Ɨ̀fàʼì 10

Kɔneliùs nyaʼa tom bə̂d ni mbɨ wo tɔŋ ə Pità

1Mbaŋə̀ mɔʼɔ zɨə nyaʼə Kàisàriyà nɨ ɨkum məd nyaʼə Kɔneliùs. Wɨ̀ yɨə nyaʼə ətu ɨgwɨ mɨ̀sɔgyɨ̀ ɨkɨ fibɨ̀ rəbɔʼ mɨ̀sɔgyɨ̀ mbe nɨ nyaʼa rɨ ə Italì. 2Wɨ̀ nyaʼa nùŋ fîŋ ɨgun ə Ŋwiə̀. Ɨ wɨə nyaʼə bə̀ wumnɨ əməd mbɨ i ɨnəbɨ jìm. Ɨ wɨə nyaʼə nàʼ ɨghɨ əmbɨ ə bə̂d ɨkwaŋ əbu əbu. Ɨ wɨə nyaʼə bə̀ kɔŋgɨ ə Ŋwiə̀ ɨghəm jìm. 3À nyaʼa ɨghabɨ mɨ̀nyùmə̀ mɨ̀tad əziə əni ə mɔʼɔ, tɨ̀taanɨ njə̀m nyaʼa chè əməd, wɨ̀ zə aŋgɨrə̀ Ŋwìə̀ nɨ nyaʼa wò kààrɨ̀ əməd ni, “Kɔneliùs!”

4Kɔneliùs nyaʼa toŋ əghə ɨgwɨ aŋgɨrə̀ we, bɔ, əne biirɨ ni, “À kɨ ənû ə ye, masà ə?”

Aŋgɨrə̀ we nyaʼa wììrɨ̀ ɨ bɔ ni, “Fîŋ Ŋwìə̀ ə bɔ̀ŋ əku ɨmbə̀ʼ ə̀kɔ̀ŋgɨ̀ ze nɨ àwɔ̀ ə kɔ̀ŋgɨ̀ə̀ fɔrɨ ɨmbə̀ʼ ɨkab we nɨ àwɔ̀ ə wèèrɨ̀ə̀ bə̂d ɨkwaŋ əŋgu. Əne wɨ̀ bɨrɨ wiirɨ e ə̀kɔ̀ŋgɨ̀. 5Àmei rɨ̀nîn, tom bə̂d ə Jopà ni mbɨ wo nɨŋ mbaŋə̀ mɔʼɔ nɨ ɨkum məd yeʼə Saimòn nɨ mbɨə bə̀ tɔŋ ənɨ Pità. 6Ɨ wɨə chubə mbɨ Saimòn we nɨə tekɨə gôb. Nəb məd zɨ əŋgo rɨ̀bàà.” 7Ənɨ aŋgɨrə̀ we nɨ nyaʼa gham ɨ bɔ nyaʼa fə wò i, wɨ̀ nyaʼa tɔŋ mbi bə̂d ə̀fàʼì mɨbe bə̀ tɔŋ ə sɔgyɨ̀ mɔʼ rəbɔʼ mɨ̀sɔgyɨ̀ mbe nɨ nyaʼə fàʼ əton məd. Sɔgyɨ̀ we nyaʼa bə̀ nùŋ fîŋ ɨgun ə Ŋwiə̀. 8Wɨ̀ nyaʼa ghà ɨnû jìm mbe nɨ nyaʼa ghɨ̌ əmbɨ mɨ̀mə̌d, əne tom mɨ̀mə̌d ə Jopà ni mbɨ wo nɨŋ ə Pità yeʼe mbɨ məd.

