Mt 21

Yeso nyaʼa nyɨ ə Jèrusalèm ɨghabɨ ɨfɔ̀n

(Mk 11.1-11; Lk 19.28-40; Jn 12.12-19)

1Ənɨ Yeso mbɨ mbi mə̀mə̀ə̀nɨ̀-ɨnû nyaʼə sɨə tiinɨ ɨban ə Jèrusalèm, mbɨ nyaʼa pè ə Bètfagè nɨ nyaʼa ɨbom Ɨwum mɨ̀Olìf. Mbɨ nyaʼa pè əŋgu əne, Yeso tom mbi mə̀mə̀ə̀nɨ̀-ɨnû mɨ̀be ni mbɨ beə wò ɨmbì. 2Wɨ̀ nyaʼa ghà əmbɨ mɨ̀mə̌d ni, “Mbə̀ wo nyɨ ɨŋga əsɨ ze nɨ yeʼ ɨmbì ɨ nən. Mbə mɨ nyɨ ə nyɨ, mbə bɨrɨ zə ə jàkas nɨ mbɨ tiŋɨ, bə̀ zə wan məd ɨban. Mbə̀ za mɨ̀jàkas mbe yeʼe nàʼ ɨ num. 3Wə̀d mɔʼɔ mɨ ghà ənû ə mɔʼɔ ɨ nən, mbə̀ gha ɨ bɔ ni, 'À yɨ Ə̀nùŋɨ̀sɨg kə̀b mɨ̀jàkas mbɔ̂.' Àmei əwu əwən, wɨ̀ bɨrɨ saŋ ni mbə̀ nɨŋ.” 4Ənû zɔ̂ ə nyaʼa ghɨ̀, ɨmbə̀ʼ ɨŋgam we nɨ wə̀d ɨ̀kə̀n Ŋwìə̀ nyaʼa be ghà jwɨ̀ ənɨ rəsìʼ ni,

5“Mbə̀ gha əmbɨ bə̂d mbe nɨə chub ə Zayɔ̀n ni,

mbə̀ zə, ə ɨfɔ̀n wɨə yeʼe ɨ nən!

Wɨ̀ fə swi i ɨnyod, əne kɔʼ ə jàkas

bə̀ kɔʼ wan jàkas.”

6Mə̀mə̀ə̀nɨ̀-ɨnû mbe nyaʼa bə̀ wò ghɨ̀ àmei ɨchî nɨ Yeso nyaʼa ghǎ əmbɨ mɨ̀mə̌d. 7Mbɨ nyaʼa wò mbɨ jàkas we fɔrɨ wan, pè zì tə ngywɨ ɨgun mɨ̀jàkas mbe, əne Yeso nyaʼa kɔʼ ɨgun. 8Bə̂d mɨ̀nɔnɔʼ nyaʼa zì tə ngywɨ̌ ɨgun ɨnə̂njɨ̀. Mbɨ cherə nyaʼa sè ɨza ɨzed zì ɨgun ɨnə̂njɨ̀. 9Mɨnɔ̂n bə̂d mbe nɨ nyaʼə wò ɨmbì mbɨ mbe nɨ nyaʼə beenɨ rɨ ənjìm, nyaʼə yènə̀ kyeŋə ghàə̀ ni,

“Tɨ̀ yiirɨ ə Wan Dèvîd!

Ŋwìə̀ zɨ əbɔrəbɔd ɨgun ə wə̀d we nɨə yeʼe ənɨ ɨkum Ə̀nùŋɨ̀sɨg.

Tɨ̀ yiirɨ ə Ŋwìə̀ we nɨ yeʼ ɨkaŋ!”

10Ənɨ Yeso nyaʼa nyɨ ə Jèrusalèm, əsɨ ze əjìm ə nyaʼa chìʼ, əne bə̂d nyaʼa biirɨ ni, “Wɔ̂ kɨə we ə?”

11Mɨnɔ̂n bə̂d mbe nyaʼa ghà ni, “Wɔ̂ yɨə Yeso we nɨ yeʼ wə̀d ɨ̀kə̀n Ŋwìə̀. Wɨ̀ yɨ rɨ ə Nazàret ə Galiliî.”

