ЛукӀа 10

Пудкъанни цӀикьвед тилмиз

(МатӀай 11:21-24)

1Адалай кьулухъ Реббиди мад пудкъанни цӀуд кас хкяна, Вичиз физ кӀанзавай шегьерризни хуьрериз абур кьве-кьвед Вичелай вилик ракъурна. 2Абуруз Ада лагьана:

– Гвен бул я, гвен гуьдайбур – тӀимил; гьакӀ хьайила, гвенин Иесидиз гвен гуьдайбур мад ракъуррай лагь!

3Алад! За куьн жанавуррин арадиз кӀелер хьиз ракъурзава. 4Я пулунин кисе, я гьебе, я кӀвачин къапар къачумир, я физвай рекье садазни салам гумир. 5Гьи кӀвализ куьн фейитӀани, сифте лагь: «Хийирар хьуй!» 6Ана хийир-дуьа авуниз лайих авай инсан аваз хьайитӀа, ада куьне а кӀвализ гъидай хийир кьада, тахьайтӀа куь хийир элкъвена квел хкведа. 7Гьа кӀваляй хъфимир, гьабурухъ авайди неъ, хъухъ: чӀугунвай зегьметдиз лайих къимет гун лазим я. Садан кӀваляй масадан кӀвализ экъечӀмир.

8Са шегьердиз атана куьн кьабулайтӀа, квез вуч гъайитӀа, гьам неъ. 9Гьана азарри кьунвайбурни сагъар хъия ва анин эгьлийризни лагь: «Аллагьди пачагьвал ийидай вахт квез мукьва хьанва». 10Чара шегьердиз атайла, куьн кьабул тавуртӀа, къецел экъечӀна, лагь: 11«Квек тахсир квайди чирун патал, чи кӀвачерал ацукьнавай куь шегьердин ругни кваз чна югъур хъувуна квез тада. Аллагьди пачагьвал ийидай вахт мукьва хьанвайди квез чир хьухь». 12За квез лугьузва хьи, Къияматдин юкъуз Садум шегьердиз и шегьердилай регьят жеда.

13Вазни жедайди гуж я, Харазин шегьер! Вазни жедайди гуж я, Бетсаид шегьер! Куьна хьайи хьтин аламатар Туьрс ва Сидун шегьерра хьанайтӀа, а шегьеррин агьалияр, шихин пекер алукӀна, кьилелай руьхъ алахна, Аллагьдин рекьел къведай. 14ГьакӀ хьайила, Къияматдин юкъуз квез гудай жазадилай Туьрсдизни Сидундиз гайи Аллагьдин жаза кьезилди жеда. 15Вазни, Кефернагьум, вун цавариз хкаждайди хьиз авани? Ваъ, вун ирид чилерин кӀаник вегьида!

16Квекай кьил къакъудзавайда закайни кьил къакъудда, Закай кьил къакъудзавайда Зун Ракъурнавайдакайни кьил къакъудда.

Тилмизар элкъвена хтун

(МатӀай 11:25-27; 13:16-17)

17Пудкъанни цӀуд тилмиз шаддаказ элкъвена хтана.

– Я Агъа! – лагьана абуру. – Ви ТӀвар кьурла, чаз жинерарни кваз муьтӀуьгъ жезвай.

18– Заз цӀайлапан хьиз цаварай аватай иблис акуна, – лагьана Исади. – 19Ингье, За квез гъуьлягърални акьрабрал са зиянни авачиз кӀвач вегьидай ва душмандин вири къуватрал гъалиб жедай гуж ганва, са затӀунивайни квез зиян гуз жедач. 20Амма куьне жинерар квез табий хьунал шадвал ийимир, куь тӀварар цаварал кхьенваз хьунал шадвал ая.

21Гьа вахтунда Пак Руьгьди Иса хвешивилив ацӀурна.

– Ваз шукур хьурай, Буба, цаваринни чилин Ребби, – лагьана Исади, – Вуна акьулни къанажагъ авайбурукай чуьнуьхнавай сир гъвечӀи аялриз ахъайна. Эхь, Буба, ам Ви регьим алай къаст тир.

