Yuána 12

María Yíésu salab shugudiche

1ˈJila máá ˈgasso-, urru-, Waaˈgietká hí gáál ˈdug gaa nadheká mé gáá koonle ram le hí ka ˈgisateká Yíésu Bédhene álle Lasááro hí gaa ijoká ki ˈjie. Lasááro he máá Yíésu hí uushich yé gáá ˈdeeyká. 2Yíésu gaalí ál kinaallá gólol tág ki nie. Máá gáál golmieká he Márta, Lasááro íín gál Yíésu hol kara ˈguomietká álle hol af ijeká he gaa ije. 3Aalé María đudmit sáláb dhát-, usiyyo-, him hí ilish-, gaalí ˈgór nariˈd-, hídhle gaa ˈdieká eete, Yíésu salab ˈgas met ˈdú fafiyye, meenyle dhúrle mú salab ˈgas ki shugudiche, ˈbíl geer lulle salab úsle hí ki maalay.

4Aalé Yúúˈdas Iskáryot giri máá lali Yiesu-, gál Yíésu oos ˈguoká Yíésu ˈdú egewká, kieye, 5Háteka sálábal gaalí mamadîny-, gaalí bíre ma ka yían-, bírelle gaalí gál he maamanká eiy ma gísinyal? Sáláballá bírellé hí yé ká ˈdeđichoká hé bíre hújíchle ram hí kúˈd seđeká muunîny? yie. 6Mu hatallá yíéllá, hé kieye, mu gál he maamanká hí geer gaa ˈdeew, muuniny, mu buraa he liley. Mu íínííllá he máá bíre laliká shomodhelle hí gíl geer gaa iđe-, kor bíre a nigini mare gaa burumeká. 7Aaléka, Yíésu kieye, Min salab ki hayyíe, min kúlích gaalí ye gaa gagaluoká héllé he ekeyche. 8Gál he maamanká aadh lulle it hí hol af iđa, tá yú yáá ˈjíig ke hol af ma iđiny, Yíésu hí gáál yie.

9Aalé nyésébích guđo-, Yuuˈdiká Yíésu hát Bédhene gaa ijoká maale. Aalé gaal sedhe, gaal hé ˈdeeny Yiesu tákámle hí ma éeny, gaal Lasááro giri muí uushich yé gáá ˈdeeyká úba aargireká he fede. 10Gál guguđo-, suoryoká Lasááro ooslé yegeská úba sulle nie. 11Hééllá he ˈdaa giri gál burnay-, Yuuˈdiká fayam Lasaaro maaleká gál guguđo kinaal el af gaa tame-, Yiesu iiy yieká.

Yíésu ˈgúól ˈdú ije-, Yerúsalem ka higileká gálaat hí meey

12Bííy éíy taaka ka biˈdeká nyésébích guđo-, ˈjila álle hol ˈdu gáá yimieká hát Yíésu ˈgierich gaa igiro-, Yerúsalem ká yiimetká maale. 13Aalé gaal kulidh muˈde, fuadhe, mú agim nadhe, af úr ki eey, kieye,

Waag hé gáál ˈdú ˈjiiyye!

Máá meeny Máá Guđo Waag kí yimie-,

Kánsích Yisirayelallá ebá Waag hí ˈdú ˈguunúánne!#12:13 Warˈgat Arram 118:26

gaalí yie.

14Yíésu kírífíny gaalí ˈdu gáá ˈdeeyká ˈdú yíéđie. Hééllá hát Warˈgat Waaˈgiet hí hote-, giri kieye,

15Ini Siyon,#12:15 Síyon úba he meeny ˈjien Yerusalem. Ini Siyon hélle kieye, Gál Yerusalem. sierm hash.

Bá dháash!

Kánsíchkú kírífíny ˈdú ija, ká yiimie!#12:15 Sakaría 9:9

chieká.

16Lali Yiesu af giri héél hatal ˈdieká hé ˈdeeny Warˈgat Waaˈgiet hí kis ˈdaa Yiesu ki hotééllá hé eiy ma náásan. Héétí gaal úba hé gálaat hí Yíésu ki ekemeyóóllá hát ˈdéé hót hí hogotoká hé eiy ma náásan. Yíésu Waag hí uushich yé gáá ˈdeeyche-, hí gúch koyyeká el ˈdaallá in gaal hééllá lulle eiy naate.

