Mt 13

Ənû ə mɨgɨ ɨmbə̀ʼ wə̀d nɨə fàʼə̀ mbeŋ

(Mk 4.1-9; Lk 8.4-8)

1Àmei əni ze, Yeso nyaʼa jwɨ̀ rɨ ə nəb, wò chub ɨban ə sà. 2Mɨnɔ̂n bə̂d nyaʼa wò fetɨ kad əməd. Əze ə nyaʼa ghɨ ni wɨ̀ wo nyɨ chub ɨŋga əbaŋ ɨgyɨ̀. Mɨnɔ̂n bə̂d mbe nyaʼa sɨ təmbɨ əŋgo ə sà ze. 3Wɨ̀ nyaʼa ghà ɨnû nɔnɔʼ əmbɨ mɨ̀mə̌d ənɨ ɨnû mɨgɨ ni, “Mbə̀ zwetɨ! Mbaŋə̀ mɔʼɔ nɨə fàʼə̀ mbeŋ nyaʼa jwɨ̀ wo kon mbi ɨghɨ. 4Ənɨ wɨ̀ nyaʼə ŋwì ɨghɨ mbe, tɨtam mɔʼɔ nyaʼa feŋ ɨgun ɨnə̂njɨ̀, əne tɨnən nyaʼa wò kud. 5Tɨ mɔʼɔ nyaʼa feŋ ɨgun ɨwɔ̌ nɨ si nyaʼa àmei rɨpiî. Ɨghɨ mbe nyaʼa zàmbɨ̀ gwed ɨmbə̀ʼ ɨghəm nɨ si nyaʼa mei ənambɨ ənambɨ. 6Àyɨə ənɨ əchwî ə nyaʼa te kàànɨ̀, zɨə nyaʼa zuʼ ɨghɨ mbe mbɨ nə̀ŋə̀ kwɨ, ɨmbə̀ʼ ɨghəm nɨ chəi ɨghaŋ ɨghɨ mbe nyaʼa nyɨ ə si. 7Tɨ mɔʼɔ nyaʼa feŋ ɨŋga ɨ̀jə̀ŋɨ̀. Ɨ̀jə̀ŋɨ̀ we nyaʼa kwi nib ɨghɨ mbe. 8Tɨ mɔʼɔ nyaʼa feŋ ɨŋga si chɔ̀m. Tɨ̀ nyaʼa kwi bə̀ kɔ̌. Tɨ mɔʼɔ nyaʼa kɔ rɨtam ɨkɨ fibɨ̀, tɨ mɔʼɔ kɔ rɨtam ɨwum rɨ̀fuə, tɨ mɔʼɔ kɔ rɨtam ɨwum tad. 9Wə̀d we nɨ tɨ̀ wɨ̀ zu ənû ə, wɨ̀ zu!”

Əton nɨ Yeso nyaʼa nɨŋ ɨnû mɨgɨ ghà ɨnû

(Mk 4.10-12; Lk 8.9-10)

10Mə̀mə̀ə̀nɨ̀-ɨnû Yeso nyaʼa wò əsɨ məd pè biirɨ ɨ bɔ ni, “Əton nɨ àwɔ̀ ə ghàm əmbɨ ə bə̂d ənɨ ɨnû mɨgɨ kɨ ni yè ə?”