Yeso nyaʼa wò nyɨ ɨŋga mbàn Ŋwìə̀

(Mk 11.15-19; Lk 19.45-48; Jn 2.13-22)

12Yeso nyaʼa wò nyɨ ɨŋga mbàn Ŋwìə̀, pè kə̀ndɨ bə̂d mbe nɨ nyaʼə fèndɨ̀ ɨghɨ bə̀ kə̀ndɨ mbe nɨ nyaʼə zòndɨə. Wɨ̀ nyaʼa bèʼ mɨ̀tebrə̀ bə̂d mbe nɨ nyaʼə kobrɨ ɨkab, bə̀ bèʼ ɨtən bə̂d mbe nɨ nyaʼə fèndɨ̀ mbɨ̀rə̀bəŋə kub ə si. 13Wɨ̀ nyaʼa ghà əmbɨ mɨ̀mə̌d ni, “Ə zɨ ɨŋga Ə̀ŋwàʼnɨ̀ ə Ŋwiə̀ ni, 'Mbɨ bɨrɨ sɨə tɔŋə mɨ nəb ənɨ nəb ə̀kɔ̀ŋgɨ̀', àyɨə mbə fə bèŋ ənɨ əsɨ nɨ mɨjɨ ə nə̀mbɨ̀ ɨŋga.”

14Mɨfɨgɨ̀ mbɨ ə bə̂d nɨ nyaʼə tèʼ ɨwu nyaʼa wò əsɨ məd ɨŋga mbàn Ŋwìə̀, wɨ̀ vɨ̀ mɨ̀mə̌d. 15Àyɨə ənɨ bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ nyaʼa zə ɨnû yiirɨ mbe nɨ wɨ̀ nyaʼə ghɨ̀ə̀, bə̀ zu ɨchî nɨ bɔn kwa nyaʼə kyeŋ ɨŋga mbàn Ŋwìə̀ ghàə̀ ni, “Tɨ̀ yiirɨ Wan Dèvîd,” mbɨ nyaʼa sə ɨtəm. 16Əne mbɨ nyaʼa biirɨ ɨ bɔ ni, “Ɨmbə̀ʼ à wɨə zu ɨnû zɔ̂ nɨ bɔn kwa mbɔ̂ ə ghà ə?”

Yeso nyaʼa wììrɨ̀ ni, “Ee mə wɨə zuə. Chəi mbə̀ kɨrɨ foŋ ɨŋga Ə̀ŋwàʼnɨ̀ ə Ŋwiə̀ ni,

'À fə dàndɨ̀ bɔn kwa bə̀ dàndɨ̀ bɔn bɔd

ni mbɨ yiirɨ əwe ə'?”

17Ənɨ wɨ̀ nyaʼa ghà əne, wɨ̀ nyaʼa sàŋ mɨ̀mə̌d, jwɨ̀ rɨŋga əsɨ ze wò ə Betanì, pè ni əŋgu.

Yeso nyaʼa fə əzed ə fîg

(Mk 11.12-14, 20-24)

18À nyaʼa ɨsɔsɔ, ənɨ Yeso nyaʼə wɨ̀rə̀ bə̀ndɨ̀ə̀ wò ə Jèrusalèm, njì rɨ nyaʼa zaŋ əməd. 19Wɨ̀ nyaʼa zə əzed ə fîg ɨban ɨnə̂njɨ̀, əne wɨ̀ nyaʼa wo nèŋ àyɨə chəi wɨ̀ nyaʼa zə fɨtam ɨkaŋ. Wɨ̀ nyaʼa zə àmei rɨfuʼ wən. Əne wɨ̀ nyaʼa ghà əmbɨ əzed ze ni, “Chəi à bɨrɨ wɨrɨ nɔ kɔ fɨtam.” Àmei əwu əwən, əzed ze ə nyaʼa zom i.

20Ənɨ mə̀mə̀ə̀nɨ̀-ɨnû mbe nyaʼa zə əne, mbɨ nyaʼa yiirɨ, əne biirɨ ni, “Əzed ə fîg zɔ̂ ə zom əwu əwən rɨ ye ə?”

