Lk 2

Ənû ɨmbə̀ʼ ɨchî nɨ mbɨ nyaʼa gywɨ ə Yeso

(Mt 1.18-25)

1À nyaʼa ənɨ ə nyùmə̀ we, Kaisà Ogɔstùs #2.1Kaisà yɨə nyaʼə ɨkum ɨfɔ̂n kyeŋ məRom. nyaʼa sob ni mbɨ taŋ bə̂d mɨjìm mbe nɨ nyaʼa ɨŋga ɨbeŋ mbe nɨ məRom nyaʼə tùmbɨ̀ə̀. 2Wɔ̂ yɨ ɨghəm rɨtu nɨ mbɨ nyaʼa taŋ bə̂d. À yɨə Kwìriniùs nyaʼə gɔmnà we nɨ nyaʼə tùmbɨ̀ ə Sirià ənɨ ə nyùmə̀ we. 3Bə̂d mɨ̀jìm nyaʼa wò ŋwaʼnɨ tə rɨkum ɨŋga ɨsɨ mbe nɨ mbɨ nyaʼa gywɨ mɨ̀mə̌d əŋgu. 4Jòsêf nyaʼa nɔ̀ʼ rɨ ə Nazàret nɨ nyaʼa ɨŋga əbà əbeŋ ze rɨ ə Galiliî, kɔʼ wò əbà əbeŋ ze rɨ ə Jùdeyà. Wɨ̀ nyaʼa wò ə Betlehem nɨ yeʼ əsɨ ze nɨ mbɨ nyaʼa gywɨ ɨfɔ̀n Dèvîd. Wɨ̀ nyaʼa wò əŋgu ɨmbə̀ʼ ɨghəm nɨ məd yɨə nyaʼə tɨ ənɨ əghaŋ ə Dèvîd. 5Wɨ̀ nyaʼa wò ni mbɨ ŋwaʼnɨ i ɨkum mbɨ wɨ Mèri nɨ nyaʼa əyi kwirɨ məd. Mèri wɨə nyaʼə rɨ̀bùmə̀. 6Ənɨ mbɨ nyaʼa əŋgu, nyùmə̀ nyaʼa kùʼ əmbɨ Mèri nɨ gywɨ i wan. 7Wɨ̀ nyaʼa gywɨ i wan mbaŋə̀ rɨtu, nib ɨŋga tɨbabɨ ngywɨ̌, əne nùŋ ɨŋga fɨ̀kùʼù nɨ mbɨə jə ə nyam, ɨmbə̀ʼ ɨghəm nɨ chə nyaʼa i rɨmbin əmbɨ mɨ̀mə̌d ɨŋga nəb ze nɨ bə̂d ɨghanɨ nyaʼə pè niə chwɨ ɨkab.

Mənə̂ŋgɨ̀-njɨ̀g nyaʼa wò zə wan

8À nyaʼa ɨzimɨ we, mənə̂ŋgɨ̀-njɨ̀g mɔʼɔ mbɨə nyaʼa ɨkaŋ ɨwum əbà əbeŋ ze nə̀ŋgɨə tə njɨ̀g. 9Aŋgɨrə̀ Ə̀nùŋɨ̀sɨg nyaʼa jwɨ̀ ɨfě mɨ̀mə̌d, ɨzeŋɨ zeŋɨ Ə̀nùŋɨ̀sɨg bə̀ te kad mɨ̀mə̌d, əne mbɨ nyaʼa bɔ kwàʼ rɨŋgəʼ. 10Àyɨə aŋgɨrə̀ we nyaʼa ghà əmbɨ mɨ̀mə̌d ni, “Tɨ mbə̀ bɔ ə. Mbə̀ zə, mə fə yeʼe mbɨ ɨkə̂n chɔ̀m ɨ nən. Ɨkə̂n we bɨrɨ ghɨ ni ɨghaʼi swi ɨŋga fîŋ bə̂d mɨjìm. 11Tə̀chɔ̀ŋ wɔ̂, mbɨ fə gywɨ Wə̀d nɨə chɨ̀ə̀ bə̂d rəŋgəʼ ɨŋga əsɨ ze nɨ mbɨ nyaʼa gywɨ ɨfɔ̀n Dèvîd. Məd yɨə Kristo #2.11“Kristo” yɨ ɨŋgam Grik. “Wə̀d we nɨ Ŋwiə̀ zɔʼɔ” yɨ ɨŋgam Hibrù. Tɨkum tɔ̂ rɨ̀be yɨ ənû ə mɔʼ. Ə̀nùŋɨ̀sɨg. 12Ənweenɨ ze nɨ mbə̀ bɨrɨ zə yɨ ni: Mbə bɨrɨ zə wan bɔd nɨ mbɨ nib ɨŋga tɨbabɨ ngywɨ̌ nùŋ ɨŋga fɨ̀kùʼù nɨ mbɨə jəə nyam.”