17Aaléka, Yíésu af giri Lasááro vie-, mú uushich yé gáá ˈdeeyká, nyésébích mú hol ˈgie-, héél lulle il ki argeká fayám les bash ki hoy. 18Aalé gál burnayká fayam hélle gálaat af ˈdaˈdabsuo-, Yíésu hí Lasááro ki ekeyká maaleká kie, Yíésu agim nadhe. 19Aalé gál Farisaay nyésébích mú agim nadhéél argeká hol geey, kieye, Bá dhaayyíe, múún gon hé ki hát mán. Ebá gálaat lulle hát he mú ˈdú ˈdoˈdodhdheká dhaayyíe! hol yie.

Yíésu kúfáchle gáál geey

20Aaléka, gál ˈjila álle mé nie-, Waag viviteká hé gál gál Yuuˈdi muuninyká ˈbaal hí gaa ije. 21Gaal Fílib giri máá ény Beđesaida-, lés Galilaayaká ˈdu gáá yimie, mú yiete, kieye, Máá guđo, nyiin Yíésu nyí aargiˈdoká nyí feˈde, yie. 22Aaléka, Fílib sedhe, Ánˈduru geey, gaal hullaalle hol eedhdhe, Yíésu geey.

23Yíésu gáál ˈdéé hol ˈdú nie, kieye, Aleđuđugul Iny Máádhat hí gaa ˈduuwawká hé ali kí ˈdiiyye. 24Yú hí hé ˈdúwaká geeye, sííndí aaritle les ki ˈjiiyye-, eeˈd geer naate-, hátle ma kufinyka, hátlé aađa-, aariteká he iđa. Tá har he kuyyeka, af kinaalka đo hai ˈdiiyye, um guđoká hai ˈdalle.#12:24 Gál Yuuˈdika, áár gaalí fieka, aar hai kufuma, tá ká ˈdeˈdeme, he yegedhe. 25Máá sídhle gielká sídhle hai baađisia, tá máá sídhle lésallá gaa điidhoká, sídhle luolmit biiyoká he af ki ija. 26Máá hújíchchú nannuoká, hí ye el gáá veero. Ál yú ijoká in gédéchchú úba hí ija. Máá hújíchchú nannuoká, ˈJaachú haí ˈduuwaya. 27Aalé káána, geer hé tág ye gaa ˈdeenedhe, tá háte yú yeedhe? Baabá, hé ye met gaa ijóóllá ye gáá bísisho yú yeedhe? Híʼi, hééllá ˈdugaka in yú aleđuđugullééllá kí yimie, Yíésu hí yie. 28Aalé mu hatal yieká kieye, Baabá, meenykú ˈduwásish! yie. Aalé ˈdéé hót úr yé gáá ˈdiiyye, kieye, Yáá ˈduwasie, tá geđi ha yú ˈduuwaya, chie.

29Nyésébích ál kinaal ˈgieká ˈdéé hót úr gaa maaleká kieye, He ˈgeˈgetíâ! Gáál ˈbaal kieye, Máá ˈgasso-, urru-, Waaˈgietká mú geey, yie. 30Yíésu kieye, ˈDéé hótééllá ˈdaa he yé kí ˈdiiyyééllá, hé ˈdaachú ma ki taaliny, ˈdaa kíchia ki taalla. 31Waag aleđuđugul lésallá ˈdéé ki iđimichoká kálle hé ká maˈde. Kánsích lesallo-, Sátan léká Waag les haí gaa aruanna. 32Tá yú af giri gaal ye les gaa egewká gálaat lulle ha yú laadhdha, muí gáál yie. 33Mu hatallá yíéllá kúfáchlé he kufunanká gáál geđia. #12:33 Yíésu lés gaalí gaa egew-, hodhééllá he ˈgór đarám yaal-, gaalí mú ˈdú ˈdaraan-, tá gaal mú les gaa egew-, mu kufunanká héllé he hogodho.