9À nyaʼa əni ze nɨ beenɨ, ənɨ mbaŋə̀ te rɨtad nyaʼə sɨə wò pe ə Jopà, Pità nyaʼa kɔʼ wò ɨdom nəb #10.9Nəb tɨ mɨ̀Jû nyaʼa berɨ ɨdom nɨ nyaʼa əpaʼrɨ əpaʼrɨ. ɨ kɔŋgɨ ə Ŋwiə̀. À yɨə nyaʼa ɨghabɨ mɨ̀nyùmə̀ wum chɔ̀b rɨ̀be əziə. 10Njì rɨ nyaʼə zaŋ əməd, əne wɨ̀ nyaʼa kə̀b əghɨ ə mɔʼɔ nɨ jɨg. Àyɨə ənɨ mbɨ nyaʼə kɨrɨ tekɨ ɨghɨjɨg mbe, tɨ̀taanɨ njə̀m nyaʼa chè əməd. 11Wɨ̀ nyaʼa zə ɨkaŋ əfìʼə, bə̀ zə əghɨ ə mɔʼɔ nɨ nyaʼə swiʼə rɨkaŋ ɨghabɨ əbapɨ ə ngywɨ̌ ə kyeŋ. Mbɨ nyaʼə swi ə si ənɨ rɨbu rɨkwè. 12Tɨkwɨrɨ nyam jìm tɨə nyaʼa ɨŋga əbapɨ ə ngywɨ̌ ze. Əne yɨə nyam te nɨə yèn ɨgwɨ ɨwu kwè, te nɨə kɔ ɨbum ə si mbɨ rɨnən. 13Gɨ̂ mɔʼɔ nyaʼa ghà ɨ bɔ ni, “Pità, nɔʼɔ zwiirɨ kud.”

14Àyɨə Pità nyaʼa wììrɨ̀ ni, “Ɨndèʼ əmɨ, kyɨ Ə̀nùŋɨ̀sɨg. Chəi mə̀ kweʼ kud əghɨ ə mɔʼɔ ze nɨ rɨka zeŋ i, kɨ̀ əze nɨ chəi bə̂d ə kurə.” 15Gɨ̂ ze nyaʼa wɨrɨ ghà ɨ bɔ ənɨ ɨghəm nɨ pè be ni, “Tɨrə̀ tɔŋ e əghɨ ze nɨ Ŋwiə̀ fə zeŋnɨ ni à yɨ əghɨ ni rɨka zeŋ i.” 16Ənû zɔ̂ ə nyaʼa ghɨ̀ ɨghəm tad, əne mbɨ nyaʼa wɨrɨ saʼ sùŋ əbapɨ ə ngywɨ̌ ze ɨkaŋ.

17Ənɨ Pità nyaʼə kɨrɨ kɔndɨ e ətu ɨmbə̀ʼ əton ənɨ rɨ̀taanɨ njə̀m ze, mbaŋə̀ te nɨ Kɔneliùs nyaʼa tomɨ nyaʼa zə nəb Saimòn, əne təm ɨchû ɨkam. 18Mbɨ nyaʼa tɔŋ rɨkǎ biirɨ ni, “Saimòn we nɨ mbɨə tɔŋ ənɨ Pità wɨə wa chub ɨŋga nəb əwɔ ə?”

19Ənɨ Pità nyaʼə kɨrɨ kɔndɨ e ətu ɨmbə̀ʼ əton ənɨ tɨ̀taanɨ njə̀m ze, Əzwî ə Zeŋɨ ə nyaʼa ghà ɨ bɔ ni, “Zə, bə̂d mɨ̀tad mbɨə kə̀b əwe. 20Əne nɔʼ rətiə swiʼi wò ə si. Tɨrə̀ nyiʼnɨ e ɨnyod nɨ wo mbɨ mɨ̀mə̌d, ɨmbə̀ʼ ɨghəm nɨ à yɨə mɔ̌ tom mɨ̀mə̌d.”

21Pità nyaʼa zu əne, swiʼi wo əsɨ mbaŋə̀ te, pè ghà əmbɨ mɨ̀mə̌d ni, “Mə yɨə wə̀d we nɨ mbə̀ə kə̀bə̀. Mbə yeʼe əgha ɨmbə̀ʼ ə yè ə?”

