MGA BINUHATAN 9

Ang Pagliso ni Saulo

(Binu. 22:6-16; 26:12-18)

1Apang si Saulo, nga nagasambo pa sa pagpahog kag pagpamatay batok sa mga gintoton-an sang Ginoo, nagkadto sa pinakamataas nga sacerdote 2kag nangayo sa iya sing mga sulat nga sa mga sinagoga sa Damasco, agud nga kon may makita sia sang mga iya sang Dalan, mga lalaki ukon mga babayi, madala niya sila nga nagapus sa Jerusalem. 3Karon sang nagalakat sia naghinamput sia sa Damasco, kag sa hinali nagsidlak sa palibut niya ang kapawa gikan sa langit. 4Kag napukan sia sa duta kag nakabati sing tingug nga nagasiling sa iya, “Saulo, Saulo, ngaa bala nga ginahingabut mo ako?” 5Kag nagsiling sia, “Sin-o bala ikaw, Ginoo?” Kag nagsabat sia, “Ako si Jesus, nga ginahingabut mo; 6apang tindug ka kag magsulud sa banwa, kag isugid sa imo ang dapat mo himoon.” 7Ang mga tawo nga nag-upud sa iya nagtindug nga naorongan, nga nagapamati sang tingug apang walay nakita nga tawo. 8Nagbangon si Saulo sa duta; kag sang pagmuklat sang iya mga mata, wala sia sing nakita; gani gintuytuyan nila sia sa kamut kag gindala sa Damasco. 9Kag tatlo ka adlaw nga indi sia makakita, kag wala magkaon ukon mag-inum.

10Karon may gintoton-an sa Damasco nga ginhingalanan si Ananias. Ang Ginoo nagsiling sa iya sa palanan-awon, “Ananias.” Kag nagsabat sia, “Yari ako, Ginoo.” 11Kag ang Ginoo nagsiling sa iya, “Tindug ka kag magkadto sa dalan nga ginatawag Matadlong, kag magpakiana sa balay ni Judas nahanungud sang isa ka tawo nga taga-Tarso nga ginhingalanan si Saulo; kay yari karon, nagapangamuyo sia, 12kag nakita niya ang isa ka tawo nga ginhingalanan si Ananias nga nagasulud kag nagatakdong sang iya kamut sa iya agud nga makakita sia.” 13Apang si Ananias nagsabat, “Ginoo, nakabati ako sa madamu nahanungud sining tawo, kon daw ano nga kalautan ang ginhimo niya sa imo mga balaan sa Jerusalem; 14kag may pagbulut-an sia diri gikan sa puno nga mga sacerdote sa paggapus sang tanan nga nagapanawag sa imo ngalan.” 15Apang ang Ginoo nagsiling sa iya, “Kadto ka, kay sia galamiton nga pinili nakon sa pagdala sang akon ngalan sa atubangan sang mga Gentil kag mga hari kag sa mga anak sang Israel; 16kay ipakita ko sa iya kon daw ano ang dapat niya antuson tungud sa akon ngalan.” 17Gani si Ananias nagtaliwan kag nagsulud sa balay. Kag sang nagatakdung sia sang iya mga kamut sa iya nagsiling, “Utud Saulo, si Ginoong Jesus nga nagpakita sa imo sa dalan nga imo gin-agihan, nagpadala sa akon agud nga makakita ka kag mapuno ka sang Espiritu Santo.” 18Kag sa gilayon nataktak sa iya mga mata ang daw mga himbis kag nakakita sia. Niyan nagtindug sia kag ginbautisohan, 19kag nagkaon sia kag nagbaskug.

Si Saulo Nagawali sa Damasco

Didto sia sing pila ka adlaw kaupud sang mga gintoton-an sa Damasco. 20Kag sa gilayon ginbantala niya sa mga sinagoga si Jesus, nga nagasiling, “Sia amo ang Anak sang Dios.” 21Kag ang tanan nga nagpamati sa iya naorongan, kag nagsiling, “Indi bala ini sia amo ang nagpaantus sa Jerusalem sang mga nagapanawag sa sining ngalan? Kag nagkari sia diri sa sining katuyoan, agud nga madala niya sila nga nagapus sa atubangan sang puno nga mga sacerdote.” 22Apang si Saulo nagbakud pa gid, kag ginpalibog niya ang mga Judio nga nagapuyo sa Damasco paagi sa pagpamatuud nga si Jesus amo ang Cristo.

