He Ekeny Gál Alb Fimiká 5

Ananías ubaa Safíra

1Aalé máá gaalí Ananías yegie mare ubaa minlé Safíra léslé mare úba bíre hidhdhe. 2Ananías bírellé les ká hidhdheká ˈdáá tikiˈd hát hinyamietká kaadhdhe, bíréétí ká eedhdhe, gál alb fimiká met ká sidhe. Mú minle úba hé hinyamééllá mú hol ki onnoy. 3Aalé Bétiro Ananías vie, kieye, Ananías, háteka Sátan ko hille-, kuun Hím Naasan Waaˈgiet nyimisate-, bíre giri les yiateká ˈdáá tikiˈd hát hinyamietká kaatéel? 4Hé kua ˈgayyeká hátlé giri bíre ma yíanká hé hékú muunîny? Aalé bíre ká yiateká bíre kinaallá hé hát kua kúólle hí feˈdoká hí ki seseennoká muunîny? Meete ko tawunyéél gaa koy, kuun hí héél ki ékéyche? Kúún kó máádhat ma nyimísan, Waago nyimisate, Bétiro hí mú yie.

5Aalé Ananías héél maaleká đo le ˈdoy, kufe. Gál héél maaleká lulle sierm guđoká hí faanne. 6Aaléka gál rúóreká kie, mú đafaraam ki maamare, mú eey, mú ˈgodhe.

7Aadh ˈgas seđ amú hí ˈgiteká Ananías minlé Safíra ká chimie, hé hé níínní onnoyyeká mán. 8Aalé Bétiro min yiete, kieye, Ebá ye ka géesh, lés kíchia hí marsateká bírellé hí ka yiateká lulle hééllo? yie. Aalé min giriká kieye, Iiy-hí, bíre lulle hé kinaallá, chie. 9Aalé Bétiro min geey, kieye, Háteka itín hí Hím Naasan Waaˈgiet nyiimisatoká hí hol af gáá maalléel? Fúˈjig, gál bélkú ˈgodheká hé shagum hí ˈbíl af gaa ˈgiˈgidhóóllá. Kúún úba gaal hai ko ˈgoodho, Bétiro hí min geey.

10Ál tikiˈde kinaal min đo mú ˈgas met les gaa ˈdoyye, kuyye. Aalé gál giri rúóreká ˈbíl ka hileká min giriká úba kuiy, đo min eedhdhe, min bélle láá ki ˈgodhe. 11Gál Yíésu iiy yieká ubaa gál héél maaleká lulle sierm guđoká hí faanne.

Gál alb fimiká gál burnayká bisie

12Gál alb fimiká hé gaalí il ki aargiro-, gáál af ˈdaˈdabsuoká gálaat met gaa eekemey. Aalé gál Yíésu iiy yieká lulle gách Solomon álle hol ˈdú gáá yiimie. 13Har gaal íín súm úba gaalí gál ˈdúwaká ká dhaˈgameka, hé máá níínní hí hurt hileká mán, ˈdaa giri gáál gaalí kikiadheká. 14Kor gál yááb ubaa gál ˈdíét burnayká Máá Guđoká iiy yie, gáál af ˈdú faafame. 15Héél ˈdaalle ˈdugaka gálaat gál basham ˈgieká ˈgierim af ká sidhe, gáál kubano ubaa rokodo ˈdugano ˈdú iifie, giri kerka Bétiro ál kinaal ká nadheka, gáchle gáál ˈdáá tikiˈd gáá nannaat-, giri gaal miidhanatká. 16ˈJien Yerúsalem lag ijeká nyésébích guđoká hí gáá yimie, gaal gál basham ˈgieká ubaa gál aryáán hí ayaˈgisicheká ká eey, gál kinaal lulle midhandhe.

Gál alb fimiká gaalí he ki ekey

17Aalé máá méte suoryoká ubaa gállé hol ˈgie-, Saˈdukaayká hinááf hí faanne. 18Gaal gál alb fimiká ˈgiiliˈgay, gáál ény hiigin-, gaalí gálaat ki higidheká fie. 19Tá chúúré kinaal máá ˈgasso-, urru-, Waaˈgiet mare ény hiigin kinaal af fuufure, gáál yé ká ˈdeete, kieye, 20Sedhíe, ˈBíl Waaˈgiet đírle geer ki ˈdée, luolmit kaanallóóllá fayamle lulle gáál shía, muí gáál yie. 21Aalé biiy ká biˈdeká hát giri máá ˈgasso-, urru kinaal hí gáál geeyká gaal đo ˈBíl Waaˈgiet đírle geer hile, gálaat ˈdéé onisie.

