Ягья 6

Вад агъзур кас тухарун

(МатӀай 14:13-21; Мрк. 6:32-44; ЛукӀа 9:10-17)

1Идалай кьулухъ Иса Галилейдин, яни Тибердин вирин муькуь къерехдиз экъечӀна. 2Ада азарри кьунвайбур сагъар хъийидайла авур керемат-ишараяр акуна, Адан гуьгъуьна аваз гзаф халкь фена. 3Иса пелел экъечӀна, анал Ам Вичин тилмизарни галаз ацукьна. 4Чувудрин Песагь сувар мукьва жезвай. 5Исади, кьил хкажна, Вичин патав къвезвай гзаф кьадар инсанар акурла, ФилипӀаз лагьана:

– Абуруз тӀуьн гун патал бес кьадар фу чна гьинай къачуда?

6Ибур Ада ФилипӀ синагъ авун патал лагьай гафар тир; вуч авуна кӀандатӀа, Адаз Вичиз чизвай. 7ФилипӀа жаваб гана:

– Гьардал са кӀус кьванни гьалтун патал кьве виш динардихъ къачур фу абуруз бес жедач.

8Адан тилмизрикай сада, Эндирея, Симун-Петрудин стхади, лагьана:

9– Ина са гададив мухан вад фуни кьве гъед гва; амма икьван инсанриз адакай вуч жеда?

10– Абурув виридав ацукьиз тур, – лагьана Исади.

А хъсан векь авай чкада вад агъзур кьван итимар ацукьна.

11Исади фар къачуна, шукур авуна, ацукьнавайбуруз гьардаз кӀандай кьван фуни гъетер пайна. 12Вири тух хьайила, Ада Вичин тилмизриз лагьана:

– Терг тахьун патал амай кӀусар кӀватӀа.

13Вирида тӀуьрдалай кьулухъ мухан вад факай амукьай кӀусарай цӀикьвед зимбил ацӀурнай. 14Исади къалурай керемат-ишараяр акур инсанри лугьуз хьана:

– Им дугъриданни дуьньядиз атана кӀанзавай гьа Пайгъамбар я.

15Инсанриз атана Вичикай гужуналди пачагь ийиз кӀанзавайди чир хьайи Иса мад текдиз пелел фена.

Иса целай фин

(МатӀай 14:22-33; Мрк. 6:45-51)

16Няни хьайила Адан тилмизар вирихъ эвичӀна. 17МичӀи жезвай, амма Иса абурун патав къвезвачир. Абур луьткведа акьахна вирин а патаз – Кефернагьумдиз фена. 18Къати гар акъатнавай, вирелни лепе акьалтнавай. 19Са сятдин мензилдиз фейила, вирелай тӀуз атана луьткведиз мукьва жезвай Иса акуна, абуруз кичӀе хьана. 20Амма Исади абуруз лагьана:

– Зун я, кичӀе жемир.

21Абуруз Ам луьткведа акьадариз кӀанзавай чӀавуз луьткве абуруз физ кӀанзавай чкадив агакьнавай.

Уьмуьрдин фу

22-23 Пакагьан юкъуз вирин а пата амай инсанри вирел анжах са луьткве аламайди кьатӀанвай. Абуруз а луьткведа тилмизар акьахайди ва абурухъ Иса галачирдини чизвай. Тилмизар вирин а патаз текдиз экъечӀнай. И арада Тибердай маса луьтквеяр Исади Реббидиз шукур авуна халкьдиз фу гайи чкадин мукьув атана. 24Исани Адан тилмизар авачиз акурла, инсанар луьтквейриз акьахна Исадихъ къекъвез Кефернагьумдиз фена. 25Иса вирин а патай жагъайла, абуру Адаз лагьана:

– Муаллим! Вун иниз мус атана?

26Исади жаваб гана:

– За квез лап рикӀивай лугьузва: фу тӀуьна тух хьайивиляй я куьн Захъ къекъвезвайди, амма Аллагьдиз Зи керемат-ишарадалди квез вуч лугьуз кӀанзаватӀа куьн гъавурда акьунвач. 27Куьн фад вара-зара жедай гьакӀан тӀуьнихъ галтугмир, квез эбеди уьмуьр гудай тӀуьнихъ галтуг. А тӀуьн квез Инсандин Хци гуда. Чи Аллагь Бубади Инсандин Хциз гьа ихтияр ганва.

28– Аллагьдин крар кьилиз акъудун патал чна вуч авуна кӀанда? – лагьана абуру.

29– Аллагьдиз кӀанзавайди Вичи Ракъурнавайдахъ куьне иман авун я, – жаваб яз лагьана Исади.

30И гафариз жаваб яз, абуру Адаз лагьана:

– Вуна чаз са керемат-ишара къалура. Ам акурла, чун Ви чӀалахъ жеда. Вуна вуч ийида? 31Каламда кхьенва: «Аллагьди абуруз цаварилай фу нез вугана»#Забур 77:24.. Гьа кхьенвайвал, гзаф йисар инлай вилик чи бубайри кьурумда мангьу тӀуьнай.

32– За квез лап рикӀивай лугьузва: цаварилай квез фу гайиди Муса туш, квез цаварилай халисан фу гузвайди Зи Буба я, – лагьана Исади. – 33Аллагьди гузвай и фу – им цаварилай атана дуьньядиз уьмуьр гузвайди я.

34– Агъа! – лагьана абуру. – Чаз датӀана гьахьтин фу це.