11Wɨ̀ nyaʼa wììrɨ̀ əmbɨ mɨ̀mə̌d ni, “Ŋwìə̀ fə nàʼ ɨwe ɨ nən ni mbə̀ kyerɨ ɨnû mbe nɨ yeʼ ənə̀mə ɨmbə̀ʼ ənû ɨfɔ̀n rɨkaŋ, àyɨə chəi wɨ̀ naʼ ɨwe we əmbɨ mɨ̀mə̌d. 12Əton nɨ mɨə ghàm əmbɨ mɨ̀mə̌d ənɨ ɨnû mɨgɨ yɨ ɨmbə̀ʼ ɨghəm nɨ wə̀d we nɨ berɨ ɨghɨ, mbɨ bɨrɨ naʼ mbɨ cherə ɨ bɔ, wɨ̀ sɨ berɨ mbɨ nɔʼ. Àyɨə we nɨ chəi wɨ̀ berɨ əghɨ, ka àbei ɨkə we nɨ wɨ̀ berɨ mbɨ bɨrɨ nɨŋ rɨ bɔ. 13Əton ənɨ mɨə ghà ɨnû mɨgɨ əmbɨ mɨ̀mə̌d yɨ ni, ɨ mbɨə nèŋə̀, àyɨə chəi mbɨə zəə. Ɨ mbɨə zwetɨə, àyɨə chəi mbɨə zuə, chəi ɨtu mɨ̀mə̌d bə zeŋ. 14Əne ənû ze nɨ wə̀d ɨ̀kə̀n Ŋwìə̀ Aizayà nyaʼa gha ɨmbə̀ʼ mɨ̀mə̌d ə nyaʼa jwɨ̀ ənɨ rəsìʼ ni,

'Mbə bɨrɨ kaŋ zu, àyɨə chəi mbə ɨtu bɨrɨ nɔ zeŋ;

mbə bɨrɨ kaŋ nèŋ, àyɨə chəi mbə̀ bɨrɨ nɔ zə,

15ɨmbə̀ʼ ɨghəm nɨ fîŋ tɨ bə̂d mbɔ̂ fə tu,

mbɨ fə zìndɨ̀ mbə ɨ̀tǒŋ

bə̀ kubrɨ ə əghə.

Njɨ mbɨ bɨrɨ zə ənɨ ə əghə,

kɨ̀ ɨ̀tǒŋ mɨ̀mə̌d zu ənû,

kɨ̀ fîŋ tɨ mɨ̀mə̌d kyerɨ ənû,

mbɨ wɨrɨ bə̀ndɨ̀ yeʼe əsɨ num, mə vɨ̀ mɨ̀mə̌d.'

16Ŋwìə̀ zɨ əbɔrəbɔd ɨgwɨ nən, ɨmbə̀ʼ ɨghəm nɨ ə əghə mbɨə zə ɨsɨ, mbə ɨ̀tǒŋ bə̀ zu ɨnû. 17Mə ghà rəsìʼ ɨ nən ni, bə̂d ɨ̀kə̀n Ŋwiə̀ nɔnɔʼ mbɨə bə̂d nɨə ghɨ̀ ɨnû nɨ kuʼnɨ nyaʼa kàŋ kə̀b zə ɨnû mbe nɨ mbən ə zəə, àyɨə chəi mbɨ nyaʼa zə. Mbɨ nyaʼa bə̀ kə̀b nɨ zu ɨnû mbe nɨ mbən ə zuə, àyɨə chəi mbɨ nyaʼa zu.

Əton ənɨ ənû ə mɨgɨ ze ɨmbə̀ʼ wə̀d nɨə fàʼə̀ mbeŋ

(Mk 4.13-20; Lk 8.11-15)