Aalé máá méte suoryoká ubaa gálle hol ˈdú sedhe. Aalé gaal gál arrá-, giri karu Yisirayelká lulle úba hol ˈdú vie. Gaal gál yuoyoká ény hiiginká ali ˈdú fie, giri gál alb fimi-, gaalí hiigidheká ká shugunatká. 22Aalé gál giri yuoyoká ény hiiginká sedheká gaal ˈbíl gaa laʼ, đo hol ká nadhe, fayám ká sidhe, 23kieye, Nyí sieteká ény hiiginká gaalí hát ˈdabaanká af gaa kuokog, gál é ˈdeˈdemeká kín é af eiy hát ˈdabaanká gaa ˈgee, kor é nyí af fuˈdeká é gerle gál níínní hí gaa ijeká mán, gaalí yie. 24Gál ˈBíl Waaˈgiet ˈdeˈdemeká máállé hí mé ki yielká ubaa gál guguđo-, suoryoká ˈdeenyéél maaleká birge, he hátlé mákártaká af ˈdabe.

25Aalé mú tikiˈd ká yimie, kieye, Bá dhaayyíe, gál kíchia giri hí ˈbíl hiiginká fiiyyeká ˈBíl Waaˈgiet đírle geer gaa ˈgee, gálaat he oonisia, yie. 26Aalé máá giri ˈBíl Waaˈgiet gállé hí ˈdeˈdemeká mé ki yielká ubaa yuoyle đo hol eedhdhe, gál alb fimi kinaal ká eedhdhe. Gaal hé gáál hát fargogintiká ma ka shúúnan, ˈdaa giri gaal gálaat kiadhe-, gálaat waar hai nyí kí tuuna, yegieká.

27Aalé gaal gál alb fimiká ka eeyká, gáál gál arráká met gaa koy, giri máá méte suoryoká hí hegesetká. 28Aalé máá kinaal gáál yiete, kieye, It ke hí he ma ki múriny, ke hí il gíl ma gaa helîny? Meenyééllá haí gálaat he ki oonisîny, ke hí ma yéen? Tá káána háteeye geđi he onisinyéél hí ˈjien Yerusalem geer kuˈd hoyche, hí nyí mú fásle méé gaa veveenne? muí gáál yie.

29Aalé Bétiro ubaa gál alb fímíítí mú ˈdéé hol ˈdú nie, kieye, Gálaat hí ˈgisat, nyiin gon Waago nyí met gaa kekeenne. 30Yíésu giri itín hí ˈgór đarám yaalká ˈdú chieská hé Waag eshim eshimkúnno hí loolnoyche, hí uushich yé gáá ˈdeeyche. 31Waag hé mú gíl ˈdaallé naanietká iđisate, mú Máá Kansich-, ubaa Máá Rubachietká hoyche, giri mu gál Yisirayel fargogínt shiguo-, gaal héllé ˈdeđew-, gaa seseenká haađuo-, mú makan fafaan-, gáál muí ađaabano ubaa nyuogim gaa egewká. 32Nyíín ubaa Waag Hím Naasanlé giri Waag hí gállé hí met gaa kekeenká shiicheká in nyí hééllá ˈdúúw ˈdú ˈdiiyye, nyí hogoto, gaalí mú yie.

33Aalé gaal ˈdeenyéél maaleká súm idhane, gáál yegieská fede. 34Aalé máá Farisaay-, gáál nyatalaam oonisuo-, gaalí Gamáliel yegie-, ˈdúwa gaal hí óg mare gál giri arraká hurtle les gaa kie, ˈdéé hodhe, giri gáál gaalí á níínni mare baaˈd yé ki ˈdeđuoká. 35Aalé mu gál guguđo kinaal geey, kieye, Gál Yisirayel, gálallá hé hí ki ekemeychoká mé dhaaˈgamíe. 36Toomééllá Dheúˈdas yé ká ˈdie, ˈduuwle huogodhe, hol meey, gáál kúˈd afur hí el gaa veere. Mú gaalí yieská mú lalilléká eiy bađay, he đo lulle me hí ˈgidhe. 37Máá kinaal elle Yúúˈdas giri máá lés Galilaayaká bár gálaat gaalí totoyká yé ká ˈdie, gál burnayká hí el gaa veere. Máá kinaal úba gaalí yieská mú gállé kinaal eiy bađay. 38Aalé káána yú hí geeye, gálallá hayyíe, gaal hí siet, gaal héllé ekemeyóóllá har hé ˈdaa gálaat yé gáá ˈdieká kátaka, af kinaalka hé el mé mán. 39Tá gaal har hélle hé Waag yé gáá ˈdieká kátaka, af kinaalka ití gálallá he eiy ma ki fufuminy. Itín af kinaalka Waago hí af ˈdú egeyye, muí gáál yie.

40Aalé gaal Gamáliel af maale, gaal gál giri alb fimiká ká vie, gáál túdaam ki tune, kor gáál il gíl gaa helie, gáál geey, kieye, Haí meeny Yiesúúllá ˈdaalle he ki hógon, yie, đo gáál fure. 41Aalé gál alb fimi kinaal ar álle gaa kieká, ger hí gaa meedhe, ˈdaa giri gáál gaalí ˈdaa meeny Yiesu ki manyjasieká. 42Ram hátlé hol el gaa igiˈdeká, gaal đír ˈBíl Waaˈgiet geerle tá ubaa ˈjien Yerusalem Fayam Midhab Waaˈgiet-, Yíésulle hát he Messíyaká taalle gáál gaa shiigie.

Currently Selected:

He Ekeny Gál Alb Fimiká 5: dsh

Highlight

Copy