22Mbaŋə̀ te nyaʼa wììrɨ̀ ni, “Kɔneliùs, nɨ yeʼ ətu ɨgwɨ mɨ̀sɔgyɨ̀ ɨkɨ fibɨ̀, fə tom əwa əsɨ ne. Məd wɨə ghɨ̀ ɨnû nɨ kuʼnɨ. Məd wɨə wumnɨ ə Ŋwiə̀. Mɨ̀Jû mɨ̀jìm mbɨə ghà ɨnû chɔ̀m ɨmbə̀ʼ əməd. Aŋgɨrə̀ Zeŋɨ kəʼ ghà ɨ bɔ ni wɨ̀ tom bə̂d əsɨ ne ni à wo əkwɨ məd, ɨmbə̀ʼ wɨ̀ zu ənû ze nɨ à berɨ nɨ gha ɨ bɔ.” 23Pità nyaʼa zu əne, tɔŋ mbaŋə̀ te ni mbɨ yeʼe ni mbɨ ni.

À nyaʼa əni ze nɨ beenɨ, Pità nyaʼa nɔ̀ʼ wò mbɨ mɨ̀mə̌d. Bə̂d mɔʼɔ mbe nɨ nyaʼa ben ə Kristo ə Jopà nyaʼa bə̀ wò mbɨ məd. 24Mbɨ nyaʼa wò nyɨ ə Kàisàriyà əni ze nɨ beenɨ. Kɔneliùs wɨə nyaʼə wòmə̀ mɨ̀mə̌d. Wɨ̀ nyaʼa tɔŋ i ɨnəbɨ bə̀ tɔŋ mbi mɨ̀sə̀ʼ mbɨ wò fetɨ ɨŋga nəb məd. 25Ənɨ Pità nyaʼa sɨə wo nyɨ ə nəb, Kɔneliùs nyaʼa wò bòm əməd, chìndɨ̀ ɨtu ɨnywɨ ɨfě ɨ bɔ, wumnɨ əməd. 26Àyɨə Pità nyaʼa nɔ̀ əməd ghà ni, “Təm rətiə, mɔ̌ yɨə wə̀d mɨ̀sɔŋɨchù ɨghabɨ àwɔ̀.” 27Ənɨ Pità nyaʼə kɨrɨ ghambɨə mbɨ Kɔneliùs, wɨ̀ nyaʼa wò nyɨ ə nəb pè zə bə̂d mɨ̀nɔnɔʼ nɨ nyaʼa fetɨ əŋgu. 28Wɨ̀ nyaʼa ghà əmbɨ mɨ̀mə̌d ni, “Mbə kàŋ kyerɨ ə ni chəi ta rɨkə chwi ni Jû jɨgnɨ kɨ̀ bè mò wə̀d əbeŋ ə cherə. Àyɨə Ŋwiə̀ fə chwi ɨ num ni tɨ mə tɔŋ əmɨ wə̀d mɔʼɔ ənɨ wə̀d nɨ rɨka zeŋ i, kɨ̀ ənɨ ə wə̀d nɨ chəi ənɨ tɨ̀ mbɨ jɨgnɨ mbɨ məd. 29Əne ənɨ à kə̀ʼ tom bə̂d əsɨ num, chəi mə ton nɨ yeʼe. Mə sɨ biirɨ ni, à kə̀ʼ chà bə̂d ni mbɨ tɔŋ əmɨ ni yè ə?”

