Khuurakikha 17

Indakaano iye khukhwiinjila imbalu

1Khu mbuka isi Iburamu oolesela kimiiko kamakhumi syeenda na syeenda (99) kye buukhulu, Umukasya waabonekhela Iburamu, waamulomela ari, “Ise ndi Wele umunyali wa byoosi. Ingana iwe ukyeendatsakile mu ntsila tsase naluundi ingana ukholatsake bye bukwalaafu. 2Kane ise ingumise indakaano akari aase ni nawe, naluundi kane imbalaayise lisaaye lye babetsukhulu boowo libe liikali naabi.”

3Lwe lomo iyo, Iburamu weenamisa kumurwe kweewe aasi khwiiloba, kila Wele amulomela ari, 4“Yino niyo indakaano yase ni nawe: Ikhusuubisa ndi iweewe utsya khuuba paapa we kamanaambo kamakali kameene. 5#Roma 4.17Lisiina lyoowo singene libe Iburamu luundi ta, ne kane ulaangibwatsake Iburayimu#17.5 Iburayimu: Lisiina lino limanyisa Paapa we kamanaambo kamakali, lwekhuuba naakhwikyelisile iwe khuuba paapa we kamanaambo kamakali kameene. 6Indi khuutsya khuukhuwa iwe lisaaye lye babetsukhulu liikali lilyeene. Mu mbuka iye mu moni, bakheekyelemwo kamanaambo ke kamaani. Ni baalala khu nibo beekyele baayiinga. 7#Luka 1.55Ise kane iniinde shisuubiso she ndakaano yase isi ikholile ni nawe, atweela ni babetsukhulu boowo babaaliilawo lwanyuma lwoowo, biilo ni biilo bibiitsa mu moni. Ise kane imbaatsake Wele woowo, luundi Wele we babetsukhulu boowo. 8#Bur 7.5Ise ikhaakhuwe iwe ni nabo liiswa lyoosi mweesi iwe aluno uli khuumenyamwo nga umukyeendaani busa. Ikhaakabile liiswa ilyo lya Kanaani lyoosi isi babetsukhulu boowo, khuuba lilyaabwe biilo ni biilo, ni nase kane imbatsake Wele waabwe.”

9Lwanyuma ndi Umukasya waalomela Iburayimu ari, “Iwe Iburayimu, atweela ni babetsukhulu boowo babaliilawo, mwaakha khuuliinda indakaano yino, kimiboolo ni kimiboolo kikiitsa iburaangisi. 10#Bur 7.8; Roma 4.11Indakaano isi iwe ni babetsukhulu boowo muli ni khuuliindila ilala, akari eenywe ni nase, niyo iye khuufukiilila khukhwiinjila imbalu. Buli mwaana umusiinde yeesi musiinywe, aakha khuukhebebwa imbalu. 11Muli ni khukhwiinjila imbalu, lwekhuuba niyo ikane ibe khaabonelo khe ndakaano ikholibwile akari owo ni nase. 12Khukhwaama aluno ari khukhwoola mu miboolo kyoowo kikiitsa iburaangisi, buli uwesaani yeesi, usaalikhana muungo mwoowo, nga woolisile biifukhu shinaane bye buukhulu, aakha khuukhebebwa imbalu, namwe umuundu yeesi isi muba nga mwaakulile busa ni tsinusu khuumenya muungo mweenywe, naye aakha khuukhebebwa imbalu. 13Umuundu yeesi, oba waasaalikhiile muungo mwoowo, oba nga mwaamukulile busa ni tsinusu, aakha khuukhebebwa imbalu. Khano kane khabe khaabonelo khe khu ngaaki khakhabonekha, khakhokyesanisa indakaano yase iye biilo ni biilo. 14Uwesaani yeesi uliba nga waakhukhebewa imbalu ta, aba waakhuliinda indakaano yase ta. Nashiryo umuundu uyo, aba s'abalibwa khuuba mutweela khu baandu baase ta, lwekhuuba aba waafuniaakile indakaano yase.”

15Wele waalomela luundi Iburayimu ari, “Lisiina ly'omukyelama woowo s'ulimulaanga luundi ari Sarayi ta, ne kane umulaangatsake uri Sara#17.15 Sara: Lisiina lino limanyisa nabakyelama. 16Kane imuwe tsikhabi, ni nawe ulisaala ni naye umwaana umusiinde. Kane imuwe tsikhabi khukhwoolesa ni kane abe maayi uwe kamanaambo kamakali, ni baalala khu betsukhulu beewe bakhaabe bayiinga.”

17Lweesho Iburayimu weenamisa kumurwe kweewe aasi khwiloba, ne waaba nga ambaasa mu mwoyo kweewe, nga atsekha busa ari, “Muundu shiina unyala waasaala umwaana nga woolisile kimiiko shitoondo shitweela (100) kye buukhulu? Ni Sara naye ari woolisile kimiiko kamakhumi syeenda kimibuufu (90), ilala anyala wasaala umwaana?” 18Lwanyuma kila Iburayimu alomela Wele ari, “Ne shiina kila Ishimaeli akhaba niye usikhila ibyo byeesi waasuubisa ise?”

19Ne Wele naye waamwiilamwo ari, “Taawe! Umukyelama woowo Sara, alikhusaalila umwaana umusiinde. Ni nawe ulimutwiikha lisiina uri Isaaka#17.19 Isaaka: Isaaka shimanyisa “khuutsekha”. Ise indiŋaŋasa indakaano yase ni naye atweela ni babetsukhulu beewe, khuuba indakaano iye biilo ni biilo. 20Ne ibyo bibiwaamba khu Ishimaeli byeesi uloombile, naabiwuliile. Kane imuwe tsikhabi, naye asaale lisaaye liikali, abe ni babetsukhulu baakali naabi. Naye kane abe paapa we baawuli likhumi na babili, naluundi ikhole lisaaye lyeewe libe linaambo lye kamaani. 21Ne indakaano yase indi khuukiŋaŋasa ni Isaaka, isi Sara alikhusaalila iwe, mu mbuka nga yino, kumwiiko kukwiitsa.”

22Wele waamaliilisa khuukanikha isi Iburayimu, lwanyuma waamulekhawo, waatsya.

23Lwanyuma khu shifukhu khweene ikhwo, Iburayimu waayila umusooleli weewe Ishimaeli, waamukheba imbalu, atweela ni baakulwa boosi babaasaalikhila muungo mweewe, namwe beesi aakula ni tsinusu tseewe, ni besaani boosi babaaba muungo mweewe. Bino byoosi aabikhola khuusiintsiila khwiibyo byeesi Wele aamulakila. 24Iburayimu aaba oolesa kimiiko kye buukhulu bweewe kamakhumi syeenda na syeenda (99) khu mbuka isi enjililakho imbalu, 25n'umusooleli weewe Ishimaeli aaba nga oolesa kimiiko likhumi na kitaru (13). 26Baryo Iburayimu n'umusooleli weewe Ishimaeli benjila imbalu khu shifukhu sheene shitweela, 27nga waayililemo atweela ni baakulwa besaani boosi babaaba muungo mweewe, ni babaasaalikhilamwo, ni naabo beesi aakula nga araambisa tsinusu tseewe.

Currently Selected:

Khuurakikha 17: LPE

Highlight

Copy