Mateo 26

Ang Plano batok kay Jesus

(Mar. 14:1-2; Luc. 22:1-2; Juan 11:45-53)

1Sa tapos si Jesus makapanudlo sini nga mga butang, nagsiling sia sa iya mga gintuton-an, 2“Nakahibalo#Exo. 12:1-27. kamo nga duha na lang ka adlaw kag Piesta na sang Pascua, kag ang Anak sang Tawo itugyan agod ilansang sa krus.”

3Dayon ang pangulo nga mga pari kag ang mga katigulangan sang mga Judio nagtipon sa palasyo ni Caifas, ang Pinakamataas nga Pari. 4Nagplano sila agod nga sa sekrito nga paagi mapadakop nila si Jesus kag mapapatay sia. 5Nagsiling sila, “Indi naton paghimuon ini sa adlaw sang piesta, kay basi magkinagamo ang mga tawo.”

Si Jesus Ginhaplasan sa Betania

(Mar. 14:3-9; Juan 12:1-8)

6Sang didto si Jesus sa Betania, sa balay ni Simon nga sadto anay aruon, 7nagpalapit#Luc. 7:37-38. sa iya ang isa ka babayi nga may tibodtibod nga alabastro nga puno sing malahalon nga agwa. Iya ini ginbubo sa ulo ni Jesus samtang nagakaon sia. 8Nakita ini sang mga gintuton-an kag naakig sila. Nagsiling sila, “Abaw kanugon! Ngaa gin-usikan ini? 9Kuntani sarang mabaligya ini nga agwa sa daku nga kantidad kag ang kwarta ihatag sa mga imol!”

10Si Jesus nga nakahibalo sang ila ginahambal nagsiling sa ila, “Ngaa bala ginatublag ninyo ini nga babayi? Maayo kag matahom nga butang ang iya ginhimo sa akon. 11Kaupod#Deut. 15:11. ninyo pirme ang mga imol, pero ako indi manginkaupod ninyo tubtob san-o. 12Ginbuboan niya ako sang agwa agod maaman ang akon lawas sa akon lubong. 13Karon dumdoma ninyo ini! Bisan diin iwali ining Maayong Balita sa bug-os nga kalibutan, ang ginhimo sini nga babayi pagaisugid man sa iya handumanan.”

Si Judas Nagsugot sa Pagtugyan kay Jesus

(Mar. 14:10-11; Luc. 22:3-6)

14Dayon ang isa sang dose ka mga gintuton-an nga ginhingalanan kay Judas Iscariote nagkadto sa pangulo nga mga pari 15kag#Zac. 11:12. nagpamangkot, “Ano bala ang ihatag ninyo sa akon kon itugyan ko si Jesus sa inyo?” Gani ginhatagan nila sia sing traynta ka bilog nga pilak. 16Halin sadto nagpangita si Judas sing kahigayunan sa pagtugyan kay Jesus sa ila.

Si Jesus Nagkaon sang Panihapon sang Pascua Upod sa Iya mga Gintuton-an

(Mar. 14:12-21; Luc. 22:7-13, 21-23; Juan 13:21-30)

17Sa nahauna nga adlaw sang Piesta sang Tinapay nga wala sing Lebadora, ang mga gintuton-an nagpalapit kay Jesus kag nagpamangkot sa iya, “Diin bala ang luyag mo nga ihanda namon para sa imo ang panihapon sang Pascua?”

18Nagsiling si Jesus sa ila, “Kadto kamo sa isa ka tawo sa siudad, kag singgani sia, ‘Ang Manunodlo nagasiling, Ang akon tion nag-abot na. Ako kag ang akon mga gintuton-an magasaulog sang Pascua sa imo balay.’”

19Gintuman sang mga gintuton-an ang sugo ni Jesus kag ila ginhanda ang panihapon sang Pascua.

20Sang gab-i na si Jesus kag ang iya dose ka mga gintuton-an nagpanihapon. 21Sang nagakaon sila, si Jesus nagsiling, “Ginasiling ko sa inyo nga ang isa sa inyo magaluib sa akon.”

