He Ekeny Gál Alb Fimiká 2

Hím Naasan Waaˈgiet ká leenlé

1Kúlích ˈjila Bentekos#2:1 ˈJila máá ˈgasso-, urru-, Waaˈgietká hí gáál ˈdug gaa nadheká ram tomonaam chen hí ˈgiteká, gaal símág muˈde, ˈguom kinaal ˈbáál gaalí Waag gaa shie. Kúlích kinaallá ˈjilalle meenyle Béntekos. ali kí ˈdiiyyeká gál alb fimi kinaal lulle ˈbíllo he gaa ije. 2Toomareka gaal kóˈd hát wááních fargogo-, úr gáá ˈdoyká maale. Kóˈd kinaallá ˈbíl gaalí gaa ijeká koch yie. 3Gaal hé hát ˈjiet bólo ki ég-, hol eiy gaa ˈgiiˈgite-, gáál lulle met eiy ˈdú yíéđieká arge. 4Gaal lulléká Hím Naasan Waaˈgiet hí koch chie, gaal lulle af hol ká eiyye-, Hím Naasan Waaˈgiet hí shiicheká ˈdeem ki huogodhe.

5Aalé Yerúsalem hé gál Yuuˈdi-, giri gál Yisirayel lé-, Waag kikiadhe-, les lúl gáá yimieká hé hí gaa ije. 6Kódal gálaat hí maaleká, nyesebich hol ˈdú gáá yimie, af gil hí fame, ˈdaa giri gaal íín lulle hátlé les eiy gáá yimieká aflé gaalí hogodheká eiy mamaleká. 7Aalé gaal he af ˈdabe, hol heegete, kieye, Gálallá lulle hé gál Galilaayaká muunîny? 8Héél kor háteeye, hé afkúnno hátlé hol ká eiy eiyyéél gaalí ˈdeem ki hogodhoká ki eiy maalóol? 9Múúni ki állá ˈgíéllá ki gál lés Bartia, gál lés Meˈdia, gál lés Ellim, gál lés Mesobotamia, gál lés Yuuˈdia, gál lés Kabaˈdosha, gál lés Bontos, gál lés Asia, 10gál lés Firgia, gál lés Bamfilia, gál lés Misirayim, tá gál lés Libia e hí ˈjien Kurene kí ˈjóbká. Múún gáál ˈdáá tikiˈd Róóma gáá yimie. 11Múúni kinaallá ˈdáá tikiˈd ke gál Yuuˈdi, tá gálatí he gál Waag Yuuˈdi iiy yieká. Tá múún ˈdáá tikiˈd ke gál lés Kerete ubaa gál lés Arabia. Tá gaal íín har hé gáál af ˈdaˈdabsuo-, Waag hí ekemeycheká afkúnno eiy ki memeye! Ki maala! gaalí yie. 12Gaal lulle he af ˈdabe, he hí mé eiy ki sedhe, hol heegete, kieye, Hééllá kor hélle meete? gaalí yie. 13Gáál ˈbáál gáál hélléél eeshey, kieye, Gáál bershó hí faanne, yie.

Bétiro nyesebich ki ˈdiiyime

14Aalé Bétiro ubaa gál alb fimi-, tomon a takachká les gaa kie, nyesebich met ki ˈdie. Bétiro af gaa guđoká nyesebich ki ˈdiiyime, kieye, Gál Yuuˈdi ubaa it halúg lul kíchia hí Yerúsalem gaa iđáállo, ebá yú hí hééllá ká geeye. Hé yú ka hogodhóóllá hát ˈdabaanká nee kóo. 15Hé hát hí taawuyyáállá muuniny, biiy hátle burro, gálallá hé bersh níínní hí faanneká mán. 16Máá Waag hí ˈdéé ka shigiche-, Yówel léká ˈdeenylé hodheká hééllá: 17Waag kieye,

Bár giri biiy el ˈdaˈd hí ká ˈjoobonotká

Hím Naasanchú gálaat lulle ha yú ˈdú leesia.

