Mk 3

Yeso nyaʼa vɨ̀ mbaŋə̀ nɨ əbɔ əməd ə nyaʼa nə̀ŋɨ

(Mt 12.9-14; Lk 6.6-11)

1Yeso nyaʼa yì wò nyɨ ɨŋga nəb ə̀kàtɨ̀. Mbaŋə̀ mɔʼɔ nyaʼa əŋgu nɨ əbɔ əməd ə nyaʼa nə̀ŋɨ. 2Bə̂d mɔʼɔ mbɨ nyaʼə bə̀ əŋgu nɨ nyaʼə nèŋ ə Yeso ɨ zə ni wɨ̀ wa bɨrɨ vɨ mbaŋə̀ ze əni əkwɨ ə. Mbɨ nyaʼə nèŋ əne ɨmbə̀ʼ ɨ zɨ ɨsaʼi ɨgwɨ məd. 3Yeso nyaʼa ghà əmbɨ ə mbaŋə̀ ze nɨ əbɔ əməd ə nyaʼa nə̀ŋɨ ni, “Yeʼe ɨfě əgha.” 4Ənɨ wɨ̀ nyaʼa ghà əne, wɨ̀ nyaʼa biirɨ əmbɨ ə bə̂d mbe ni, “Tɨkə ə wa chwiə ni tɨ̀ ghɨ ɨ̀chɔ̀m əni əkwɨ kɨ̀ ni tɨ̀ ghɨ ɨbə ə? Tɨ wa chwiə ni tɨ̀ zwemnɨ wə̀d kɨ̀ ni tɨ̀ zwiirɨ wə̀d ə?” Bə̂d mbe nyaʼa kəm rəziə. 5Wɨ̀ nyaʼa nèŋ mɨ̀mə̌d kad nàànɨ̀, sə ɨtəm bə̀ wɨrɨ kə̀n ɨmbə̀ʼ ɨghəm nɨ fîŋ tɨ mɨ̀mə̌d nyaʼa tu. Wɨ̀ nyaʼa ghɨ̀ əne ghà əmbɨ ə mbaŋə̀ ze ni, “Sem e əbɔ.” Wɨ̀ nyaʼa sèm, əne əbɔ əməd ə nyaʼa wɨrɨ kà i. 6Mɨ̀Farisiî mbe nɨ nyaʼa əŋgu nyaʼa jwɨ̀ əwu əwən wò yim ɨfetɨ mbɨ ə bə̂d mbe nɨ nyaʼə tìmbɨ̀ ə Herɔ̀d, əne taŋ ɨchî nɨ mbɨ bɨrɨ zwiirɨ ə Yeso.

Ɨnɔ̂n bə̂d nyaʼa beenɨ əbɔʼ ə Yeso

7Yeso mbɨ mbi mə̀mə̀ə̀nɨ̀-ɨnû nyaʼa jwɨ̀ wò ɨban ə sà ze rɨ ə Galiliî. Ɨnɔ̂n bə̂d nɨ nyaʼa kwàʼ wɨ kyeŋ nyaʼə beenɨ əbɔʼ məd. Bə̂d nyaʼa bə̀ nɔ̀ʼ rɨ ə Jùdeyà, 8rɨ ə Jèrusalèm, rɨ ə Idùmeyà, rɨ ɨsɨ mbe nɨ nyaʼa ɨnjin ɨgyɨ̂ Jodàn bə̀ fɔrɨ rɨŋga ɨsɨ mbe nɨ nyaʼa kad ə Taì fɔrɨ ə Sidòn. Ɨnɔ̂n bə̂d we nɨ nyaʼa kwàʼ wɨ kyeŋ nyaʼa zu ɨnû mbe nɨ wɨ̀ nyaʼə ghɨ̀ə̀, əne mbɨ nyaʼa wò əsɨ məd. 9Ɨchî nɨ ɨnɔ̂n bə̂d we nyaʼa kaŋ nɔʼ əku, Yeso nyaʼa ghà əmbɨ mbi mə̀mə̀ə̀nɨ̀-ɨnû ni mbɨ tekɨ əbaŋ ɨgyɨ̀ nùŋ ɨ ni, njɨ bə̂d mbe bɨrɨ nyem əwi. 10Wɨ̀ nyaʼa fə vɨ̀ bə̂d mɨ̀nɔnɔʼ, əne əze ə nyaʼa ghɨ̀ ni bə̂d mɨ̀jìm mbe nɨ nyaʼa berɨ ɨwɔn zɔŋ nɨ betɨ əməd. 11Ənɨ bə̂d mbe nɨ ɨzwî rɨbɔ̀ŋ nyaʼa ɨŋga mɨ̀mə̌d nyaʼa zə əməd, mbɨ nyaʼa gù ə si ɨfě ɨ bɔ, kyeŋ rɨkǎ ghà ni, “Àwɔ̀ yɨə Wan Ŋwìə̀!”