22Natublag gid ang mga gintuton-an kag nagbulosbulos sila pamangkot sa iya, “Ako bala ina, Ginoo?”

23Nagsabat#Sal. 41:9. si Jesus, “Ang nagatusmaw sang iya tinapay sa yahong upod sa akon amo ang magaluib sa akon. 24Ang Anak sang Tawo mapatay suno sa ginsiling sang mga Kasulatan, pero makaluluoy man yadtong tawo nga magaluib sang Anak sang Tawo! Mas maayo pa sa iya nga sia wala matawo!”

25Si Judas nga traidor nagsiling, “Ako bala ang imo ginatumod, Manunodlo?”

Si Jesus nagsabat, “Ginasiling mo.”

Ang Panihapon sang Ginoo

(Mar. 14:22-26; Luc. 22:14-20; 1 Cor. 11:23-25)

26Sang nagakaon sila, nagkuha si Jesus sing tinapay, nagpangamuyo sa pagpasalamat, kag iya ginpamihakpihak ini kag ginhatag sa iya mga gintuton-an. Nagsiling sia, “Kuha kamo, kag magkaon sini. Ini amo ang akon lawas.”

27Dayon ginkuha niya ang kupa, nagpasalamat sa Dios, kag iya ini ginhatag sa ila. Nagsiling sia, “Tanan kamo mag-inom sini, 28kay#Exo. 24:8; Jer. 31:31-34. ini amo ang akon dugo, nga nagaselyo sang kasugtanan sang Dios, ang akon dugo nga gin-ula para sa tanan nga mga katawhan sa kapatawaran sang mga sala. 29Nagasiling ako sa inyo, indi na ako magainom liwat sini nga bino, tubtob sa sadto nga adlaw nga magainom ako sing bag-o nga bino kaupod ninyo sa Ginharian sang akon Amay.”

30Sa tapos sila makakanta sang isa ka ambahanon, nagkadto sila sa Bukid sang mga Olivo.

Gintagna ni Jesus ang Pagpanghiwala ni Pedro

(Mar. 14:27-31; Luc. 22:31-34; Juan 13:36-38)

31Dayon#Zac. 13:7. si Jesus nagsiling sa ila, “Karon gid nga gab-i tanan kamo magapalagyo kag magabiya sa akon, kay ang kasulatan nagasiling, ‘Ako magapatay sang manugbantay sang mga karnero, kag magaalaplaag ang panong sang mga karnero.’ 32Pero#Mat. 28:16. sa tapos ako mabanhaw, magauna ako sa inyo sa Galilea.”

33Si Pedro nagsabat kay Jesus, “Bisan bayaan ka sang tanan, indi gid ako magbiya sa imo!”

34Si Jesus nagsiling kay Pedro, “Tandai ini! Sa wala pa makapamalo ang manok karon nga gab-i magasiling ikaw sing makatlo nga wala ikaw makakilala sa akon.”

35Si Pedro nagsabat, “Indi gid ako magsiling nga wala ko ikaw makilala, bisan pa pagapatyon ako kaupod sa imo!”

Amo man ang ginsiling sang tanan nga mga gintuton-an.

Si Jesus Nagpangamuyo sa Getsemani

(Mar. 14:32-42; Luc. 22:39-46)

36Dayon si Jesus nagkadto sa lugar nga gintawag Getsemani kaupod sa iya mga gintuton-an, kag nagsiling sia sa ila, “Pungko kamo diri samtang makadto ako sa unhan sa pagpangamuyo.” 37Gin-upod niya si Pedro kag ang duha ka mga anak ni Zebedeo. Natublag gid kag nagpangalisod si Jesus, 38kag nagsiling sia sa ila, “Daw malumos ako sa kalisod. Pabilin kamo diri kag magpulaw upod sa akon.”

39Nagkadto sia sa ulounhan, naghapa kag nagpangamuyo, “Amay ko, kon mahimo, ilikaw sa akon ini nga kupa sang pag-antos! Pero indi ang akon kabubot-on ang matuman, kundi ang imo.”