18“Mbə zu əton ənɨ ənû ə mɨgɨ ze ɨmbə̀ʼ wə̀d nɨə fàʼə̀ mbeŋ: 19Bə̂d mbe nɨ zu ɨnû ɨmbə̀ʼ ənû ɨfɔ̀n rɨkaŋ, àyɨə chəi ɨtu mɨ̀mə̌d zeŋɨ yɨ ɨghabɨ ɨghɨ mbe nɨ nyaʼa feŋ ɨgwɨ ɨnə̂njɨ̀. Wə̀d rɨbɔ̀ŋ nyaʼa wò fè ɨnû mbe nɨ mbɨ nyaʼa kon ɨŋga fîŋ tɨ mɨ̀mə̌d. 20Ɨghɨ mbe nɨ nyaʼa feŋ ɨgun ɨwɔ̌ yɨ ɨghabɨ ə bə̂d mbe nɨ zu ɨŋgam Ŋwiə̀, əne nɨŋ ənɨ ɨghaʼi àmei əwu əwən. 21Chəi ɨŋgam we jeŋgɨ nyɨ ɨŋga fîŋ tɨ mɨ̀mə̌d. Wɨ chub àmei ənɨ ɨkə nyumə̀. Ənɨ ŋgəʼ yeʼe kɨ̀ ənɨ mbɨə nwèndɨ̀ tɨkyerɨ-ɨwu mɨ̀mə̌d ɨmbə̀ʼ ɨŋgam we, mbɨ ton ɨŋgam we əwu əwən. 22Ɨghɨ mbe nɨ nyaʼa feŋ ɨŋga ɨ̀jə̀ŋɨ̀ yɨ ɨghabɨ bə̂d mbe nɨ zu ɨŋgam Ŋwiə̀, əne ənû nɨ nwiʼ ɨnyod ɨmbə̀ʼ ɨghɨ rɨŋga ɨsɨg mbɨ ənû nɨ berɨ mbɔ̂n, mbɨ fumnɨ ɨŋgam we, chəi wɨ kɔ rɨtam. 23Ɨghɨ mbe nɨ nyaʼa feŋ ɨgwɨ ə si chɔ̀m yɨ ɨghabɨ ə bə̂d mbe nɨ zu ɨŋgam we, ɨtu mɨ̀mə̌d zeŋ, əne mbɨ kɔ rɨtamɨ, mbɨ mɔʼɔ kɔ rɨtam ɨkɨ fibɨ̀, mbɨ mɔʼɔ ɨwum rɨ̀fuə, mbɨ mɔʼɔ ɨwum tad.”

Ənû ə mɨgɨ ɨmbə̀ʼ ɨfu rəkaʼ əbən

24Yeso nyaʼa yì ghà ənû ə mɨgɨ ə cherə əmbɨ mɨ̀mə̌d ni, “Ənû ɨfɔ̀n rɨkaŋ yɨ ɨghabɨ ə wə̀d nɨ nyaʼa kon kywɨ̀ chɔ̀m ɨŋga i mbeŋ. 25Ənɨ bə̂d nyaʼə gwenə, wə̀d pə̀n məd nyaʼa wò kon ɨfu əkaʼ kywɨ̀ te, nɔ̀ʼ wò i. 26À nyaʼa ənɨ kywɨ̀ te fə kwi kɔ rɨtam, ɨfu we nyaʼa jwɨ̀ rɨ ə si.

27“Əne bə̂d ə̀fàʼì wə̀d mbeŋ we nyaʼa wò əsɨ məd, pè ghà ɨ bɔ ni, 'Masà, ɨmbə̀ʼ à nyaʼa kon kywɨ̀ chɔ̀m ɨŋga e mbeŋ ə? Ɨfu sɨ nɔ̀ʼ rɨ ə yi ə?'

28“Wɨ̀ nyaʼa wììrɨ̀ əmbɨ mɨ̀mə̌d ni, 'À yɨə wə̀d pə̀n ghɨ ənû zɔ̂.'

“Bə̂d ə̀fàʼì mbe nyaʼa biirɨ ɨ bɔ ni, 'À wa kə̀b ni tɨ̀ wo chɔʼrɨ ɨfu we ə?' 29Wɨ̀ nyaʼa wììrɨ̀ ni, 'Chə̂! Njɨ mbə mɨ nɨrə chɔʼrɨə, mbə bə̀ chè chɔʼrɨ kywɨ̀ əbɔʼ. 30Mbə̀ saŋ ɨghɨ mbe be kwi ɨnɔ̂n pè ənɨ mbɨ bɨrɨ kwəŋ ɨghɨ. À sɨ ənɨ mbɨə kwə̀ŋə̀, mə bɨrɨ ghà əmbɨ bə̂d mbe nɨə kwə̀ŋə̀ ni: Mbə̀ be chɔʼrɨ ɨfu we, kod ənɨ rɨbiŋ nɨ mbɨ bɨrɨ tɔ̀n, bɔŋ sɨ mòʼ kywɨ̀ te chà ɨŋga mɨ ŋgən.'”