22Зи Бубади Заз вири ганва. Хва вуж ятӀа, Бубадилай гъейри садазни чидач, Буба вуж ятӀа, Хцелай ва Хциз Ам низ къалуриз кӀан хьайитӀа, гьадалайни гъейри садазни чидач.

23Исади тилмизрихъ элкъвена кьилди абуруз лагьана:

– Квез аквазвайди аквазвай вилер бахтавар я! 24За квез лугьузва: квез аквазвай крар гзаф пайгъамбарризни пачагьриз чпизни акуна кӀанзавай, амма акунач; квез ван къвезвайбурукай чпизни ван атана кӀанзавай, амма атанач.

Хъсан самариятви

(МатӀай 22:34-40; Мрк. 12:28-31)

25Са гъилера Иса синагъ ийиз кӀанз, къарагъна са тавратдарди Адавай хабар кьуна:

– Я Муаллим, эбеди уьмуьрдив агакьун патал, за вуч авун лазим я?

26– Къанунда вуч кхьенва? – жаваб гана Исади. – Анай вуна вуч кӀелзава?

27Ада жаваб гана:

– Виридан Ребби Аллагь рикӀин сидкьидай, жуван вири чандалди, жуван вири амандалди, жуван вири кьатӀунралди кӀан хьухь, «жув хьиз жуван мукьув гвайдини кӀан хьухь»#Леви 19:18..

28– Вуна дуьздаказ жаваб гана, – лагьана Исади; – вуна гьакӀ авунни ая, вал чан жеда.

29Амма, вичин суал дуьзди яз къалурун патал, ада Исадиз лагьана:

– Бес зи мукьув гвайди вуж я?

30А суалдиз жаваб яз, Исади адаз кьиса ахъайна:

– Са инсан Ярусалимдай Еригьандиз физвайла, ам къачагърин гъиле гьатна; абуру адалай пекер хтӀунна, гатана, ам рекьидай чкадал гъана, чебни хъфена. 31А рекьяй са хахам физваз хьана, адаз гатанвайди акурла, ам кьасухдай къвалавай элячӀна фена. 32Гьа и чкадал атай левидини гьакӀ авуна: гатанвайди акун кумазни, патавай элячӀна фена. 33Гьанлай са самариятви фидайла, ам акунмазни, адаз а касдин язух атана. 34Ам адан патав фена, чехирдив чуьхвена, адан хирериз зейтундин чӀем яна, кутӀунна. Вичин ламрал акьадарна ам мугьманханадиз хкана ва гьанани адахъ гелкъвена. 35Пакагьан юкъуз вич хъфидайла, кьве динар акъудна ада мугьманханадин иесидиз виликамаз гана ва лагьана: «Адахъ гелкъуьгъ; артухан харж акъатайтӀа, элкъвена хкведайла, за вав вахгуда». 36Ваз чиз, къачагърин гъиле гьатай кас патал а пудакай вуж мукьув гвайди тир?

37Тавратдарди лагьана:

– Адаз хъсанвал авурди.

Инал Исади лагьана:

– Алад, жувани гьакӀ ая.

Иса мугьманвиле

38Садра абур рекье авайла, Иса атана са хуьруьз акъатна; ана Марта лугьудай са папа Адаз мугьманвилиз эверна. 39Адахъни Майрам лугьудай са вах авай. Ада, Исадин кӀвачерив ацукьна, Адан гафариз яб гузвай. 40ТӀуьн-хъун гьазуриз гара авай чӀавуз, Мартади, атана, Исадиз лагьана:

– Я Агъа! Зи ваха са кӀвалахни тийиз, икьван крар са зал вегьенвайди Ваз аквазвачни? Адаз заз куьмек ая лагь.

41– Марта! Марта! – жаваб гана Реббиди. – Вуна гзаф зегьметар чӀугвазва, ваз гзаф къайгъуяр ава. 42КӀанзавайди анжах са кар я. Майрама вичиз виридалайни хъсан кар хкянава, ам адавай къакъудни ийидач.

Currently Selected:

ЛукӀа 10: ЛезПК

Highlight

Copy