13Àmei əwu əwən, ɨnɔ̂n mbɨ̀aŋgɨrə̀ nɨ nyaʼa kwàʼ wɨ kyeŋ, nyaʼa swiʼi rɨkaŋ wò fɔtɨ mbɨ wɨ rɨtu we, mbɨ kɔ kwerɨ ɨkyî yiirɨ ə Ŋwiə̀ ghàə̀ ni,

14“Tɨ̀ wumnɨ ə Ŋwìə̀ we nɨ yeʼ ɨkaŋ,

əbɔrəbɔd ə nyɨ ɨgwɨ ə bə̂d mbe nɨ wɨ̀ ghaʼi ɨgwɨ ə si!”

15Ənɨ mbɨ̀aŋgɨrə̀ mbe nyaʼa saŋ mɨ̀mə̌d wɨrɨ wo ɨkaŋ, mənə̂ŋgɨ̀-njɨ̀g mbe nyaʼa ghà mbənə mbənə ni, “Tɨ̀ wo ə Betlehem, wo zə ənû zɔ̂ nɨ jwɨ, nɨ Ə̀nùŋɨ̀sɨg fə ghɨ ni tɨ̀ kyerɨ.” 16Mbɨ nyaʼa nɔ̀ʼ wò əmad əmad, pè zə ə Mèri mbɨ Jòsêf fɔrɨ wan bɔd we nɨ mbɨ nyaʼa nuŋ ɨŋga fɨ̀kùʼù fe nɨ mbɨə jəə nyam. 17Ənɨ mənə̂ŋgɨ̀-njɨ̀g mbe nyaʼa zə wan we, mbɨ nyaʼa ghà ɨnû mbe nɨ mbɨ̀aŋgɨrə̀ mbe kəʼ ghà əmbɨ mɨ̀mə̌d ɨmbə̀ʼ wan we. 18Bə̂d mɨ̀jìm mbe nɨ nyaʼa zu, nyaʼa yiirɨ ənû ze nɨ mənə̂ŋgɨ̀-njɨ̀g mbe nyaʼa gha əmbɨ mɨ̀mə̌d. 19Àyɨə Mèri nyaʼa yim ɨnû mbe jìm ɨŋga i fîŋ, sɨə kɔndɨə. 20Mənə̂ŋgɨ̀-njɨ̀g mbe nyaʼa bə̀ndɨ̀ wò yènə̀ kwerɨə mɨkyî yiirɨ ə Ŋwiə̀ ɨmbə̀ʼ ɨnû jìm mbe nɨ mbɨ nyaʼa zu bə̀ zə. Ɨnû mbe nyaʼa àmei ɨchî nɨ mbɨ̀aŋgɨrə̀ mbe nyaʼa ghà əmbɨ mɨ̀mə̌d.

Mbɨ nyaʼa chù wan

21Ənɨ ɨni nyaʼa pe famɨ, mbɨ nyaʼa ne wan we, əne chù əməd ni Yeso, nɨ nyaʼa ɨkum we nɨ aŋgɨrə̀ we nyaʼa chu əməd bɔŋ Mèri nyaʼa sɨə bɔ̀ŋ ɨbum məd.