21Yeso nyaʼa wììrɨ̀ əmbɨ mɨ̀mə̌d ni, “Mə ghà rəsìʼ ɨ nən ni, mbə mɨ berɨ ɨbenɨ nɨ chəi mbə̀ə bìrə̀, njɨ chəi mbə bɨrɨ ghɨ àmei ənû zɔ̂ nɨ mə̀ ghɨ ənɨ əzed ə fîg. Mbə mbe tɨ̀ mbə bə̀ ghà əmbɨ ɨwum wɔ̂ ni, 'Mən e wò feŋ ɨŋga rɨ̀bàà', wɨ bə̀ ghɨ̀ əne. 22Mbə mɨ berɨ ɨbenɨ, njɨ Ŋwìə̀ bɨrɨ naʼ ɨghɨjìm mbe nɨ mbə̀ kɔŋgɨ əməd nɔn ɨ bɔ.”

Ɨbiirɨ ɨmbə̀ʼ wə̀d we nɨ nyaʼa naʼ ɨka əmbɨ Yeso

(Mk 11.27-33; Lk 20.1-8)

23Ənɨ Yeso nyaʼa nyɨ ɨŋga mbàn Ŋwìə̀, bə̂d kyeŋ mbe rɨ ə mbàn Ŋwìə̀ mbɨ ə bə̂d kyeŋ mbe rɨŋga əbeŋ nyaʼa wò əsɨ məd ənɨ wɨ̀ nyaʼə chwiə ɨnû, pè biirɨ ɨ bɔ ni, “À kɨə we naʼ ɨka ɨ ni à ghɨ ɨnû mbɔ̂ ə? À kɨə we naʼ ɨka wɔ̂ ɨ ne ə?”

24Yeso nyaʼa wììrɨ̀ əmbɨ mɨ̀mə̌d ni, “Mə bɨrɨ bɨ biirɨ ənû ə mɔʼɔ ɨ nən. Mbə mɨ wììrɨ̀ ɨ num, mə bɨrɨ bə̀ sɨ ghà əsɨ ze nɨ mə̀ nɨŋ ɨka rəŋgu bɔŋ sɨə ghɨ̀ ɨnû mbɔ̂. 25À kɨə Ŋwìə̀ nyaʼa naʼ ɨka əmbɨ Jɔ̌n ni wɨ̀ nàʼ mɨnib kɨ̀ à kɨ̀ ə bə̂d ə?”

Mbɨ nyaʼa zu əne kɔ tàŋɨ mbənə mbənə ghàə̀ ni, “Tɨ̀ mɨ ghà ni, 'À yɨə Ŋwiə̀,' wɨ̀ bɨrɨ biirɨ ɨ na ni, 'À nɨə yeʼ əne, njɨ chəi mbə̀ nyaʼa ben əməd ɨmbə̀ʼ ə yè ə?' 26Tɨ̀ mɨ ghà ni, 'À yɨə bə̂d,' tɨ̀ wɨə bɔ ɨnɔ̂n bə̂d wɔ̂, ɨmbə̀ʼ ɨghəm nɨ mɨ̀mə̌d mɨ̀jìm ben ni Jɔ̌n yɨə nyaʼə wə̀d ɨ̀kə̀n Ŋwìə̀.”

27Əne mbɨ nyaʼa wììrɨ̀ əmbɨ Yeso ni, “Chəi tɨ̀ kyerɨ.”

Wɨ̀ nyaʼa bə̀ sɨ ghà əmbɨ mɨ̀mə̌d ni, “Chəi mə bɨrɨ bɨ gha wə̀d we nɨ naʼ ɨka ɨ num ni mə̀ ghɨ ɨnû mbɔ̂.

