Lúka 15

Hib wálách bađayká

1Gál gibíre gugusatká ubaa gállé éíy taaka gaalí gál ađaabano ˈguoká yegetká lulle hol ˈdú gáá yimie, Yíésu he af nee kokoy. 2Aalé gál Farisaayká ubaa gál nyatalaamká yiirsam fadhdhe, kieye, Máállá gál ađaabano ˈguoká hol ˈdoy, hol ˈgar golmoto, yie. 3Aalé Yíésu gáál hát hibietká geey, kieye, 4Itín mááya, walallé kúˈd he ˈguoká walach tikiˈd hí gaa bađayka, wala giri tomon saal a saalká guor ma ki haađiny? Ma seeminy? Wálách giri tikiˈde bađayká hol ma gaa ˈgeˈgen? ˈJíig ma shugunan? 5Máá kinaallá walach shuunneka, geer haí gaa meedhe, walach ˈgáár hai kí egedhdhe. 6Mu é kí ˈjieka, mu sheelle ubaa olle hollo hol ˈdú veeme, gáál hai geđia, kieye, Ka yimedhíe, kí hol ˈgar aaˈduan, yáá wálách chia bađayká shuunne! hai gáál yeedhe. 7Hát tikiˈdééllá yú hí geeye, mú tikiˈd héllé ˈdeđewká hay-, Waag makan ˈjieká Waag gállé ˈgasso-, urruká súmo ger hí gaa meedhe. Gál tomon saal a saal hol gál saas mánká hol ka dhaˈgasanká hé Waag gállé ˈgasso-, urruká geer ma gaa memesiny, Yíésu hí gáál yie.

Bíre bađayyeká hiblé

8Yíésu gáál hibéél úba geey, kieye, Kálmaréél min bíre tomon ˈgayyo-, kor bíre tikiˈd hí gaa bađayyeka, min hé ˈjiet ma úgúfîny? ˈBíl ma gaa hégên? Bíre hát ˈdabaanká ˈbíl ma gaa ˈgéˈgên? ˈJíig bíre ma shúgúnân? 9Min kinaallá bíre shuunateka, sheelle ubaa olle hollo hol ˈdú gáá veenne, gáál hai geđicha, kieye, Ka yimedhíe, kí hol ˈgar aaˈduan, bíre chia ye gaa bađayyeká yáá shuunne! hai gáál cheedhe. 10Yú hí geeye, hát tikiˈdééllá máá hé ˈdeđewká gaa seseenká héllé ˈdeđewká hay-, Waag makan ˈjieka, in Waag gálle ˈgasso-, urruká ger hí gaa meedhe, Yíésu hí gáál yie.

Hib iny bađayká

11Aalé Yíésu geđi gáál geey, kieye, Mú tikiˈd nyígéény hí naama. 12Iny giri ninniká ˈjaalle geey, kieye, Baabá, aany ubaa he lullé kua aadh ˈdaatika aˈjibaatle yú léká yáálle ye kí naʼ, yie. Aalé gáál ˈjaalle gáál aany ubaa shokodaam eiy ki nie.

13Guch guđo mán, máá giri ninniká shokodaamle shuunne, aanyle hol ˈdú tune, aany ˈdaanne, lés éíy fágká mé nie. Bííy kinaal shokodaamle ubaa aanyle ki aaˈdume. 14Mu shokodaamle ubaa aanyle lulle beeteká, lés kinaal kuoˈd ˈdeewká hí gáá ˈdiiyye, mú mar hí yies. 15Aalé mu máá les kinaallo mare hujich ˈdú ˈgeˈgedhe. Máá kinaal léslé golchom hí gaa ˈdeˈdedhenká mú ali ˈdú kaay, giri mu golchom iish ubaa ˈguor af ki mumuroká. 16Mu ˈguor golchom hí kokoeyká kóonylé kokuoká táb ˈdodhdhe. Mú úba hé máá níínní hí hé geere shieká mán.

17Mu biiy táb ˈdodhdhe, tawue, kieye, Gede ˈjaachú hí ˈguoká ˈdáb aake ki yaalla, heyime, ˈguom hí gáá nannaata, kor yú íín ál kuoˈd hí ye ki chegese! 18Yú ha keeme, bííy ˈjaa chia mé nannaa, mú ha geđia, Baabá, yáá Waag ubaa kuun hí he ki ˈdeeney. 19Yáá ˈduuw ˈguo-, geđi gaal ye inykú yeetká mán. Ye gedech hóso, ha yú yeedhe, muí hol yie. 20Aalé mu kie, bííy ˈjaalle mé nie. Mu é kí ˈjobondhe-, geđéétí sieká mú ˈjaalle mú arge, mú geer hí ˈdú gudhdhe, mú agim ˈdodhdhe, mú hođoˈd gaa ˈgiliˈgay, mú aˈdíne ˈdunge.

21Iny ˈjaalle geey, kieye, Baabá, yú yáá Waag ubaa kuun hí he ki ˈdeeney. Yú yáá geđi máá ye inykú yegetká mán, yie. 22Aalé mú ˈjaalle gedelle ká vie, kieye, Hararáa! Đafar bis hí midhab-, ˈjilaká ka ée, mú hidháa! Mú gibit gúmúríny káa, mú koiy ˈgas fáa! 23Máádíny gieká ka ˈdeetíe, yiesíe, kí gololsot, kí aaˈduan. 24Iny chiallá érléká hai kufe, yú yie, káána lúol! Hai bađayyo, yú yie, káána hé yé ká ˈdie! íny ˈjaalle hí gedelle yie. Aalé gaal lulle aaˈdume.

25Af kinaallá iny guđoká íín lés gaalí fafadhdheká he gaa ije. Aalé mu ka gagale-, é kí ˈjobondheká mu ár lalalat-, gálle aˈduanká maale. 26Aalé mu gál giri gédeká mú tikiˈd ká vie, mú yiete, kieye, Áˈdúmal hélle meete? yie. 27Aalé máá giri gedechká mú geey, kieye, Nyár kua ká ˈjie, in ˈjaakú máádíny gieká yies, ˈdaa giri mu ká ˈjie-, mu fayyáká! mú yie. 28Iny giri guđoká idhane, ˈbíl hilít điidhe. Aalé ˈjaalle hí yé ˈdú ˈdie, hí gil ki efe. 29Kor íín ˈjaalle geey, kieye, Bá dháash! Warramééllá lulle yú hujicho ko kí nannie. Yáá hé ye geeyche điidheká mán. Kó ye amit níínní edech ká shiiche-, yú ubaa sheelchú nyí ˈgalate-, nyí hol ˈgar aaˈduanneká mán. 30Kor káána iny kua aanykú ki aaˈdume-, aany sharmúut ˈdú beeteká ka ˈjieká, kuun hí máádíny gieká ki chiesal! ˈjaalle yie.

31Aalé íny ˈjaalle kieye, Ákutú! Kúún bar lulle hé kuol af ijo. He lullé yú ˈgúóllá hékú. 32Kí aaˈduan, ger hí gáál gaa meet. Nyár kuallá érléká hai kufe, ke yie, káána lúol! Hai bađayyo, ke yie, káána hé yé ká ˈdie! muí inylé guđo kinaal yie, Yíésu hí gáál yie.

Currently Selected:

Lúka 15: dsh

Highlight

Copy