Mbɨ nyaʼa nɨŋ ə Yeso wò ə mbàn Ŋwìə̀

22Ənɨ nyùmə̀ nyaʼa kuʼu nɨ Jòsêf mbɨ Mèri nyaʼa berɨ zeŋnɨ ə ɨnyod ɨchî nɨ tɨkə rɨ Mose nyaʼa chwiə, mbɨ nyaʼa nɨŋ ə Yeso kɔʼ wò ə Jèrusalèm ɨmbə̀ʼ sweŋ əməd əmbɨ Ə̀nùŋɨ̀sɨg. 23Mbɨ nyaʼa ghɨ̀ əne ɨchî nɨ mbɨ nyaʼa ŋwaʼnɨ ɨŋga rɨkə Ə̀nùŋɨ̀sɨg ni, “Mbɨ berɨ sweŋ wan fə̀d jìm we nɨ yeʼ wɨ mbaŋə̀ əmbɨ Ə̀nùŋɨ̀sɨg.” 24Mbɨ nyaʼa wò nàʼ əghɨ ə̀fà ɨchî nɨ mbɨ ŋwaʼnɨ ɨŋga rɨkə Ə̀nùŋɨ̀sɨg ni, “Mbɨ berɨ naʼ mbɨ̀rə̀bəŋə əgyeŋ ɨbe kɨ̀ bɔn mbɨ̀rə̀bəŋə mbɨ rɨ nuʼ ɨbe.”

25Mbaŋə̀ mɔʼɔ zɨə nyaʼa ə Jèrusalèm nɨ ɨkum məd nyaʼə Simiòn. Ɨ wɨə nyaʼə ghɨ̀ ɨnû nɨ kuʼnɨ. Ɨ wɨə nyaʼə nùŋ i fîŋ ɨgun ə Ŋwiə̀. Ɨ wɨə nyaʼə bə̀ wòmə̀ nyùmə̀ we nɨ Ŋwìə̀ bɨrɨ chɨ mɨ̀Izre rəŋgəʼ. Əzwî ə Zeŋɨ ə nyaʼa ɨgwɨ məd. 26Əzwî ə Zeŋɨ ə nyaʼa fə chwi ɨ bɔ ni ka wɨ̀ bɨrɨ kwɨ i nɨ chəi wɨ̀ zə Wə̀d we nɨ Ə̀nùŋɨ̀sɨg zɔʼɔ. 27Əzwî ə Zeŋɨ ə nyaʼa ŋwè əməd, wɨ̀ wò nyɨ ɨŋga mbàn Ŋwìə̀. Ənɨ mbǎʼ Yeso mbɨ ɨŋgɔb məd nyaʼa wo mbɨ Yeso ɨmbə̀ʼ mbɨ ghɨ mbɨ məd ɨchî nɨ mɨchî ɨmbə̀ʼ rɨkə nyaʼa chwiə, 28Simiòn nyaʼa nɨŋ əməd ɨŋga mbi ɨbɔ, yiirɨ ə Ŋwiə̀ ghà ni,

29“Ə̀nùŋɨ̀sɨg, tɨ̀nîn sɨ sàŋ ni e wə̀d ə̀fàʼì kwɨ ənɨ əbɔrəbɔd,

ɨchî nɨ à nyaʼa fə kaʼi;

30Mɨ əghə ə fə zə ɨchî nɨ à bɨrɨ chɨ mbe bə̂d rəŋgəʼ,

31ɨchî nɨ à nyaʼa fə tekɨ ɨfě bə̂d mɨ̀jìm.

32Məd yɨə ɨzeŋɨ zeŋɨ we nɨ bɨrɨ ghɨ ni bə̂d mbe nɨ kaʼi mɨ̀Jû kyerɨ ə Ŋwiə̀.

Wɨ̀ bɨrɨ ghɨ ni bə̂d wumnɨ mɨ̀Izre nɨ yeʼ mbe bə̂d.”