35– Уьмуьр гудай фу – Зун я, – лагьана Исади. – Зи патав атайди са чӀавузни гишила амукьдач ва Захъ иман ийизвайди гьич са чӀавузни къаних жедач. 36Амма За квез виликдай лагьайвал, квез Зун аквазватӀани, куьне Захъ иман ийизвач. 37Зи Бубади Заз ганвай вирибур гьар гьикӀ хьайитӀани, Зи патав къведа. Зи патав атайди За чукурдач. 38Зун цаварилай Жуваз кӀандайвал авун патал ваъ, Зун Ракъурнавайдан къаст кьилиз акъудун патал атанва. 39Зун Ракъурнавайдан къаст Заз ганвай са касни терг тахьун, Къияматдин юкъуз абурал За чан хкун я. 40Зун Ракъурнавайдан къаст – Хва акур ва Адахъ иман ийизвай гьар садаз эбеди уьмуьр гун я. Къияматдин юкъуз За гьахьтин гьар са касдал чан хкида.

41Исади «Зун цаварилай эвичӀна атанвай фу я» лугьуникди, чувудар Адалай нарази хьана.

42– Ам Юсуфан хва Иса тушни кьван? – лугьузвай абуру. – Чаз Адан дидени буба хъсан чизва. Ада «Зун цаварилай эвичӀнавайди я» гьикӀ хьана лугьузвайди я?

43Абуруз жаваб яз Исади лагьана:

– Куьне наразивилер ийимир. 44Зи патав анжах Зун ракъурай Зи Бубади гъайидавай къвез жеда. Къияматдин юкъуз За адал чан хкида. 45Пайгъамбарри кхьенва: «Аллагьди вири гъавурда твада»#Яшай 54:13.. Зи Бубади вуч лугьузватӀа ван жезвай ва Ада лагьайбур чир жезвай гьар сад Зи патав къведа. 46Им са низ ятӀани Буба акуна лагьай чӀал туш. Анжах Аллагьдин патавай Атанвайдаз Буба акунва. 47За квез лап рикӀивай лугьузва: Захъ иман ийизвайдаз эбеди уьмуьр жеда. 48Зун уьмуьр гудай фу я. 49Куь бубайри кьурумда мангьу тӀуьнайтӀани, абур кьенай. 50Куь вилик квайди лагьайтӀа, цаварилай атанвай фу я, а фу тӀуьрди рекьидач. 51Зун цаварилай атанвай уьмуьр гудай фу я; и фу незвай кас эбеди яз жеда. За гузвай фу Зи Беден я. Ам За инсанар чан алаз хьун патал гуда.

52Инлай чувудри чпи чпихъ галаз гьуьжетар ийиз, лугьуз хьана:

– Ада Вичин Беден чав гьикӀ нез тада?

53Исадини абуруз лагьана:

– За квез лап рикӀивай лугьузва: куьне Инсандин Хцин Беден тӀуьн тавуртӀа ва Адан Иви хъун тавуртӀа, квехъ уьмуьрни жедач. 54Зи Беден незвайдахъ, Зи Иви хъвазвайдахъ эбеди уьмуьр жеда, Къияматдин юкъуз За адал чан хкида. 55Вучиз лагьайтӀа Зи Беден – недай гьакъикъи затӀ я, Зи Иви – хъвадай гьакъикъи затӀ я.

56Зи Беден незвайди ва Зи Иви хъвазвайди За жеда, Зунни – гьада. 57Зун уьмуьр гудай Зи Бубади Ракъурнавайди я, Ам себеб яз Зал гьикӀ чан ала, Зун незвайбурални, Зун себеб яз, гьакӀ чан жеда. 58Цаварилай атай гьакъикъи фу гьа ихьтинди я, куь кьенвай бубайри тӀуьр хьтинди туш. Цаварилай атай и фу незвайди эбеди яз жеда.

59И гафар Исади Кефернагьумда синагугда чирвилер гудай чӀавуз лагьанай.

Гзаф тилмизар Иса туна хъфин

60Исадин и гафар ван хьайи Адан тилмизрикай гзафбуру лагьанай:

– Ибур хупӀ зегьле ракъурдай гафар тушни! Абуруз яб гудайди вуж хьуй!

61Тилмизрин наразивал Вичиз аян хьанвай Исади абуруз лагьана:

– Зи гафари квек хкуьрзавани? 62Бес квез Инсандин Хва Вич хьайи цаварал хъфиз акуртӀа куьне вучда? 63Уьмуьр гузвайди Руьгь я, инсанрин алахъунрихъ ахьтин керемат-ишара авач. За квез лагьанвай гафар руьгь я, абуру уьмуьрни гузва.

64ГьакӀ ятӀани, куь арада иман тийизвайбур ава.

Исадиз лап сифтедилай Вичихъ ни иман ийидачтӀа чизвай. Адаз Вич ни маса гудатӀани чизвай.

65– За гьавиляй лагьанай хьи, – давамарна Исади, – Бубади Зи патав атун низ ганвачтӀа, абурукай садавайни Зи патав къвез жедач.

66Гьа вахтунилай Адан тилмизрикай гзафбур Адакай къерех хьана ва Адахъ галаз къекъуьн хъувунач. 67Амай цӀикьведавай Исади жузуна:

– Квезни Завай къакъатиз кӀанзавани?

68– Чун нин патав фида, я Агъа? – жаваб гана Симун-Петруди. – Эбеди уьмуьр гудай гафар Вахъ ава. 69Чна Вахъ иман авунва, чаз Вун Аллагьди ракъурнавай Пакди тир чӀал чир хьанва.

70Исади абуруз жаваб гана:

– Куьн цӀикьведни За хкягъайбур тушни бес? Амма квекай сад иблис я.

71ИкӀ лугьудайла, Адан фикирда Искарият Симунан хва Ягьуд авай; цӀикьведакай сад тир Ягьуд ахпа Иса маса гайиди тир.

Currently Selected:

Ягья 6: ЛезПК

Highlight

Copy