Lúka 23

Gaal Yíésu Bilááto ubaa Heróˈde met ká eey

1Aalé karu lullé giri hol ˈdu gáá yimieká les gaa kie, Yíésu Bilááto met eey. 2Gaal mú he af kaay, kieye, Máállá gál kínyia baađisia, nyí argiyye. Mu kieye, Haí Káísar gibíre les ki fíinyo, he gálaat yeedhe. Mu úba kieye, Yú he Messíya giri kansichká, he yie, gaalí yie.

3Aalé Bilááto Yíésu yiete, kieye, Kúún in he kánsích gál Yuuˈdi? yie. Yíésu mú ˈdéé hol ˈdú nie, kieye, Hát kuuní hogotóóllá, yie. 4Aalé Bilááto gál guguđo-, suoryoká ubaa nyesebich geey, kieye, Máállá hé ˈdeew-, he ekey-, yú gaa argeká mán, yie. 5Gaal Bilááto ˈdéé mé ki tie, kieye, Máállá hé lés gál Yuuˈdi geerle lulle gaa sedhe, gálaat he onisinyle ki chure. Mu he onisinyle erkob Galilááya mé gáá kodhdhe, in ˈjíig káána állá kí hile, gaalí yie. 6Bilááto ˈdeeny kinaal maaleká gáál heete, kieye, Máállá he máá Galilaaya? yie. 7Aalé Bilááto Yíésu hát lés Heróˈde hí mé ki yaalká máálle maaleká, mu gáál geey, kieye, Mú Heróˈde ˈdú ée, yie, ˈdaa giri Heróˈde af kinaal úba Yerúsalem gaa ijeká.

8Heróˈde Yíésu argeká súm geer hí gaa meedhe. Hééllá he ˈdaa giri mu kíssóótí mú fayamle mamale-, hé gálaat af ˈdaˈdabsuo-, muí ekemeyoká mú gaa aargireká fedeká. 9Aalé mu hé burnayká Yíésu heegete, tá Yíésu hé mú ˈdeeny níínní hol ˈdú nieká mán. 10Gál guguđo-, suoryoká ubaa gál nyatalaam ál kinaal ˈgieká mú ki hurgudhdhe, mú he af kaay. 11Aalé Heróˈde ubaa yuoyle mú eeshey, mú he gaa ˈdeey. Gaal đafar máá kansich hí kakaatká mú kuch gáá bue, mú Bilááto hol ˈdú nie. 12Heróˈde ubaa Bilááto giri kíssóótí hol ka kídh onnoyká, kúlích tikiˈde kinaal đo hol hile.

13Aalé Bilááto gál guguđo-, suoryoká ubaa gál Yuuˈdi tá karullé hí met ki ˈgieká, hol ˈdu gáá vie, 14gáál geey, kieye, Máá hí ye ˈdu gáá eeyyééllá itín kieye, Mu gálaato baađisia, hí ye chie. Tá bá dhaayyíe, mú káána yú metkícho gaa heegeteká hé ˈdeđew-, lulle hí mú af kaayyééllá har yú mú má gaa argua! 15Heróˈde har káána úba hé níínní ˈdeew-, muí ekey-, mú gaa argeká mánaa! Mú gáál hol ˈdu gáá naa! Bá dhaayyíe, máállá hé níínní he ˈdeeney-, hí kúfach mé ki kokuoká mán. 16Aalé yuoychú ha yú geđia, Mú tunáa, tá mú hayyíe, ha yú yeedhe, Bilááto hí gáál yie.

[ 17Warram lulle ˈjiláállá ali kí ˈdiiyyeka, gál gaalí hiigidheká máá gálaat hí fedoká gaalí gaa fufura. Aalé kúlích kinaal Bilááto máádhato he fufure.]#23:17 Gárallá hé warˈgasam heleká ˈbaal gaa mán. 18Aalé gálaat lulle kúóˈd ˈdoy, kieye, Máállá áas! Baráábas nyí kí fur! gaalí yie. 19Baráábas gaalí hiigidhééllá, he ˈdaa giri mu gál gál Yerusalem ˈbaal chure-, gáál mangis mé il gaa koyká máálle onnoyká, tá héétí mu úba máádhat yieská.

