Хьунухь 9
9
Аллагьдинни Нуьгьан икьрар
1Аллагьди Нуьгьазни адан рухвайриз хийир-дуьа авуна: «Куьне куь тум-кьадар артух ая, чил ацӀура.
2Чилел алай вири вагьшийриз ва цавара авай вири къушариз, гьам чилин винел алай чан алай кьван вири куьлуь-шуьлуьйриз, гьамни гьуьлера авай вири гъетериз квехъай кичӀе хьурай ва куь вилик зурзурай: абур куь ихтиярда тунва. 3Вири гьайванар за квез, виликдай набататрин къацар гайивал, тӀуьн патал гузва. 4Амма чан алай як, яни иви квайди, – немир.
5Куь ивидин патахъайни – къакъудай уьмуьрдин патахъайни – За а иви экъичайдаз – кӀандатӀа ам вагьши хьурай, кӀандатӀа вичин стхадин уьмуьр къакъудай инсан – жаза гуда.
6Инсандин иви ни экъичайтӀа, и кардай ивикъичдин иви эхкъичрай. Вучиз лагьайтӀа инсан Аллагьдин къамат хьиз халкь авунвайди я. 7Куьне куь тум-кьадар артух ая, чил тирвал чукӀукӀ, гзаф хьухь».
8Аллагьди Нуьгьаз ва адан рухвайриз лагьана: 9-10«Гила За квехъ галаз ва квелай гуьгъуьниз къведай несилрихъ галаз, гьам гимидай эвичӀай чан алай вири затӀарихъ галаз: ничхиррихъ, кӀвалин ва вагьши гьайванрихъ галаз икьрар кутӀунзава. 11Квехъ галаз зи икьрар ихьтинди жеда: идалай кьулухъ чан алай гьич са затӀни мад чилел яд акьалтна терг жедач, яд акьалтуни мад чил барбатӀ хъийидач».
12Аллагьди давамарна: «Ингье За квехъ галаз ва чан алай кьван вири затӀарихъ галаз эбеди яз кутӀунзавай икьрардин лишан: 13За циферал Жуван чӀемерук – яргъируш – Зини чилин агьалийрин арада авай икьрардин лишан яз куьрсарнава.
14За лацу цифер чилин винел гъайила, абурукай яргъируш хкечӀда. 15И чӀавуз квехъ ва чан алай гьар са затӀунихъ галаз кутӀуннавай икьрар Зи рикӀел хкведа – ва чан алай гьар са затӀ терг ийидай яд акьалтун мад хъижедач.
16Циферик яргъируш жеда – Заз ам аквада, ва чилел алай вири агьалийрихъ галаз эбеди яз кутӀуннавай Жуван Икьрар Зи рикӀел хкведа».
17Аллагьди Нуьгьаз лагьана: «Им За чилел уьмуьр тухузвай гьар са затӀунихъ галаз кутӀуннавай Икьрардин лишан я».
Нуьгьан рухваяр
18Гимидай экъечӀай Нуьгьан рухваяр – ибур Шам, Хам ва Яфет я. Хам Къенанан буба я.
19Абурун кьадар пуд тир, ва чилел алай вири халкьар гьабурулай арадал атанвайди я.
20Нуьгьа чилел зегьмет чӀугвазвай; сифте ада ципицӀар цана. 21Чехирдикай хъвана, Нуьгь луьл сархуш хьана ва кьецӀилдаказ вичин алачухдик къаткана.
22Адан кьецӀилвал Къенанан буба Хамаз акуна ва экъечӀна и кардикай стхайриз лагьана. 23И чӀавуз Шамани Яфета къуьнерихъ чухва вегьена ва кьулу-кьулухъ атана адан кьецӀилвал чухвадалди кӀевна. Абур чеб маса патахъ килигзавай, гьавиляй адан кьецӀилвал акуначир. 24Нуьгь кьил кьилел хтанваз ахварай аватна ва вичин гъвечӀи хци авур кӀвалах чир хьайила, 25ада лагьана:
«Къенаназ лянет хьурай!
Вичин стхайриз ам лап усал лукӀ хьурай!»
Аллагьди мадни лагьана:
26«Шукур хьурай Реббидиз, Ша́ман Аллагь тир!
Къенан лагьайтӀа, стхайрин лукӀ хьурай.
27Аллагьди Яфетан мулкар гегьенш авурай!
Яфета Шаман алачухрик уьмуьр тухурай!
Къенан лагьайтӀа, стхайрин лукӀ хьурай».
28Дуьньядал яд акьалтайдалай кьулухъ Нуьгьан уьмуьр мадни пуд вишни яхцӀурни цӀуд йис давам хьана. 29Уьмуьрдин яшар кӀуьд вишни яхцӀурни цӀудаз барабар хьайила, Нуьгь кьена.
Currently Selected:
Хьунухь 9: ЛезПК
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© Институт перевода Библии, 2010, 2018, 2023