къахчу.

Имандикай

5 Илчийри Реббидиз лагьана:

– Чи иман чӀехиди ая!

6Реббиди лагьана:

– Квехъ финдин твар кьванни са гъвечӀи иман аватӀа, тутун тараз куьне «Жуван дувуларни къахчуна фена гьуьлуьз гьахь», – лагьайтӀа, ам куь чӀалаз килигда. 7Цан цазвай, я тахьайтӀа куь малар хуьзвай вач-хъша элкъвена хтайла, квевай нивай адаз: «Тадиз хъша, суфрадихъ ацукь», – лугьуз жеда? 8Акси яз, куьне адаз «Вуна заз нянин тӀуьн гьазура, жуван пекер дегишарна, за тӀуьн-хъун ийидай чӀавуз захъ гелкъуьгъ, ахпа жувани неъ», – лугьудачни?

9Вичин эмир кьилиз акъудна лагьана ада а вач-хъшадиз сагърай лугьудани? 10Куьнни гьакӀ я, квез ганвай эмир кьилиз акъуддайла, лагь: «Чун гьакӀан лукӀар я, чна анжах чаз гайи эмир кьилиз акъудна».

Жузам азар квайбур сагъар хъувун

11Садра Иса, Ярусалимдиз физвайла, Самариятдинни Галилейдин сергьятдин патарив гвай. 12Ам са хуьруьз гьахьдайла, Адан вилик жузам азар квай цӀуд кас атана, са тӀимил къерехда хьиз акъвазна. 13Абуру гьарайна лагьана:

– Иса! Устаз! Чаз регьим ая!

14Абур акурвалди, Исади лагьана:

– Алад, фена куьн хахамриз къалура.

Фидай рекье абур жузамдикай михьи хьана. 15Абурукай сад, вич сагъ хъхьана акурди, элкъвена хтана. Ада ван алаз Аллагьдиз шукурар авуна. 16Ам Исадин кӀвачерик ярх хьана, адаз «Вун сагърай» лагьана. А кас чувуд ваъ, самариятви тир.

17Исади адавай хабар кьуна:

– Бес михьи хъхьайбур цӀуд кас туширни? Амай кӀуьд кас гьинава? 18Патанди тир и касдилай гъейри, Аллагьдиз шукурар ийиз вучиз абурукай садни хтанач? 19Къарагъ, вач, ви иманди вун хиласна.

Аллагьдин Пачагьлугъ атун

(МатӀай 24:23-28, 37-41)

20Садра фарисейри Аллагьдин пачагьвилин вахт мус алукьда лагьана хабар кьурла, Исади жаваб ганай:

– Аллагьдин пачагьвилин вахт вилериз аквадай жуьреда алукьдач, 21я квез: «Ингье, им Аллагьдин пачагьвал я», я тахьайтӀа: «Килиг, ана авайди Аллагьдин пачагьвал я» лагьана Адакай хабарни гудач. Ингье, Аллагьдин пачагьвал куь арада авайди я.

22Ада тилмизриз мад хълагьна:

– Йикъар къведа хьи, Инсандин Хцин баркалладин са югъ хьайитӀани квез акваз кӀан жеда, амма ам квез аквадач. 23Квез садбуру: «Ингье, Инсандин Хва ина ава», – лугьуда. Муькуьбуру: «Ангье, Ам ана ава», – лугьуда. Куьн абурун гуьгъуьна гьатмир, я абуру къалурзавай патаризни фимир. 24Цавун са патай ягъайла муькуь пад экуь ийидай цӀайлапан хьиз, Инсандин Хва атана акъатда. 25Амма сифте Инсандин Хцикай и несилдин инсанри кьил къакъудда, Ам гзаф азиятрик акатун лазим я. 26Нуьгьан девирда гьикӀ хьанатӀа, Инсандин Хва элкъвена хтай девирдани гьакӀ жеда: 27Нуьгьан девирда, ам гимидиз акьахдалди, вирибуру незвай, хъвазвай, папар гъизвай, гъуьлуьз физвай, амма дуьньядал яд акьалтна – вири терг хьана. 28Гьа икӀ Лутан девирдани незвай, хъвазвай, къачузвай, маса гузвай, тарар-тумар цазвай, дараматар эцигзавай. 29Амма Лут Садумдай экъечӀай юкъуз, Садумдал цавай цӀайни гугурт квай марф къвана ва вири тергна. 30Инсандин Хва пайда хьайи юкъузни гьакӀ жеда. 31Гьа юкъуз кӀвалин чӀередал вуж хьайитӀа, ам кӀвале авай шейэр къахчуз эвичӀ тавурай; вуж чуьлда аваз хьайитӀа, ам элкъвена кӀвализ хтун тавурай. 32Лутан папан кьилел атай мусибат рикӀел хкваш. 33Вуж вичин чан хуьз алахъзаватӀа, адавай ам къакъудда, ни вичин уьмуьрдилай гъил къачуртӀа, адан чан сагъни жеда. 34За квез лугьузва: гьа йифиз кьвед са месик жеда: абурукай сад къахчуда, муькуьди тада. 35-36Кьве папа са регъве техил регъведа: абурукай сад къахчуда, муькуьди тада.

37Исади лагьай и гафариз яб гайидалай кьулухъ тилмизри Адавай хабар кьуна:

– А крар гьина хьун лазим я?

– Гьинал леш алатӀа, – жаваб гана Ада, – гьанал къузгъунарни кӀватӀ жеда.

Currently Selected:

ЛукӀа 17: ЛезПК

Highlight

Copy