33Mbǎʼ wan we mbɨ ɨŋgɔb məd nyaʼa yiirɨ ənû ze nɨ Simiòn nyaʼə ghǎ ɨmbə̀ʼ əməd. 34Simiòn nyaʼa zɨ̀ əbɔrəbɔd ɨgwɨ mɨ̀mə̌d əne ghà əmbɨ Mèri, ɨŋgɔb wan we ni, “Wan wɔ̂ bɨrɨ ghɨ ni bə̂d mɨ̀nɔnɔʼ gu ə. Wɨ̀ bɨrɨ bɨ nɔɔrɨ bə̂d mɨ̀nɔnɔʼ ɨŋga Izre. Məd bɨrɨ yeʼ ənweenɨ nɨ Ŋwìə̀ naʼa nɨ chəi bə̂d bɨrɨ benɨ. 35Wɨ̀ bɨrɨ du ɨnû nɔnɔʼ mbe nɨ bə̂d ə kɔndɨ ɨŋga tə fîŋ. Ə̀kə̀nɨ̀ ə bɨrɨ zum e fîŋ ɨghabɨ ni à yɨ ɨbi bid.”

36Wə̀d ɨ̀kə̀n Ŋwìə̀ mɔʼɔ nɨ nyaʼa əyi nyaʼa bə̀ əŋgu. Ɨkum məd yɨə nyaʼə Ana. Wɨ̀ yɨə nyaʼə wan Fanuèl rɨŋga ɨnəbɨ Ashà. Wɨ̀ nyaʼa fə nùn i. Wɨ̀ nyaʼa nam chubɨ mbɨ i ɨnom ɨghəm ɨwu sambe, ɨnom məd kwɨ i. 37Wɨ̀ nyaʼa chub ənɨ ɨku əyi pè ənɨ wɨ̀ nyaʼə sɨ ɨghəm ɨwu ɨwum famɨ chɔ̀b rɨkwè. Chəi wɨ̀ nyaʼə jwɨ̀ rɨŋga mbàn Ŋwìə̀. Ɨ wɨə nyaʼə wumnɨ ə Ŋwiə̀, chubə zɨ rɨ jɨg bə̀ kɔŋgɨ ə Ŋwiə̀ əziə mbɨ ɨzimɨ. 38Wɨ̀ nyaʼa wò əwu əwən, pè nàʼ məben-əwe əmbɨ ə Ŋwiə̀, bə̀ ghà ɨnû ɨmbə̀ʼ wan we əmbɨ ə bə̂d mɨ̀jìm mbe nɨ nyaʼə wòmə̀ ni Ŋwìə̀ choʼ ɨtu bə̂d mbe rɨ ə Jèrusalèm.

Jòsêf mbɨ Mèri nyaʼa bə̀ndɨ̀ wò ə Nazàret

39Ənɨ Jòsêf mbɨ Mèri nyaʼa ghɨ ɨnû jìm mbe nɨ nyaʼa ɨŋga rɨkə Ə̀nùŋɨ̀sɨg, mbɨ nyaʼa bə̀ndɨ̀ wò ə Nazàret nɨ yeʼ əsɨ ze nɨ mbɨ nyaʼə chub əŋgu. Nazàret wɨə nyaʼa ɨŋga əba əbeŋ ze rɨ ə Galiliî. 40Wan we nyaʼa kwi, kàànɨ̀. Ɨwe nyaʼa swi ətu ɨ bɔ. Ŋwìə̀ nyaʼa bə̀ ghɨ̀ ɨ̀chɔ̀m ənɨ məd.