20Bilááto Yíésu fuuroká he fede, mu geđi gáál hol geey. 21Gálaat íín kúóˈd ˈdoy, kieye, Mú ˈgór đarám yaalká ˈdug ˈdú yiesíe! gaalí yie. 22Bilááto gíl ki seđeká gáál yiete, kieye, Mú háteka ke yegesal? Meete ˈdeew muí ekey? Yú yáá hé ˈdeew-, muí ekey-, ki mú ˈdú yegeská mú ma gaa árginy. Yuoy ha yú geđia, giri gaal mú tuuno-, tá mú haađuoká, muí gáál yie. 23Gaal geđi súm kúóˈd ˈdoy, Bilááto ˈdéé ˈdú moy, giri Yíésu gaalí ˈgór đarám yaalká ˈdug ˈdú yegeská. Aalé gaal Bilááto ká adhdhe. 24Aalé Bilááto ˈdéé mure, giri hát gaalí fedoká ˈgíéríchle yuoy hí mú ki naatoká. 25Bilááto máá giri gál Yerusalem chure-, gáál mangis mé il gaa koy-, ubaa máádhat yies-, gaalí hiigidhe-, tá káána, Nyí kí fur! gaalí yieká fure. Yíésu íín muí yuoy gíl gaa kaay, giri yuoy hát gál Yuuˈdi hí fedóóllá mú ki seseennoká.

Yíésu gaalí ˈgór đarám yaalká ˈdú ˈdisse

26Gaal sienylé seseme-, Yíésu ˈgie-, mú ál ˈgór đarám yaalká ˈdú ˈdaraanká ˈdú egedhdheká, máá Kurene-, gaalí Símon yegie-, forich gáá yiimie mare hol met kí ˈdoy. Aalé gaal máá kinaal ká ˈgiliˈgay, mú ˈgór đarám yaal-, Yíésu hí ˈgieká ˈgáár ˈdú iđie, mu Yíésu el gaa veere, mú ˈgór ˈgar sidhe. 27Nyésébích guđoká ubaa gál ˈdíét Yíésu ˈdú bebeme-, hol ger gaa tutuneká Yíésu el gaa veere. 28Yíésu ˈdég ki fuˈjie, kieye, Hada Yerusalem, haí ye ˈdú bebéminy, hol ˈdú buoyyíe, ubaa umkícho ˈdú buoyyíe. 29Bá dhaayyíe, kúlích gálaat kieye, ˈDeg ˈdal mán, kálta ma ˈdáliny-, um hí ma ˈdóósonká kalat! gaalí yeetká, ali hai kí ˈdeenne. 30Gaal gumano hai geđia, Nyí ˈdú ˈdanáa! hai yeedhe. Héétí úba gurm hai geđia, Nyí yúa!#23:30 Hoséya 10:8 hai yeedhe. 31Gaal ˈgór nyuroká héél ki ekemeye háluke, tá ˈgór gogoyká kor mee ki ekêy? Yíésu hí gáál yie.

32Gál éíy taaka naama-, he ˈdeeđeney-, hiigin gaa ije mare úba yuoy hí shuunne, giri gaalí ˈguor đarám yaalká ki ˈdaraan-, gaalí Yíésu hol ˈgar yegeská. 33Aalé gaal he ál gaalí Ál Me ˈGonte yegetká ki ˈdieká, yuoy Yíésu ˈgór đarám yaalká ˈdú ˈdoyye. Yuoy úba gál naama he ˈdeeney kinaal ˈguor ˈdú ˈdanne. Mú tikiˈd gaalí Yíésu gíl ˈdaa naaniet koy, máátí gaalí mú gíl ˈdaa ˈjíbach koy.

34Aalé Yíésu kieye, Baabá, ˈdaa giri hé gaalí ekemeyóóllá gaalí muogká, gáál ˈdú ˈjé, yie. Aalé yuoy hol koiy ki ˈdoyye,#23:34 Koiy ˈdony bar kinaalloká amú waaro gaalí ˈdarame. giri mú đafaraamle eiy shugunatoká. 35Gál ál kinaal ˈgieká mú gaa dhaay. Gál Yuuˈdi gállé hí met ki ˈgie-, úba ál kinaal ˈgieká mú fichile, kieye, Mu gál éíyyo he ririme, aalé káána íín dhúrle hí hol rio, har kín Messíya Waag hí ka eeyyeká kátaka, gaalí yie. 36Yuoy úba mú he af kí dhaaˈgasanne, mú ˈdú siete, mú ˈduuny bírigká ki heliche, 37kieye, Kúún har kín kánsích Yuuˈdi kátaka, hol rig! yuoy hí mú chie.