Nyígéénykícho ubaa hadakícho ˈdeeny yú shiguoká

hai ˈdiyime,

gál kíchia rúóre yaabká ˈdeeny ˈdaachú yé gáá ˈdeˈdeenká

hai aargira.

Gál kíchia káru yaabká amádh ha yú shigia,

hai aamadhma.

18Gede chia yaabká ubaa gede chia ˈdietká

Hím Naasanchú ha yú ˈdú leesia,

gaal ˈdeeny yú shiguoká hai ˈdiyime.

19Yú hé gáál af ˈdaˈdabsuoká úr yé ha gáá ˈdeđia.

Les úba hé gálaat il hí aargiˈdoká yé ha yú gáá ˈdeđia,

fás, ˈjiete, tá ér guđoká yé ha yú ká ˈdeđia.

20Kúlích giri ˈdúwa-, fargogiyyo-, yáá Guđóóllá hí gáá ˈjeen-,

hí ˈdéé gálaat ki iđimuoká hátlé ali ma kí ˈdíinyká,

aadh ha yú oongʼorosia, ˈgúíy hollo yú hol gaa laama,

bur ˈdíngi hát fáská ha yú hođia.

21Tá máá meenychú vivisatká ha yú riima,#2:21 Yówel 2:28-32

Waag hí chie, Bétiro hí yie.

22Aalé Bétiro geđi gáál geey, kieye, Gál Yisirayel, hééllá nee kóo. Yíésu giri Nasaretká héllé farguogo-, Waag hí shiiche-, hí hurt gaa eekemey-, hí af ˈdaˈdabiyyeká ití óg. Hé kinaallá ˈdugaka in mu hát he máá ˈdúwaká Waag hí itín argisiche. 23Máállá Waag hí gíl geer gáá kaayyééllá, he hát giri kis Waag hí tawuyye-, hí gaa feˈdeká in gál nyatalaam maamanká hí mú yiir kí chiˈde, mú hí ˈgór đarám yaalká ˈdú chies. 24Aalé ˈdaa giri kufach fargogint níínní he ˈguo-, mú uushich ki chichirat-, mánká, in Waag mú kúfach gaa eeyye, mú uushich yé gáá ˈdeeyche. 25ˈDáwuˈd mú ˈdeenyle huogodheká kieye,

Máá chia Guđoká bar lullé yú met gaa kokodhdho.#2:25 Muuninyka: Hát Máá chia Guđoká bar lulle nyí hol ˈgayyeká yáá óg.

Yú yáá hé ye riitisuoká mán,

ˈdaa giri mu ye gíl ˈdaa naaniet yaalká.

26Aaléka, geer hé ye gaa meedhe,

af hé ye hé midhabká huogodhe,

gónchú aalé úba naanná hai gaa yíéđianna,

27ˈdaa giri kuun sídhchú ál gaaramká ma ki haađiny-,

máá kua lé-, kuun hí taak koyyeká

mooˈdowká kuun hí iiy ma chegenká.

28Kó ye ˈgíérích luolmitiká argisiche,

innumkú geer ha ye gaa memesicha.#2:28 Warˈgat Arram 16:8-11

ˈDáwuˈd ˈdeenyééllá ˈdaa Kiristo he ki hodhe, Bétiro hí gáál yie.

29Aalé Bétiro geđi kieye, Nyaaramchú, ebá yú hí hát ˈdabaanká ká geeye, eshi eshimkúnno ˈDáwuˈd lééllá héle mán yieká, állá gaalí ki ˈgodhe, úúshíchle káána úba hé állá gaa ijo. 30Mu íín he máá Waag hí ˈdéé ka shigicheká, hát Waag úba hí he af iđicheká hé onnoy, giri mú hídhle mú tikiˈd Waag hí mú karalle ˈdú iđimichoká. 31Mu hé biiy metoká onnoyká, in Messíya#2:31 Af Heberewka Kirísto he Messíya. Messíya hélle kieye, Máá Waag hí salab mé ki liiyye-, Waag hí kansím koyyeká. uushich yé gáá ˈdímle huogodhe, giri mú Waag hí ál gaaramká ma ki haađiny-, ubaa mu ma mooˈdonyká. 32Waag hé Yíésu kinaallá loolnoyche, uushich yé gáá ˈdeeyche, tá nyíín lulkínyo nyáá nyí hé kinaallá ˈdúúw ˈdú ˈdiiyye. 33Mú hé Waag hí les gaa eeyye, Waag hí gíl ˈdaallé naanietká iđisate, mú ˈJaalle Hím Naasanlé he mú af iđieká hé mú shie. Hé káána aalé hí argiyya-, hí mamallóóllá he Hím Naasan Waaˈgiet kinaallá muí nyí ˈdú gáá leesie. 34Tá ˈDáwuˈd bár giri ˈdeenyééllá hodheká hé úr ma síen, kor kieye,