34Nyesebich kieye, Warˈgat Waaˈgiet hé nyí gaa maaleká kieye, Messíya bííyyo ali he ija, he chie. Tá háte geđi kúún kieye, Iny Máádhat lesso gaalí gaa egee? chegedhe. Iny Máádhátallá he mááya? gaalí mú yie. 35Aalé Yíésu gáál geey, kieye, Edhum rámlé ka ˈgite-, hí hol af iđaká hé iraam ká ˈdabiyye. Édhum hátlé hí hol ˈgayya, bííy gaa dhátká hí el ma ˈdug gáá hílinyallá hol gaa seesemíe. Máá bííy gaa ongʼoˈdeká gaa seseenká hé ál he nannaatká muog. 36Édhum hátlé hí hol ˈgayyáállá, édhum iiy yiedhíe, giri hí um edhum chegetoká, Yíésu hí gáál yie. Yíésu ˈdéé beeteká đo gáál mé af ˈgite, ali gaa sedhe.

Gál burnayká Yíésu iiy yegetká điidhe

37Yíésu har úba he lullé burnay-, gáál af ˈdaˈdabsúól gálaat met gaa ekeyka, gál burnayká hé mú iiy ma yéen. 38Yaalmitééllá ˈdéé hót Waag hí Yisááya ká shiiche-, giri kieye,

Máá Guđo, mááya fayamkínyo iiy yie?

Mááya gílkú fargogintle eiy naate?#12:38 Yisááya 53:1

chieká, hé ˈduwasiche.

39Gaal hát Waag iiy ma yegenallá yaalmitle hé Yisááya geđi hí gáál geey, giri kieye,

40Waag hé gáál in ˈdabsiche, gáál met googonoyche,

giri gaal inle he ma ki aargiriny-,

kasle he eiy ma ki nannasanká.

Waag úba kieye,

Gaal hai ye ˈdu gáá ríébiny, yú bisîny,#12:40 Yisááya 6:10

Waag hí chie, Yisááya hí yieká.

41Yisááya hééllá hodhééllá, Yíésu guchlé arge, in mú ˈdeenyle huogodhe.

42Har héél úba hatal kátaka, gál guguđoká gál burnayká mú iiy yie, kor gaal ˈdaa giri gál Farisaay hí ˈbíl ˈdiiyiminyká gaa aruanká kikiatká, hé iiy yeenle ma húógon. 43Hééllá ˈdaa giri gaal gálaat hí memeyoká fedo-, meeny Waag hí memeychoká ma ˈdú fafinyká.

44Aalé Yíésu af gaa guđoká ˈdéé ki hodhe, kieye, Máádhat ye iiy yieka, hé yú tákámchú ye iiy ma yéen, Máá ye ali gáá kaayká he iiy yie. 45Máá ye dhaˈgasanká, Máá ye ali gáá kaayká he dhaˈgama. 46Yú lésallá ka yimíéllá he édhum, giri máá ye iiy yegetká bííy gaa ongʼoˈdeká ma gaa yíéđiminyká. 47Máá ˈdeenychú maalo-, kor ˈdéé ma ki yaalinyká yáá ˈdéé ma ki iđiminy. Yú yáá les ˈdéé ki iđiny ma ˈdu gáá yímen, yú lés ririanká ˈdu gáá yimie. 48Máá ye điidho-, ˈdeenychú iiy ma yeenká, hé héllé giri hí kúlích biiy el ˈdaˈdká gaa ˈdeđenset-, hí ˈdéé ki iđimuoká ˈguo. Hé kinaallá he ˈdeenychú. 49Tá yú yáá hé meenychú ma húógon, ˈJaa chia ye ali gáá kaayká in hé yú hogodhoká ubaa hé yú hí geđuoká ye kí mure. 50Mú hemuritle hát luolmit biiyoká yé ˈdú ˈdeˈdeennoká yáá óg. In hé ˈJaachú hí ye geeyká tákámle yú hogodho, Yíésu hí gáál yie.

Currently Selected:

Yuána 12: dsh

Highlight

Copy