Ягья 19

1И чӀавуз ПилатӀа Иса къамчидив гатут лагьана эмир гана. 2Аскерри къакъвадин таж храна, ам Исадин кьилел эцигна, Адал икьи-яру аба алукӀна. 3Абуру лугьуз хьана:

– Сагъ хьурай Чувудрин Пачагь!

ГьакӀ лугьуз Ам гатаз хьана.

4ПилатӀа, мад экъечӀна, чувудриз лагьана:

– Килиг. Адак са тахсирни кваз таквазвайвиляй ингье за Ам мад куь вилик гъизва.

5И чӀавуз къакъвадин тажни икьи яру аба алаз Иса атана. ПилатӀани абуруз лагьана:

– Ингье, Им гьа Инсан я!

6Ам акурвалди чӀехи хахамрини Аллагьдин КӀвалин къаравулри «Ам хашуниз ягъ, хашуниз ягъ!» лугьуз гьарайна.

– Ам кьуна куьне хашуниз ягъ, заз Адак са тахсирни кваз аквазвач, – лагьана ПилатӀа.

7– Ада Вичиз Аллагьдин Хва лугьузва, – жаваб гана чувудри. – Чахъ къанун ава, чи Къанундалди Ам кьин лазим я.

8И гафар ван хьайи ПилатӀаз амайдалайни кичӀе хьана, 9Ада, дараматдиз хтана, Исадивай хабар кьуна:

– Вун гьинай я?

Исади жаваб ганач.

10– Вуна заз жаваб гузвачни? – лагьана ПилатӀа. – Вун ахъа хъувунни, хашуниз ягъунни зи гъиле авайди ваз чизвачни?

11– Ваз Цавари ихтияр ганачиртӀа, вахъ а ихтияр жедачир, – жаваб гана Исади. – ГьакӀ хьайила Зун ви гъиле тур касдин гунагь мадни чӀехи я.

12Инлай ПилатӀ Иса ахъайдай багьнадихъ къекъвез хьана. Амма чувудри гьараярзавай:

– Вуна Ам ахъаяйтӀа, вун Римдин пачагьдин дуст туш. Ни вич пачагьдай кьадай кьасар ийизватӀа, ам Римдин пачагьдин душман я.

13И гафар ван хьайи ПилатӀа Иса Къванцин Шегьре лугьудай майдандал акъудна. А чкадиз чувуд чӀалал Габат лугьуда. Анал ПилатӀ дуванбегдин чкадал ацукьна. 14Гьа вахт Песагь суварин вилик квай жуьмя югъ тир. Югъни атана частуниз мукьва жезвай. ПилатӀа чувудриз лагьана:

– Им куь Пачагь я!

15– Йикь, Ам йикь, хашуниз ягъ! – гьарайна абуру.

– Куь Пачагь За хашуниз яна кӀанзавани квез? – лагьана ПилатӀа.

– Чахъ Римдин пачагьдилай гъейри маса пачагь авач, – жаваб гана чӀехи хахамри.

16Эхирни ПилатӀа, Иса хашуниз ягъун патал, абурун гъиле туна. Аскерри Иса кьуна тухвана.

Иса хашуниз ягъун

(МатӀай 27:33-44; Мрк. 15:24-32; ЛукӀа 23:33-43)

17Иса, Ам ядай хашни гваз Пелел, чувуд чӀалал – ГалгутӀ, лугьудай чкадал тухвана. 18Гьанал Иса ва Адан къваларивай мад кьве кас хашуниз яна. Иса юкьва авай. 19ПилатӀа хашунал «Чувудрин Пачагь Назаретви Иса» кхьенвай кьул эцигун эмирна. 20Иса хашуниз ягъай чка шегьердин патав хьуниз килигна, а кхьинар гзаф чувудри кӀелнай. А кхьинарни чувуд, латин ва юнан чӀаларалди авунвай.

21– «Чувудрин Пачагь» вучиз кхьенва? – лагьана чувудрин чӀехи хахамри ПилатӀаз. – «Ада „Зун Чувудрин Пачагь я“ лугьузвай», гьам кхьинни ая.

22– За кхьейди кхьена, – жаваб гана ПилатӀа.