Yeso nyaʼa wo nyɨ ɨŋga mbàn Ŋwìə̀ ənɨ adə̀n

41Mbǎʼ Yeso mbɨ ɨŋgɔb məd nyaʼə wò ə Jèrusalèm ɨghəm ɨwu jìm ɨmbə̀ʼ wò jɨg Əchwɨ̂ ə Che-ɨgun. 42Ənɨ Yeso nyaʼa pe ɨghəm ɨwu wum chɔ̀b rɨ̀be, mbɨ nyaʼa kɔʼ wò ə Jèrusalèm ɨchî nɨ mbɨ nyaʼə mɨ̀ə̀ ghɨ̀ə̀. 43Ənɨ mbɨ nyaʼa fə jɨg əchwɨ̂ ze màànɨ̀, sɨ kɔ wɨrɨə bə̀ndɨ̀ə̀ wò əwən, Yeso nɨ nyaʼa kɨrɨ adə̀n, nyaʼa tèn əwi rəbɔʼ ə Jèrusalèm. Àyɨə chəi mbǎʼ məd mbɨ ɨŋgɔb məd nyaʼa kyerɨ. 44Mbɨ nyaʼa kɔndɨ əzən ni ɨ wɨə nyaʼa əbɔʼ ɨnɔ̂n bə̂d we nɨ nyaʼə yènə̀ wòə̀. Ənɨ mbɨ nyaʼa zi yèn əni ə fibɨ̀, chəi mbɨ nyaʼa zə əməd, mbɨ nyaʼa kɔ kəb əməd əkaʼ ɨfurɨ bə̀ fɔrɨ əkaʼ bə̂d mbe nɨ mbɨ nyaʼa kyerɨ. 45Ənɨ chəi mbɨ nyaʼa zə əməd, mbɨ nyaʼa bə̀ndɨ̀ wo ə Jèrusalèm yènə̀ kə̀b əməd. 46Ənɨ ɨni nyaʼa chè tad, mbɨ nyaʼa zə əməd ɨŋga mbàn Ŋwìə̀ nɨ wɨ̀ nyaʼa chub əkaʼ məchwiə̀-ɨnû. Ɨ wɨə nyaʼə zwetɨə ɨnû mbe nɨ mbɨ nyaʼə ghàə̀, bə̀ biirɨ ɨnû rɨ əmbɨ mɨ̀mə̌d. 47Bə̂d mɨ̀jìm mbe nɨ nyaʼa zu ɨnû mbe nɨ wɨ̀ nyaʼə ghàə̀, nyaʼa yiirɨ ɨchî nɨ wɨ̀ kyerɨ ɨnû bə̀ yiirɨ ɨchî nɨ wɨ̀ nyaʼə wììrɨ̀ ɨnû. 48Ənɨ Jòsêf mbɨ Mèri nyaʼa zə əməd, mbɨ nyaʼa yiirɨ, əne ɨŋgɔb məd nyaʼa ghà ɨ bɔ ni, “Wan, à ghɨ əni ənɨ ə nà ɨmbə̀ʼ ə ye ə? Zə ɨchî nɨ mɔ̌ mbɨ e mbǎʼ fə zə ŋgəʼ yènə̀ kə̀b əwe.”

49Wɨ̀ nyaʼa wììrɨ̀ əmbɨ mɨ̀mə̌d ni, “Mbə kɨə kə̀b əmɨ ni ye ə? Chəi mbə̀ kyerɨ ni mə berɨ chub ɨŋga nəb mɨ mbǎʼ ə?” 50Chəi mbɨ nyaʼa kyerɨ əton ənɨ ɨŋgam we nɨ wɨ̀ nyaʼa gha əmbɨ mɨ̀mə̌d.

51Wɨ̀ nyaʼa ghɨ əne, swiʼi mbɨ mɨ̀mə̌d mbɨ wò ə Nazàret. Wɨ̀ nyaʼa pè zuunɨ mɨ̀mə̌d. Ɨŋgɔb məd nyaʼa yim ɨnû mbɔ̂ jìm ɨŋga i fîŋ. 52Ɨwe Yeso mbɨ nyamnyod məd mbɨə nyaʼə kwiə wò ɨmbì. Ŋwìə̀ nyaʼa ghaʼ əməd, bə̂d bə̀ ghaʼ əməd.

Currently Selected:

Lk 2: mgo

Highlight

Copy