MATEO 13

Ang Paanggid nahanungud sa Manugsab-ug

(Mar. 4:1-20; Luc. 8:4-15)

1Sa sadtong adlaw naggowa si Jesus sa balay kag naglingkod sa ubay sang dagat. 2Kag nagduguk sa iya ang daku nga mga kadam-an sa bagay nga nagsakay sia sa sakayan kag naglingkod;#Luc. 5:1-3. kag ang bug-os nga kadam-an nagtindug sa baybayon. 3Kag nagpamolong sia sa ila sing madamung butang sa mga paanggid nga nagasiling: “Ang manugsab-ug nagkadto sa pagsab-ug. 4Kag sang nagsab-ug sia, ang iban sang mga binhi nagtupa sa higad sang dalan, kag nagdapu ang mga pispis kag nagtuka sa ila. 5Ang iban nagtupa sa batohon nga duug, diin wala sila sing madamu nga duta, kag sa gilayon nagtubo sila, bangud nga wala sila sing madalum nga duta, 6apang sang nagsubang ang adlaw nalayong sila; kag bangud nga walay gamut, nalaya sila. 7Ang iban nagtupa sa mga talongon, kag nagtubo ang mga talongon kag naglumus sa ila. 8Ang iban nagtupa sa maayong duta kag nagpamunga, ang iban isa ka gatus ka pilo, ang iban kan-uman, ang iban katloan. 9Ang may mga idulungug [sa pagpamati], magpamati sia.”

10Niyan nagpalapit ang mga gintoton-an kag nagpamangkot sa iya, “Ngaa bala nagapamolong ikaw sa ila sa mga paanggid?” 11Kag nagsabat sia sa ila, “Sa inyo nahatag ang paghibalo sang mga tinago sang ginharian sang langit, apang sa ila wala nahatag. 12Kay ang may iya hatagan, kag magabugana sia; apang ang walay iya, bisan pa ang iya kuhaon.#Mat. 25:29; Mar. 4:25; Luc. 8:18; 19:26. 13Bangud sini nagapamolong ako sa ila sa mga paanggid, kay sa nagatolok wala sila makakita, kag sa nagapamati wala sila makabati, kag wala man sila makahangup. 14Natuman sa ila ang tagna ni Isaias nga nagasiling:

‘Sa pagkamatuud makabati kamo apang indi gid makahangup,

kag sa pagkamatuud makakita kamo apang indi gid makahantup.

15Kay ang tagiposoon sining katawohan ginkibulan,

kag ang ila mga idulungug halus makabati,

kag ginpiyong nila ang ila mga mata,

basi makahantup sila sa ila mga mata,

kag makabati sa ila mga idulungug,

kag makahangup sa ila tagiposoon,

kag magliso agud nga ayohon ko sila.’#Isa. 6:9-10.

16Apang bulahan ang inyo mga mata, kay makakita sila, kag ang inyo mga idulungug, kay nagapamati sila. 17Sa pagkamatuud, nagasiling ako sa inyo, nga madamu ang mga manalagna kag matarung nga mga tawo nga naghandum sa pagtan-aw sang inyo ginatan-aw, kag wala makakita sini, kag sa pagpamati sang inyo ginapamatian, kag wala makabati sini.#Luc. 10:23-24.

18“Busa pamatii ninyo ang paanggid nahanungud sa manugsab-ug. 19Kon bisan sin-o ang nagapamati sang polong nahanungud sa ginharian kag indi niya paghangpon, nagaabut ang malaut kag nagaagaw sang ginsab-ug sa iya tagiposoon; amo ini ang ginsab-ug sa higad sang dalan. 20Kag ang ginsab-ug sa batohon nga duug, amo ini sia ang nagapamati sang polong kag sa gilayon nagabaton sini nga may kalipay; 21apang walay gamut sa iya, kondi nagapadayon sa diotay nga tion, kag kon mag-abut ang kapipit-an ukon paghingabut bangud sang polong, sa gilayon nagakasandad sia. 22Kag ang ginsab-ug sa mga talongon, amo ini sia ang nagapamati sang polong, apang ang paghimud-os sining kalibutan kag ang limbong sang manggad nagalumus sang polong, kag nangindimabungahon ini. 23Kag ang ginsab-ug sa maayong duta, amo ini sia ang nagapamati sang polong kag nagahangup sini; sa pagkamatuud sia nagapamunga, kag nagapatubas, ang iban isa ka gatus ka pilo, ang iban kan-uman, kag ang iban katloan.”