12Yeso nyaʼa jeŋgɨ patɨ ɨzwî rɨbɔ̀ŋ mbe ni tɨ mbɨ tɔ ghɨ̀ ə ni bə̂d kyerɨ wə̀d we nɨ tə yeʼ wɨwən.

Yeso nyaʼa chɔʼ bə̂d tom wum chɔ̀b rɨ̀be

(Mt 10.1-4; Lk 6.12-16)

13Yeso nyaʼa kɔʼ ɨkaŋ ɨwum pè tɔŋ mbaŋə̀ te nɨ wɨ̀ nyaʼa kəbɨ. Wɨ̀ nyaʼa tɔŋ əne, mbɨ wò əsɨ məd. 14Wɨ̀ nyaʼa chɔʼ mbaŋə̀ wum chɔ̀b rɨ̀be, nɨ wɨ̀ nyaʼa tɔŋ ənɨ ə bə̂d tom. Wɨ̀ nyaʼa chɔʼ mɨ̀mə̌d ni mbɨ chubɨ mbɨ ni bə̀ fɔrɨ ni wɨ̀ bɨrɨ tom mɨ̀mə̌d ni mbɨ yenə ghà ɨŋgam Ŋwiə̀. 15Wɨ̀ nyaʼa bə̀ nàʼ ɨka əmbɨ mɨ̀mə̌d ni mbɨ chɨ ɨzwî rɨbɔ̀ŋ rɨŋga bə̂d.

16Mbaŋə̀ te nɨ wɨ̀ nyaʼa chɔʼɔ yɨə: Saimòn, nɨ wɨ̀ nyaʼa chu əməd ni Pità; 17Jems mbɨ Jɔ̌n nɨ nyaʼa aŋgɔb məd. Mbɨ yɨə nyaʼə bɔn Zebèdiî, nɨ wɨ̀ nyaʼa chu mɨ̀mə̌d ni Boanejès, əne yɨə ni, Bɔn nɨə ghàm ɨghabɨ ə mbə̀ŋ nɨə kùmə̀. 18Mbɨ cherə yɨə Andrù, Filip, Bàtòlòmiù, Matiù, Tomas, Jems nɨ nyaʼə wan Alfaùs, Tadiòs, Saimòn nɨ mbɨ nyaʼə tɔŋ ənɨ ə mɨ̀taku 19mbɨ Judàs Iskàriɔ̀t nɨ nyaʼa fen əməd.

Məchwiə̀ rɨ̀kə̌ nyaʼa ghà ni à yɨə Belzebùl naʼ ɨka əmbɨ Yeso

(Mt 12.22-32; Lk 11.14-23; 12.10)

20Yeso nyaʼa bə̀ndɨ̀ wò əwi ɨnuʼ. Ənɨ wɨ̀ nyaʼa pè əŋgu, bə̂d mɨ̀nɔnɔʼ nyaʼa yi wò nàànɨ̀, əne ghɨ̀ ni chəi ənɨ tɨ̀ məd mbɨ mbi mə̀mə̀ə̀nɨ̀-ɨnû berɨ nyùmə̀ nɨ jɨg. 21Ənɨ ɨnəbɨ məd nyaʼa zu əne, mbɨ nyaʼa jwɨ̀ wò nɨŋ əməd ɨmbə̀ʼ ɨghəm nɨ bə̂d mbɨə nyaʼə ghàə̀ ni, “Ətu əməd rɨka kuʼ i.”