23Иса хашуниз ягъай аскерри Адан аба чпин арада пайна. Абур кьуд кас авай. Исадин яргъи перем са цвални алачиз санлай хранвайди тир. 24Гьавиляй абуру перем къазун тавун кьетӀна ва, ам низ акъатдатӀа чирун патал, чип вегьена. Гьа икӀ аскерри Каламда кхьенвай ихьтин гафар кьилиз акъатдайвал авуна: «Абуру Зи пекер чпин арада пайна ва Зи перемдин паталай чип вегьена»#Забур 21:19..

25Иса ягъай хашунин патав Адан диде, Адан дидевах, КӀулпӀасан паб тир Майрам ва Маждалдай тир Майрам акъвазнавай. 26Исади, диде ва Вичин рикӀ алай тилмиз акъвазнаваз акурла, Вичин дидедиз лагьана:

– Ам Ви Хва я, диде.

27Ахпа тилмиздиз лагьана:

– Ам ви диде я!

Гьа идалай кьулухъ а тилмизди Адан диде вичин кӀвализ хутахна.

Исадин кьиникь

(МатӀай 27:48-50; Мрк. 15:36-37; ЛукӀа 23:36)

28Исадиз вири куьтягь хьанвайди чир хьана. Каламда кхьенвай гафар тамамдиз кьилиз акъатун патал, Ада лагьана:

– Заз яд кӀанзава.

29Анал цуру чехирдай ацӀанвай къаб алай. Аскерри мант цуру чехирда экъуьрна, ам иссуп лугьудай набататдин лашунал акьалжна, Исадин сивихъ тухвана. 30Цуру чехирдин дад акуна, Исади лагьана:

– Гила вири туькӀвена!

Кьил хуруз аватай Ада чан гана.

31Жуьмя тир. Гуьгъуьнин югъ Киш, гьакӀни чӀехи суварин югъ тирвиляй чувудрин гьакимриз хашуниз янавайбур хашарал аламукьна кӀанзавачир. Гьаниз килигна, абуру ПилатӀавай, хашуниз янавайбурун ажал фад алукьун патал, абурун кӀвачер яна хадай ва ахпа хашунилай ахлуддай ихтияр гун тӀалабна. 32Гьа икӀ аскерри атана эвел Исадин са патай хашуниз янавайдан, ахпа муькуьдан зангар яна хана. 33Абур Исадин патав атайла, абуруз Адал чан аламачирди акуна, гьавиляй абуру Исадин зангар ханач. 34Амма абурун арадай са аскерди Исадин пакун тӀваларин арадиз жида сухна, анай гьасятда ивини яд авахьна. 35И кар вичин вилералди акур касди тестикьарна. Ада вири авайвал лагьана, адаз вичи лугьузвайди гьакъикъат тирди чизва. Ада лугьунни куьне иман авун патал ийизвайди я. 36Инал Каламда кхьенвай «Адан са кӀарабни ханач»#ЭхкъечӀун 12:46. лагьай гафар кьилиз акъатна. 37Гьа идакай Каламдин маса чкадани лугьузва: «Чпи жида эцягъайдаз абур килигни ийида»#Зекери 12:10..

Иса рага атӀанвай сура тун

(МатӀай 27:57-61; Мрк. 15:42-47; ЛукӀа 23:50-56)

38Идалай кьулухъ АриматӀайдай тир Юсуф Исадин мейит хашунилай алудна хутахдай ихтияр къачуз ПилатӀан патав атана. Юсуф Исадин тилмиз тир, амма ада, чувудрин кьиле авайбурухъай кичӀела, и кар чуьнуьхзавай. ПилатӀа адаз ихтияр гана. Гьа чӀавуз Юсуфа Исадин мейит хашунилай алудна, ам гваз хъфена. 39Юсуфан патав Никъадимни атана. Ада виш гирванка кьван атир галай жуьреба-жуьре векьер-кьалар гъана. Ам са мус ятӀани Исадин патав йифиз атай гьа Никъадим тир. 40Абуру Исадин тандал атирдин ни къвезвай шаршав алчудна. Кьейибур чувудри гьа и къайдада динжарда. 41Ам хашуниз ягъай чкада багъ, багъдавай кьветӀе цӀийи сур авай. Ана икьван гагьда са мейитни эцигнавачир. 42КьветӀ патав хьуниз килигна, абур жуьмя йикъакай амаз Исадин мейит динжариз агакьна.

Currently Selected:

Ягья 19: ЛезПК

Highlight

Copy