40Dayon nagbalik sia sa tatlo ka mga gintuton-an kag nakita niya sila nga nagakatulog. Nagsiling sia kay Pedro, “Ano kamo man! Indi gid bala kamo makapulaw upod sa akon bisan isa lang ka oras? 41Magpulaw kamo kag magpangamuyo, agod indi kamo mahulog sa pagsulay. Ang espiritu handa ugaling ang lawas maluya.”

42Sa liwat naglakat si Jesus kag nagpangamuyo, “Amay ko, kon ini nga kupa sang pag-antos indi malikaw sa akon kon indi ko pag-imnon, ang imo kabubot-on amo ang matuman.” 43Nagbalik liwat si Jesus kag nakita niya nga ang iya mga gintuton-an nga natulogan, kay tama gid ang ila katuyo.

44Sa liwat ginbayaan sila ni Jesus, naglakat sia kag nagpangamuyo sang amo man gihapon nga pangamuyo sa ikatlo nga tion. 45Dayon nagbalik sia sa iya mga gintuton-an kag nagsiling sa ila, “Nagakatulog pa bala kamo kag nagapahuway? Nag-abot na ang tion nga ang Anak sang Tawo itugyan na sa gahom sang mga makasasala. 46Bangon kamo, malakat kita. Tan-awa, ang tawo nga magatugyan sa akon yari na!”

Ang Pagdakop kay Jesus

(Mar. 14:43-50; Luc. 22:47-53; Juan 18:3-12)

47Nagahambal pa si Jesus sang si Judas nga isa sang mga dose ka mga gintuton-an nag-abot. May upod sia nga madamo nga mga tawo nga nagadala sang mga espada kag mga inuglampos. Ini sila ginpadala sang pangulo nga mga pari kag sang mga katigulangan sang mga Judio. 48Ang traidor naghatag sa mga tawo sini nga senyas, “Ang halukan ko nga tawo amo ina sia. Dakpa ninyo sia!”

49Sa gilayon nagpalapit si Judas sa kay Jesus kag nagsiling, “Maayong gab-i, Manunodlo,” kag ginhalukan niya sia.

50Si Jesus nagsabat, “Sigi abyan, himua na ang bulohaton mo!”#26:50 Sigi abyan, himua na ang bulohaton mo; ukonNgaa yari ka man, abyan?

Dayon nagpalapit sila kag gindakop nila si Jesus kag ginsiguro nga indi sia makapalagyo. 51Ang isa sang mga kaupod ni Jesus naggabot sang iya espada kag ginlabo niya ang suloguon sang Pinakamataas nga Pari kag nautas ang iya dulonggan. 52Dayon si Jesus nagsiling sa iya, “Itagob mo ang imo espada, kay ang tanan nga nagagamit sang espada mapatay sa espada. 53Wala ka bala makahibalo nga sarang ako makapangayo sing bulig sa akon Amay kag sa gilayon padalhan niya ako sing sobra sa dose ka batalyon nga mga anghel? 54Ugaling kon amo ina, ano bala ang pagkatuman sang ginasiling sang mga Kasulatan nga amo gid ini ang dapat matabo?”

55Dayon#Luc. 19:47; 21:37. si Jesus nagsiling sa mga tawo, “Nag-abot bala kamo nga may mga espada kag mga inuglampos sa pagdakop sa akon, subong bala nga daw buyong ako? Adlaw-adlaw yara ako sa Templo nga nagapungko kag nagapanudlo, kag wala ninyo ako pagdakpa. 56Pero ini tanan nahanabo agod matuman ang mga ginsulat sang mga propeta sa mga Kasulatan.”

Dayon ginbayaan sia sang iya mga gintuton-an, kag nagpalalagyo sila tanan.