Ənû ə mɨgɨ ɨmbə̀ʼ bɔn mbaŋə̀ mɨ̀be

28“Mbə kɔn əzən ni ye ə? Mbaŋə̀ mɔʼɔ nyaʼa berɨ mbi bɔn mbaŋə̀ mɨ̀be. Wɨ̀ nyaʼa wò əsɨ wɨ rɨtu pè ghà ɨ bɔ ni, 'Wân, ndə̀ wo fàʼ ɨŋga mbeŋ vaìn rə̀chɔ̀ŋ.' 29Wɨ̀ nyaʼa wììrɨ̀ ni, 'Chəi mə bɨrɨ wò', àyɨə əmad ə nyaʼa zombɨ, wɨ̀ bèŋ i fîŋ wɨrɨ wò. 30Mbaŋə̀ ze nyaʼa wò əsɨ wan mbaŋə̀ we nɨ beenɨ, pè ghà ɨ bɔ àmei əndəŋ əndəŋ. Wɨ̀ nyaʼa bendɨ ni, 'Ee, mə bɨrɨ wò kyɨə bàba', àyɨə chəi wɨ̀ nyaʼa wǒ. 31À kɨ wi rəbɔʼ bɔn mbaŋə̀ mbɔ̂ mɨ̀be nɨ nyaʼa ghɨ ənû ze nɨ mbǎʼ məd nyaʼa kə̀b ə?”

Mbɨ nyaʼa wììrɨ̀ ni, “À yɨ wɨ rɨtu.”

Əne Yeso nyaʼa ghà əmbɨ mɨ̀mə̌d ni, “Mə ghà rəsìʼ ɨ nən ni, məfetɨ mɨ̀tagsɨ̀ mbɨ ɨ̀kùnɨ̀ bɨrɨ be nyɨ ɨŋga ənû ɨfɔ̀n ə Ŋwiə̀ bɔŋ ə mbə̀nə. 32Mə ghà əne ɨmbə̀ʼ ɨghəm nɨ Jɔ̌n nyaʼa yeʼe əsɨ nən ɨ chwi ɨnə̂njɨ̀ nɨ kuʼnɨ, àyɨə chəi mbə̀ nyaʼa ben əməd. À yɨ məfetɨ mɨ̀tagsɨ̀ mbɨ ɨ̀kùnɨ̀ nyaʼa ben əməd. Ka àbei ənɨ mbə̀ nyaʼa zə ənû zɔ̂, chəi mbə̀ nyaʼa wɨrɨ bèŋ tə fîŋ ben əməd.

Ənû ə mɨgɨ ɨmbə̀ʼ bə̂d nɨ nyaʼa yim mbeŋ vaìn

(Mk 12.1-12; Lk 20.9-19)

33“Mbə̀ zu ənû ə mɨgɨ ə cherə. Wə̀d mbeŋ mɔʼɔ nyaʼa kon i mbeŋ vaìn. Wɨ̀ nyaʼa kod ɨkam ghab, toŋ ɨbɨgɨ nɨ mbɨ bɨrɨ sɨə mìn mɨnoʼ ɨŋga, bə̀ bɔm nəb ɨkaŋ nɨ mbɨ bɨrɨ sɨə chub ɨŋga ɨmbə̀ʼ nəŋgɨ mbeŋ ze. Wɨ̀ nyaʼa ghɨ̀ əne, nàʼ mbeŋ ze əmbɨ ə bə̂d mɔʼɔ ni mbɨ yim fàʼ ɨŋga. Wɨ̀ nyaʼa nàʼ əne, nɔ̀ʼ wò ɨŋga əbeŋ ə cherə. 34Nyùmə̀ nɨ mbɨ nyaʼə kab rɨtam vaìn nyaʼa kùʼ, əne wɨ̀ nyaʼa tom mbi bə̂d ə̀fàʼì ni mbɨ wo nɨŋ əzi rɨ əbà ənɨ rɨtam vaìn te. 35Bə̂d mbe nɨ nyaʼa yim mbeŋ ze nyaʼa gywɨ̀ bə̂d ə̀fàʼì mbe, som wɨ fìbɨ̀, zwiirɨ wɨ fìbɨ̀, bə̀ tumbɨ wɨ fìbɨ̀ ənɨ əti. 36Wə̀d mbeŋ we nyaʼa yì tom bə̂d ə̀fàʼì cherə nɨ nyaʼa nɔʼ chè mbɨ rɨtu. Bə̂d mbe nɨ nyaʼa yim mbeŋ ze nyaʼa ghɨ̀ àmei əndəŋ əndəŋ ənɨ mɨ̀mə̌d. 37Wɨ̀ nyaʼa sɨ nwìə̀ tom i wan mbaŋə̀ əsɨ mɨ̀mə̌d, ghà ni, 'Mbɨ bɨrɨ wumnɨ mɨ wan.'

