Buraambi 23

1Paulo womiisila tsimoni khu baandu be mu lukhobo, waaloma ari, “Bebuulebe, ba Isiraeli bashaase, ise namenyile mu moni tsa Wele nga nitsililisa naabi, ni kumwoyo kumulayi, khukhwoolisa khu shifukhu she shaleelo.” 2Ne umusaayi ufuura bukhulu Ananiya waloma ibo abe babeemile aambi ni Paulo bamukhupe khu minwa. 3#Mat 23.27,28Kila Paulo aloma ari, “Nawe Wele alikhukhupa! Iwe litikiiyi liliwakhibwile ni luloongo luwaanga. Unyala uryeena khukhukhalila ise kumusaango khulondekhana ni kamakaambila, ne ate iwe walekha khukalondelela, walakila uri bakhupe ise?”

4Abo abe babeemile ni Paulo bamuloma bari, “Unyala uryeena khukhomyaasa umusaaayi ufuura bukhulu uwa Wele?”

5 # Luky 22.28 Paulo welamo ari, “Bebuulebe, abe ise ishiili khumanya ndi niye Umusaayi ufuura bukhulu ta.”

6 # Bur 26.5; Filp 3.5 Ne lwanyuma Paulo n'ashimanya ari batweela khuubo babaaba mu lukhobo Basadukaayo, ni babaandi nga Bafarisaayo, waalomela angaaki ari, “Bebuulebe, ise indi Umufarisaayo, luundi indi umwaana we Bafarisaayo. Shishikila balikho bambotsesa bari lwekhuuba ise niyikina, naluundi ifukiilila mu khulamukha khwe baafu.” 7Paulo n'aloma aryo, abawo khukhaandisana akari e Bafarisaayo, ni Basadukaayo. Abawo khukhwawukhana mu lukhobo, 8#Mat 22.23; Mako 12.18; Luka 20.27lwekhuuba Basadukaayo bafukiilila bari mbaawo khulamukha khukhwaama mu baafu ta, bari mbaawo bamalayika ta, namwe kimyoyo ta. Ne Bafarisaayo bino byoosi babifukiilila. 9Ulwo abawo khutumbuukha khukali. Ni baleekeli be kamakaambila babaaba khu luwaande lwe Bafarisaayo benyukha beema, bakhaandisana nga baloma bari, “Ifwe sikhubona ilomo yoosi khu muundu yuno ta. Shinyalikhana khuuba nga mwoyo namwe malayika wamukanikhileyo.”

10Nga khukhaandisana khwekyelile shisaayumba, umukhulu we basilikhale warya ari Paulo banyala bamutabulakamo bisiintsa, aryo walakila basilikhale beewe bamuruseyo mu baandu ni kamaani, bamureere mu lumako.

11Mu shilo shishelakho, Umukasya weetsa weema isi Paulo, wamuloma ari, “Yinyindaalila kumwoyo, lwekhuuba nga niwawa bujulisi khusiise mu Yerusalemu, shikhwakhila khukhola shishiindu sheene nisho shitweela ni mu Roma namwo.”

Luwomelo lwe khukhwiira Paulo

12Ni bwasha kumutikhinyi, basaani Bayudaaya baakhola luwomelo, bekuta nga betsuba bari, sibakane balyekho namwe banywekho khakhaandu khoosi ta, khukhwoolesa nga bamalile khukhwiira Paulo. 13Abo babaaba mukhwikuta khuno baaba babirisa mu baandu kamakhumi kane. 14Shikila batsya isi basaayi bakhulu ni basakhulu babaloma bari, “Khukhwitsuba khwetsubiile ilala khuri singene khukhoombe khu shilyo shoosi ta, khukhwoolisa nga khwaamalile khukhwiira Paulo. 15Nashiryo, ana ari, inywe ni be mu lukhobo, ni mulaalikhe umusilikhale umukhulu khumureera isi muli, mufwane nga mumutsya khukhalawo kumusaango kweewe luundi. Ifwe khwerekekhile khumwiira nga ashiili khwoola ni nahano ta.”