30Kɔneliùs nyaʼa ghà ni, “À nyaʼa ɨghabɨ ə nyùmə̀ wɔ̂, ənɨ ɨni fə chè ɨkwè, mə̀ wɨə nyaʼə kɔ̀ŋgɨ̀ ə Ŋwiə̀ ɨŋga mɨ nəb ənɨ mɨ̀nyùmə̀ mɨ̀tad əziə. Mə̀ nɨ zə, mbaŋə̀ mɔʼɔ nɨ nyaʼa zɨ ngywɨ̌ nɨə teenɨə nyaʼa sàʼ təm ənɨ mɨ ɨfě. 31Wɨ̀ nyaʼa təm ghà ni, 'Kɔneliùs! Ŋwìə̀ fə zu e ə̀kɔ̀ŋgɨ̀. Wɨ̀ fə bə̀ zə ɨkab we nɨ àwɔ̀ ə nàʼ əmbɨ ə bə̂d ɨkwaŋ. 32Əne tom bə̂d ə Jopà ni mbɨ kəb ə Saimòn we nɨ mbɨə bə̀ tɔŋ ənɨ Pità. Məd wɨə chub ɨŋga nəb Saimòn we nɨə tekɨə gôb. Nəb məd zɨ əŋgo rɨ̀bàà.' 33Ənɨ mə̀ nyaʼa zu əne, mə nyaʼa tom bə̂d əsɨ ne əwu əwən ni mbɨ tɔŋ əwe. À fə kàŋ ghɨ̀ ənû ə chɔ̀m ɨchî nɨ à yeʼe. Tɨ̀nîn tɨ̀ wɨ əgha mbà mɨjìm ɨfě Ŋwiə̀ ɨ zu ɨnû mbe nɨ Ə̀nùŋɨ̀sɨg gha ɨ ne ni à gha ɨ na.”

Bə̂d nɨ kaʼi mɨ̀Jû nyaʼa zu ɨkə̂n chɔ̀m

34Pità nyaʼa kɔ ghamɨ ghà ni, “Tɨ̀nîn mə kàŋ kyerɨ ənɨ rəsìʼ ni chəi Ŋwìə̀ ə ghɨ̀ ɨghə. 35Məd wɨə nɨŋə bə̂d rɨŋga ɨbeŋ jìm, əne yɨ mbe nɨə wumnɨ əməd bə̀ ghɨ̀ ɨnû nɨ kùʼnɨ̀. 36Mbə kyerɨ ɨŋgam we nɨ wɨ̀ nyaʼa tom əmbɨ mɨ̀Izre. Ɨŋgam we wɨə ghà ɨkə̂n chɔ̀m ɨmbə̀ʼ əbɔrəbɔd ze nɨ tɨ̀ chè ənjìm ə Yeso Kristo berɨ mbɨ ə Ŋwiə̀. Yeso Kristo yɨ Ə̀nùŋɨ̀sɨg ɨgwɨ ə bə̂d mɨ̀jìm. 37Mbə kyerɨ ənû ə kyeŋ ze nɨ nyaʼa ghɨ̌ ɨŋga Izre jìm. Ənû ze ə nyaʼa kɔ ə Galiliî ənɨ Jɔ̌n nyaʼa gha ni bə̂d beŋ tə fîŋ, nɨŋ mɨnib. 38Mbə kyerɨ ɨchî nɨ Ŋwìə̀ nyaʼa naʼ Əzwî ə Zeŋɨ bə̀ nàʼ ɨka əmbɨ Yeso we rɨ ə Nazàret. Mbə kyerɨ ɨchî nɨ Yeso nyaʼa ghanə yèn ɨsɨ jìm, yènə̀ ghɨ̀ ɨ̀chɔ̀m ənɨ bə̂d bə̀ vɨ̀ə̀ bə̂d mɨjìm mbe nɨ Debɨ̀rə̀ nyaʼə tùmbɨ̀ə̀ mɨ̀mə̌d. Ɨ wɨə nyaʼə ghɨ̀ əne ɨmbə̀ʼ ɨghəm nɨ Ŋwìə̀ wɨə nyaʼa mbɨ məd. 39Tɨ̀ yɨ mɨ̀zərɨmbin ənɨ ɨnû jìm mbe nɨ wɨ̀ nyaʼa ghɨ̌ ɨŋga Izre fɔrɨ ɨŋga Jèrusalèm. Mbɨ nyaʼa kòmbɨ̀ əməd əzed ə baʼnɨ, zwiirɨ. 40Àyɨə ənɨ əni nyaʼa pe ɨtad, Ŋwìə̀ nyaʼa zwemnɨ əməd, ghɨ̀ wɨ̀ jwɨ̀ bə̂d zə əməd. 41Kaʼi bə̂d mɨjìm nyaʼa zə əməd. Wɨ̀ nyaʼa jwɨ̀ ɨ na, mba mbe nɨ Ŋwìə̀ nyaʼa chɔʼ ni tɨ̀ yeʼ mɨ̀zərɨmbin ənɨ ɨnû ɨməd. Tɨ̀ wɨə nyaʼə jɨgə bə̀ nɔə mbɨ məd ənɨ wɨ̀ nyaʼa zwemə. 42Wɨ̀ nyaʼa gha ɨ na ni tɨ̀ gha ɨŋgam Ŋwiə̀ əmbɨ ə bə̂d. Wɨ̀ nyaʼa bə̀ ghɨ̀ ni bə̂d kyerɨ ni məd yɨə wə̀d we nɨ Ŋwìə̀ chɔʼɔ nùŋ ni wɨ̀ saʼ bə̂d mbe nɨ yeʼ ɨkǎ mbɨ mbe nɨ fə kwɨ. 43Bə̂d ɨkə̂n Ŋwiə̀ mɨjìm mbɨə nyaʼə ghà ɨnû ɨmbə̀ʼ əməd ni Ŋwìə̀ bɨrɨ chè ənjìm məd, waʼ ɨnû rɨbɔ̀ŋ wə̀d jìm we nɨ nuŋ fîŋ ɨgwɨ məd.”

