Крар 8

Шаула иманияр хурук кутун

1Шаула Истефас кьин дуьз кар яз гьисабнай.

Гьа йикъалай Ярусалимда Исадихъ иманийрин кӀватӀал кӀевелай хурук кутаз эгечӀнай. Илчийрилай гъейри, амай вири катна фена, Ягьудатдизни Самариятдиз чкӀанай. 2Аллагь рикӀел алай инсанри Истефас кучукна, адахъ чӀехи шел-хвал авунай. 3Шаул иманийрин кӀватӀал терг ийиз алахъзавай. Ада, кӀваляй кӀвализ физ, имандал атай итимарни папар кьаз, абур къазаматда тваз хьана.

ФилипӀ Самаратда

4Ярусалимдай катайбуру, чеб гьина аваз хьайитӀани виринра Шад Хабар агакьариз, Аллагьдин Гаф чукӀурзавай. 5ФилипӀ Самариятдин меркездиз атана, ана Месигьдикай муштулухар гуз хьана. 6ФилипӀа къалурзавай керемат-ишараяр акваз, адаз яб гайи вири инсанри рикӀивай адан крариз фикир гузвай. 7ЧӀуру жинерар квайбурукай гьарай галаз абур хкатзавай, фалужди янавайбурни кьецӀибур сагъ хъжезвай. 8Шегьерэгьлияр лап шад тир.

9И шегьерда ицитӀар авунал машгъул са кас авай, адан тӀварни Симун тир. Адан ицитӀвилел самаратвияр вири гьейран тир. Ада вич зурба кас хьиз къалурзавай. 10Адан аламатри пун квайбурун ва амай маса инсанрин фикирар чпел желбзавай.

– Симун – Аллагьдин Къуват я, а Къуватдиз Зурбади лугьузва, – тестикьзавай абуру.

11Инсанрин фикирар ада вичихъ желбнавай, вучиз лагьайтӀа вичин гьиллейрив вири мягьтелариз хейлин вахтар тир. 12ФилипӀа, лагьайтӀа, Аллагьдин Пачагьлугъдикайни Иса Месигь тирдакай Шад Хабарар гузвай. Итимарни, папарни имандал къвезвай ва абуру цик акахьун къачузвай. 13Симунни имандал атана, ада цик акахьун къачуна ва ам ФилипӀахъ галаз амукьна. ФилипӀа къалурзавай аламатар ва керемат-ишараяр акваз, ам мягьтел жезвай.

14Самаратдин халкьди Аллагьдин Гаф кьабулна лугьудай хабар Ярусалимда авай илчийрал агакьайла, абуру аниз Петруни Ягья ракъурна. 15Абуру, атана, цӀийиз иман кьабулайбурук Пак Руьгь акатрай лугьуз, дуьаяр ийиз хьана, 16вучиз лагьайтӀа абурук гьеле садакни Пак Руьгь акатнавачир. Абуру анжах Иса Месигьдин ТӀварцӀелай цик акахьун къачунай. 17Ахпа Петрудини Ягьяди абурал гъилер эцигна, абурук Пак Руьгь акатна. 18Илчийри гъилер эцигуникди, инсанрик Руьгь акатзавайди акур Симуна абуруз пул гъана 19ва лагьана:

– За садал гъилер эцигайла, гьа касдикни Пак Руьгь акатдайвал куьне зазни гьахьтин къуват це.

20– Вуна Аллагьди гузвай пай пулунихъ къачуз жеда лугьузватӀа, вун гьа пулни галаз кьий! – жаваб гана Петруди. 21– Ваз и карда иштиракдай са ихтиярни авач, вучиз лагьайтӀа ви рикӀ Аллагьдин вилик гьахъ туш. 22Ша, вун Аллагьдин рекьел элячӀ, Реббидиз дуьаяр ая, белки Ада ви рикӀе чӀуру фикир хьунилай гъил къахчун. 23Ви рикӀ туькьуьлвилив ацӀанвайди ва вун батӀулвилин зунжурра гьатнавайди заз аквазва.

24Инал Симуна тӀалабна:

– Куьне лагьай крар зи кьилел текъведайвал за квез зи паталай Аллагьдиз дуьаяр авун тавакъу ийизва.

25Чпин вилериз акур кьван крарикай инсанриз суьгьбетар авуна, Аллагьдин Гаф абурал агакьарайдалай кьулухъ, илчияр Ярусалимдиз хъфена. Хъфидай рекье абуру Самариятдин гзаф кьадар хуьрера Шад Хабардикай ахъайиз хьана.

ФилипӀни эфияпви

26Реббидин малаикди ФилипӀаз лагьана:

– Къарагъ, кьибледихъ Ярусалимдай Газадиз физвай, кӀвачик гзаф квачир рекьел экъечӀ.

27ФилипӀ къарагъна фена. Ингье, эфияп худум – Гьебешдин Кандикат тӀвар алай пачагь-ханумдин вири хазина гъиле авай везир а рекьяй файтунда аваз физвай. Ам Ярусалимдай ибадат авуна 28кӀвализ хъфизвай. Файтунда ацукьна, ада Яшай пайгъамбардин ктаб кӀелзавай. 29Руьгьди ФилипӀаз лагьана:

– А файтундиз мукьва хьана, адан къвалал алаз алад.

30ФилипӀ зверна файтундин патав атана. Анай адаз Яшай пайгъамбарди кхьенвай гафар эфияпвиди гьикӀ кӀелзаватӀа ван хьана.

– Вун кӀелзавайдан гъавурда акьазвани? – хабар кьуна ФилипӀа адавай.

31– Гъавурда твадай кас тахьайла, зун гьикӀ гьатрай? – жаваб гана везирди. Ада ФилипӀаз файтундиз акьахна вичин патав ацукьун теклифна. 32Везирди Каламдай кӀелзавай чка ихьтинди тир:

«Ам хеб хьиз, кьасаб ийиз тухванай,

сар твазвайдан вилик квай кӀел кисдайвал,

Ада гьич сивни ахъайзавачир.

33 Ам акьван русвагь авунай хьи,

Адаз атӀай карни гьахъди хьаначир.

Адан эвледрикай лугьуз жедай вуж ава?

Адан чан чилел къахчунай эхир» # Яшай 53:7-8. .

34Худумди ФилипӀавай хабар кьуна:

– Лагь кван садра заз, ина пайгъамбар никай рахазва? Вичикай, я тахьайтӀа са масадакай?

35ФилипӀа, ада кӀелай чкадилай гатӀунна, адаз Исадикай Шад Хабар гуз хьана. 36-37Атана абур яд авай чкадив агакьна.

– Ингье, ина ядни ава, – лагьана худумди. – Цик акахьун къачудайла, зи вилик пад ни кьада?

38Ада файтун акъвазра лагьана эмирна. ФилипӀни худум кьведни цел фена. ФилипӀа адав цик акахьун къачуз туна. 39Абур цяй экъечӀайла, Аллагьдин Руьгьди ФилипӀ садлагьана анлай къахчуна хутахна. Худумдиз ам мад ахкунач. Шад хьайи худумди вичин рехъ давамарна. 40ФилипӀ Ашдад шегьердиз акъатна. Ада Кесар шегьердиз фидай рекьел алай вири шегьеррив Шад Хабар агакьарна.

Currently Selected:

Крар 8: ЛезПК

Highlight

Copy