Ang Paanggid nahanungud sa mga Gamhon sa tunga sang Trigo

24Isa na man ka paanggid gin-asoy niya sa ila, nga nagasiling, “Ang ginharian sang langit kaangay sang isa ka tawo nga nagsab-ug sing maayong binhi sa iya uma; 25apang sang nagakatolog ang mga tawo, nag-abut ang iya kaaway kag nagsab-ug sing mga gamhon sa tunga sang trigo, kag naghalin. 26Gani sang nagtubo ang trigo kag nagpamunga, niyan nag-ulhot man ang mga gamhon. 27Kag nagpalapit ang mga sologoon sang agalon sang panimalay kag nagpamangkot sa iya, ‘Ginoo, wala ka bala magsab-ug sing maayong binhi sa imo uma? Paano bala nga may gamhon ini?’ 28Nagsiling sia sa ila, ‘Ang kaaway naghimo sini.’ Ang mga sologoon nagsiling sa iya, ‘Buut ka bala niyan nga magkadto kami kag maggabut sa ila?’ 29Apang nagsabat sia, ‘Dili; basi kon sa paggabut ninyo sang mga gamhon magabut ninyo pati ang trigo. 30Pabaya-i nga magtubo anay sila sing tingub tubtub sa ani; kag sa tig-alani magasiling ako sa mga mangangani, Gabuta ninyo anay ang mga gamhon, kag hugpunga sila sa pagsonog sa ila, apang ang trigo tipona ninyo sa akon tambobo.’”

Ang Paanggid nahanungud sa Binhi nga Mostaza

(Mar. 4:30-32; Luc. 13:18-19)

31Isa na man ka paanggid gin-asoy niya sa ila, nga nagasiling, “Ang ginharian sang langit kaangay sang lamigas sang mostaza nga ginkuha sang isa ka tawo kag ginsab-ug sa iya uma; 32ini amo ang labing diotay sa tanan nga binhi, apang kon makatubo amo ini ang labing daku sa mga kahoy-kahoy, kag nagakahimo nga isa ka kahoy, sa bagay nga ang mga pispis sa langit nagadapo kag nagapugad sa mga sanga sini.”

Ang Paanggid nahanungud sa Tapay

(Luc. 13:20-21)

33Isa na man ka paanggid ang ginpamolong niya sa ila, “Ang ginharian sang langit kaangay sang tapay nga ginkuha sang isa ka babayi kag gintago sa tatlo ka sukub sang harina, tubtub nga ang bug-os nalatum.”

Ang Paggamit ni Jesus sang mga Paanggid

(Mar. 4:33-34)

34Tanan ini nga butang ginpamolong ni Jesus sa mga paanggid sa mga kadam-an; kag sa wala sing paanggid wala sia sing ginpamolong sa ila. 35Ini sa pagtuman sang ginpamolong sang manalagna:

“Magabungat ako sa mga paanggid,

magamitlang ako sang butang nga nalipdan kutub sa pagtukud sang kalibutan.”#Sal. 78:2.