16Ne umwiwaana wa Paulo wawulila khukhwibuula khuno. Kila aryo watsya wenjila mu lumako lwe basilikhale wareewula Paulo. 17Kila Paulo alaanga mutweela khu basilikhale, babaraangilila kamatuuli ke basilikhale shitoondo shitweela, wamuloma ari, “Nuyile umusoleeli yuno isi umukhulu we basilikhale, lwekhuuba ali ni sheesi akana khumuboolela.” 18Aryo wamuyila wamwolisa isi umukhulu we basilikhale, wamuloma ari, “Umubowe Paulo, anaangile wanoomba ari, indeere umusoleeli yuno is'uli, lwekhuuba ali ni sheesi akana khukhuboolela.”

19Umukhulu we basilikhale kila awaamba umusoleeli yuno kumukhono, wamwiisa andulo, waamureeba ari, “Shiina sheesi ukana khukhumboolela?”

20Umusooleli waaloma ari, “Bayudaaya bafukiilisaane khukhuloomba iwe khukhwikhisa Paulo mu lukhobo kumukaamba, bafwane nga babaatsya khumureebelesakho mu bwitsufu bibimuwaambakho. 21Ne ukhabafukiilisa ta, lwekhuuba babaandu baabwe babaminyisa kamakhumi kane bamwibuulile, nga bamalile ni khukhwitsuba bari, singene balye, namwe banywe ta, khukhwoolisa nga bamwiirire. Ne ana ari bali berengerengefu, nga baliindilila iwe sheesi kane ubalomele.”

22Lwanyuma umusilikhale umukhulu yuno wasibula umusoleeli khuutsya, nga amukhonyakilila ari, “Ukhaboolelakho umuundu yeesi, uri wamboolelekho ise bilomo bino ta.”

Paulo akaanisibwa wa Gafana Felikisi

23Lwanyuma umukhulu we basilikhale walaanga babili khu basilikhale babaraangilila kamatuuli ke basilikhale, waabaloma ari, “Ni muŋoonaŋoone basilikhale bitoondo bibili, atweela ni babakyeendela khu ŋwaŋwa kamakhumi musaafu, ni be kamafumo bitoondo bibili; bano kane batsye i Kayisaliya shiilo saawa tsitaru. 24Akhaba ni Paulo ni mumulolele tsiŋwaaŋwa araambise, bamuyile khukhwoolela ilala isi gafana Felikisi.”

25Kila umukhulu we basilikhale arona burone bubuuloma buri: 26“Khukhwaama isi Kilawudiyo Lusiya, khuutsya isi uwe shiriifwa gafana Felikisi, inoma ndi naakhukheesile. 27Umuundu yuno aawaambibwa ni Bayudaaya, naluundi baaba bali aambi khuumwiira, ne ise ni nabakwakho nga ndi ni basilikhale, namumusawo ni nashimanya nga ali umu Roma. 28Ne lwekhuuba nakana khumanya ilomo inyene isi bamufunaana, namureera mu lukhobo lwaabwe. 29Nashifumbula ndi bamufunaana khulondekhana ni bibiindu bibiwaambakana ni kamakaambila kaawe, ne nga mbaawo sheesi bamufunaana shishimwolisa khu khufwa, namwe khu bubowe ta. 30Ne ise ni bamboolela bari kane ibewo luwomelo khu musaani yuno, khaangu akho imwakaanisa is'uli, naluundi nalakiile ndi babamuwabila beene beetse is'uli, bakhuboolele iwe shiina shisheene sheesi bamufunaana.”

31Baryo basilikhale batsiila khu makaambila keesi baweebwa, baatsya ni Paulo mu shilo, bamwoolisa i Antipatiri. 32Ni bwasha khu shifukhu shishelakho, belayo mu lumako lwe basilikhale, balekha babakyeendela khu ŋwaŋwa, khuutsya ni Paulo. 33Nga boolile mu Kayisaliya, bakaanisa gafana ibaluwa, naluundi bamwokesa Paulo. 34Naye n'amala khusoma ibaluwa, wareeba Paulo buwuli bweesi amilamo. Ne n'ashifumbula ari, amila mu Kilikiya, 35wamuloma ari, “Indikhurekeeresa nga babaakhufunaana kumusaango boolile ano.” Kila alakila ari baliindile Paulo mu lwaanyi lwa Herode.

Currently Selected:

Buraambi 23: LPE

Highlight

Copy