MARCOS 5

Ang Yawan-on nga taga-Gerasa Gin-ayo

(Mat. 8:28-34; Luc. 8:26-39)

1Nag-abut sila sa tabok sang dagat, sa duta sang mga taga-Gerasa. 2Kag sang nakatakas sia halin sa sakayan, sa gilayon ginsugata sia sang tawo gikan sa mga lulubngan nga may espiritu nga dimatinlo, 3nga nagapuyo sa mga lulubngan; kag wala na tawo nga makagapus sa iya, bisan sa talikala; 4kay sa makadamu gingapus sia sing mga grilyos kag mga talikala, apang ang mga talikala ginpamugras niya, kag ginpamugto ang mga grilyos; kag walay tawo nga may kusug nga makamanso sa iya. 5Sa gihapon sa adlaw kag gab-i sa mga lulubngan kag sa kabukiran nagasinggit sia, kag nagapilas sang iya kaugalingon sa mga bato. 6Kag sang nakita niya si Jesus sa malayo, nagdalagan sia kag nagsimba sa iya; 7kag sang nagasinggit sa dakung tingug, nagsiling sia, “Ano bala ang labut mo sa akon, Jesus, nga Anak sang Dios nga Labing Mataas? Ginapakilooy ko sa imo sa Dios, indi ako pagsakita.” 8Kay nagsiling sia sa iya, “Gowa ka sa tawo, ikaw nga espiritung dimatinlo!” 9Kag nagpamangkot si Jesus sa iya, “Sin-o bala ang ngalan mo?” Nagsabat sia, “Si Legion ang akon ngalan; kay madamu kami.” 10Kag nagpakilooy sia sing daku sa iya nga indi niya sila pagpahalinon sa sadtong duta. 11Karon didto sa kilid sang bakolod may dakung panong sang babuy nga nagakaon; 12kag nagpakilooy sila sa iya, “Ipadala kami sa mga babuy, pasudla kami sa ila.” 13Gani gintugutan niya sila. Kag naggowa ang mga espiritung dimatinlo, kag nagsulud sa mga babuy; kag ang panong, mga duha ka libo ang kadamuon nagdinagusu sa pil-as pa dagat, kag nalumus sila sa dagat.

14Ang mga manugbahog sang mga babuy nagpalagyo, kag nagbalita sini sa banwa kag sa kaumhan. Kag nag-abut ang katawohan sa pagtan-aw kon ano ang nahanabu. 15Kag nagpalapit sila kay Jesus, kag nakita nila ang may mga yawa nga nagalingkod didto, nga napanaptan kag sa iya maayong hunahuna, nga amo ang may legion anay; kag hinadlukan sila. 16Kag ang mga nakakita sini nagsugid sa ila kon ano ang nahanabu sa may mga yawa kag nahanungud sa mga babuy. 17Kag nagsugud sila sa pagpakilooy kay Jesus nga maghalin sa ila mga duug. 18Kag sang nagasakay sia sa sakayan, nagpakilooy sa iya ang may mga yawa anay nga maupud sia sa iya. 19Apang si Jesus wala magtugut, kondi nagsiling sa iya, “Pauli ka sa imo mga abyan, kag sugiri sila kon daw ano ang nahimo sang Ginoo sa imo, kag daw ano nga nalooy sia sa imo.” 20Kag naglakat sia kag nagsugud sa pagbantala sa Decapolis kon daw ano ang nahimo ni Jesus sa iya; kag natingala ang tanan nga tawo.

Ang Babaying Anak ni Jairo kag ang Babayi nga Nagtandug sang Panapton ni Jesus

(Mat. 9:18-26; Luc. 8:40-56)

21Kag sang si Jesus nakatabok liwat sa sakayan, nagtipon sa iya ang dakung kadam-an; kag yadto sia sa ubay sang dagat. 22Niyan nag-abut ang isa sang mga punoan sang sinagoga, si Jairo ang ngalan; kag sang pagkakita sa iya, naghapa sia sa tiilan ni Jesus, 23kag nagpakilooy gid sa iya nga nagasiling, “Ang diotay kong bata nga babayi tagumatayon. Kari ka kag pandungan mo sia sang imo kamut, agud nga mag-ayo sia, kag mabuhi.” 24Kag nag-upud si Jesus sa iya.