Si Saulo Nagapalagyo gikan sa mga Judio

(2 Cor. 11:30-33)

23Sang natuman ang madamung adlaw, ang mga Judio nagsinapul sa pagpatay sa iya, 24apang ang ila puhon nahibaloan ni Saulo. Ginbantayan nila ang mga gawang sa adlaw kag gab-i, agud nga mapatay nila sia; 25apang ginkuha sia sang iya mga gintoton-an sa kagab-ihon kag ginpapanaug sia sa kuta, nga gintonton sia sa alat.

Si Saulo sa Jerusalem

26Kag sang pag-abut niya sa Jerusalem naghimulat sia sa pagpakig-impon sa mga gintoton-an; kag sila tanan nahadluk sa iya, kay wala magpati nga sia gintoton-an. 27Apang ginkuha sia ni Bernabe, kag gindala sia sa mga pinadala, kag nag-asoy sia sa ila kon paano ang pagkakita niya sang Ginoo sa dalan, nga nagpamolong sa iya, kag kon paano nga sa Damasco nagwali sia sing masidla sa ngalan ni Jesus. 28Gani kaupud sia nila nga nagasulud kag nagagowa sa Jerusalem, 29nga nagawali sing masidla sa ngalan sang Ginoo. Kag nagpamolong sia kag nagpakigbais sa mga Judio nga Greciahanon; apang nagtinguha sila sa pagpatay sa iya. 30Kag sang pagkahibalo sini sang mga kauturan, gindol-ong nila sia sa Cesarea, kag ginpadala sia sa Tarso.

31Gani ang iglesia sa bug-os nga Judea kag Galilea kag Samaria may kalinong kag naglig-on; kag sa nagalakat sa kahadluk sang Ginoo kag sa paglipay sang Espiritu Santo nagdugang ini.

Si Eneas Ginaayo

32Karon sang si Pedro nagpakadto diri kag didto sa tunga nila tanan, nagdolhog man sia sa mga balaan nga nagapuyo sa Lida. 33Didto nakita niya ang tawo nga ginhingalanan si Eneas, nga walo na ka tuig sa iya higdaan kag paralitiko. 34Kag si Pedro nagsiling sa iya, “Eneas, si Jesu-Cristo nagaayo sa imo; bangon ka kag himosa ang imo higdaan.” Kag sa gilayon nagbangon sia. 35Kag nakita sia sang tanan nga nagpuyo sa Lida kag sa Sarona, kag nagliso sila sa Ginoo.

Si Dorcas Ginabanhaw

36Karon didto sa Joppe may gintoton-an nga ginhingalanan si Tabita, nga kon sayoron Dorcas ukon Gacela. Sia puno sang maayong mga buhat kag mga pagpanglimos nga ginhimo niya. 37Sa sadtong mga adlaw nagmasakit sia kag napatay; kag sang nadigos nila sia, ginhamyang nila sia sa hulut nga naibabaw. 38Sanglit ang Lida malapit sa Joppe, sang nakabati ang mga gintoton-an nga didto si Pedro, ginpakadtoan nila sia sing duha ka tawo nga nagapakilooy sa iya, “Dili ka magdugay sa pagkari sa amon.” 39Gani si Pedro nagtindug kag nag-upud sa ila. Kag sang nag-abut sia, gindala nila sia sa hulut nga naibabaw. Ang tanan nga babaying balo nagtindug sa luyo niya nga nagahibi, kag nagapakita sa iya sang mga bayo kag mga kunup nga ginhimo ni Dorcas sang kaupud pa sia nila. 40Apang ginpagowa sila tanan ni Pedro kag nagluhud sia kag nagpangamuyo; niyan sang nagaliso sia sa bangkay nagsiling sia, “Tabita, bangon ka.” Kag ginmuklat niya ang iya mga mata, kag sang pagkakita niya kay Pedro naglingkod sia. 41Kag gindaho ni Pedro sa iya ang iya kamut kag ginpatindug sia. Niyan sang gintawag niya ang mga balaan kag ang mga babaying balo ginpaatubang niya sia nga buhi. 42Kag ini naglapnag sa bug-os nga Joppe, kag madamu ang nagtoo sa Ginoo. 43Nagpabilin sia sing madamu nga adlaw sa Joppe upud sa isa nga si Simon, nga manugpanit.

Currently Selected:

MGA BINUHATAN 9: ABHIL82

Highlight

Copy