Хьунухь 13

Ибрамни Лут чара хьун

1Ибрам пабни вири мал-девлетни гваз элкъвена Мисридай Негевдиз хтана; адахъ галаз санал Лутни хъфена. 2Ибрам гзаф девлет авайди тир – гьам мал-къарадин, гьам гимишдин, гьамни къизилдин жигьетдай. 3-4Негевдай ам элкъвена Бет-Элдиз хтана – вич виликдай акъвазай ва Реббидин тӀвар кьуна къурбанган эцигай Бет-Элдинни Гъайдин арада авай чкадал.

5Ибрамахъ галаз санал куьчери яз уьмуьр тухузвай Лутахъни вичин лапагарни малар ва вичин алачухар авай. 6Кьве касдиз чил бес жезмачир: абурухъ гьар жуьредин мал-девлет акьван авай хьи, санал уьмуьр тухуз абуруз дарискъал хьанвай. 7Ибраманни Лутан нехирбанрин арада къалар жез гатӀунна (а девирда лагьайтӀа, и чилел гьакӀ къенанвийрини перизийри уьмуьр тухузвай).

8Ибрамани Лутаз лагьана: «Зини ви арада, чи нехирбанрин арада къал-макъалар тахьурай: чун мукьва-кьилияр я эхир! 9Вири чил ви вилик ква – ша чун гьар сад са патахъ фин. Вун чапла патахъ фейитӀа – зун эрчӀи пад галайвал. Вун эрчӀи патахъ фейитӀа – зун чапла пад галайвал».

10Лут килигайла акуна хьи, Ярдан дере – вири михьиз, лап Сагардал кьван, Реббидин багъ хьиз, Мисридин чилер хьиз цик ква. (Им Реббиди Садумни Гамура терг ийидалди вилик тир). 11Лута вич патал Ярдан дере хкяна ва рагъэкъечӀдай патахъ рекье гьатна. Гьа икӀ абурун рекьер чара хьана: 12Ибрам Къенанда уьмуьр тухуз ацукьна, Лут – Дередин Шегьеррин патав. Ада Садумдин патарив кьван куьчеривал ийизвай. 13Садумдин агьалияр лагьайтӀа, гзаф чӀуру инсанар тир ва Реббидиз акси яз гунагьриз гзаф рехъ гузвай.

14Лут Ибрамакай чара хьайи чӀавуз Реббиди Ибрамаз лагьана: «Элкъвена са вил вегь! Инлай кефер ва кьибле патарихъ, рагъэкъечӀдай ва рагъакӀидай патаз килиг. 15Ваз аквазвай вири и чил За эбеди яз ваз ва ви несилриз гуда. 16За ви несилар къум кьван гзаф ийида: нивай чилел алай къумадин тварарин кьадар гьисабиз хьайитӀа, гьадавай ви несилрин кьадарни гьисабиз жеда.

17Алад кван, За ваз гудай вири чилериз элкъвена килиг, абур яргъивилихъни гьяркьуьвилихъни кьил акъудна чира».

18Са чкадилай маса чкадал куьч жез, Ибрам Хеврандин патарив гвай Мамре тӀвар алай мегъуьн тамув агакьна, анал акъваз хьана ва Реббидиз къурбанган туькӀуьрна.

Currently Selected:

Хьунухь 13: ЛезПК

Highlight

Copy