1 MGA HARI 17

Si Elias Nagatagna sang Tingadlaw

1Karon si Elias nga Tisbinhon, nga isa sang mga manlulugayaw sang Galaad, nagsiling kay Acab, “Sa nagakabuhi ang Ginoong Dios sang Israel, nga sa atubangan niya nagatindug ako, walay ton-og ukon ulan sining mga tuig, kondi sa akon polong.”#Sant. 5:17. 2Kag nag-abut sa iya ang polong sang Ginoo, 3“Halin ka diri kag kadto ka nayon sa sidlangan, kag panago ka imo sa ubay sang sapa nga Carit, nga yara sa atubangan sang Jordan. 4Magainum ka sa sapa, kag ginsogo ko ang mga uwak sa pagpakaon sa imo didto.” 5Gani nagkadto sia kag naghimo sono sa polong sang Ginoo; nagkadto sia kag nagpuyo sa luyo sang sapa nga Carit nga yara sa atubangan sang Jordan. 6Kag ang mga uwak nagdala sa iya sing tinapay kag unud sa aga, kag tinapay kag unud sa gab-i; kag nag-inum sia sa sapa. 7Kag sa wala madugay ang sapa nagmala, bangud nga walay ulan sa duta.

Si Elias kag ang Babaying Balo sa Sarepta

8Niyan ang polong sang Ginoo nag-abut sa iya, 9“Tindug ka, kadto sa Sarepta, nga nasakup sang Sidon, kag puyo ka didto. Yari karon, nagsogo ako sa isa ka babayi nga balo#Luc. 4:25-26. didto sa pagsagud sa imo.” 10Gani nagtindug sia kag nagkadto sa Sarepta; kag sang pag-abut niya sa gawang sang banwa, yari karon, didto may balong babayi nga nagapangahoy; kag gintawag niya sia kag nagsiling, “Kuhai ako sing diotay nga tubig sa suludlan, agud nga mag-inum ako.” 11Kag sa nagalakat ang babayi sa pagkuha sini, nagtawag sia sa iya kag nagsiling, “Dalhi ako sing isa ka hungit nga tinapay sa imo kamut.” 12Kag nagsiling sia, “Sa nagakabuhi ang Ginoo nga imo Dios, walay kalan-onon ako, kondi isa ka tapnay nga harina sa banga, kag diotay nga lana sa tibud; kag yari karon, nagapamolot ako sing duha ka gatong, agud nga magsulud ako kag maghiwat sini nga sa akon kag sa akon anak nga lalaki, kag magkaon kami sini, kag mapatay.” 13Kag si Elias nagsiling sa iya, “Dili ka mahadluk; lakat ka kag himoa sono sa imo nasiling; apang himoi ako anay sa iya sing isa ka diotay nga kalan-onon kag dalha ini sa akon, kag ugaling himo ka nga sa imo kag sa imo anak nga lalaki. 14Kay amo ini ang ginasiling sang Ginoong Dios sang Israel, ‘Ang tadyaw sang harina dili maubusan, kag ang tibud sang lana dili mawad-an, tubtub sa adlaw nga ang Ginoo magapaulan sa duta.’” 15Kag naglakat sia kag naghimo sono sa ginasiling ni Elias; kag nagkaon sia, kag ang babayi kag ang iya panimalay sa madamu nga adlaw. 16Ang tadyaw sang harina wala maubusi, kag ang tibud sang lana wala mawad-i, sono sa polong sang Ginoo nga ginpamolong niya paagi kay Elias.

17Sa tapus sini nagmasakit ang anak sang babayi, ang tagbalay sang panimalay; kag ang balatian niya matama nga wala na sia sing ginhawa. 18Kag sia nagsiling kay Elias, “Ano bala ang akon sa imo, O tawo sang Dios? Nagkari ka sa akon sa pagpaumdum sang akon mga sala, kag sa pagpatay sang akon anak!” 19Kag nagsiling sia sa iya, “Ihatag sa akon ang imo anak.” Kag ginkuha niya sia sa iya sabak, kag gindala sia sa hulut sa ibabaw, diin sia nagdayon, kag ginpahigda sia sa iya kaugalingon nga higdaan. 20Kag nagtuaw sia sa Ginoo, “O Ginoo nga akon Dios, nagdala ka bala man sing malaut sa balo nga ginadayonan ko, sa pagpatay sang iya anak?” 21Niyan ginhap-an niya sing dolog ang bata sing makatlo, kag nagtuaw sa Ginoo, “O Ginoo nga akon Dios, pabalika sa iya ang kalag sining bata.” 22Kag ginpamatian sang Ginoo ang tingug ni Elias; kag ang kalag sang bata nag-uli sa iya, kag naumpawan sia. 23Kag ginkuha ni Elias ang bata, kag ginpanaug sia gikan sa hulut pasulud sa balay, kag ginhatag sia sa iya iloy; kag si Elias nagsiling, “Tan-awa, ang imo anak nagakabuhi.” 24Kag ang babayi nagsiling kay Elias, “Karon nakilala ko nga ikaw tawo sang Dios, kag nga ang polong sang Ginoo sa imo baba kamatooran.”

Currently Selected:

1 MGA HARI 17: ABHIL82

Highlight

Copy