Buraambi 22

1“Bebuulebe Bayudaaya bashaase ni ba paapa, ni muwulile tsilomo tsase, nga samweene ntsya khukhwiwotsakho isi muli.” 2Ne ni bawulila nga akanikha isi bali mu lulimi Luheburaniya, beloosela khusila.

Paulo weloosela nga aloma ari, 3#Bur 5.34-39“Ise ndi Umuyudaaya uwasaalikha i Taruso, shisiintsa she Kilikiya. Ne natsowesebwela mu shiriimba shino nga umuleekeli Gamalieli niye umuleekeli wase, khukhwiyika kamakaambila ke bakuuka beefwe, nga intsiinikhanila naabi bya Wele, nga nanywe ni muli ana ari. 4#Bur 8.3; 26.9-11Nakubyeengatsaka naabi babaandu be Intsila yino, naboolesa ni khubeera, nga imaamba basaani ni bakhasi boosi khubayila mu mapuusu. 5Umusaayi ufuura bukhulu ni basakhulu boosi banyala baawa bujulisi lwe shilomo isho. Nafuna tsibaluwa khukhwaama isi bali, tsitsinganikhakho khus'ise isi be buulebe be Damasiko, khuutsya khuwaamba babaandu b'eyo, imbareere i Yerusalemu nga babowe khufuna shitaambiso.”

Paulo ekanikhakho khu khushuukha khweewe

(Buraambi 9.1-19; 26.12-18)

6“Ne ni naba nga ntsya, nga ndi aambi ni shiriimba Damasiko, saawa tsye mwihangilwe, khaangu akho khumulikha khukali khwaama mwikulu, khwaamulikhila tsimbeka tsoosi. 7Ise nakwa aasi, naawulila likono nga lindeeba liri, ‘Saulo, Saulo, lwashiina kila iwe ungubyeenga ise?’ 8Nase nilamo ndi, ‘Umukasya, Iwe naanu?’ Naye waanoma ari, ‘Ise Yesu we Nazareesi, isi iwe ukubyeenga.’ 9Abo babaaba ni nase baabona khuumulikha, ne sibawulila likono ly'oyo uwakanikha ni nase ta. 10Ise namureeba ndi, ‘Umukasya, kane ise ikhole ndyeena?’ Umukasya waantsilamo ari, ‘Yinyukha utsye i Damasiko. Ibweeneyo, kane bakhuboolele she khuukhola.’ 11Ne ise ni khanyala khuubona lwe khuumulikha khuukali khwe buwaanga ta, abo babaaba ni nase bamaamba kumukhono, bananjilila khukhwoola i Damasiko.

12“Aabawo umusaani lisiina lyeewe bari Ananiya mu shiriimba isho, uwaba esaaya naabi Wele, nga kamakaambila ni kaloma, naluundi nga Bayudaaya b'eyo boosi bamwisamo naabi lukoosi. 13Umweeneyo weetsa wimikha ise isiindi wanoma ari, ‘Uwe buulebe Saulo, n'ubone luundi.’ Ni nase mu mbuka nyeneyo nabimbula tsimoni, namubona. 14Lwanyuma waaloma ari, ‘Wele we bakuuka beefwe, waakhuroboole iwe umanye ibyo byeesi akana, ubone Umukhosefu weewe, luundi uwulile likono lilyaama mukhanwa mweewe. 15Lwekhuuba uliiba umujulisi weewe isi babaandu boosi mwibyo byeesi uboone naluundi byeesi uwuliile. 16Aso, ari waliindile shiina? Yinyukha ubatisibwe, usingibwekho bibyoonako byoowo, nga uloomba mu lisiina lya Wele.’

Paulo arumanibwa khuuboolela Banaambo

17“Lulwoola ni naba nga nakobooleyo i Yerusalemu, nga ndi mu Lisaayilo Likhulu inoomba, nafwaana nga uroora. 18Nabona Umukasya nga anoma ari, ‘Yuubakho khaangu urure mu Yerusalemu, lwekhuuba singene bafukiilise bujulisi bweesi ubawa khusiise ta.’ 19Nase nilamo ndi, ‘Umukasya, babaandu bano bamanya nga ni natsyatsaka mu ntsu tsye khukhwisaayilamo, nembowa luundi ne khupa ibo babafukiilila mwiiwe. 20#Bur 7.58Naluundi ni kamafuki k'omujulisi woowo Sitefano ni katsukhiwa, nase samweene nabawo, nga iŋaŋasa khukhwiribwa khweewe, luundi nga iniinda bikwaaro byaabo babamwiira.’

21“Luundi Umukasya wanoma ari, ‘N'utsye, lwekhuuba ndikhurumana aleeyi mu Banaambo.’ ”

22Lituuli lye babaandu lyarekeeresa Paulo khukhwoolesa khu shilomo shino, lwanyuma benyusa kamakono kaawe angaaki nga baloma bari, “Murusewo, lwekhuuba umuundu ufwaana aryo sishimwakhila khuuba mulamu khu shiibala ta.” 23Ne ni baaba nga bashiyokesela angaaki, nga bawuutsa tsingubo tsaabwe, luundi nga bahanyaka lifukhuulu mu ngaaki, 24umukhulu we liye umu Roma walakila ari Paulo bamuyile mu lumako, bamukhupe nga bamureebelesa, nio bamanye lwashiina babaandu baaba bayokesa naabi baryo. 25Ne ni baamala khumubowa tsikhoba nio bamukhupe, Paulo waloma umukhulu we liye uwaba wamwimilewo ambi ari, “Shifukiilisibwa mu makaambila khukhupa umuundu umu Roma nga bashiili khumukhalila kumusaango ta?”

26Ne umukhulu uyo n'awulila aryo, watsya isi umukhulu umweene uwe liye, wamuloma ari, “Ari, unakhola uryeena? Lwekhuuba umusaani yuno ali umu Roma.”

27Umukhulu we liye wesyeenda aambi isi Paulo waamureeba ari, “Imboolele khubone, iwe uli umu Roma?”

Paulo naye welamo ari, “E e!”

28Kila umukhulu we liye aloma ari, “Ise nasasula tsinusu tsingali busa khukhwikyela umu Roma.”

Paulo waamwiilamo ari, “Ne ise ndi umusaalikhana umu Roma umweene.”

29Baryo ibo babaabawo nga bakana khumureebelesa, barurawo khaangu akho. N'umukhulu we liye umweene, naye warya naabi, nga n'amanya ari Paulo umu Roma, ate nga wamubowele.

30Ne ni bwasha khu shifukhu shishelakho, nga umukhulu we liye akana ekure buulayi ilomo yeesi Bayudaaya bawabila Paulo, wamukangulula, ne walakila basaayi bakhulu ni lukhobo lwoosi khubuusana, wareera Paulo wamwiimisa mu moni tsaabwe.

Currently Selected:

Buraambi 22: LPE

Highlight

Copy