Əzwî ə Zeŋɨ ə nyaʼa nyɨ ɨgun ə bə̂d mbe nɨ kaʼi mɨ̀Jû

44Ənɨ Pità nyaʼə kɨrɨ ghàmə̀, Əzwî ə Zeŋɨ ə nyaʼa yeʼe ɨgwɨ ə bə̂d mɨjìm mbe nɨ nyaʼə zwetɨ ɨŋgam we. 45Ənû ze ə nyaʼa chè mɨ̀Jû mbe nɨ nyaʼa ben ə Kristo, əne yɨ mbe nɨ nyaʼa nɔʼ rɨ ə Jopà beenɨ əbɔʼ Pità. Mbɨ nyaʼa yiirɨ ɨmbə̀ʼ ɨghəm nɨ mbɨ nyaʼa zə ni Ŋwìə̀ fə bə̀ nàʼ i ɨneʼe we nɨ yeʼ Əzwî ə Zeŋɨ əmbɨ ə bə̂d mbe nɨ kaʼi mɨ̀Jû, 46ɨmbə̀ʼ ɨghəm nɨ mbɨ nyaʼa zu ənɨ mbɨ nyaʼə ghàm mɨŋgam ɨbeŋ cherə, bə̀ fɔrɨ ənɨ mbɨ nyaʼə yiirɨə ə Ŋwiə̀. Pità nyaʼa ghà ni, 47“Tɨ̀ wə̀d mɔʼɔ ton ni tɨ rɨ̀ naʼ a mɨnib əmbɨ ə bə̂d mbɔ̂ nɨ Əzwî ə Zeŋɨ ə fə nyɨ ɨgwɨ mɨ̀mə̌d ɨchî nɨ zɨə nyaʼa nyɨ ɨgwɨ na ə?” 48Ənɨ wɨ̀ nyaʼa ghɨ̀ əne, wɨ̀ nyaʼa ghà ni mbɨ naʼ mɨnib əmbɨ mɨ̀mə̌d ənɨ ɨkum Yeso Kristo. Ənɨ mbɨ nyaʼa nɨŋ mɨnib mbe, mbɨ nyaʼa ghà ɨ bɔ ni wɨ̀ chubɨ mbɨ nən ɨni mɔʼɔ bɔŋ nɔ̀ʼ.

Currently Selected:

Ɨ̀fàʼì 10: mgo

Highlight

Copy