Ənû ə mɨgɨ ɨmbə̀ʼ sǎm ə̀wɔ̀mɨ

(Mk 4.30-32; Lk 13.18-19)

31Yeso nyaʼa yì ghà ənû ə mɨgɨ ə cherə əmbɨ mɨ̀mə̌d ni, “Ənû ɨfɔ̀n rɨkaŋ yɨ ɨghabɨ ə sǎm ə̀wɔ̀mɨ nɨ wə̀d nyaʼa nɨŋ wò ŋwì ɨŋga i mbeŋ. 32Sǎm ə̀wɔ̀mɨ yɨə sǎm nɨ kə chè sǎm rɨjìm, àyɨə fɨ mɨ fə kwi, əzed əməd ə faŋ chè ɨzed jìm. Tɨnən tɨə wò korə tə kàn ənɨ tɨtəb rɨ məd.”

Ənû ə mɨgɨ ɨmbə̀ʼ ɨfuʼ we nɨə ghɨ̀ ni ŋgə̀ŋ kɔʼ

(Lk 13.20-21)

33Yeso nyaʼa ghà ənû ə mɨgɨ ə cherə əmbɨ mɨ̀mə̌d ni, “Ənû ɨfɔ̀n rɨkaŋ yɨ ɨghabɨ ɨfuʼ we nɨə ghɨ̀ ni ŋgə̀ŋ kɔʼ, nɨ əyi nyaʼa nɨŋ tɔpɨ mbɨ əburɨ ə ŋgə̀ŋ ɨŋga ɨkaŋ kyeŋ tad pè ənɨ ŋgə̀ŋ ze nyaʼa kɔʼɔ.”

Əton nɨ Yeso nyaʼa kɨə ghà ɨnû mɨgɨ

(Mk 4.33-34)

34Yeso nyaʼa ghà ɨnû mbɔ̂ jìm əmbɨ mɨnɔ̂n bə̂d mbe ənɨ ɨnû mɨgɨ. Chəi ənû ə mɔʼɔ nɨ wɨ̀ nyaʼa ghǎ nɨ chəi wɨ̀ nyaʼa zɨ ənû ə mɨgɨ əbɔʼ. 35Ɨ wɨə nyaʼə ghà əne ɨmbə̀ʼ ənû ze nɨ wə̀d ɨ̀kə̀n Ŋwiə̀ nyaʼa ghǎ ə jwɨ̀ ənɨ rəsìʼ ni,

“Mə bɨrɨ ghàm əmbɨ mɨ̀mə̌d ənɨ ɨnû mɨgɨ,

mə bɨrɨ gha ɨnû mbe nɨ yeʼ ənə̀mə tɨ ənɨ Ŋwìə̀ nyaʼa tekɨ ɨsɨg.”

Əton ənɨ ənû ə mɨgɨ ɨmbə̀ʼ ɨfu rəkaʼ əbən

36Yeso nyaʼa nɔ̀ʼ saŋ mɨnɔ̂n bə̂d mbe, wò ɨŋga nəb. Mə̀mə̀ə̀nɨ̀-ɨnû ɨməd nyaʼa wò əsɨ məd pè ghà ɨ bɔ ni, “Toʼrɨ əton ənɨ ənû mɨgɨ ɨmbə̀ʼ ɨfu we rəkaʼ əbən ɨ na.”