Ginasaysay ang mga Gamhon sa tunga sang Trigo

36Niyan ginbayaan niya ang mga kadam-an kag nagsulud sia sa balay. Kag nagpalapit sa iya ang iya mga gintoton-an, nga nagasiling, “Saysayi kami sang paanggid sang mga gamhon sa uma.” 37Nagsabat sia, “Ang nagasab-ug sang maayong binhi amo ang Anak sang tawo; 38ang uma amo ang kalibutan, kag ang maayong binhi amo ang mga anak sang ginharian; ang mga gamhon amo ang mga anak sang malaut, 39kag ang kaaway nga nagsab-ug sa ila amo ang yawa; ang tig-alani amo ang katapusan sang panuigon, kag ang mga mangangani amo ang mga manugtunda. 40Busa subong nga ang mga gamhon ginagabut kag ginasonog sa kalayo, manginsubong sina ang katapusan sang panuigon. 41Magapadala ang Anak sang tawo sang iya mga manugtunda, kag kuhaon nila sa iya ginharian ang tanan nga butang nga nagapasandad kag ang nagahimo sing kalautan. 42Kag idap-ung sila sa horno nga may kalayo; didto ang mga tawo magahibi kag magabagrut sang ila mga ngipon. 43Niyan ang mga matarung magasidlak subong sang adlaw sa ginharian sang ila Amay. Ang may mga idulungug, magpamati sia.

Ang Tinago nga Bahandi

44“Ang ginharian sang langit kaangay sang isa ka bahandi nga natago sa latagon, nga nakita sang isa ka tawo kag gintago; niyan sa kalipay nagalakat sia kag nagabaligya sang tanan niya kag nagabakal sadtong latagon.

Ang Mutya nga Bilidhon

45“Liwat, ang ginharian sang langit kaangay sang isa ka manugpatikang nga nagapangita sing maayong mga mutya, 46nga, sang pagkakita niya sang isa ka mutya nga bilidhon, naglakat kag ginbaligya ang tanan niya kag ginbakal ang mutya.

Ang Pukot

47“Liwat, ang ginharian sang langit kaangay sang pukot nga ginladlad sa dagat kag nakakuha sing sarisari nga mga isda; 48sang napuno ini, ginsangya nila sa baybay kag naglingkod sila kag gintipon nila ang mga maayo sa mga suludlan apang ginpilak nila ang mga malain. 49Manginsubong sina ang katapusan sang panuigon. Magagowa ang mga manugtunda kag magapain sila sang mga malaut sa mga matarung, 50kag idap-ung sila sa horno nga may kalayo; didto ang mga tawo magahibi kag magabagrut sang ila mga ngipon.

Bag-o kag Daan nga mga Bahandi

51“Nahangup bala ninyo ini tanan?” Sila nagsiling sa iya, “Hoo.” 52Kag nagsiling sia sa ila, “Busa ang tagsa ka escriba nga nangin-gintoton-an sa ginharian sang langit kaangay sang isa ka amay sang panimalay nga nagakuha sa iya bahandi sing mga butang nga bag-o kag daan.”

Si Jesus Ginasikway sa Nazaret

(Mar. 6:1-6; Luc. 4:16-30)

53Kag sang nakatapus si Jesus sining mga paanggid, nagtaliwan sia gikan didto, 54kag sang nag-abut sia sa iya duta nga natuboan nagpanudlo sia sa sinagoga nila, sa bagay nga natingala sila, kag nagpamangkot, “Diin bala nagkuha ining tawo sining kaalam kag sining mga buhat nga gamhanan? 55Indi bala ini ang anak sang panday? Indi bala ang iya iloy ginatawag si Maria? Kag ang iya mga utud si Santiago kag si Jose kag si Simon kag si Judas? 56Kag ang iya mga utud nga babayi wala bala sila diri tanan kaupud naton? Busa diin bala nagkuha ining tawo sini tanan?” 57Kag nasandad sila sa iya. Apang si Jesus nagsiling sa ila, “Ang manalagna may kadungganan luwas sa iya kaugalingon nga duta kag sa iya kaugalingon nga balay.”#Juan 4:44. 58Kag wala sia makahimo didto sing madamung buhat nga gamhanan, bangud sang ila pagkadimatinoohon.

Currently Selected:

MATEO 13: ABHIL82

Highlight

Copy