Ягья 17

Исадин дуьа

1 Исади, и гафарилай кьулухъ кьил цавуз хкажна, лагьана:

– Вахт хьанва, Буба. Жуван Хцин баркалла къалура, Хцини Ви баркалла къалурда. 2Вуна Адан патав гъидай гьар садаз Ада эбеди уьмуьр гун патал, Вуна чан алай вирибур Адан ихтиярда тунва. 3Эбеди уьмуьр, лагьайтӀа, халисан сад Аллагь тир Вун ва Вуна ракъурнавай Иса Месигь чир хьун я. 4Вуна Заз чилел ая лагьанвай кар За кьилиз акъудна. Гьа идалди За Ви баркалла къалурна. 5Гила, Буба, дуьнья халкь ийидалди Зун ви патав гвайла, Зал алай хьтин баркалла Вуна Зав гахце. 6И дуьньяда Вуна Зав агудай инсанриз За Ви ТӀвар чирна. Абур вибур тир, Вуна абур Зи патав гъана. Абуру Ви гаф кьилиз акъудна. 7Вуна Заз гайи кьванди вири Валай къвезвай чӀал гила абуруз чир хьанва. 8Вуна Заз лагьай гафар За абурал агакьарна, абуруни а гафар кьабулна. Гила абуруз Зун Ви патавай атайди гьакъикъатда чир хьанва ва Зун Вуна ракъурайдахъ абур агъунва. 9Абурун паталай За Ваз минетзава. Дуьньяда авай вирибурун паталай ваъ, са гьабурун паталай. Абур вибур тир, Вуна абур Заз гана. 10Захъ авай вири Види я, Вахъ авай вири Зиди я. Абуру чпин краралди Зи баркалла виридаз къалурда. 11Зун мад и дуьньяда акъваздач, Зун Ви патав хквезва. Абур, лагьайтӀа, и дуьньяда амукьзава. Я пак Буба, абур Заз Вуна гана, Жуван ТӀварцӀелай абур хуьх; къуй абур чун хьиз сад хьурай. 12Зун абурухъ галамай кьван гагьда Заз ганвай Ви ТӀварцӀелай За абур хуьзвай. За абур хвена ва Каламда кхьенвайди кьилиз акъатун патал кьиникь ганвай садалай гъейри, абурукай гьич садни терг хьанач. 13Гила Зун Ви патав хквезва. За ийизвай хьтин шадвилив гьабурни ацӀун патал, За и вири гафар абурухъ галаз Зун и дуьньяда амаз лугьузва. 14Ви гаф За абурал агакьарна, амма дуьньяда авайбуруз абур такӀан хьанва, вучиз лагьайтӀа, Зун хьиз, гьабурни и дуьньядикай туш. 15За Ваз абур и дуьньядай къахчун патал минетзавач, За Вавай абур чӀурудакай хуьн тӀалабзава. 16Зун дуьньядикай туширвал, гьабурни дуьньядикай туш. 17Жуван гьакъикъатдив абур пак ая. Ви гаф гьакъикъат я. 18Вуна Зун и дуьньяда авайбурун патав ракъурайвал, Зани абур и дуьньяда авайбурун патав ракъурна. 19За Жув гьабурун паталай пак къурбанд хьиз гузва, гьабурни гьакъикъатдив пак хьурай. 20За ийизвай минет са гьабур ваъ, абурун гафариз яб гана Захъ иман ийидайбур патални я. 21Зун Ва ава, Вунни За ава. Абур – сад хьурай ва Ча аваз хьурай. Гьа чӀавуз дуьнья Зун Вуна ракъурайдахъ агъада. 22Зунни Вун гьикӀ сад ятӀа, гьабурни гьакӀ сад хьурай. Гьавиляй За гьабурузни Вуна Заз гайи хьтин баркалла гана. 23Зун абура ава, Вунни За ава. Абурухъни гьа ихьтин тамам садвал хьурай. Гьа чӀавуз Ваз, Зун хьиз, гьабурни кӀанзавай чӀал дуьньядиз чир жеда ва Зун Вуна ракъурайдахъ дуьнья агъада. 24Буба, гьеле дуьнья халкь жедалди Ваз зун кӀандай ва Вуна Заз баркаллани ганай. Гьавиляй Заз, Вуна Зав агудай и баркалла акун патал, Заз абур Зун гьина хьайитӀа, гьана хьанайтӀа кӀандай. 25Гьахъ-михьи Буба! Дуьньядиз Вун чизвач, амма Заз Вун чизва. Зун Вуна ракъурнавайди ина авайбурузни чир хьанва. 26Ваз Зун кӀандайвал, гьабурни кӀан хьун патал, За абуруз Ви ТӀвар ачухарна ва мадни ачухарда. Гьа и саягъда Зун абура ава.

Currently Selected:

Ягья 17: ЛезПК

Highlight

Copy