Kag nagsonod sa iya ang dakung kadam-an kag gin-ipit nila si Jesus. 25Kag may babayi nga may tagas sang dugo sing napulog duha na ka tuig, 26kag nag-antus sing tama sa madamung manugbulong, kag naghinguyang sang tanan niya, kag wala gid mag-ayo kondi naglain tapat. 27Nakabati sia sang mga sugid nahanungud kay Jesus, kag nagpalapit sa likod niya sa tunga sang punsok kag nagtandug sang iya panapton. 28Kay nagsiling sia, “Kon akon matandug ang iya mga panapton lamang, magaayo ako.” 29Kag sa gilayon natugon ang pagtagas sang iya dugo; kag nabatyagan niya sa iya lawas nga nag-ayo sia sa iya balatian. 30Kag sa gilayon si Jesus, sang nakahantup sa iya kaugalingon nga ang gahum naggowa sa iya, nagliso sa tunga sang punsok, kag namangkot, “Sin-o bala ang nagtandug sang akon mga panapton?” 31Kag ang iya mga gintoton-an nagsabat sa iya, “Nakita mo nga ginaipit ka sang kadam-an, kag nagasiling ka, ‘Sin-o bala ang nagtandug sa akon?’” 32Kag nanghulunghulung sia sa pagtan-aw sang nakahimo sini. 33Apang ang babayi, nga nakahibalo sang nahimo sa iya, nagpalapit nga nahadluk kag nagakurug kag naghapa sa atubangan ni Jesus, kag nagsugid sa iya sang bug-os nga kamatooran. 34Kag nagsiling si Jesus sa iya, “Anak, ang imo pagtoo nag-ayo sa imo; lakat sa paghidait, kag mag-ayo sa imo balatian.”

35Sang nagahambal pa sia, may nag-abut gikan sa balay sang pangolo, nga nagasiling, “Ang imo anak nga babayi patay na. Ngaa bala budlayon mo pa ang Manunudlo?” 36Apang si Jesus, nga wala nagasapak sang ginpamolong, nagsiling sa pangolo sang sinagoga, “Dili ka mahadluk, magto-o lamang.” 37Kag walay tawo nga gintugutan niya sa pagsonod sa iya kondi si Pedro kag si Santiago kag si Juan nga utud ni Santiago. 38Sang nag-abut sila sa balay sang pangolo sang sinagoga, nakita niya ang isa ka kinagahud, kag madamu nga nagahibi kag nagahaya sing mabaskug. 39Kag sang nakasulud sia, nagsiling sia sa ila, “Ngaa bala nagagahud kamo kag nagahibi? Ang bata indi patay kondi nagakatolog.” 40Kag ginkadlawan nila sia. Apang ginpagowa niya ang tanan, kag gindala ang amay kag iloy sang bata kag ang mga kaupud niya, kag nagsulud diin ang bata nahamyang. 41Sang nagakaput sia sa kamut sang bata nagsiling sia sa iya, “Talita cumi”; nga kon sayoron, “Inday, nagasiling ako sa imo, bangon.” 42Kag sa gilayon nagtindug ang dalagita kag naglakat; kay sia nagpanuigon sing napulog duha ka tuig. Kag sa gilayon naorongan sila sing daku. 43Kag nagtugon gid sia sa ila nga walay tawo nga makahibalo sini, kag nagsogo si Jesus nga hatagan sing pagkaon ang dalagita.

Currently Selected:

MARCOS 5: ABHIL82

Highlight

Copy