Si Jesus sa Atubang sang Konseho

(Mar. 14:53-65; Luc. 22:54-55, 63-71; Juan 18:13-14, 19-24)

57Ang mga nagdakop kay Jesus nagdala sa iya sa balay ni Caifas, ang Pinakamataas nga Pari, sa diin nagtipon ang mga manunodlo sang Kasugoan kag ang mga katigulangan sang mga Judio. 58Si Pedro nagsunod sa malayo, tubtob sa hardin sang balay sang Pinakamataas nga Pari. Nagsulod sia sa hardin kag nagpungko upod sa mga gwardya sa pagtan-aw kon ano ang mahanabo. 59Ang pangulo nga mga pari kag ang bug-os nga katapo sang konseho nagpangita sang indi matuod nga mga saksi batok kay Jesus agod nga mapapatay nila sia, 60pero wala sila sing may nakita, bisan pa nga madamo ang nagpalapit kag nagsugid sing mga butig batok sa iya. Sang ulihi may nagpalapit nga duha ka tawo 61kag#Juan 2:19. nagsiling, “Ini nga tawo nagsiling, ‘Sarang ko maguba ang Templo sang Dios kag sa sulod sang tatlo ka adlaw sarang ko mapatindog ini liwat.’”

62Ang Pinakamataas nga Pari nagtindog kag nagsiling kay Jesus, “Wala ka bala sing may isabat sa panumbongon nila batok sa imo?” 63Pero si Jesus wala magsabat. Sa liwat ang Pinakamataas nga Pari nagsiling sa iya, “Ginapasumpa ko ikaw sa ngalan sang Dios nga buhi: sugiri kami, ikaw bala ang Cristo, ang Anak sang Dios?”

64Si#Dan. 7:13. Jesus nagsabat sa iya, “Ginsiling mo. Pero nagasiling ako sa inyo: sugod karon makita ninyo ang Anak sang Tawo nga nagapungko sa tuo sang Makagagahom, kag nagapalapit nga yara sa mga panganod sang langit!”

65Sa#Lev. 24:16. sini, gingisi sang Pinakamataas nga Pari ang iya bayu kag nagsiling, “Nagpasipala sia sa Dios! Wala na kita nagakinahanglan sang dugang pa nga mga saksi! Nabatian na ninyo ang iya pagpasipala! 66Ano bala sa inyo?”

Nagsabat sila, “Nakasala sia, kag dapat sia patyon.”

67Dayon#Isa. 50:6. ginduplaan nila sia sa guya kag ginbunal, kag ang mga nagtampa sa iya 68nagsiling, “Kon ikaw ang Cristo, pakta kon sin-o ang nagtampa sa imo!”

Ginpanghiwala ni Pedro si Jesus

(Mar. 14:66-72; Luc. 22:56-62; Juan 18:15-18, 25-27)

69Si Pedro nagapungko sa gwa sang hardin. Nagpalapit sa iya ang isa ka suloguon nga babayi kag nagsiling, “Ikaw man kaupod ni Jesus nga taga-Galilea.”

70Pero ginpanghiwala niya ini sa atubang sang tanan kag nagsabat, “Wala ako makahibalo sang imo ginahambal.” 71Kag naglakat sia pakadto sa pwertahan sang hardin. Nakita sia sang isa naman ka suloguon nga babayi kag nagsiling sia sa mga tawo didto, “Ini nga tawo upod man ni Jesus nga taga-Nazaret.”

72Sa liwat ginpanghiwala ini ni Pedro, kag nagsabat, “Sumpa ko, wala ako makakilala sina nga tawo!”

73Sa wala madugay, ang mga tawo nga nagatilindog didto nagpalapit kay Pedro kag nagsiling, “Matuod gid nga ikaw isa man sa ila. Mahibal-an ini sa imo panghambal!”

74Dayon si Pedro nagsiling, “Nagasumpa ako nga nagasugid ako sang matuod! Silutan ako sang Dios kon wala ako nagasugid sing matuod! Wala gid ako makakilala sina nga tawo!”

Sa gilayon may nagpamalo nga manok, 75kag nadumdoman ni Pedro ang ginsiling ni Jesus sa iya, “Sa wala pa makapamalo ang manok, magasiling ikaw sing makatlo nga wala mo ako makilala.” Naggwa sia kag naghilibion sing tudo.

Currently Selected:

Mateo 26: MBBHIL12

Highlight

Copy