Máá Guđo Waag Máá chia Guđoká geey, kieye,

Gíl ˈdaa chia naanietká yíéđig,

35ˈdaab gál ko ka kídhká

kara kuun hí ˈgas ˈdú kokoyyoká yú ma hônyká,

Waag hí Máá chia Guđoká chie.#2:35 Warˈgat Arram 110:1

ˈDáwuˈd Waag hí ˈdeenyééllá shiiche, Bétiro hí gáál yie.

36Aalé Bétiro geđi kieye, Aalé it Yisirayelallá, lulkícho hééllá hát ˈdabaanká onnóo, Yíésu giri hí ˈgór đarám yaalká ˈdú chies kinaallá hé Waag hí Máá Guđoká ubaa Messíya hoyche, muí yie.

37Gálaat héél maaleká gáál ˈdee hí geer hile, gaal Bétiro ubaa gál Yiesu alb fimiká heete, kieye, Nyaaramkínyo, háte nyí ˈdeenne? gaalí yie. 38Bétiro gáál ˈdéé hol ˈdú nie, kieye, Hé kíchia ˈdeđew-, hí gaa seseenká hayyíe, Waag makan famíe, lulkícho gaalí meeny Yiesu Kiristo bie gim ki nuo, ađaabano ubaa nyuogim kícho Waag hí gaa eeyyo. Hát kinaallá in Hím Naasan Waaˈgiet hí aargiˈda. 39He af iđinyééllá meka he af iđinykícho ubaa he af iđiny umkícho, tá he af iđiny gál fág-, Máá kúnnaa Guđo Waag hí ká veveenká, Bétiro hí gáál yie. 40ˈDeem burnay hatalloká Bétiro hí gáál geey, muí gáál net gaa kaay, mu kieye, Gál barallo-, ˈgierim hí kuongʼodóóllá hol ka ridhdhíe, muí gáál yie. 41Gál mú ˈdeenylé kinaal iiy yieká gaalí bie gim nie. Kúlích kinaal gáál shíí seđ gáál túóyle ˈdú fame.

Gál Yíésu iiy yieká hátlé hol ki ijeká

42Gál Yíésu iiy yie kinaallá aalé đo gál alb fimiká hol af yíéđie, gáál he onisinyle nee kuokoy, gáál balashá hol ˈgar goolmote,#2:42 Hé kinaallá he gólól Yiesu. tá hol Waag ˈgar viivite. 43Yíésu gállé alb fimiká hé burnay-, gáál af ˈdaˈdabsuo-, gaalí il ki argeká eekemey, gálaat lulle he af ˈdabe. 44Gál Yíésu iiy yieká hol af yíéđie, tá héllé ˈgieká hol gil gáá gise. 45Gaal aanyle ubaa shokodaamle madie, birm hidhdhe, gál he hí ki ˈgeeˈgerneyká gil gáá gise. 46Gaal aadh lulle ˈBíl Waaˈgiet nyáláárle geerle hol ˈdú gáá yiimie. Gaal lúl hol af yíéđie, ˈjienle hát gielmitiká hol ˈgar gaa golmote, ger hí gaa memeedhe. 47Gaal bar lullé Waag memey, gáál gálaat lulle úba hí geelnedhe. Ram hátlé hol el gaa igiˈdeká Máá Guđoká gál hí iiy yieká gáál af ˈdú faafie.

Currently Selected:

He Ekeny Gál Alb Fimiká 2: dsh

Highlight

Copy