38“Àyɨə ənɨ bə̂d mbe nɨ nyaʼa yim mbeŋ ze nyaʼa zə wan məd, mbɨ nyaʼa ghà mbənə mbənə ni, 'À yɨ əjɨnəb məd wɔ̂. Mbə̀ yeʼe tɨ̀ zwiirɨ əməd ɨmbə̀ʼ jɨg ɨghɨ məd.' 39Mbɨ nyaʼa ghà əne gywɨ̀ əməd màʼ ənjìm ɨkam mbeŋ vaìn ze, zwiirɨ.”

40Yeso nyaʼa sɨ nwìə̀ biirɨ ni, “Ənɨ wə̀d mbeŋ we yeʼe, wɨ̀ kɨə wo ghɨ ye ənɨ bə̂d mbe nɨ nyaʼa yim mbeŋ ze ə?”

41Mbɨ nyaʼa wììrɨ̀ ɨ bɔ ni, “Wɨ̀ bɨrɨ zwiirɨ mɨzɨg mbe ənɨ ɨnə̂njɨ̀ nɨ bə əku, sɨ nàʼ mbeŋ ze əmbɨ bə̂d cherə mbe nɨ bɨrɨ sɨə nàʼ əbà əməd tɨ ənɨ rɨtam te ənɨ nyùmə̀ we nɨ mbɨə kwə̀ŋ ɨghɨ kuʼu.”

42Yeso nyaʼa ghà əmbɨ mɨ̀mə̌d ni, “Chəi mbə̀ kweʼ foŋ ənû ze nɨ yeʼ ɨŋga Ə̀ŋwàʼnɨ̀ ə Ŋwiə̀ ə? Zɨə ghà ni,

'Ɨti we nɨ məbɔmɨ nəb nyaʼa tonɨ,

fə bèŋ ənɨ ɨti rɨ ɨbu nəb.

Ənû zɔ̂ yɨ Ə̀nùŋɨ̀sɨg ghɨ̌,

əne à yɨ ənû ə yiirɨ ɨ na nɨ zə.'?

43Əne mə ghà ɨ nən ni Ŋwìə̀ bɨrɨ nɨŋ ənû ɨfɔ̀n əməd rɨ nən, sɨ nàʼ əmbɨ ə bə̂d mbe nɨ bɨrɨ sɨə ghɨ̀ ɨnû mbe nɨ wɨ̀ kə̀bɨ.” 44[Wə̀d we nɨ gu ɨgun ɨti wɔ̂ bɨrɨ sopə tɨkə rɨkə. Ɨti we mɨ bə̀ feŋ ɨgun ə wə̀d mɔʼɔ, wɨ bɨrɨ wɔʼ əməd.] #21.44Chəi əsɨ ə̀ŋwàʼnɨ̀ zɔ̂ ɨŋga ɨ̀ŋwàʼnɨ̀ nun mɔʼɔ.

45Ənɨ bə̂d kyeŋ mbe rɨ ə mbàn Ŋwìə̀ mbɨ mɨ̀Farisiî nyaʼa zu ɨnû mɨgɨ məd mbe, mbɨ nyaʼa kyerɨ ni ɨ wɨə nyaʼə ghà ɨnû mbe ɨmbə̀ʼ əwən. 46Əne ɨ mbɨ nyaʼa kəb gywɨ əməd, àyɨə ɨ mbɨ nyaʼa bɔ ɨnɔ̂n bə̂d we, ɨmbə̀ʼ ɨghəm nɨ mbɨ nyaʼa ben ni məd yɨə wə̀d ɨ̀kə̀n Ŋwìə̀.

Currently Selected:

Mt 21: mgo

Highlight

Copy