37Yeso nyaʼa wììrɨ̀ ni, “Wə̀d we nɨ nyaʼa kon kywɨ̀ chɔ̀m yɨə Wan Wə̀d. 38Əbən ze yɨ ɨsɨg. Kywɨ̀ chɔ̀m ze yɨə bə̂d mbe nɨ yeʼ ɨŋga ənû ɨfɔ̀n rɨkaŋ. Ɨfu we yɨə bə̂d wə̀d rɨ̀bɔ̀ŋ. 39Wə̀d pə̀n we nɨ nyaʼa kon ɨfu we yɨə Debɨ̀rə̀. Mbɨ bɨrɨ kwəŋ ɨghɨ mbe ənɨ ɨsɨg bɨrɨ nwìə̀. Bə̂d mbe nɨ bɨrɨ kwəŋ ɨghɨ mbe yɨ mbɨ̀aŋgɨrə̀. 40Ɨchî nɨ mbɨ nyaʼa fetɨ ɨfu we tɔ̀n ənɨ ɨwid, yɨə bə̀ ɨchî nɨ zɨə bɨrɨ yeʼ we ənɨ ɨsɨg ə wo nwìə̀. 41Wan Wə̀d bɨrɨ cha mbi mbɨ̀aŋgɨrə̀, mbɨ wò fetɨ ɨghɨjìm mbe nɨə ghɨ̀ə̀ ni bə̂d ghɨ ɨnû rɨbɔ̀ŋ, bə̀ fetɨ bə̂d mɨ̀jìm mbe nɨə ghɨ̀ ɨnû rɨbɔ̀ŋ chɨ̀ rɨŋga ənû ɨfɔ̀n əməd, 42əne màʼ mɨ̀mə̌d ɨŋga ɨsweŋ ɨwid ənam, nɨ yeʼ əsɨ nɨ bə̂d bɨrɨ sɨə zə̀ʼə̀, kud əsɔŋ. 43Bə̂d mbe nɨə ghɨ̀ ɨnû nɨ kuʼnɨ bɨrɨ sɨə te ɨghabɨ ə nyumə̀ ɨŋga ənû ɨfɔ̀n ə Mbǎʼ mɨ̀mə̌d. Wə̀d we nɨ tɨ̀ wɨ̀ zu ənû, wɨ̀ zu.

Ənû ə mɨgɨ ɨmbə̀ʼ əghɨ əka ɨnùn nɨ wə̀d mɔʼɔ nyaʼa nəmɨ

44“Ənû ɨfɔ̀n rɨkaŋ yɨ ɨghabɨ əghɨ əka ɨnùn nɨ wə̀d mɔʼɔ nyaʼa nəm ɨŋga mbeŋ. Wə̀d mɔʼɔ nyaʼa wò zə əghɨ ze wɨrɨ kubrɨ. Ɨghaʼi nyaʼa swi ɨŋga fîŋ məd, əne wɨ̀ fèndɨ̀ mbi ɨghɨjìm wò zon mbeŋ ze.

Ənû ə mɨgɨ ɨmbə̀ʼ ə pə̂l

45“Ənû ɨfɔ̀n rɨkaŋ yɨ ɨghabɨ ə wə̀d-ɨ̀wǐn nɨ nyaʼə ghanə kə̀bə̀ mɨ̀pə̂l nɨ bɔŋɨ. 46Ənɨ wɨ̀ nyaʼa zə pə̂l mɔʼ nɨ bɔŋɨ chè, wɨ̀ nyaʼa fèndɨ̀ mbi ɨghɨjìm, wò zon ə pə̂l we.