22Məchwiə̀ rɨ̀kə̌ mɔʼɔ nɨ nyaʼa nɔʼ rɨ ə Jèrusalèm swiʼi nyaʼa ghà ni, “Belzebùl wɨ ɨŋga məd. À yɨ Belzebùl, nɨ yeʼ ɨfɔ̂n ɨzwî rɨbɔ̀ŋ, naʼ ɨka ɨ bɔ ni wɨ̀ chɨ ɨzwî rɨbɔ̀ŋ.”

23Ənɨ mbɨ nyaʼa ghà əne, wɨ̀ nyaʼa tɔŋ mɨ̀mə̌d əsɨ ni, ghà əmbɨ mɨ̀mə̌d ənɨ ɨnû mɨgɨ ni, “Satàn kɨə wɨrɨə chɨ̀ i ɨnyod rɨŋga bə̂d rɨ ye ə? 24Əbeŋ nɨ ɨfɔ̂n ə tùmbɨ̀ə̀ mɨ saanɨ əkəmɨ kəmɨ, ka əbeŋ ɨfɔ̀n ze ə bɨrɨ təm i. 25Nəb mɨ saanɨ əkəmɨ kəmɨ, ka nəb ze bɨrɨ bɨ təm i. 26Satàn mɨ nɔʼ kɔ zɔ̀ŋ i ziə ziə, ghàbrɨ̀ i ɨnyod ɨba ɨba, ka wɨ̀ bɨrɨ təm i. Əne ɨnwǐ məd fə yeʼe.

27“Əndəŋ əndəŋ, chəi wə̀d mɔʼɔ əŋgu nɨ tɨ̀ wɨ̀ nyɨ ɨŋga nəb əka wə̀d, beʼrɨ ɨghɨ məd, nɨ chəi wɨ̀ be kod əka wə̀d ze. Wɨ̀ berɨ be kod əməd, bɔŋ beʼrɨ ɨghɨ məd.

28“Mə ghà rəsìʼ ɨ nən ni, Ŋwìə̀ bɨrɨ waʼ ɨnû rɨbɔ̀ŋ jìm bə̀ waʼ mɨzɔ̂m jìm mbe nɨ bə̂d ə zɔ̀m əməd, 29àyɨə ka wɨ̀ bɨrɨ nɔ waʼ i ɨnû rɨbɔ̀ŋ wə̀d mɔʼɔ we nɨ zɔm Əzwî ə Zeŋɨ. Ka wɨ̀ bɨrɨ nɔ waʼ i ɨmbə̀ʼ ɨghəm nɨ wɨ̀ fə ghɨ ənû rɨbɔ̀ŋ ze nɨ ten i koŋ.” 30Wɨ̀ nyaʼa ghà əne ɨmbə̀ʼ ɨghəm nɨ mbɨ nyaʼə ghàə̀ ni, “Əzwî rɨbɔ̀ŋ ə zɨ ɨŋga məd.”

Ɨŋgɔb Yeso mbɨ ə bɔŋgɔb məd

(Mt 12.46-50; Lk 8.19-21)

31Ɨŋgɔb Yeso mbɨ ə bɔŋgɔb məd nyaʼa wò pè təm ɨsɨg, əne tom bə̂d ni mbɨ tɔŋ əməd. 32Bə̂d mɨ̀nɔnɔʼ nyaʼa chub kad əməd. Əne bə̂d mɔʼɔ nyaʼa ghà ɨ bɔ ni, “E nɨŋ mbɨ mbe bɔŋgɔb mbɨ ɨsɨg kə̀b əwe.”

33Yeso nyaʼa wììrɨ̀ ni, “Mɨ nɨŋ mbɨ mbɨ bɔŋgɔb kɨ mɨ̀we ə?” 34Ənɨ wɨ̀ nyaʼa ghà əne, wɨ̀ nyaʼa neŋ bə̂d mbe nɨ nyaʼa chub kad əməd, əne ghà ni, “Mbə̀ zə, mbɔ̂ yɨə mɨ nɨŋ mbɨ mbɨ bɔŋgɔb! 35Wə̀d mɔʼɔ we nɨə ghɨ̀ ənû ze nɨ Ŋwìə̀ kəbɨ yɨ wum aŋgɔb, yɨ mɨ njàbɨ bə̀ fɔrɨ mɨ nɨ̌ŋ.”

Currently Selected:

Mk 3: mgo

Highlight

Copy