38ˈGór gaalí mú ˈdú ˈdoy kinaallá úba ˈdéé hót kieye,hééllá he kánsích yuuˈdi, chieká gaalí ˈdug ki ˈdoy.

39Gál giri he ˈdeeđeney-, gaalí ˈguor đarám yaalká ˈdú ˈdisseká mú tikiˈd Yíésu fichile, kieye, Kúún kó Messíya#23:39 Messíya hélle kieye, Máá Waag hí salab mé ki liiyye-, Waag hí kansím koyyeká. muunîny? Hol rig! Nyíín úba nyí rig! yie. 40Tá máátí máálle ki ˈday, kieye, Kúún kó Waag ma kikian? Hé gaalí ko ki ekemeyóóllá, úba hé gaalí mú ki ekemeyóóllá muunîny? 41Múún taglé gaal gáál hééllá ki ekemeye, ˈdaa giri ki he ˈdeeđeneyká. Tá máállá íín hé níínní ˈdeew-, he ˈdeeneyká mán, muí mú yie. 42Aalé mu Yíésu geey, kieye, Yíésu, af giri guch kua kansimoká kí chiimetká ye mé ká ˈgab, yie. 43Yíésu mú ˈdéé hol ˈdú nie, kieye, Yú ko hé ˈdúwaká geeye, kúún kúlíchallá ubaa yú ál geyyietká ha ke gaa yíéđima, mú yie.

Yíésu kúfáchlé

44Aadh ˈgas le-, e me ˈdugoká, biiy lulle chuurayye, ˈjíig aadh ˈgas saal ˈdoyye. 45Aadh ˈgas seđe kinaallá biiy hé édhúm aadho mannayye. ˈBíl Waaˈgiet ˈbíllé biiy geereká đafarlé hí af gaa tielká eiy lođuđugul fuate. 46Aalé Yíésu af gaa guđoká kúóˈd ki ˈdoy, kieye, Baabá, sídhchú yáá ko gíl geer gáá kaay, yie. Mu héél hodheká đo sidh hí ˈgite.

47Máá yuoy kúˈd mé ki yiel-, ál kinaal yielká héél lulle argeká Waag meey, kieye, Hé ˈduwa, máállá gon he máá ˈdúwa-, saas mánká! yie. 48Nyésébích hol ˈdu gáá yimie-, héél dhaˈgameká, he yaalmitle argeká, ger hí súm gaa ˈdeenedhe, ˈjienle hol ˈdú nadhe. 49Aalé gál giri Yíésu ógká ubaa ˈdeg mú hol Galilááya gáá eedhdheká lulle tagéétí ki ˈdie, hééllá lulle il ki dhaay.

Yíésu gaalí galie

50Aalé máá arra gaalí Yúósef yegie-, hodhin midhabká ˈgie-, ˈdúwa-, 51máá ˈjien Arimataya giri lés Yuuˈdiaká hé ál kinaal úba gaa ije. Máá kinaallá Guch Waaˈgieto egese. Mu hé gál arraká hí mure-, hí ekemeyká iiy ma yéen. 52Aalé mu Bilááto ˈdú sedhe, mú Yíésu gónle heete, giri mú gagalioká. 53Mu Yíésu gónle ˈgór đarám yaalká gáá leesie, mú đafaraam édh-, kaanaká ki ˈdane, mú liish waariet-, kis gaalí geer gaa ˈgodhe-, kálta máá hí máádhat ki galie mán mare ki galie. 54Kúlích kinaallá he kúlích gál Yuuˈdi hí Kúlích Hef ˈGisanká met les gaa ˈdiđianká.

55ˈDeg Yíésu Galilááya hol gáá eedhdheká Yúósef el gaa veeˈde, liish argiyye, mú hát gaalí iifieká úba argiyye. 56Aalé ˈdég é hol ˈdú naate, ˈgór ussaká ubaa sáláb Yíésu shugudmichoká tág koyye. Hát giri hemurit Waaˈgiet hí hoteká ˈdég Kúlích Hef ˈGisan kinaal héf gaa ˈgisate.

Currently Selected:

Lúka 23: dsh

Highlight

Copy