Ənû ə mɨgɨ ɨmbə̀ʼ ə kɨ̀

47“Ənû ɨfɔ̀n rɨkaŋ yɨ ɨghabɨ ə kɨ̀ nɨ mbɨ nyaʼa maʼ ɨŋga ə sà, əne gywɨ̀ tɨkwɨ əgwi jìm. 48Ənɨ kɨ̀ ze nyaʼa swii, mə̀gywɨ̀-əgwi nyaʼa sùŋ chà əŋgo ɨgyɨ̀, chub ə si, tiirɨ əzɨ ə chɔ̀m zɨ̀ ɨŋga mbə ɨghɨ, əne waʼ əzɨ nɨ chəi ənɨ tɨ̀ bə̂d kud. 49À yɨ ɨchî nɨ zɨə bɨrɨ nɨ yeʼ we ənɨ ɨsɨg bɨrɨ nwìə̀. Mbɨ̀aŋgɨrə̀ bɨrɨ yeʼe pè chɨ̀ bə̂d mbe nɨə ghɨ̀ ɨnû rɨbɔ̀ŋ rəbɔʼ mbe nɨə ghɨ̀ ɨnû nɨ kuʼnɨ, 50əne, màʼ mɨ̀mə̌d ɨŋga ɨsweŋ ɨwid ənam, nɨ yeʼ əsɨ nɨ bə̂d bɨrɨ sɨə zə̀ʼə̀ kud əsɔŋ.”

Ɨghɨ fi mbɨ mbɨ ənun

51Yeso nyaʼa biirɨ ni, “Mbə fə zu ɨnû mbɔ̂ jìm mbə ɨtu zeŋ ə?”

Mbɨ nyaʼa wììrɨ̀ ni, “Ee.”

52Əne wɨ̀ nyaʼa ghà əmbɨ mɨ̀mə̌d ni, “Əne yɨ ni, əchwiə̀ rɨ̀kə̌ jìm we nɨ fə kwembɨ ənû ɨmbə̀ʼ ənû ɨfɔ̀n rɨkaŋ, yɨ ɨghabɨ ə wə̀d nəb we nɨə chɨ̀ ɨghɨ fi bə̀ chɨ̀ mbɨ ənun rɨŋga i ŋgə̌n.”

Bə̂d mbe rɨ ə Nazàret nyaʼa ton ə Yeso

(Mk 6.1-6; Lk 4.16-30 )

53Ənɨ Yeso nyaʼa maanɨ nɨ gha ɨnû mɨgɨ mbe, wɨ̀ nyaʼa nɔ̀ʼ rɨ əsɨ ze. 54Ənɨ wɨ̀ nyaʼa pe ɨŋga e əbeŋ, wɨ̀ nyaʼa chwi ɨnû əmbɨ ə bə̂d ɨŋga nəb ə̀kàtɨ̀ ze nɨ nyaʼa əŋgu. Bə̂d mbe nɨ nyaʼa zu ɨnû mbe nyaʼa yiirɨ, əne biirɨ ni, “Mbaŋə̀ zɔ̂ ə nɨŋ ɨkwɨ ɨwe wɔ̂ mbɨ ɨka nɨ ghɨ ɨnû yiirɨ mbɔ̂ rɨ ə yi ə? 55Ɨmbə̀ʼ wɔ̂ yɨə wan kabɨndà ə? Ɨmbə̀ʼ ɨkum ɨŋgɔb məd yɨə Mèri ə? Ɨmbə̀ʼ bɔŋgɔb məd yɨə Jems mbɨ Jòsêf mbɨ Saimòn fɔrɨ ə Judàs ə? 56Ɨmbə̀ʼ njàbɨ rɨ məd rɨjìm tɨ əgha mbɨ na ə? Mbaŋə̀ zɔ̂ sɨ nɨŋ ɨnû mbɔ̂ jìm rɨ ə yi ə?” 57Mbɨ nyaʼa biirɨ əne ton əməd.

Àyɨə Yeso nyaʼa ghà əmbɨ mɨ̀mə̌d ni, “Bə̂d mbɨə wumnɨ ə wə̀d ɨ̀kə̀n Ŋwìə̀ ɨsɨ jìm, àyɨə chəi mbɨə wumnɨ əməd ɨŋga əsɨ əməd bə̀ fɔrɨ ɨŋga ɨnəbɨ məd.” 58Chəi wɨ̀ nyaʼa ghɨ̌ ɨnû yiirɨ nɔnɔʼ əŋgu ɨmbə̀ʼ ɨghəm nɨ chəi mbɨ nyaʼa berɨ ɨbenɨ fîŋ.

Currently Selected:

Mt 13: mgo

Highlight

Copy